Ekim. 23
23
1Tolimok nai Balaam Balak tema, “Todukok ne aŋuna kaŋ ŋamuroeta ŋakanikaarei, ido tolemu aŋuna kaŋ ŋimoŋin ŋikanikaarei ka ŋimeesekin ŋikanikaarei.” 2Kitiya Balak lopite ŋolo alimokinitor Balaam iŋes ka apotu Balak ka Balaam inakis erae ainakinet, emoŋ epei ka emesek epei alokidiama ŋinamuroet. 3Tosodi Balaam tolimok Balak tema, “Kiboiye a ne alodiyete ŋainakineta kon ŋuna epeyo, alosi mono ayoŋ nawae; acepaki ebuni Ekapolon akirwor ka ayoŋ, ŋuna daadaŋ eketoodikini iŋes ayoŋ abuni ayoŋ alimokin iyoŋ.”
4Abu nai Akuj totakanu neni a Balaam, ido tolimok Balaam Akuj tema, “Etemok ayoŋ ŋamuroeta ŋakanikaarei, ido ainak neni kon emoŋ ka emesek alokidiama ŋinamuroet.” 5Tolimok Ekapolon Balaam tema, “Toboŋo neni a Balak, ŋakiro nu ikes emaikina iyoŋ tolimok iŋes.” 6Aŋun, abu Balaam toboŋo neni a Balak a ŋolo awoi alodiyete ŋainakineta keŋ ŋuna epeyo, awuasi iŋes a nen kaapei ka ŋikapolok ŋulu ka akwap a Moab daadaŋ. 7Tosodi kirwor Balaam ŋakiro ŋuna kebu Akuj tolimok iŋes tema,
“Akayau ayoŋ Balak alo Aram,
akayau ayoŋ erwosit a Moab alomoru a ŋulu alo Kide ebala,
‘Bua, kicen ŋituŋa a Yakob aŋuna kaŋ,
bua, kisitak Ŋisirael.’
8Ekokini ayoŋ eceni ŋini nyecamit Akuj akicen ai?
Ekokini ayoŋ esitakini ŋini nyecamit Akuj akisitakin ai?
9Ete ayoŋ ikes alokidiama ŋatabab ŋuna aoyak,
ete ayoŋ ikes alokidiama ŋikamukumukui.
Erae ŋituŋa ŋul ŋulu iboiyete ka akec
etyakara ikes alotuŋa a ŋakwapin aŋunace!
10Ŋae epedori akimar ŋiletok a Isirael ŋulu alalak ŋul?
Ŋae epedori akimar ŋiletok a Yakob ŋulu alalak ŋul?
kimyekinae ayoŋ otwan arae ituŋanan ŋini eyookino
kimyekinae ayoŋ otwan lopite ŋolo atwania iŋes!”
11Kiŋit nai Balak Balaam tema, “Anukiro itiya ayoŋ neni kaŋ? Akayaunit ayoŋ iyoŋ akicen ŋimoe kaŋ, nai tokona nyitiya iyoŋ ŋadi, mati akiterereŋ ikes.” 12Toboŋok Balaam tema, “Nyemaikina mono ayoŋ ocoite alimun ŋakiro ŋuna akalimokini Ekapolon ayoŋ a?”
