Kub 20
20
Abburahamu na Abimereki
1Abburahamu obu yarugire oku, yakwata omuhanda ogurukugenda omunsi Negebu, yaikara hagati ya Kadesi na Suuru kandi yayombeka Gerali. 2#Kub 12:13; 26:7.Abburahamu akabiihabiiha abantu yabagambira ati: “Omukazi ogu Saara, munyanya-nyowe.” Aho Abimereki omukama wa Gerali, yatuma bamutwarre Saara. 3Baitu ekiro, Ruhanga yaizira Abimereki omu kirooto, yamugambira ati: “Wamanya? Wafa, omukazi ou otwaire waija kumugwaho, habwokuba mukamusaija.” 4Omu kasumi ako, Abimereki akaba atakateraine n'omukazi ogu, nikyo yagambiire ati: “MUKAMA oraita ihanga eritaine musango? 5Abburahamu wenka tinuwe yangambiire ngu omukazi ogu munyanya-nyowe? Kandi n'omukazi wenka tinukwo yangambiire? Kinu nkakikora nnanukiire kimu kandi ntaina kabi aka ndukwenda kukora omusaija ogu.” 6Aho Ruhanga yagambira Abimereki omu kirooto ati: “Mmanyiire kimu nkooku wakikozire onanukiire kimu kandi ninyowe nakutangire kunsobyaho, nikyo ntarakwikiririize kumuhikaho. 7Hati nu, omusaija mugarurre mukazi we, habwokuba murangi kandi naija kukusabira oyomeere. Baitu kakuba otamugarurra mukazi we, omanye nkooku orukwija kufakwo, n'ebyawe byona.”
8Abimereki, nukwo kwimuka nyenkya kara, yayeta abaheereza be boona, 9Aho Abimereki yayeta Abburahamu yamukaguza ati: “Eki okatukora ki? Nkakusobyaho ki eki wasigikiireho kundeetera ekibi ekirukwingana aho hamu n'abantu bange? Okankora ebintu ebitasemeriire kukorwa.” 10Abimereki yakaguza Abburahamu ati: “Okagenderra ki kukora ekintu nk'eki?” 11Abburahamu yagarukamu ati: “Ekyankoleze eki, nagiraga nti abantu ab'omu kiikaro kinu tibatiina Ruhanga naakake, kandi nti nibaija kunyita bantule mukazi wange. 12Okwongera hali eki omukazi ogu, munyanya-nyowe mali mali, tuzaarwa isiitwe omu, twahuranwa banyina itwe; kandi nuwe naswiire. 13Kandi Ruhanga obu yandagiire okuruga omuka ya ise nyowe, nkagambira omukazi ogu nti: ‘Kinu nikyo ekikorwa eky'embabazi eki osemeriire kunkorra, hoona hoona ha turakahikaga, ogambege oti: omusaija ogu munyanya-nyowe.’ ” 14Aho Abimereki yakwata entaama, ente, abairu n'abazaana yabiha Abburahamu, kandi yamugarurra mukazi we Saara. 15Abimereki yagamba ati: “Dora, ensi yange ngigyo noogirora, genda oikale nambere orukwenda.” 16Yagambira Saara ati: “Munyanyoko mmuhaire ebicweka by'Efeeza rukumi, oku nukwo kukwihaho ekihemu omumaiso g'abantu boona aboikara na bo; kandi okugumya omumaiso ga boona nkooku otaina kabi.”
17Aho Abburahamu yayesengereza Ruhanga, Ruhanga yajumurra Abimereki kandi yajumurra na mukazi we n'abazaana be, nukwo bazaara abaana. 18Habwokuba enju y'Abimereki yoona MUKAMA akaba agiimire oruzaaro ha bwa Saara muka Abburahamu.
Currently Selected:
Kub 20: BRR2008
Highlight
Share
Copy
Want to have your highlights saved across all your devices? Sign up or sign in
Bible in Runyoro/Rutooro Interconfessional Translation © Bible Society of Uganda, 2008.
