Mar. 4

Akitadapet ŋina ke eketan

(Mat. 13:1-9; Luk. 8:4-8)

1Togeu nabo Yesu akitatam alodiye anam ŋina a Galileya. Potu ŋituŋa ŋulu alalak nooi neni keŋ, todoka nai iŋes nataker, kiboikin. Ayai ataker nanam, toya ŋituŋa lokipetot. 2Kitatam iŋes ŋakiro ŋuna alalak a ŋakitadapeta, tema anakitatam keŋ,

3“Kiirasi! Abu eketan tolot aere ŋikinyom lomanikor. 4Ani eekini iŋes, todoto ŋikinyom ŋice lorot, potu ŋikyeny kidepasi. 5Todoto ŋice loŋaro neni amam ŋalup ŋuna alalak, toruput atipei, anerae akudyoko ŋalup. 6Ani enomokini akoloŋ ikes, torinyiyosi tooko. 7Todoto ŋice kidiŋ ŋikukwa, toruput, nai ani epolounete ŋikukwa, toridakis ikes. 8Todoto ŋice nalup ŋuna ajokak, topolout toraa, ece ŋatomoniuni, ece ŋatomonikanikapei ka ece amiat.”

9Tolimok nai Yesu ikes tema, “Iŋes ŋini eya ŋaki ŋuna kiiraret, kiira.”

Apolou ŋina a ŋakitadapeta

(Mat. 13:10-17; Luk. 8:9-10)

10Ani iboi Yesu aneni keŋ bon, potu ŋikasyomak keŋ ŋulutomon ka ŋiarei ta ŋituŋa ŋulu aris keyenut iŋes, kiŋita apolou ŋina a ŋakitadapeta. 11Toboŋok Yesu ikes tema, “Ikiinakinitae iyes ayenun ŋuna imunono ŋuna ka Apukan ka Akuj. Nai ŋituŋa ŋuluce itatamio a ŋakitadapeta, 12ikotere

‘Ani kiŋolikis daŋ, nyeanyuwasi;

ani kepuput daŋ, nyiirasi.

Anerae kerae toanyuwarito ka kiirarito,

keboŋorito neni ka Akuj akisyonio.’ ”

Apolou ŋina ka akitadapet a ŋina ke eketan

(Mat. 13:18-23; Luk. 8:11-15)

13Kiŋit Yesu ikes tema, “Nyiirara iyes apolou ŋina ka akitadapet a ŋin a? Ikokinete nai iyes iirarete apolou ŋina a ŋakitadapeta a ŋunace a daadaŋ ai? 14Eekini eketan ŋakiro ŋuna ka Akuj. 15Ikote ŋicetuŋa ŋikinyom ŋulu apotu todoto lorot, ŋinapei iiraryata ikes ŋakiro ŋuna ka Akuj, bu Satan atipei, tolema ŋakiro ŋuna aris keekin neni kec. 16Ikote ŋicetuŋa ŋikinyom ŋulu adoete loŋaro neni akudyoko ŋalup. Ŋinapei iiraryata ikes ŋakiro ŋuna ka Akuj, kijaut atipei ka alakara. 17Nai emamukatar ikes ŋataagor alotooma kec ka nyeroparete; ani epote ŋican ka ŋatyokisyo aŋuna a ŋakiro a ŋun, toesikis ikes. 18Ikote ŋicetuŋa ŋikinyom ŋulu apotu todoto tooma lokukwa; ikes ŋulu iirarete ŋakiro ŋuna ka Akuj, 19nai amitakinit ŋuna ka akwap, ekibure ŋolo ke ebari, ka ekibure ŋolo a ŋiboro a daadaŋ, elomunete tooma toridakis ŋakiro ŋuna ka Akuj, nyera. 20Nai ŋulu adoete nalup ŋuna ajokak, ikes ŋituŋa ŋulu ani kiirasi ŋakiro tocamut, toraa; ice ŋatomoniuni, ice ŋatomonikanikapei ka ice amiat.”

