Kub 33
33
Yakobbo n'Esau nibatangatangana
1Yakobbo obu yaimukize amaiso, yarora Esau naija, aina abasaija bikumi bbina. Aho abaana yababaganizaamu, Leeya yamuha abe na Rakeeri yamuha abe. 2Abazaana n'abaana baabo, yabata omumaiso, yagarraho Leeya n'abaana be, yamalirra na Rakeeri na Yosefu omwana we. 3Uwe wenka yabeebembera, yagenda nainama emirundi musanju, okuhika obu yahikireho owanyina.
4Esau yairuka kwitirana Yakobbo, yamugwa omunda yamubumbaatira, yamunywegera, bombi barra. 5Esau obu yaimukize amaiso, arozire abakazi n'abaana, yakaguza ati: “Banu aboizire nabo, nibaha?” Yakobbo yagarukamu ati: “Abo nubo baana Ruhanga abayampaire nyowe omwiru wawe, ha bw'embabazi ze.” 6Nubwo abazaana n'abaana baabo, bairiire haihi bainama. 7Leeya n'abaana be nabo bairra haihi bainama ha kumalirra, Rakeeri na Yosefu bairra haihi, bainama. 8Esau yakaguza ati: “Ogenderiire ki kuleeta ekitebe eky'abantu abo boona kunyitirana?” Yakobbo yagarukamu ati: “Ekitebe kinu eki nkireetiire nukwo iwe mukama wange kungirra embabazi.” 9Esau yamugarukamu ati: “Mugenzi wange, ebi nyinabyo, nibimmara, ebintu byawe, oikale nabyo.” 10Yakobbo yamugarukamu ati: “Nangwa, nkwesengeriize, obu oraaba noongirra embabazi, ekirammanyisa nukwo kwikiriza ekisembo eki nkuhaire, habwokuba mazima kwo, okurora amaiso gawe, ninsisana nk'anyakurozire Ruhanga, ontangiriire n'embabazi ezitagambwa. 11Nkwesengeriize, ikiriza ekisembo kinu eki nkuleetiire, habwokuba Ruhanga akangirra embabazi, kandi ntungire ebintu bingi.” Obu yamwesengeriize muno Esau yaikiriza.
12Esau yagamba ati: “Tweyongere tugende orugendo rwaitu, nyowe ka nkwebembere.” 13Baitu Yakobbo yamugarukamu ati: “Mukama wange omanyire abaana banu nkooku bali bato, amagana ag'ente n'ag'entaama ezirukwonkya, mulimo gwange kugarolerra, amagana ago, kakuba ngarubasa muno, okumara ekiro kimu, nigaija kufa. 14Mukama wange, iwe yebembera, nyowe nyije mpora mpora n'amagana n'abaana, okuhika obu ndaakusanga omu kiikaro Seiri.” 15Esau nukwo kumugarukamu ati: “Ka nkusigire abamu ha basaija banu aba nyinabo.” Yakobbo yakaguza ati: “Nimbeetaagira ki? Kyonka eki ndukwenda, nukwo iwe mukama wange kungirra embabazi.” 16Ha kiro eki, Esau yakwata omuhanda yagaruka Seiri, 17baitu Yakobbo yagenda Sukosi, yayeyombekera enju, yazitirra ente ze, ekiikaro eki, nikyo kyayetiirwe Sukosi.
Yakobbo naahika Sekemu
18Yakobbo akaruga Padanaramu, yahika n'obusinge omu rubuga Sekemu, orunyakuli omunsi Kanaani, yateera orusiisira haihi n'orubuga, 19#Yos 24:32; Yoh 4:5.yagura ekicweka ky'itaka hali abaana ba Hamora, ise Sekemu eki akaba atiireho eheema ye, yakiheera siringi kikumi. 20Oku, yayombekayo itambiro, nkekiijukizo kya Ruhanga, Ruhanga wa Isirairi. #33:20 Elelohe-Isirairi Amakuru galyo ngu: onu nuwe Ruhanga, Ruhanga owa Isirairi.
Currently Selected:
Kub 33: BRR2008
Highlight
Share
Copy
Want to have your highlights saved across all your devices? Sign up or sign in
Bible in Runyoro/Rutooro Interconfessional Translation © Bible Society of Uganda, 2008.
