Kub 23
23
Saara ha yaziikirwe
1Saara akoomeera emyaka kikumi mu abiri na musanju; obwomeezi bwa Saara, aho nuho bwagarukiire. 2Akagwa Kiryasi-araba niyo Hebburoni omunsi ya Kanaani. Abburahamu yasaalirwa kandi yalirirra Saara. 3Abburahamu yasiga aho omufu we, yagenda yagambira Abahiiti ati: 4#Baheb 11:9,13; Ebik 7:16.“Omuli inywe, ndi munya ihanga kandi nsuhuuki; mumpe omwanya ogw'okuziikamu, nziike omufu wange, mwihe omumaiso gange.” 5Abahiiti baamugarukamu bati: 6“Waitu, hurra eki turukugamba, omuli itwe, oli muntu w'obusobozi. Ziika omufu wawe omu kituuro eki oraasiima omu bituuro byaitu; busaho n'omu omuli itwe araakwima rundi araakutaanga ekituuro h'oraaziika omufu wawe.” 7Abburahamu yaimuka, yainama yasiima Abahiiti, bakama b'ensi. 8Yabagambira ati: “Obu muraaba nimugonza nziike omufu wange anduge omumaiso, muhurre eki ndukugamba kandi munyesengerereze Efuroni mutabani wa Zohara, 9nukwo ampe obwingira bwe obunyakuli Makipera ha nsaro y'ekibanja kye. Omuhendo gwakyo gwona ogu araancwa ngumusasule inywena nimurora.” 10Omu kasumi ako, Efuroni akaba ali omu Bahiiti abo; yagarukamu Abburahamu, Abahiiti boona abaataahire omu rubuga bahuliriize yagamba ati: 11“Nangwa, waitu hurra eki ndukugamba; ekibanja eki ndaakikuha hamu n'obwingira obunyakurumu; nakikuha abantu ab'ihanga lyange baroho. Ziika omufu wawe.” 12Aho Abburahamu yainama yasiima bakama b'ensi egi. 13Yagambira Efuroni n'abantu boona bahuliriize ati: “Nkwesengeriize ompulirize; ka nsasule omuhendo gw'ekibanja kinu, gwikirize ngukuhe, nukwo nziikemu omufu wange.” 14Efuroni yagambira Abburahamu ati: 15“Waitu, mpuliriza, ekicweka ky'itaka ekirukugura siringi bikumi bbina, kintu ki hali iwe na nyowe? Ziika omufu wawe.” 16Abburahamu yaikirraniza n'Efuroni, yamulengera omuhendo ogu yagambire, Abahiiti nibahurra, nizo siringi ebikumi bbina, okurorra ha muhendo ogw'abasuubuzi ogukaba guroho omu kasumi ako.
17Nahabweki, ekibanja kya Efuroni, ekikaba kiri Makipera enyakuli Burugaizooba bwa Mamule, ekibanja n'obwingira obukaba burumu, emiti yoona eyekaba eri omu kibanja, okumarayo ensaro zakyo zoona, 18byona byaheebwa Abburahamu omumaiso g'Abahiiti, bibe bintu bye habwe, boona abakaba baizire ha irembo ly'orubuga nibarora. 19Eki obu kyamazire kubaho, Abburahamu yaziika Saara mukazi we omu bwingira obunyakuli omu kibanja ekikaba kiri Makipeera ha Burugaizooba bwa Mamule (niyo Hebburoni) omunsi Kanaani. 20Ekibanja n'obwingira obukaba burumu, byaheebwa Abburahamu, kibe kibanja kye habwe eky'okuziikamuga, eki yahairwe Abahiiti.
Currently Selected:
Kub 23: BRR2008
Highlight
Share
Copy
Want to have your highlights saved across all your devices? Sign up or sign in
Bible in Runyoro/Rutooro Interconfessional Translation © Bible Society of Uganda, 2008.
