Ekim. 9
9
Paska alo Sinai
(Awos. 12:1-20)
1Elap ŋolo ke epei alokaru a ŋolo a ŋiarei ameun anakaloŋit a ŋina alomuniata Ŋisirael anakwap a Ijipit, kirwor Ekapolon neni a Moses analoŋisat a ŋina a Sinai tema, 2“Emaikina Ŋisirael kiricakis akinumunum ŋasuban ŋuna a Paska anakoloŋit a ŋina etubunitoe. 3Ŋirwa ke elap ŋitomon ka ŋiomwon elap lo eapuuni akoloŋ adoyor, emaikina Ŋisirael kitiyata ŋasuban ŋuna a Paska iwuapito ŋakiro ŋuna etubunitoe ka ŋikisila ŋulu itiyaere ŋasuban ŋun.” 4Aŋun, abu Moses tolimok Ŋisirael kinumunuma ŋasuban ŋuna a Paska. 5Ŋirwa ke elap ŋitomon ka ŋiomwon elap ŋolo ke epei, eapuuni akoloŋ adoyor, apotu Ŋisirael kinumunuma ŋasuban ŋuna a Paska analoŋisat a ŋina a Sinai. Apotu Ŋisirael kitiyata ŋakiro daadaŋ lopite ŋolo ecikitor Ekapolon Moses. 6Ayakasi nen ŋituŋa ŋulu etoroniyaritae, anerae kepotu ikes totapa akuwan a ituŋanan a ŋini atwanit, aŋun pa etemokino ikes akitiya ŋasuban ŋuna a Paska akoloŋit ŋin. Apotu nai ikes toloto neni a Moses ka Aron akoloŋit ŋin 7tolimokis ikes temasi, “Tari kikitoroniyaritae isua aŋuna aponere totapae akuwan a ituŋanan a ŋini atwanit, kaanukiro nyikicamakinere isua ainakin kaapei ka Ŋisirael daadaŋ ainakinet neni ke Ekapolon akoloŋit ŋina etubunitoe?” 8Tolimok Moses ikes tema, “Kidareutu, eiira mono ayoŋ aneni ke Ekapolon ŋakiro ŋuna elimuni iŋes aŋuna kus.”
9Kirwor Ekapolon neni a Moses tema, 10“Tolimok Ŋisirael ŋakiro nu, ‘Ituŋanan daadaŋ alokidiŋ kus, kori aloletok kus ŋini itoroniyaritae aŋuna atapya akuwan a ituŋanan a ŋini etwanit, tari kelosit iŋes iwace, epedori akinumunum ŋasuban a Paska neni ke Ekapolon. 11Ŋirwa ke elap ŋitomon ka ŋiomwon elap ŋolo a ŋiarei eapuuni akoloŋ adoyor, emaikina Ŋisirael kinumunuma ŋasuban a Paska. Enyamete ikes Paska a ŋamugati aŋuna emam ŋakinyalet ka ŋidyas ŋulu adwarak. 12Nyemaikina ikes kimyekis akiriŋ adio kidoŋ kiwalak, nyemaikina ikes totubo ŋakoyo a ibarasit a ŋini earyo aŋuna a ŋasuban a Paska. Emaikina Ŋisirael kiwuapa ŋakiro daadaŋ ŋuna etubunitoe aŋuna ka akinumunum Paska. 13Nai ituŋanan daadaŋ ŋini nyitoroniyaritae ka nyelosit iwace, ido nyitiya ŋasuban a Paska nyelosi iwace, ido nyinumunum ŋasuban a Paska, nyeriŋa imarakinio iŋes erae ipei a ŋituŋa kaŋ aŋuna pa ainakinia iŋes ainakinet neni ke Ekapolon akoloŋit ŋina etubunitoe. Eryamuni iŋes akisicanio aŋuna ka asecit keŋ. 14Ani keyai ituŋanan ŋinigelaanot ŋini iboiyoto iyes ŋini ecamit akinumunum ŋasuban a Paska neni ke Ekapolon epedori iŋes akinumunum ŋasuban ŋun alopite a ŋolo etubunitere akitiya ŋasuban ŋuna a Paska ka iwuapito ŋikisila a ŋasuban a ŋun, ŋakiro ŋuna etubunitoe ikes emaikina ŋituŋa daadaŋ kerae egelaanot, kori Esiraelit kiwuapa.’ ”
Adis ka arira a akim
(Awos. 13:21-22, 40:34-38)
15Akoloŋit ŋina erikakinere akiduk Eema ŋolo ayai Asaduku ŋina ka Acamunet, abu Ekapolon bu esibit adis torapuwa Eema ŋolo ayai Asaduku ŋina ka Acamunet, ameun eboŋ tari taparacu ayai iŋes kidiama Eema ŋolo ayai Asaduku ŋina ka Acamunet, esibit arira a akim. 16Ekoni nen jik a ŋinakoloŋit: Naparan arapuwarit Ekapolon eema ŋolo ayai Asaduku ŋina ka Acamunet esibit adis, nakwaare totakani esibit arira a akim. 17Apaki daadaŋ ŋina ikyaaror edou aneni eyai Eema ŋolo iryamununoi, awotonokinete Ŋisirael iwace, ani neni etiyaunor edou loeema, alomeneneete Ŋisirael nen. 18Analimunet ke Ekapolon awotonokinete Ŋisirael ka alomeneneete Ŋisirael nakibois ace. Apaki daadaŋ ŋina arubakinitor edou eyai kidiama Eema, pa awotonokinete ikes anakibois a ŋina alomito. 19Tari ŋina erubakinia edou ŋirwa ŋulu alalak erapuwarit Eema ericakinito Ŋisirael akiciket ke Ekapolon, pa awotonokinete a nen. 20Ŋapakio ŋace arubanakini edou erapuwarit Eema ŋirwa ŋidi ka aŋuna ka akiciket ke Ekapolon eboiyete ikes analomar a ŋin jik, ido ani elimokini Ekapolon ikes atemar towotokisi, towotokis nai ikes anakibois a ŋin. 21Ŋapakio ŋace arapuwanari edou Eema ameun eboŋ tari taparacu, ido ani ŋina ikyaaror edou taparacu towotokis Ŋisirael kiŋaren, kori ani kerubaki edou erapuwarit Eema apaaran ka akuwar, ani ikyaar edou towotokis Ŋisirael anakibois a ŋina sek alomito. 22Kerae ŋirwa ŋiarei, kori elap, kori apaki ŋina aoyan erapuwaritor edou Eema, eboiyete Ŋisirael jik anakibois a ŋina alomito, nai apaki ŋina ikyaaroredou towotokis ikes. 23Analimunet ke Ekapolon alomeneneete Ŋisirael nakibois ŋina itoodikinio ka analimunet ke Ekapolon awotonokinete ikes a nen. Ericakinito ikes jik ŋuna elimuni Ekapolon alotooma akiciket keŋ aneni a Moses.
Currently Selected:
Ekim. 9: NIB2008
Highlight
Share
Compare
Copy
Want to have your highlights saved across all your devices? Sign up or sign in
Ngakarimojong Interconfessional Bible © Bible Society of Uganda, 2008.