Kub 21
21
Okuzaarwa kwa Isaaka
1MUKAMA akabungira Saara nkooku yagambire, kandi yamukorra nkooku yamunihiize. 2#Baheb 11:11.Saara yatwara enda yazaarra Abburahamu omwana omwojo, kunu Abburahamu akaba agurusire, omu kasumi Ruhanga aka yabaliizeemu na uwe. 3Abburahamu, omwana ogu Saara ou yamuzaaliire, yamuruka ibara Isaaka. 4#Kub 17:12; Ebik 7:8.Isaaka obu yahikize ebiro munaana, Abburahamu ise yamusara ekisusu Ruhanga nkooku akaba amuragiire. 5Abburahamu akaba ahikize emyaka kikumi, Isaaka ha yazaaliirwe. 6Saara yagamba ati: “Ruhanga ampaire kusemererwa; weena araahurra ngu nzaire omwana, arasekaga nanyowe.” 7Kandi yagaruka yagamba ati: “Atali Ruhanga, ondi nooha ayaakugambiire Abburahamu ngu Saara alyonkya abaana? Baitu ndinzirwe namuzaarra omwana omwojo, kunu ali mugurusi.”
8Omwana yakura yacuuka. Ha kiro eki yaihirwe ha mabere, Abburahamu akacumba obugenyi. 9Baitu Saara obu yarozire omwana wa Hagara Omunyamisiri ou akaba azaaliire Abburahamu, naazaana n'omwana we Isaaka, 10#Bag 4:29,30.yagambira Abburahamu ati: “Binga omuzaana onu, aruge hanu n'omwana we, habwokuba omwana w'omuzaana ogu, taligwetwa hamu n'omwana wange Isaaka.” 11Eki kyabiihiza Abburahamu, okuragirwa kubinga omwana we. 12#Bar 9:7; Baheb 11:18.Baitu Ruhanga yagambira Abburahamu ati: “Eki kitakubiihiza, okubinga omwana wawe na mukazi wawe omuzaana, kyona kyona Saara eki araakuragira okikole nkooku akikuragiire, habwokuba Isaaka, nuwe alikuzarra abaijukuru aba nakuraganiize. 13Kandi omwana w'omuzaana, na uwe ndimwihamu ihanga, habwokuba okamuzaara.” 14Abburahamu akazinduka nyenkya kara, yatwara omugaati n'endyanga ey'amaizi, yagiha Hagara yagimutweka, yamugambira ati: “Genda n'omwana wawe.” Hagara yagenda yaikara naajeerajeera omwirungu lya Beeri-seba.
15Amaizi aga akaba ainago omu ndyanga obu gaahoire, yanaga omwana omu kimu ha bijumba eby'omwirungu. 16Uwe yamwesungusura haraho, yaikarra nk'omwanya oguhungurwamu ibaale yagamba ati: “Tindukwenda kurora omwana wange nkooku arukufa.” Hagara obu akaba ali oku, omwana yatandika kurra. 17Ruhanga yahurra omwana narra; malaika wa MUKAMA yayema omwiguru, yayeta Hagara, yamugambira ati: “Kiki ekirukukutuntuza? Leka kutiina, habwokuba Ruhanga ahuliire iraka ly'omwana wawe nambere ali. 18Imuka ohimbe omwana wawe, omukwate omugumye, habwokuba ndimwihamu ihanga erikooto.” 19Aho Ruhanga yaigura amaiso ga Hagara, yarora iziba ly'amaizi, yagenda ha iziba eri, yataha amaizi yaijuza endyanga ye, agandi yaha omwana we yanywa. 20Ruhanga akalinda omwana ogu, yakura kandi yaikara omwirungu, yamanya muno kurasa obuta. 21Yaikaraga omwirungu lya Parani, nyina yamuswererra omukazi Omunyamisiri.
22 #
Kub 26:26. Omu kasumi ako, Abimereki na Fikoli, omukuru w'ihe rye, bagambira Abburahamu bati: “Ruhanga aikara na iwe omu byona ebi okora; 23hati nu, ndahira noojurra Ruhanga nkooku otalinkora kintu kyona ekitahikire, nkooku otalikikora abaana bange rundi abaijukuru bange, nkooku nkukoliire, na iwe nukwo olinkorra, kandi nukwo olikorra ensi enu ei orukwikaramu.” 24Abburahamu yagamba ati: “Ndaarahira.”
25Abburahamu obu yahyemiire Abimereki habw'iziba ery'amaizi, abaheereza b'Abimereki eri bakaba banyagire, 26Abimereki yagamba ati: “Timmanyire anyakukozire eki atangambiire, eki tinkakihurraaga, hati bunu bunu, nubwo nabanza kukihuurra.” 27Abburahamu nukwo kukwata entaama n'enimi, yabiha Abimereki, abantu abo ababiri, baakora endagaano. 28Abburahamu yasoroora omu igana lye, ebuguma ez'entaama musanju. 29Abimereki yakaguza Abburahamu ati: “Ebuguma ez'entaama musanju zinu ezi osoraire, nizimanyisa ki?” 30Abburahamu yagarukamu ati: “Ebuguma zinu omusanju, ozitwale, oziihe omu ngaro zange, nukwo obe kaiso arukugumya nkooku ali ninyowe nalimire iziba linu.” 31Ekiikaro eki, nukwo kwetwa Bbeeri-seba habwokuba hanu, bombi nuho baarahiriire. 32Nukwo baakozire bati endagaano, bali Bbeeri-seba. Hanyuma, Abimereki na Fikoli, mukuru w'ihe rye, baimukya, baagenda omunsi ey'Abafirisiti. 33Abburahamu yabyara omuti omunsi Bbeeri-seba kandi yayamirra MUKAMA Ruhanga atahwaho. 34Abburahamu akamara ebiro bingi omunsi y'Abafirisiti.
Currently Selected:
Kub 21: BRR2008
Highlight
Share
Copy
Want to have your highlights saved across all your devices? Sign up or sign in
Bible in Runyoro/Rutooro Interconfessional Translation © Bible Society of Uganda, 2008.
