Ekim. 36
36
Akorakinet a ŋidwe a Selopead a ŋulupesur
1Apotu ŋikapolokinitok a ŋituŋa a ŋatekerin a ŋiletok a Gilead a ŋolo arae lokoku a Makir, a ŋolo arae lokoku a Manase, a ŋolo arae lokoku a Yosepu potu kiŋaren kirworo neni a Moses ka Ŋikarikok, ŋikapolokinitok a ŋatekerin a Ŋisirael, 2temasi, “Ecikit Ekapolon ekapolon kaŋ atemar tokorakinae akwap neni a Ŋisirael anakilamilam, ido ecikit Ekapolon ekapolon kaŋ ainakin akwap ŋina aponi tokorakinae lokaato kosi Selopead neni a ŋidwe keŋ a ŋulupesur toruwor ŋina kec. 3Nai kiitarae ikes lokabila ece ŋolo a Ŋisirael, einakinio ŋalup kec anakwap a atapapaa kosi neni a ekabila a ekile a ŋolo iisi ikes. Aŋun, nyeriŋa ŋalup ŋun erae, ŋuna imarakinitae nalup ŋuna a akwap a ekabila kosi. 4Ani edoli ekaru ŋolo a ŋatomonikan, ekaru ŋolo a ŋasuban a Ŋisirael, imarakinio ŋalup kec erae ŋuna a ekabila a ŋolo aponi kiitarae ikes, tosodi tojoŋoi akimarakinit nalup a ekabila kosi.”
5Abu nai Moses kicik Ŋisirael lopite ŋolo alimokinitor Ekapolon tema, “Iyookinito ŋiletok a ekabila a Yosepu anakiro a ŋuna elimunito. 6Ŋuna ecik Ekapolon aŋuna a ŋidwe a Selopead a ŋulupesur ikes nu, ‘Kimyekisi ikes kiitarae neni a ŋikilyok a ŋulu ecamito ikes, nai emaikina ŋikilyok ŋulu iisete ikes erae ŋulu a ateker a ekabila a papa kec, 7ikotere nyeruwor akwap a ekabila a Ŋisirael a epei ŋina a ŋoloce, anerae itemokino Ŋisirael toyakatar akwap ŋina adau aruwor ŋina kec alokabilae atapapaa kec. 8Apese daadaŋ ŋina eyakar akwap ŋina erae ŋina keŋ alokabila a edio a Ŋisirael, emaikina kiit ekile ŋolo anateker a ekabila a papa keŋ, ikotere ŋolokabila eyakar akwap ŋina akorakinitae atapapaa kec. 9Mam akwap einakinio alokabila a epei lokabila ŋoloce, anerae itemokino Ŋisirael daadaŋ toyakatar akwap ŋina aponi tokorakinae ikes.’ ”
10Apotu nai ŋidwe a Selopead ŋulupesur kitiya lopite ŋolo ecikitor Ekapolon Moses. 11Aponi Mala, Tirisa, Ogila, Milika ka Noa, ŋidwe a Selopead ŋulupesur kiitarae neni a ŋikilyok a ŋulu arae ŋidwe a ŋakaitotoi a papa kec. 12Aponi kiitarae ikes natekerin a ŋiletok a Manase alokoku a Yosepu, ido abu akwap kec kidoŋ lokabila a ateker a papa kec.
13Erae ŋun, ŋakiciketa ka ŋikisila ŋulu abu Ekapolon kicik Ŋisirael aneni a Moses anadipoe a ŋuna a Moab alodiyete Yorodan aneni iteosi ka Yeriko.
Currently Selected:
Ekim. 36: NIB2008
Highlight
Copy
Compare
Share
Want to have your highlights saved across all your devices? Sign up or sign in
Ngakarimojong Interconfessional Bible © Bible Society of Uganda, 2008.