Ekim. 30
30
Ŋakikoŋieta ŋuna a ŋaberu
1Kirwor Moses neni a ŋikarikok a ŋikabilae a Ŋisirael tema, “Ŋakiro ŋuna ikicik iwon Ekapolon ikes nu, 2‘Ani kikoŋ ekile ainakin idiobore neni ke Ekapolon, kori kikoŋ anakiikinet keŋ ainakin ibore idio, nyemaikina iŋes kimyek ŋuna alimu, emaikina iŋes kitiya ŋuna ekoŋ iŋes analimunet keŋ.’”
3Ani kikoŋ aberu ainakin idiobore neni ke Ekapolon, kori kikoŋ anakiikinet keŋ ainakin idiobore eriŋa iŋes erae apese eyai lore a papa keŋ, 4ido kiira papa keŋ ŋuna ekoŋ iŋes, kori akiikinet keŋ ŋina ekoŋ iŋes akisiyookin, nyelimu ŋakiro ŋadi, emaikina apese ŋin kitiya daadaŋ ŋuna adau iŋes akikoŋ kori akiikin. 5Nai ani pa kecamu papa keŋ ŋakiro ŋuna ekoŋ apese ŋin, apaki ŋina iirarya ŋuna ekoŋ ka eik nakoku keŋ, epedori apese ŋin akimyekin akitiya ŋuna abu iŋes kikoŋ, kori kiik, ido isyoni Ekapolon iŋes, anerae abu papa keŋ nyecamu ŋakiro ŋuna ekoŋit ka eikinit nakoku keŋ.
6Ani kepudo apese ŋin toriŋa nyimyekina ŋuna abu iŋes kikoŋ, kori kikirikirak akiikin, 7ido kiira lokile keŋ ŋuna sek ikoŋit, kori iikinit apese ŋin ka nyelimu ŋakiro ŋadi apaki ŋina iirarya ŋuna ikoŋit, kori iikinit apese ŋin, emaikina apese ŋin kitiya daadaŋ ŋuna adau iŋes akikoŋ, kori akiikin. 8Nai ani kewou lokile keŋ iŋes akisiyookin akikoŋiet, kori akiikinet keŋ apaki ŋina iirarya, epedori aberu ŋin akimyekin kitiyae ŋuna adau iŋes akikoŋ, kori akiikin, ido isyoni Ekapolon iŋes. 9(Nai aberu daadaŋ ŋina elakitae, kori ŋina erae apuserut emaikina kisiyook ŋuna adau iŋes akikoŋ, kori akiikin.) 10Ani kikoŋ aberu ŋina eriŋa erukito ka ekile keŋ akitiya idiobore, kori kiik anakikoŋet keŋ ainakin idiobore, 11ido kiira lokile keŋ ka nyelimu ŋakiro ŋadi apaki ŋina iirarya ŋuna ikoŋit, kori iikinit aberu keŋ, emaikina aberu ŋin kitiya daadaŋ ŋuna adau iŋes akikoŋ, kori akiikin. 12Nai ani kewou lokile keŋ iŋes akisiyookin akikoŋiet, kori akiikinet keŋ, epedori aberu ŋin akimyekin akitiya ŋuna adau iŋes akikoŋ, kori akiikin, ido isyoni Ekapolon iŋes, anerae awou lokile keŋ iŋes akisiyookin ŋuna ekoŋit, kori eikinit iŋes akitiya. 13Eyakar ekile a aberu a ŋin apedor ŋina kimyekinet aberu keŋ kisiyook; kori nyisiyook ŋuna ikoŋit, kori ŋuna iikinit aberu keŋ akitiya. 14Nai ani kililiŋia lokile a aberu a ŋin ŋakiro ŋun a ŋinakoloŋit, iŋes atemar ecamunit iŋes ŋakiro daadaŋ ŋuna abu aberu ŋin kikoŋ, kori kiik, anerae mam ŋakiro alimu iŋes kedau akiirar ŋuna ikoŋit, kori iikinit aberu keŋ akitiya. 15Nai ani kelunyar apaki, ido tolimok ekile ŋol aberu keŋ akimyekin akisiyookin ŋuna ikoŋit, kori iikinit akitiya, eruwor ekaile ŋolo ka asecit a aberu a ŋin nakou a ekile a ŋol.
16Erae ŋun ŋakiro ŋuna etubunitoe ŋuna abu Ekapolon tolimok Moses aŋuna aberu ka lokile keŋ ka aŋuna a papa ka nakoku keŋ eriŋa erae apese kiboiye alore a papa keŋ.
Currently Selected:
Ekim. 30: NIB2008
Highlight
Copy
Compare
Share
Want to have your highlights saved across all your devices? Sign up or sign in
Ngakarimojong Interconfessional Bible © Bible Society of Uganda, 2008.