Kub 46
46
Yakobbo naagenda Misiri
1Kandi Isirairi yaimukya orugendo rwe, yatwara byona ebi akaba anyinabyo, yahika Beeri-seba, oku, yatambirrayo Ruhanga owa Isaaka ise ekyonzira. 2Ekiro, Ruhanga yayeyoleka Isirairi yamweta ati: “Yakobbo, Yakobbo.” Uwe yayetebuka ati: “Taata.” 3Nubwo Ruhanga yagambire ati: “Ninyowe Ruhanga, Ruhanga owa sso, otatiina kugenda Misiri, habwokuba oku, nuho ndikwihiramu ihanga erikooto. 4Ninyija kugenda na iwe Misiri, kandi ndyongera nkwiheyo. Yosefu nuwe alikukuma, obu oliba nookaba.” 5Nubwo Yakobbo yaruga Beeri-seba, batabani be baamutwara, abaana baabo abato n'abakazi baabo, baabatwarra ha bigaali, Faraaho ebi yatwekere kumutwarraho. 6#Ebik 7:15.Baatwara ente zaabo n'ebintu byabo ebi baatungiire omunsi Kanaani, baahika Misiri, Yakobbo hamu n'oruzaaro rwe rwona, 7abatabani, abahara, n'abaijukuru boona, oruzaaro rwe rwona, yaija narwo Misiri.
Oruzaaro rwa Yakobbo
8Ganu nugo mabara g'abantu g'oruzaaro rwa Isirairi abaizire Misiri. Yakobbo n'abatabani, Rubbeni omuzigaijo gwa Yakobbo, 9batabani ba Rubbeni nubo banu: Hanoki, Paru, Hezeroni, Karumi. 10Ganu nugo mabara ga batabani ba Simyoni: Yemweri, Yemeni, Ohadi, Yakini, Zohali na Sauli, anyakuzaarwa omukazi Omunyakanaani. 11Ganu nugo mabara ga batabani ba Leevi: Geresoni, Kohati, na Merai. 12Ganu nugo mabara g'abatabani ba Yuda: Eri, Onani, Sera, Pereezi na Zera, (baitu Eri na Onani, bakafeera omunsi Kanaani.) Ganu nugo mabara ga batabani ba Pereezi: Hezeroni, na Hamuli. 13Ganu nugo mabara ag'abatabani ba Isakara: Toora, Puuva, Yobu na Simirooni. 14Ganu nugo mabara ga batabani ba Zebburuuni: Seredi, Eloni, Yahaleeri. 15Aboojo abo boona hamu na munyanya-bo Dina, baana ba Leeya, aba yazaairweho Yakobbo, ali omunsi Padanaramu, abaana be boona hamu n'abaijukuru bakahika asatu na basatu. 16Ganu nugo mabara ga batabani ba Gaadi: Zifiyoni, Haagi, Suuni, Eziboni, Eri, Arodi, na Aleri. 17Ganu nugo mabara g'abatabani ba Aseeri: Imuna, Isuva, Isivi, Beriya, hamu na Seera munyanya bo. Kandi ganu nugo mabara g'abatabani ba Beriya: Heberi na Merikyeri. 18(Abo nubo baana n'abaijukuru ba Yakobbo na Ziripa, Labbani ou yasagaliire muhara we Leeya kwikara nawe, abantu boona bakahika ikumi na mukaaga.) 19Ganu nugo mabara g'abatabani ba Rakeeri muka Yakobbo: Yosefu na Benyamiini. 20#Kub 41:50-52.Kandi Yosefu obu akaba ali Misiri, Asenasi muhara wa Potifera nyakatagara wa Oni, akamuzarra Manaase na Efuraimu. 21Ganu nugo mabara ag'abaana ba Benyamiini: Beera, Bekeri, Asubeeri, Geera, Naamani, Ehi, Rosi, Mupimu, Hupimu na Alidi. 22Abo nubo baana n'abaijukuru ba Yakobbo na Rakeeri boona hamu nibahika ikumi na bbana. 23Ibara ery'omwana wa Daani nuwe Husimu. 24Ganu nugo mabara ag'abaana ba Nafutaali: Yahazeeri, Guuni, Yezeeri, na Sileemu. 25Abo nubo baana n'abaijukuru ba Yakobbo na Biriha, Labbani ou yasagaliire muhara we Rakeeri kwikara nawe, boona hamu nibahika musanju. 26Abantu boona aba Yakobbo abaizire Misiri, ab'esagama ye, otatairemu bakamwana, omuhendo gwabo gukaba guli nkaaga na mukaaga; 27#Ebik 7:14.batabani ba Yosefu aba yazaaliire Misiri, bakaba bali babiri, abantu boona ab'enju ya Yakobbo abaizire Misiri, omuhendo gwabo gwahikaga nsanju.
Yosefu naatangirra Ise
28Yakobbo yatuma Yuda amwebembere ahikeho Yosefu, amumanyise nkooku arukwija, nukwo basobole kutangatangana Goseni. 29Yosefu yateekaniza ekigaali kye, yagenda kutangaana ise omu Goseni, obu yamuhikireho, yamugwa omunda, yamubumbaatira, yamara akasumi narra akyamubumbaatiire. 30Yagamba ati: “Hati ndaafa gwezire, habwokuba nkuboine, namanya nkooku okyali mwomeezi.” 31Yosefu yagambira bagenzi be n'abantu boona ab'eka ya ise ati: “Ka ngende ngambire Faraaho, mumanyise nti: bagenzi bange n'eka yoona eya isenyowe, abakaba bali omunsi Kanaani, banyebingire, 32abantu abo baliisa, habwokuba bagira ente, kandi baleesire amagana gaabo, ag'entaama, ag'embuzi n'ag'ente, n'ebintu byabo byona. 33Faraaho obu araabeeta akabakaguza ati: ‘Mukora mulimo ki?’ Mumugarukemu muti: 34‘Abairu bawe okuruga obuto bwabo okuhika na hati, baliisa ente, itwena na baisenkuru itwe,’ nubwo muraasobora kwikara omunsi Goseni, habwokuba Abanyamisiri banuga abaliisa.”
Currently Selected:
Kub 46: BRR2008
Highlight
Share
Copy
Want to have your highlights saved across all your devices? Sign up or sign in
Bible in Runyoro/Rutooro Interconfessional Translation © Bible Society of Uganda, 2008.
