Kub 19
19
Bamalaika babiri nibahika Sodomu
1Bamalaika babiri obu baahikire Sodomu omu kairirizi, Looti akaba aikaliire ha irembo ly'orubuga. Obu yababoine, yaimuka yagenda kubatangirra, yajuumara hansi, 2yagamba ati: “Bakama bange, nimbasaba muhunguke owange omwiru wanyu munaabe ebigere; muraaleho, nubwo muraimuka kara mwongere orugendo rwanyu.” Bamalaika baagamba bati: “Nangwa, turaaraara omu ikute.” 3Baitu uwe yabeesengereza muno, nukwo na bo kuhunguka owe, baataaha omunju ye; yabacumbira obugenyi, kandi yacumba omugaati ogutatumbisiibwe, baalya. 4Baitu obu bakaba batakabyamire, abantu ab'omu rubuga oru, nubo aba Sodomu, abato n'abakuru boona babbomooka, baagota enju; 5#Bac 19:22-24.baayeta Looti, baamukaguza bati: “Abasaija abaizirege hanu omu kairirizi bali nkaha? Baturukye obatuleetere, tubyame nabo.” 6Looti yaturuka yakinga orwigi, yagenda nambere bali, 7yagamba ati: “Bagenzi bange mbeesengeriize, mutakora ekintu kyona ekibi. 8Mumanyire nkooku nyina bahara bange babiri abatamanyire musaija, kambaturukye mbabaleetere, mubakole kyona eki murukwenda; kyonka abasaija banu mutabakoraho akantu koona, habwokuba bagenyi bange.” Bbo baagamba bati: “Rugaho kuli!” 9Baagaruka baagamba bati: “Omuntu onu akaija hanu ali munyaihanga hati naagonza kwefoora mucwi w'emisango! Hati nitwija kukukora kubi kukira nkooku turaakora kubi bbo.” Aho baacuma kuli omusaija ogu Looti n'amaani, kake bacwe orwigi. 10Baitu abasaija bali abakaba bali omunju baturukya emikono, baasika Looti baamutaahya omunju baakinga orwigi. 11#2 Bakam 6:18.Bamalaika baita amaiso g'abasaija n'abasigazi abakaba bali ha rwigi, ekyarugiremu baajwaha habw'okuhumahuma nibaserra orwigi.
Looti naateerererwa ebi asemeriire kukora
12Nubwo abasaija baakagwize Looti bati: “Omu kiikaro kinu oyinamu abantu abandi? Bako bawe, batabani bawe, bahara bawe rundi omuntu wawe wena anyakuli omu rubuga, baihe omu kiikaro kinu, 13habwokuba empamo z'abantu abarukukorwa kubi abantu baarwo ihinguraine; MUKAMA azihuliire kandi atutumire kuruhwerekereza.” 14Aho Looti yaimuka yagenda hali bako be abakaba bajumbiire bahara be, yabagambira ati: “Mwimuke, muruge omu kiikaro kinu; habwokuba MUKAMA ali haihi kuhwerekereza orubuga runu.” Baitu bako be baagira naasandaara.
