Ekim. 25
25
Akilip neni a Baal alo Peor
1Ani eriŋa Ŋisirael elomito Sitim, kisyakis ŋikilyok a Ŋisirael akiryamanakin ka ŋaberu ŋuna arae Ŋamoabi. 2Apotu ŋaberu ŋun torikokis Ŋisirael akitiya ŋamuronisya neni a ŋakujo a Ŋimoabi, kisyakis Ŋisirael akimuj ka akilip neni a ŋakujo a Ŋimoabi. 3Aŋun, apotu kisyakis akilip neni a Baal alo Peor. Apotu ŋakiro ŋun kitoŋoa Ekapolon, toŋoik Ŋisirael. 4Tolimok Ekapolon Moses tema, “Tocunak ŋikarikok a ŋituŋa daadaŋ, toar ikes daadaŋ naparan alokiŋaren Ekapolon, ikotere ejoŋoe Ekapolon aŋoikinit Ŋisirael.” 5Kirwor Moses neni a ŋikatubok a Ŋisirael tema, “Emaikina iyes toara ŋinituŋanan kus ŋini ilipi neni a Baal alo Peor.”
6Apaki ŋinapei ŋin, yau Esiraelit epei aberu ŋina Midianait lotuŋa keŋ, iteete Moses ka Ŋisirael ŋuluce daadaŋ, apaki ŋin egworosi Ŋisirael alopuke ke eema a ŋolokilipet. 7Ani iŋolikini Pineas lokoku ka Eleasar a ŋolo arae lokoku ka Aron a esacaradoti ŋakiro ŋun, tonyou toesik atukot a Ŋisirael. Tolemu akwara, 8kiwuapak Esiraelit ŋolo ayauni aberu ŋina Midianait, kicum ikes daadaŋ ŋiarei nakookyes. Aŋun, abu edeke tojoŋo akiar Ŋisirael. 9Nai ŋulu apotu totwaka aŋuna ke edeke arae ŋalipyo ŋatomoniarei ka ŋaomwon.
10Kirwor Ekapolon neni a Moses tema, 11“Alema Pineas lokoku ka Eleasar a ŋolo erae lokoku ka Aron a esacaradoti aŋoit kaŋ neni a Ŋisirael, aŋuna ainakina keŋ neni kaŋ alokiŋaren Ŋisirael, aŋun abu ayoŋ analilit kaŋ nyamunya Ŋisirael. 12Aŋun, tolimok Pineas ebe, ‘Ikicamun ayoŋ ka iŋes anacamunet kaŋ a ŋina ke ekisil. 13Eruwor aneni keŋ ka aneni a ŋiletok keŋ acamunet ŋin ŋina ka asacaradotonu ŋinaruba, anerae ainakina iŋes aŋuna ka Akuj keŋ, ido amooku iŋes Ŋisirael anasecit.’ ”
14Ekiro a ekile a ŋolo abu Pineas toar, a ŋolo aaryo kaapei ka aberu ŋina Midianait arae Simiri lokoku a Salu, ekarikon a ateker a ŋina arae ŋina a Ŋisimeoni. 15Arae ekiro ka aberu a ŋina Midianait a ŋina aaryo Kosibi nakoku a Sur a ŋolo arae ekarikon a ateker alo Midian.
16Tolimok Ekapolon Moses tema, 17“Kiman Ŋimidian, tomunya ikes, 18anerae apotu ikes ikimana iyoŋ ikimodiyasi anakiro a ŋuna alo Peor ka a Kosibi anakaato kec, arae Kosibi nakoku a ekarikon a ateker a Midian, a aberu a ŋina aponi toarae akoloŋit ŋina abunio edeke lotuŋa aŋuna a ŋakiro alo Peor.”
Currently Selected:
Ekim. 25: NIB2008
Highlight
Copy
Compare
Share
Want to have your highlights saved across all your devices? Sign up or sign in
Ngakarimojong Interconfessional Bible © Bible Society of Uganda, 2008.