ŋakiro a Balaam ŋuna a ŋaarei
13Tema nai Balak neni a Balaam, “Bua oloto ka ayoŋ nakibois ace, neni ipedorya iyoŋ akiŋolikin ikes, iŋolikini ikes ŋice, nai nyiŋolikini iyoŋ ikes daadaŋ; ido kicen ikes aŋuna kaŋ anakibois a ŋin.” 14Aŋun abu Balak ya Balaam nakibois ŋina anyaritae Sopim alokidiama emoru Pisiga. Todukok Balak ŋamuroeta ŋakanikaarei nen, tosodi inak erae amuronot emoŋ epei ka emesek epei alokidiama ŋinamuroet. 15Tolimok Balaam Balak tema, “Towo a ne alodiyete ŋainakineta kon ŋuna epeyo, alosi mono ayoŋ ama akiryamun ke Ekapolon.” 16Kiryamun Balaam a Ekapolon, ido tolimok Ekapolon Balaam tema, “Toboŋo neni a Balak, ŋakiro nu ikes emaikina iyoŋ tolimok iŋes.” 17Ani eboŋori Balaam neni a Balak, awoi Balak apaki ŋin alodiyete ŋainakineta keŋ ŋuna epeyo awuasi iŋes a nen kaapei ka ŋikapolok ŋulu ka akwap a Moab. Kiŋit Balak Balaam tema, “Anukiro alimu Ekapolon?” 18Kirwor Balaam ŋakiro keŋ nu tema,
“Bua Balak, ido kiira,
topupokinae ayoŋ, okoe lokoku a Sipor.
19Nyirworo Akuj alyokonu ikwa ituŋanan,
ka nyiloconokini Akuj ikwa ituŋanan ŋatameta keŋ.
Ŋuna daadaŋ iikini iŋes isiyookini,
ŋuna daadaŋ elimuni iŋes, itiyakini
20Kiira, akalimokinitae ayoŋ akiterereŋ,
adau iŋes akiterereŋ, ido nyalemari ayoŋ arereŋu ŋin.
21Mam aronis eŋolik Akuj itiyaete ŋituŋa a Yakob,
mam akisyanu eŋolik Akuj itiyaete ŋituŋa a Isirael.
Erukito ikes ka Ekapolon Akuj kec,
elimorito ikes atemar arae Akuj erwosit kec.
22Akuj ŋina abu yau ikes anakwap a Ijipit,
iŋes eji aŋuna kec lopite ŋolo ejio emoŋ ŋolo aryenyaanan.
23Kire, mam ŋakikukujaeta ŋuna itoroniayarito ŋuna Yakob,
mam ŋadwareta ŋuna aronok ŋuna itoroniarito Isirael.
Tokona elimunio aŋuna a Yakob ka Isirael ebe,
‘Kiŋolikisi ŋuna etiya Akuj!’
24Kiŋolik ŋituŋa ŋulu anyout esibit aŋatuny
anyout esibito eŋatuny ŋolo adedeŋan,
ŋolo nyeperi akitodol ŋina enyamia etyaŋ ŋolo ikamunit ka ŋina emasya ŋaokot a ŋityaŋ a ŋulu adau iŋes akiar.”
25Abu nai Balak tema neni a Balaam, “Nyicen ikes jik ka nyiterereŋ ikes jik.” 26Nai tolimok Balaam Balak tema, “Nyelimokina mono ayoŋ iyoŋ ebe, ‘Ŋuna daadaŋ akalimokini ayoŋ Ekapolon ikes emaikina ayoŋ etiya a?’ ”
27Aŋun, tolimok Balak Balaam tema, “Bua tokona, akayai ayoŋ iyoŋ nakibois ace, acepaki italakari Akuj akicen ikes aŋuna kaŋ anakibois a ŋin.” 28Abu nai Balak ya Balaam kidiama emoru Peor, ŋolo erounit aloŋisat. 29Tolimok Balaam Balak tema, “Todukok aŋuna kaŋ ne ŋamuroeta ŋakanikaarei ka kitemok ŋimoŋin ŋikanikaarei ka ŋimeesekin ŋikanikaarei aŋuna kaŋ.” 30Abu nai Balak kitiya lopite ŋolo alimokinitor Balaam iŋes, tosodi inak erae amuronot emoŋ epei ka emesek epei alokidiama ŋinamuroet.
Currently Selected:
Ekim. 23: NIB2008
Highlight
Copy
Compare
Share
Want to have your highlights saved across all your devices? Sign up or sign in
Ngakarimojong Interconfessional Bible © Bible Society of Uganda, 2008.