MARCOS 12
12
Esohui ebameesahuajji echacosahuajji dejjacuanajo
(Mt 21.33-46; Lc 20.9-19)
1Jesosaa esohui ebameesahuajjicuanajo huohuicapoa cuana jama ba'a: —Oe dejjaa equemeseya oe oja quejo uvajjono banameecanaje. Majoya ohuaya oja que peeimeecanaje uvajjono anijji meiya. Ohuaya mei queaquemo quecuapejjameecanaje uvajjajja quishipashajji enanequijji. Majoya oja uvajjajja meshijaahuanajji mei iya-ao-aomeecanaje eyajo anija ebajji. Majoya quijjepishana ohuaya oja meshi uvajjajja anijji dejjacuana majotii echacochacojji bacanaje. Ma oja uvajjajja que chacojji dejjacuana huohuinanamajje ache echacojji ojaya acajji, oya poquinaje queahuesha pea meshiyasijje. 2Majoya quijje uvajjajjacuana oja banamee jahuajo equemeseya pea ojo chacochacoanicuana huoojeacanaje cuamaya oja meshi uvajjajja aniyasijje oja sejja'yo ma ojaya yajji huisotii jjequiya. 3Oja que chacojji po-ani dejjacuaa equemeseja huoojeacuana oja sejja'yo jjequiya nisho poeajo oya cuiacajjequinaje. Jamatii oya huoojeaca'yonaje cuaa uvajjajjama'nei huacuaya. 4Majoya quijje equemeseya pea ojo chacochacoanicuana huoojeacao'oyanaje cuamaya. Ohua bacañaquiajo oja que chacojji po-ani dejjacuaa oya mata-ajeacajjequinaje. Oja sapajje cuiacanaje cuaa acuiya. 5Majoya aje emeshimeseya pea dejja huoojea-ajjacao'oyanaje. Oma ca cuiaca'yonaje cuaa oque poquiajo. Majoya aje quijje queahuiso peacuana huoojea-ajjacao'oyanaje emeshimeseya. Becacuana cuiapea-aicanaje cuaa, pea oja huoojea-ajja ca cuiapea-aica'yonaje ma oja que chacojji poani dejjacuaa.
6Oenei nequinaje ehuoojeajji, emeshimeseja bacuaejjanei ma ojaya queajeaneenee poani. Oya jjashahuabaquinaje jama ba'a: “Ecue bacuaejjanei pojja'a queapame acajjequije cuaa. Cuiajjequijjima acaje” jamaya onaa oya eacajjequije poso acanaje. Jamajje oja bacuaejja huoojeacanaje. 7Majoya aje oja bacuaejjanei poeje bamajje oja que chacojji po-anicuana ojee mimimiminaje jama ba'a: “Bacue, jiquio poeje dejjaa ojjaña jiquio meshi mesenacaje'yo, ojayatii acaje'yo. Jamajjeya oya jjeyahuanei ejjacuiajeaqui'yo. Majoya jiquio meshi esejayatii poaje'yo.” 8Jamajjeya emeshimeseja bacuaejja poeajo iñaca'ajeamajje cuiaca'yonaje cuaa. Oya chama'yotii jaa bamajje oja yami queaquehueshapishana jeajeaquicanaje cuaa.—
9Majoya aje Jesosaa jama acapoa ba'a: —Jamajjeya, ¿yajja emeshimeseya oja que chacojji po-ani dejjacuana acaje? Ohuaya cuama poquimajjeya oja que chacojji poanaje dejjacuana cuiacuajimeecaje'yo. Majoya ohuaya peacuana oja que quiacaje'yo maja echaco'yojjiya.—
10Majoya Jesosaa huohuipea-aicapoa cuana jama ba'a: —¿A'a quianaja ajjima' so'o Eyacuiñajjija esohui etehue jaa? Jama poani ba'a:
“Jiquio mei-ai equi-ai peeijji ebionei enequiasohua cajaa acanaje cuaa.
Jamatiiya Eyacuiñajjiya onaja cajaa'ya oya mei-aiya ebionei equi peeijji nequiasohuaca'yonaje.
11Jamaya eseja Emeshimeseneiya oya aca'yonaje.
Eseyaya baña jama queapamenee”
jama yahuajonei etehue jaa ojaya esohui.—
12Eyacuiñajjija equi-aijo chacochacopoquiani etii poanicuana, fariseo dejjacuana pea-ai Jesosaa jama huohuime acani shajja-ajjamajje jjabaquiapoa cuana Jesosa ojo mimiani. Jamajjeya queaquene poa onijje. Jesosa ejeanobiameejjijo jjashahuabaquiapoa etiicuana. Jamatii Jesosa iñameejjima poa cuanaja queahuiso judiocuana onijje queaquenenee epo poanijje. Jamajjeya poqui'yapoa etii poanicuana, jamatii Jesosa jeanobiameejjima.
