Ekim. 22
22
Tonyarau Balak Balaam akicen Ŋisirael
1Towotokis Ŋisirael a nen, tolomiyasi nadipoe a Moab, ekekwaye Yorodan alowae a ŋolo a Yeriko. 2Apaki ŋin, kebu Balak lokoku a Sipor kiira ŋakiro daadaŋ ŋuna kepotu Ŋisirael kitiyata neni a Ŋiamori. 3Tobul ŋituŋa a Moab nooi aŋuna a Ŋisirael, anerae alalak ikes nooi, kiinaiya ekabule ŋituŋa a Moab nooi aŋuna a Ŋisirael. 4Tolimokis Ŋimoabi ŋikasikou a Midian temasi, “Epedorete ŋituŋa ŋulu alalak lu akirikar ibore daadaŋ ŋini eyai diyete yok, lopite ŋolo irikarya emoŋ ŋinya anadakar.” Apaki ŋin, Balak lokoku a Sipor iŋes arae erwosit a Moab. 5Abu iŋes kiyakiya ŋituŋa anyarare Balaam lokoku a Beor ŋolo ayai Pesor, etaun ŋolo ayai diyete aŋolol Eupurate anakwap a ŋituŋa keŋ, ebala, “Eya ŋituŋa ŋulu apotu alo Ijipit, apetakinito kona akwap na daadaŋ ka aloma ne diyete kaŋ. 6Bua tokona kicen ŋituŋa lu aŋuna kaŋ, anerae egogoŋ ikes akilo ayoŋ, acepaki apedori ayoŋ akiloun ikes, ido erita ikes anakwap kaŋ, anerae ayeni ayoŋ atemar ituŋanan daadaŋ ŋini iterereŋi iyoŋ, erereŋior ka ŋini iceni iyoŋ, eruwor ŋini icenen.”
7Torotokis nai ŋikasikou a Moab ka ŋikasikou a Midian etiŋito ŋisiliŋa ŋulu etacere emuron Balaam, todolo ikes neni a Balaam, ido tolimokis iŋes ŋakiro a Balak. 8Tolimok Balaam ŋikasikou ŋulu eyakuunit Balak tema, “Topero ne akuwar na, ani moi taparacu eketeyenikini ayoŋ iyes ŋakiro daadaŋ ŋuna akalimokini ayoŋ Ekapolon.” Kiriyata nai ŋikasikou ŋul ka Balaam. 9Abu Akuj totakanu neni a Balaam, kiŋit Akuj Balaam tema, “Ata ŋae ŋikilyok lu ŋulu irukitotor iyoŋ?” 10Toboŋok Balaam Akuj tema, “Iyakuunit Balak lokoku a Sipor ŋakiro nu neni kaŋ, 11‘Eya ŋituŋa ŋulu apotu alo Ijipit, apetakin kona akwap na daadaŋ, bua tokona kicen ŋituŋa lu aŋuna kaŋ, acepaki apedori ayoŋ akiloun ikes, ido erita ikes anakwap kaŋ.’” 12Tolimok Akuj Balaam tema, “Nyilot kaapei ka ikes, nyicen ŋituŋa ŋul, anerae iterereŋitoe ikes.” 13Ani ekyenyuni Balaam taparacu, tolimok ŋikasikou ŋulu eyakuunit Balak tema, “Toboŋosi nakwap kus, anerae awou Ekapolon ayoŋ alosit ka iyes.” 14Tonyout nai ŋikasikou ŋulu eyakit Balak toboŋosi neni a Balak, tolimokis iŋes temasi, “Awou Balaam abunore ka isua.”
15Kiyakiya Balak ŋikapolok a akwap keŋ ŋice ŋulu alalak nooi, ŋulu itopolooritae akilo ŋulu sek eyakiyarit iŋes ekiŋaren. 16Toloto ŋikapolok ŋul neni a Balaam tolimokis iŋes temasi, “Ebala Balak lokoku a Sipor ebe, ‘Kimyek, nyikiretak iyoŋ idiobore abunore neni kaŋ; 17anerae kire jik, eketopoloori ayoŋ iyoŋ nooi, ido ibore daadaŋ ŋini ilimuni iyoŋ etiyae ayoŋ, bua kareca kicen ŋituŋa lu aŋuna kaŋ.’” 18Nai tolimok Balaam ŋikapolok ŋulu eyakuunit Balak tema, “Tari kakainaki ayoŋ Balak akai keŋ ileleba esilipa ka egolid, nyetiyae ayoŋ ŋuna nyakalimokinit ayoŋ Ekapolon Akuj kaŋ, nyapedori ayoŋ akitiya ŋuna ekudyoko, kori ŋuna alalak. 19Topero ne akuwar na, lopite ŋolo aponiata ŋuluce toperyoto ne, ikotere ayenuni ayoŋ ŋace ŋuna epedori Ekapolon alimokin ayoŋ.” 20Akuwar ŋin totakanu Ekapolon neni a Balaam tolimok iŋes tema, “Ani keponito ŋikilyok ŋul anyaraar iyoŋ, tonyou toloto kaapei ka ikes, nai kitiya ŋuna akalimokini ayoŋ iyoŋ.” 21Aŋun, abu Balaam tonyou taparacu, toenik esigirya keŋ, toloto kaapei ka ŋikapolok ŋulu eyakuunit Balak.