15Emamba obu ekaba neesara, bamalaika baateereerra Looti nibagamba bati: “Imuka otwale mukazi wawe nabahara bawe ababiri abali hanu, mutaikara kuhwerekererra omu rubuga runu obu ruraaba nirufubirwa.” 16#2Pet 2:7.Baitu Looti yayezigaziga, nukwo abasaija kumukwata ha mukono, baakwata n'omukono gwa mukazi we, n'ey'abahara be ababiri, Ruhanga habwokubagirra embabazi, bamalaika baamwiha omunju, baamuturukya orubuga. 17Obu baamazire kubaturukya, baabagambira bati: “Mwiruke mujune obwomeezi bwanyu, mutarora enyuma rundi kugira ha mwayemerra omu kyeya kinu, mwiruke mwebinge ensozi, muleke kuhwerekerra.” 18Looti yagamba ati: 19“Haa bakama bange, omwiru wanyu ndozire nkooku mungondeze, mwangirra embabazi nyingi kukiza obwomeezi bwange, baitu tinsobora kwiruka nkahika ha nsozi ziri, akabi katakampikireho nkafa. 20Murole, orubuga orwa nseeri, ruli haihi kandi rutoito. Leka nuho nsingirwe; nukwo nkire.” 21Malaika yamugambira ati: “Kinu eki osabire nkikiriize, n'orubuga oru ogambireho tinduhwerekereze. 22Rahuka bwango nuho osingirwe, tinkole kantu koona otakahikireyo.” Nikyo orubuga oru rwarukiirwe ibara Zohara. 23Looti kuhika Zohara izooba likaba liturukire.
24 #
Mat 10:15; 11:23,24; Luk 10:12; 17:29; 2Pet 2:6; Yud 1:7. Nubwo MUKAMA yayema omwiguru yaseesira Sodomu na Gomora obuganga n'omurro; 25yahwerekereza embuga ezi, ekyeya kyona, abantu abaikaraga omu mbuga ezi, na buli kintu kyona ekikaba kimezire ha itaka. 26#Ama 10:7; Luk 17:32.Baitu muka Looti akaba amukuratiire, yarora enyuma yafooka nyomyo y'ekisura. 27Abburahamu akazinduka nyenkya kara, yagenda yahika ha kiikaro eki akaba atangatanganiireho MUKAMA, 28yanaga amaiso Sodomu na Gomora n'ensi yoona ey'ekyeya, yarora omwika omunsi egi nigucuuka nk'omwika gw'ekikoomi.
29Ebi nibyo byabaireho, Ruhanga obu yahwerekeriize embuga ez'omukyeya, yaijuka eki yaraganiize Abburahamu, yaiha Looti omu kabi ak'okuhwerekerra, obu yahwerekeriize embuga Looti ezi yaikaramuga.
30Aho Looti yaruga Zohara, yaikara omunsi ey'ensozi hamu nabahara be ababiri, habwokuba akatiina kwikara Zohara, nukwo kwikara omu bwingira. 31Muhara we omuzigaijo yagambira muto we ati: “Isiitwe akuzire, kandi omunsi enu busamu musaija ow'okutuswera nk'engeso y'ensi oku eri. 32Hati tuhe Isiitwe amaarwa anywe atamiire, tubyame na uwe, nukwo tulinde oruzaaro rwaitu niturwihirra hali isiitwe.” 33Habweki, kiro eki, nukwo kutamiza isebo, omuzigaijo yagenda yabyama na uwe; Looti atamanye muhara we ha yabyamiire rundi ha yaimukiire. 34Ha kiro ekyakurasireho, omwisiki omukuru yagambira muto we ati: “Ekiro mbyamirege na isiitwe, na kiro kinu, twongere tumutamiize, na iwe ogende obyame na uwe, tulinde oruzaaro rwaitu niturwihirra hali isiitwe.” 35Nahabweki, kiro eki nakyo baatamiiza isebo; omwisiki omuto yagenda yabyama na uwe, ise atamanye muhara we ha yabyamiire rundi ha yaimukiire. 36Bahara ba Looti nukwo batwaire enda, ezi baatwekerwe isebo. 37Omwisiki omuzigaijo yazaara omwana omwojo, yamuruka ibara Mowabbu, nuwe ise aba Mowabbu na hati hoona. 38Omwisiki omuto na uwe yazaara omwana omwojo, yamuruka ibara Benammi, nuwe ise Abamooni na hati hoona.
Currently Selected:
Kub 19: BRR2008
Highlight
Share
Copy
Want to have your highlights saved across all your devices? Sign up or sign in
Bible in Runyoro/Rutooro Interconfessional Translation © Bible Society of Uganda, 2008.
