Ekim. 8
8
Ŋitaae ŋulukanikaarei
(Awos. 25:31-40)
1Kirwor Ekapolon neni a Moses tema, 2“Kirwor neni ka Aron tolimok iŋes ebe: ‘Ani inokakini iyoŋ ŋitaae, emaikina akica a ŋitaae a ŋulukanikaarei kinwak kiŋaren awoet a ŋitaae.’ ” 3Abu nai Aron kinokak ŋitaae, kimyek kinwak akica kec kiŋaren awoet a ŋitaae, lopite ŋolo ecikitor Ekapolon Moses. 4Erae lo epite ŋolo etiyaunitere awoet a ŋitaae. Etiyaunitae iŋes ke egolid a ŋolo etyekitae ejok; ameun alokwap tari natur keŋ, etyekitae lopite ŋolo etoodikinitor Ekapolon Moses. Epite ŋolo etiyaunitere awoet a ŋitaae iŋes ŋol.
Totyakarae ŋilepi ka inakinae etic kec
5Kirwor Ekapolon neni a Moses tema, 6“Totyaka ŋilepi aneni a Ŋisirael a ŋuluce, ido kitaleu ikes. 7Kitiya nu neni kec kitaleunio ikes: Towuatak ikes ŋakipi ŋuna kitaleunet, tolimok ikes tobanya a ewembe ŋawat kec daadaŋ ka kilotasi ŋilowi kec, kitaleunos. 8Ekaku emaikina ikes tolemut etaok kaapei ka ainakinet ŋina a ŋikinyom ŋina erae ŋakirya ŋuna ajokak nooi ŋuna iguritoe ka akimyet, ido tolemu nabo iyoŋ etaok ece erae ainakinet aŋuna ka asecit. 9Emaikina iyoŋ yau ŋilepi kiŋaren eema ŋolokilipet, ido tocunak Ŋisirael daadaŋ. 10Apaki ŋina iyaunia iyoŋ ŋilepi kiŋaren Ekapolon, emaikina Ŋisirael kidokokis ŋakan kec neni a ŋilepi, 11einakini nai Aron ŋilepi neni ke Ekapolon erae ainakinet aneni a Ŋisirael ŋina apolon nooi, ikotere itiyaete ikes etic aŋuna ke Ekapolon. 12Idokokinete nai ŋilepi ŋakan kec nakyes a ŋimoŋin, ido inak Aron ŋimoŋin ŋul neni ke Ekapolon, epei erae ainakinet aŋuna ka asecit, epei erae ainakinet ŋina epeyo aŋuna ka amookunia ŋilepi. 13Kedaun ŋun imyekini iyoŋ ŋilepi towua alokiŋaren Aron ka ŋidwe keŋ ŋulusapa, aŋun iinakini iyoŋ ikes neni ke Ekapolon erae ainakinet ŋina apolon nooi.
14“Aŋun ityakari iyoŋ ŋilepi aneni a Ŋisirael a ŋuluce, ido eruworosi ŋilepi ŋulu kaŋ. 15Ekaku, epedorete ŋilepi alosit akitiya ŋiticisyo alo eema a ŋolokilipet kidau iyoŋ akitaleun ikes ka ainakin ikes erae ainakinet ŋina apolon nooi, 16anerae akainakinitae ayoŋ bon ikes aneni a Ŋisirael. Adau ayoŋ acamun ikes toruworos ŋulu kaŋ, kilunyokin neni a ŋikiyae a ŋulusapa a ŋulu a Ŋisirael a daadaŋ, 17anerae erae ŋikiyae a Ŋisirael daadaŋ ŋulu kaŋ, kerae ŋikiyae a ŋituŋa, kori ŋikiyae a ŋibaren. Akoloŋit ŋina amunyarya ayoŋ ŋikiyae daadaŋ anakwap a Ijipit, abu ayoŋ otyaka ikes aŋuna kaŋ, 18Nai aseu ayoŋ ŋilepi kilunyokin lorot a ŋikiyae a Ŋisirael daadaŋ. 19Nabo daŋ adau ayoŋ ainakin ŋilepi erae ainakinet neni ka Aron ka ŋidwe keŋ ŋulusapa aneni a Ŋisirael akitiya ŋiticisyo aŋuna a Ŋisirael alo eema a ŋolokilipet ka amookuunun Ŋisirael, ikotere nyeyakaun edeke ŋolo emunyari Ŋisirael apaki ŋina eapiyaryata ikes nakibois ŋina asegan.”
20Apotu Moses ka Aron ta atukot a Ŋisirael kaapei ka ŋilepi kitiyata ŋuna alimokinitae ikes, apotu Ŋisirael kaapei ka ŋilepi kitiyata daadaŋ ŋuna ecikit Ekapolon Moses akitiya aŋuna kec. 21Apotu ŋilepi kitaleunos anasecit, kilotasi daŋ ŋilowi kec, ekaku a ŋun, abu Aron inak ikes neni ke Ekapolon erae ainakinet ŋina apolon nooi ka abu Aron tomooku ikes kitesegu. 22Kedaun ŋun, apotu ŋilepi toloto akitiya ŋiticisyo kec alotooma eema ŋolokilipet akiŋarakin Aron ka ŋidwe keŋ ŋulusapa. Apotu Ŋisirael kitiyata ŋun neni a ŋilepi lopite ŋolo ecikitor Ekapolon Moses!
23Kirwor Ekapolon neni a Moses tema, “Emaikina ŋilepi, togeut etic kec alotooma eema ŋolokilipet erae ŋikaru kec ŋatomoniarei ka ŋikan ka adepar, 24nai ani edolete ŋikaru kec ŋatomonikan emaikina ikes tojoŋoto akitiya etic alotooma eema ŋolokilipet. 25Epedorete ca akiŋarakinit ŋikaitotoi kec alo eema a ŋolokilipet apaki ŋina itiyaata ŋiticisyo kec, nai nyemaikina ikes bon kitiyata ediotic. 26Kitiya ŋun neni a ŋilepi ikoranakini ikes ŋiticisyo kec.”
Currently Selected:
Ekim. 8: NIB2008
Highlight
Share
Compare
Copy
Want to have your highlights saved across all your devices? Sign up or sign in
Ngakarimojong Interconfessional Bible © Bible Society of Uganda, 2008.