Kub 34
34
Dina naahoolerwa enzigu habw'okukorwa kubi
1Dina muhara wa Leeya ou yazairweho Yakobbo, akagenda kubungira abakazi ab'omunsi egi, 2Sekemu mutabani wa Hamora Omuhiivi, omulemi w'ensi egi, obu yamuboine, yamugwera, yamuhamba yamuhemura. 3Omutima gwa Sekemu gwona gwaikara hali Dina muhara wa Yakobbo; yagonza muno omwisiki ogu, yamubalizaaga obugambo oburungi. 4Nubwo Sekemu yagambiire ise Hamora ati: “Omwisiki ogu munswererre.” 5Omu kasumi ako, Yakobbo akahurra Sekemu nkooku akaba amazire kusiisa omuhara Dina; baitu abatabani bakaba bali omu kisaka, nibaliisa ente, Yakobbo tiyagamba kantu, okuhika obu baagarukire. 6Hamora ise Sekemu yaimuka, yagenda kubaza na Yakobbo ha kigambo eki. 7Batabani ba Yakobbo obu baakihuliire, baaruga omu kisaka, baataaha omuka; baasaalirwa, baabiihirwa muno, habwokuba Sekemu akaba ahemwire Isirairi, habw'okuhamba muhara wa Yakobbo, ekintu nk'eki, kikaba kitarukuhika kukorwa.
8Baitu Hamora yagambira Yakobbo n'abatabani ati: “Mutabani wange Sekemu nagonza muno muhara wanyu, mbeesengeriize, mumumuhe amuswere. 9Tuswerrane, mutuhe bahara baanyu, na inywe mutwale abaitu. 10Mwikale na itwe, ensi enu, ebe yanyu; mugiikalemu, mugisuubuurremu, mugwagwane.” 11Sekemu na uwe, yagambira ise na banyanya omwisiki ati: “Mungirre embabazi, kyona ekimurakancwa, ndaakibaha. 12Mucwe enjugano n'ebisembo nkooku murukwenda, ndaabibaha, nyowe eki ndukwenda, kiri kimu kyonka, mumpe omwisiki ogu mmuswere.”
Batabani ba Yakobbo nibahoora enzigu
13Batabani ba Yakobbo baabiihabiiha Sekemu na Hamora ise habwokuba Sekemu akaba asiisire munyanya-bo Dina. 14Baabagambira bati: “Ekintu eki, titusobora kukikora, munyanya-itwe kumuha omuntu atasazirwe, habwokuba eki, kiraaba kihemu hali itwe. 15Nitwija kubaikiriza, kakuba na inywe mwikiriza kusisana na itwe, buli musaija wena omuli inywe obu araasarwa. 16Obu nubwo turaabaha bahara baitu, na itwe tuswere bahara baanyu, tufooke ihanga limu. 17Baitu obu mutaikirize eki tugambire, mukasarwa, obu muhara waitu turaamutwara tugende.”
18Hamora n'omutabani Sekemu, baasiima ebigambo byabo. 19Omusigazi atabandaale, yakora eki baagambire, habwokuba akaba naagonza muhara wa Yakobbo, kandi omunju ya Sekemu ise, omusigazi ogu, nuwe baakiraga kutamu ekitiinisa. 20Aho, Hamora n'omutabani Sekemu, baagenda ha irembo ery'orubuga rwaabo, baagambira abantu ab'omu rubuga oru bati: 21“Abasaija banu, nganjani zaitu, mubaleke baikale omunsi munu, basuuburremu, habwokuba ensi egalihire muno, neebamara; tuswere bahara baabo, na itwe tubahe bahara baitu babaswere. 22Abantu eki baraasigikiraho kwikiriza kwikara naitwe, tukafooka bantu bamu, kiri kimu kyonka nukwo buli musaija wena omuli itwe kusarwa nka bo oku basazirwe. 23Ente zaabo, ebintu byabo, n'ebisoro byaabo byona tibyabe byaitu? Kimu kyonka, twikirranize nabo, nibaija kwikara na itwe.” 24Boona abaarugire omu rubuga, baikiriza, baakora Hamora n'omutabani ebi baabagambiire; abasaija boona abaarabire omu irembo ly'orubuga rwe baasarwa.
25Ha kiro ekya kasatu, abantu abaasazirwe obu bakaba batakakizire, ababiri ha batabani ba Yakobbo, Simyoni na Leevi, banyanya Dina, baasomora empirima zaabo, baasesira orubuga, abantu batabeeteekaniriize, baita abasaija boona, 26baita Hamora n'omutabani Sekemu, baiha Dina omunju ya Sekemu, baagenda. 27Batabani ba Yakobbo abandi baahika ha mitumbi, banyaga orubuga, habwokuba Sekemu akaba ahemwire munyanya-bo; 28baatwara amagana gaabo ag'ente n'ag'embuzi, enkaina zaabo, na byona ebikaba biri omu nda y'orubuga n'aheeru yarwo; 29itungo lyabo lyona, abaana baabo abato, na bakazi baabo, byona ebikaba biri omu maju, baabinyaga. 30Aho Yakobbo yagambira Simyoni na Leevi ati: “Mundetiire akabi, mwannobesa abasi b'ensi Abanyakanaani, Abaperezi, itwe tuli bake, kakuba beesorooza bakaseesa kundwanisa, nibaija kumpwerekereza, nyowe n'ab'omuka yange boona.” 31Baitu bo baamugamba bati: “Kikahika Sekemu, kusisaniza munyanya-itwe nka malaaya?”
Currently Selected:
Kub 34: BRR2008
Highlight
Share
Copy
Want to have your highlights saved across all your devices? Sign up or sign in
Bible in Runyoro/Rutooro Interconfessional Translation © Bible Society of Uganda, 2008.
