مقتطفات من الزبور 41
41
دعاء الشفاء للنبي داود (عليه السلام)
1هنيئاً ليلّي بيعتني بالمساكين وبيهتم فييُن،
وليلّي بساعدوا، بوقت الشدّة، يا ربّ بتنجّييُن.
2وبتحافظ عليُن، بتطوّل عمرُن عهالأرض، وبتسعِدُن،
وإنتَ يا اللّه عن شرّ أعداءن بتبعِدُن.
3وهنّ عفراش المرض بتشفِيُن،
وإنتَ يا اللّه بتعافيُن.
4"دخيلَك يا ربّ! اشفيني، تحنّن عليّي،
أنا أذنبت بحقّك، نفسي مخطيّة"
5وأعدائي الخُبثا الكلّ عم بقول:
"أيمتى بِموت وبْيِنْتَسى على طول؟"
6وإذا إجوا يزوروني بيحكوا عليّي،
عشان قلبُن مليان غشّ وأذيّة.
7عم يتّفقوا علّي، كلّن بيكرهوني،
عم يتآمروا ضدّي، بدّن يأذوني.
8وعم بقولوا: "خطرة مرضتُه،
وإذا وقع هالمرّة ما بقوم من فرشتُه.
9وحتّى اليّ وثقت فيه صديقي الحميم،
آكلين خبز وملح سوا، انقلب ضدّي، وصار غريم.
10وإنتَ يا ربّ، دخيلَك! تحنّن عليّ، اشفيني،
حتّى جازيهُن عيلّي عملوه فيني.
11وعرفت إنّك راضي عنيّ يا حاميني،
لمّا ما شمت فيني عدوّيني.
12وإنّك كرمال نزاهتي مقوّيني،
وللأبد إدّام محضرَك مخلّيني.
13إلَك الحمد والشكر يا ربّ العالمين،
ربّ بني يعقوب من الأزل وإلى أبد الآبدين،
آمين ثم آمين."
Currently Selected:
مقتطفات من الزبور 41: LRT
Highlight
Share
Copy
Want to have your highlights saved across all your devices? Sign up or sign in
© 2021 Sabeel Media