Kub 18
18
Ruhanga naabonekera Abburahamu ali Mamule
1MUKAMA akabonekera Abburahamu ali haihi n'emiti emisisa eya Mamule aikaliire haihi n'omulyango gw'eheema ye, omu ihangwe. 2#Baheb 13:2.Abburahamu yaimuka yarora abasaija basatu bamwemeriire omumaiso. Obu yababoine yaimuka haihi n'orwigi nambere akaba aikaliire yagenda kubatangirra, yainama kuhika hansi, 3yagamba ati: “Bakama bange nkooku muhikireho nyowe omwiru wanyu, obu muraaba nimungirra embabazi, mutandabaho kigenzi. 4Leka baleete otwizi munaabe ebigere, mubanze muhumuleho omu kiituuru ky'omuti gunu 5nyowe mbe ninkyatabarra akookulya, mulye mugarukwemu amaani, obu muraamara kulya, nukwo mwongere orugendo rwanyu.” Abasaija abo baagarukamu bati: “Kora nkooku ogambire.” 6Abburahamu yarahuka yataaha omu heema ye, yagambira Saara ati: “Tekaniza bwango ebihi bisatu eby'ensaano enungi, ocumbe emigaati.” 7Abburahamu yairuka yagya omu igana, yaihamu enyana enungi erukworoba yagiha omuheereza, omuheereza yagibaaga bwango. 8Yakwata omwisi, amata n'enyama ebikaba biteekaniziibwe yabibasembereza; obu bakaba nibalya yabaikarra haihi hansi y'omuti.
9Baamukaguza bati: “Saara mukazi wawe ali nkaha?” Abburahamu yagarukamu ati: “Ali omu heema!” 10#Bar 9:9.MUKAMA yagamba ati: “Otagurukyagurukya ndigaruka hanu ha itoigo, obu, mukazi wawe Saara aliba akuzaaliire omwana omwojo.” Omu kasumi ako, Saara akaba nahurra ayemeriire enyuma y'Abburahamu haihi n'omulyango gw'eheema. 11Omu busumi obu, Abburahamu akaba agurusire kandi na Saara akaba akaikwire, emyaka ekaba ebahinguraine; obu Saara akaba atakyali omu buhangwa bwa'abakazi obwabuli kwezi. 12#1Pet 3:6.Aho Saara yayeseka naagamba ati: “Hati obu mmazire kukaikura, na iba nyowe agurusire ndaaba ninkyayegonza?” 13MUKAMA yakaguza Abburahamu ati: “Kiki ekisekeseze Saara kandi ekimugambisize ngu ‘obu mazimakwo ndizaara omwana, kandi kunu nkuzire nti?’ 14#Luk 1:37.Haroho ekirema MUKAMA? Omu kasumi aka ngumize, ha itoigo, ndigaruka hanu, kandi obu, Saara aliba azaire omwana omwojo.” 15Baitu Saara yahakana naagamba ati: “Tinsekere.” Habwokuba akaba natiina MUKAMA, nikyo kyamugambisize kiti. MUKAMA yagamba ati: “Nangwa osekere.”
Okuhwerekerra okw'embuga ez'omukyeya
16Nubwo abasaija baimukize, baagenda. Baimukya amaiso baarora obukiizi bwa Sodomu; Abburahamu yagenda nabo kubooleka omuhanda. 17MUKAMA yagamba ati: “Ndaasereka Abburahamu eki mmaliriire kukora; 18kunu nuwe alifooka ihanga erikooto ery'obusobozi, kandi amahanga goona ag'ensi nuwe galiheererwamu omugisa? 19Nangwa habwokuba mmukomere aragirre abantu be n'eka ye okugenderaga omu muhanda gwa MUKAMA uwe noobu aliba afiire, baikalege nibakora ebirungi kandi nibahondera ebi ngonza; nukwo MUKAMA ahe Abburahamu eki yamuraganiize.” 20Aho MUKAMA yagamba ati: “Habwokuba abantu empamo ezi barukuterra Sodomu na Gomora nyingi kandi ekibi kyabo kihinguraine, 21kangende ndole obu baraaba bakozirekwo ebireteriize okurra oku mpuliire; obu baraaba batabikozire nabwo ndaamanya.”
22Aho abasaija baaruga omuka, baakwata ogw'obukiizi bwa Sodomu; baitu Abburahamu yaikara ayemeriire omumaiso ga MUKAMA. 23Aho Abburahamu yairra haihi yagamba ati: “Obu mazimakwo, abarungi n'ababi boona oraabahwerekereza? 24Boojo omu rubuga kakuba habamu abarungi amakumi ataano, nabwo orubuga oraaruhwerekereza? Tooruganyire habw'abarungi amakumi ataano abanyakururumu? 25Eki otakisura, eky'okwita abarungi n'ababi, nukwo abarungi baleke kusisanizibwa n'ababi! Eki otakikora! Omucwi w'emisango ow'Ensi yoona taagendere ha bwinganiza?” 26MUKAMA yagamba ati: “Sodomu obu ndagisangamu abarungi makumi ataano bali omu rubuga, ekiikaro kyona ndaakiganyira habw'abo.” 27Abburahamu yagarukamu ati: “Nyehaireyo kubaza na MUKAMA, nyowe ecuucu kandi iju. 28Kandi abarungi obu baraaba bali nk'ana na bataano? Orubuga oraaruhwerekereza habw'okuburaho bataano?” MUKAMA yagarukamu ati: “Tinduhwerekereze obu ndaasangamu ana na bataano.” 29Abburahamu yayongera akaguza MUKAMA ati: “Kandi kakuba hasangwamu ana?” MUKAMA yagarukamu ati: “Habwa makumi ana ago, orubuga tinduhwerekereze.” 30Abburahamu yagamba ati: “MUKAMA otambihirirwa; nyikiriza mbaze. Kandi kakuba habayo asatu?” MUKAMA yagamba ati: “Tinduhwerekereze obu ndasaangamu asatu.” 31Abburahamu yagamba ati: “Nyefumire kubaza na MUKAMA, kakuba hasangwayo abiri?” MUKAMA yagarukamu ati: “Habw'amakumi abiri, orubuga tinduhwerekereze.” 32Aho Abburahamu yagamba ati: “MUKAMA otabihirwa, kambaze omurundi gumu gwonka, kakuba hasangwayo abarungi ikumi bonka?” MUKAMA yagarukamu ati: “Ha bw'ikumi abo orubuga tinduhwerekereze.”
33MUKAMA obu yamazire kubaza n'Abburahamu, yagenda kandi n'Abburahamu yagaruka owaabo.
Currently Selected:
Kub 18: BRR2008
Highlight
Share
Copy
Want to have your highlights saved across all your devices? Sign up or sign in
Bible in Runyoro/Rutooro Interconfessional Translation © Bible Society of Uganda, 2008.