Balaam, Esigirya ka Emalaika
22Toŋo Ekapolon nooi aŋuna acamunia Balaam alosit neni a Balak, bu emalaika ke Ekapolon towo alorot a ŋolo amyat iŋes, ikotere egolokin lorot keŋ. Apaki ŋin, adokit Balaam esigirya, arukito daŋ iŋes kaapei ka ŋiketiyak keŋ ŋiarei. 23Kiŋolik esigirya emalaika a Ekapolon ewoi alorot, etiŋit ekileŋ ŋolo aŋaara; aŋun abu esigirya tori alorot, kitor nariet, ido abu Balaam toram esigirya ecamit akinyakun lorot. 24Towo nabo emalaika alorot aneni adidiŋ, aneni ayai kidiŋ ŋimanikorin ŋulu a ŋikito ke epiini ka kidiŋ ŋarwatatain. 25Ani iŋolikini esigirya emalaika a Ekapolon, togaariyo arwatata, togirisiyo arwatata akeju a Balaam, tosodi toram nabo Balaam esigirya. 26Tolot nai emalaika a Ekapolon kiŋaren, towo aneni adidiŋ, aneni amam epite ŋoloriyet lowae ŋolo aloteten, kori ŋolo alokedyeny. 27Ani iŋolikini esigirya emalaika ŋolo a Ekapolon, touryanikin kwap eriŋa Balaam edokit, toŋo Balaam nooi, toram esigirya a ebela keŋ. 28Abu nai Ekapolon inak esigirya kirworik kiŋit Balaam tema, “Anukiro etiyat ayoŋ neni kon ŋuna ikiryamya iyoŋ ayoŋ tokona ŋarwa ŋauni?” 29Toboŋok Balaam esigirya tema, “Erae aŋuna itiyaa iyoŋ neni kaŋ esibit arae ayoŋ ebaŋ; kerae oyakar ayoŋ ekileŋ, kakaar ayoŋ iyoŋ apaki napei na!” 30Nai tolimok esigirya Balaam tema, “Meere mono ayoŋ esigirya kon ŋolo idokit iyoŋ ŋirwa ŋulu ka akiyar kon daadaŋ tari tokona a? Etiyaenene mono sek ayoŋ ŋakiro nu neni kon a?” Toboŋok Balaam tema, “Mam.”
31Kisiŋolik nai Ekapolon Balaam emalaika ŋolo awoi alorot, atiŋit emalaika ŋol ekileŋ keŋ ŋolo aŋaara, abu Balaam toryedik kijuuru todol ereet kwap. 32Kiŋit emalaika a Ekapolon Balaam tema, “Kaanukiro iramya iyoŋ esigirya kon ŋarwa ŋauni tokona? Abunit ayoŋ arae ŋolo akaremokino iyoŋ, anerae nyiyookino aneni kaŋ ŋakiro ŋuna ilosyo iyoŋ. 33Abu esigirya ekeŋolik ayoŋ ka abu tori aneni kaŋ ŋarwa ŋauni tokona. Ani kerae nyeriit iŋes aneni kaŋ, kire jik kakaarit tokona ayoŋ iyoŋ, emyek iŋes toyar.” 34Tosodi Balaam toboŋok emalaika ŋolo ke Ekapolon tema, “Asec ayoŋ, anerae pa ayeni ayoŋ atemar iwoi iyoŋ alorot iŋerit ŋuna alosyo ayoŋ. Aŋun tokona, ani pa kikitalakarito iyoŋ ŋakiro a alosit kaŋ, aboŋori ayoŋ lore.” 35Tolimok emalaika ŋolo ke Ekapolon Balaam tema, “Toloto kaapei ka ŋikilyok ŋul, nai kirwor ŋakiro ŋuna akalimokini ayoŋ iyoŋ akirwor make.” Aŋun, apotu Balaam toloto kaapei ka ŋikapolok ŋulu eyakuunit Balak.
36Ani eyenuni Balak atemar kebu Balaam, abu tolot akisiryam iŋes alo Ir-Moab, alokukoruu a ŋolo egerit ayonae Arinon, anakisalet a ekukoru akwap keŋ. 37Kiŋit Balak Balaam tema, “Pa mono eyakuunit ayoŋ ŋituŋa anyarare iyoŋ a? Kaanukiro pa ibunio iyoŋ neni kaŋ? Nyapedori ayoŋ ainakin iyoŋ akitopoloorit a?” 38Toboŋok Balaam Balak tema, “Abu ayoŋ neni kon tokona, nai ayakar mono ayoŋ apedori adio ŋina a ŋakiro a ŋadi a? Akirot ŋina akalimokini ayoŋ Ekapolon, iŋes emaikina ayoŋ olimu.” 39Tosodi toloto Balaam ka Balak todolo Kirias-Usos. 40Abu Balak toar ŋimoŋin ka ŋamesekin erae amuronot, ido inak ŋice neni a Balaam ka neni a ŋikapolok a ŋulu arukitotor Balaam.
Ŋakiro a Balaam ŋuna esyaunak
41Akoloŋit ŋina atupakini ŋin, ya Balak Balaam kitipeiyorya Bamos-Baal, apedorit iŋes a nen akiŋolikin Ŋisirael ŋice.
Currently Selected:
Ekim. 22: NIB2008
Highlight
Copy
Compare
Share
Want to have your highlights saved across all your devices? Sign up or sign in
Ngakarimojong Interconfessional Bible © Bible Society of Uganda, 2008.