Akitadapet ŋina ke etaa

(Luk. 8:16-18)

21Tolimok nabo Yesu ikes tema, “Eyai mono ituŋanan ŋini inokakini etaa, ido tobuburik atuba kidiama keŋ, kori kiwuak kwap ekitaada a? Nyepedori ŋun, nai ani kinokakin, iwuakinio neni ikeuna. 22Anerae emam idiobore ŋini imunonitae ŋini nyisileereunio, nabo emam ŋini iwuaitae ŋini nyitatakanunio. 23Iŋes ŋini eya ŋaki ŋuna kiiraret, kiira!”

24Tolimok nabo tema, “Tocoikisi ŋuna iiranarete iyes. Etyae daadaŋ ŋolo iinakiniata iyes ŋuluce, ikiinakinio iyes daŋ etya nenipei ka iyatakinio. 25Ituŋanan daadaŋ ŋini eyakar idiobore, iyatakinio tolalaar, nai ŋini emamukar, edemaryo tari ŋini eyakar iŋes.”

Akitadapet ŋina ke ekinyomit a ŋolo epoloe

26Tema nai Yesu, “Ikoni Apukan ka Akuj ituŋanan ŋini eekini ŋikinyom lomanikor. 27Ejotoe iŋes nakwaare, tokienyu iwalari; ŋirwa daadaŋ ŋulu ikonia iŋes nen, erupete ŋikinyom topoloete pa eyeni iŋes epoloe kec. 28Erupunete ŋikinyom analup, kisyaut ŋakwii, tosodi ekaku tosurosi, toraa. 29Ani ekokete, elemuni elope atipei ekileŋ tolemia; anerae adol ŋirwa ŋulu elemere.”

Akitadapet ŋina ka icokit a ŋini ikoni ŋini ke ebobore

(Mat. 13:31-32, 34; Luk. 13:18-19)

30Kiŋit Yesu ikes tema, “Nyo isikwaanere Apukan ka Akuj? Isikwaanio kan akitadapet ani? 31Ikoni iŋes icokit ŋini ikoni ŋini ke ebobore ŋini edit nooi akilo ŋicok daadaŋ anakwap, nai ani kedupakin nalup, 32epoloor ekeekitoe akilo ŋikito daadaŋ. Epetari ŋaten ŋuna apolok, toduko ŋikyeny.”

33Tolimonok Yesu ikes ŋakiro a ŋakitadapeta a ŋuna alalak, a ŋuna ekwaan ka ŋin, ikwaŋina apedoryata ikes akiirar. 34Nyitatama iŋes ŋituŋa emam akitadapet, nai ani erae iŋes bon ka ŋikeekasyomak, kirwor ŋakiro ileerete.

Kitidipok Yesu ekuwuam ŋolo apolon

(Mat. 8:23-27; Luk. 8:22-25)

35Akoloŋit ŋin, kedoiyo akoloŋ, tolimok Yesu ŋikeekasyomak tema, “Apena, odokasi ekekwaye anam.” 36Toesikis ŋikasyomak asepic a nen, tolomasi nataker neni ayai Yesu, yaasi ikes iŋes. Ayakasi ŋatakerin ŋace daŋ ŋuna arukitotor ikes. 37Tokut ekuwuam ŋolo apolon ananam, tokuut ŋakipi, togeut akilapanakin nataker, kiburiburi akilelebun.

Ekuwuam ŋolo apolon ananam

38Apaki ŋin, ajotoe Yesu alokaku ataker anakicoloŋiet. Kitekienyut ŋikasyomak iŋes temasi, “Eketataman, nyimisit iyoŋ ikitwaki iwon a?”

39Tokienyu iŋes, kiretak ekuwuam, tolimok anam tema, “Todipakin! Kinapakin!” Todipakin ekuwuam, kililiŋ akwap cek. 40Kiŋit nai Yesu ikes tema, “Nyo ikuryakyata iyes? Emam iyes anupit a?”

41Tobul ikes nooi, kiŋitanaros make ebasi, “Ŋae mono ekile lo, ŋolo epupete tari ekuwuam ka anam ŋakiro keŋ lo?”

Currently Selected:

Mar. 4: NIB2008

Highlight

Copy