Jesosaa emeshimeseja yajji bejjojo huohuicapoa cuana
(Mt 22.15-22; Lc 20.20-26)
13Majoya aje quijje judĂo etii poanicuaa fariseocuana, Herodesja epeejjicuana pea-ai huoojeacapoa Jesosa nequiyasijje. Jesosa esohui queaquehua huohuimeesa-acapoa cuaa o jeanobiameejjijo nisho. 14Jamajjeya poquiapoa cuana Jesosa nequiyasijje. Jama huohuiquime acapoa cuaa Jesosa ba'a: —Esohuihuohuijji, ecuanaja eba miyaya e'ejojonei esohui aña, miya siajje po-ajja, peacuana minijje ejjapeequijjijo pojjeama huohuiaña cuana. Miyaya e'ejojonei Eyacuiñajjija esohui oenei huohuiaña pea-ai. Jamajjeya Âżyajja jjashahuabaquime miya poani? ÂżA'a esejaya quiacapoquijji Roma emeshimese Cesarja yajji ma ohua tehuemeecanaje huisotii, a'a quiaca-ajja pojja'a? ÂżYajja miya poani?—
15Jesosaa oja ejjashahuabaquijji queaquehua bacanitiiya ca saja-acapoa cuana jama ba'a: —¿Apiojji miquiaaya eya esohui queaquehua huohuitaimeesa-aña? Yecue jjo bejjo eso'dojjo quiaa— jamaya acapoa.
16Jamajjeya oe eso'dojjo yecapoa ebameejji. Jesosaa eso'dojjo jjeshemajje huohuiajjacapoa cuana jama ba'a: —Bacue jiquio eso'dojjo. Jiquio mijijje, ¿ajea ecojja ani? ¿Ajea bajjani etehue jaa?—
Saja-acapoa cuaa oya jama ba'a: —Roma emeshimeseja ecojja jiquio ani, ojaya bajjani pea-ai jiquio etehue jaa.—
17Jamajje Jesosaa huohuicapoa cuana jama ba'a: —Jamajojoya aje cua Roma emeshimeseya sacani oja tehuemee huisotiiya eso'dojjo oya quiapoquiacue quiaa. Eyacuiñajji pea-aiya oe quiapoquiacue cua ohua miquiana quiameesa-acani huisotii.—
Jesosaa jama huohuime acani shajja-ajjamajje jjabaneineiquiapoa cuana ojo acheja'anei ohuaya esohui huohuicani.
Jesosa huohuiajjacapoa cuaa dejja mano'yomajje, Âża'a shequije'yo?
(Mt 22.23-33; Lc 20.27-40)
18Majoya aje quijje peacuana poquiapoa saduceo bajjani dejjacuana Jesosa baa. Ma dejjacuana jama jjashahuabaquime poa ba'a: Dejjacuana mano'yomajje oya eshequi'yojjitii pojjeama poaje. Jamajjeya Jesosa huohuiajjaquicapoa cuaa jama ba'a: 19—Esohuihuohuijji, yahuajonei Moisesya jama tehuecapoa ba'a: “Dejja cua bacuama'tii nequi mano'yajo oja chahuaa oja quijjojea ehuanase huanacaje'yo. Oja jeajo oja o'i emano'yo bacuajji poaje. E'ejojonei oja o'ija jea jayojja ebacua bacaje cuaa” jama tehuemeya Moisesya yahuajonei acapoa. 20Bacue, ecuanaja meshijo siete huisome dejja nequiapoa o dohue pea-ai. Ma ebionei etii dejja edohuemese jjahuanaquiapoa. Jamatii bacuama' nequi oya mano'yapoa. 21Jamajjeya oja chahuaa o quiquishi'yojjiya oja huanase huanaca'yapoa. Oya jayojja pea-ai oja chahua bacuama'tii nequi manopea-ai'yapoa ma eponajotiiya. Jamajjeya oya jayojja pea-ai pea echahuamese pea-aiya oja o'ija quijjojea ani epona huanaca'yapoa. Majoya oya manopea-ai'yapoa. 22Ojjaña seis huisome oja chahuacuana oya jayojjaya bacuama'tii nequi manocapoqui'yapoa oya eponajotii jjahuanaqui nequi. Majoya aje oe-ejjenei ma epona manopea-ai'yonaje. 23Jamajjeya ecuaa miya huohuiajjaña, ¿ache oja dohueja ehuanase poaje ma epona shequi'yomajje? Ojjaña o dohue pea-ai siete huisomeya ma oe eponaya huanacapoqui'yapoa.—
24Jesosaa saja-acapoa cuana jama ba'a: —Miquianaya queaquehuanee jjashahuabaquiani dejjacuana, eponacuana pea-ai mano'yomajje shequi'yoajja epoaje poso aña. Eyacuiñajji queaca'aneetii nequipoquiani, oja esohui etehue pea-ai miquianajaya bajjima poani. 25Emano'yo jaacuana dejjacuana, eponacuana pea-ai shequi'yomajje ejjahuanabecaquio'oyajjitii, ejjahueabecaquio'oyajjitii pojjeama poaje'yo. Oya angelcuana jayojjaya shacuima'tii nequicaje'yo, ahuema'tii anicaje'yo. 26Jiquio esohui emano'yo jaacuana shequimeecaje'yo bacajji. Yahuajonei Eyacuiñajjija esohui etehuejo Moisesya oe tata jijiqui bacapoa jamatii quiyojeyoajja poa. Eyacuiñajjiya Moisés jama huohuime acapoa ba'a: “Eya ca iña Eyacuiñajji ma Abrahamya, Isaacya, Jacobya pea-ai bihuiacapoquianitii Eyacuiñajjitiiya poani.” 27Israelcuanaja etiiquiana emano'yotii, chama'yotii poanijojjemo, ohuaya jama huohuime ajjima' acaquiae. Jamajjeya esejaya ebatii oya Eyacuiñajji emano'yocuanaja pojjeama poani, oya caca eshe ba'ecacuanaja Eyacuiñajji nequi. Jamajjeya miquiana queaquehuanee jjashahuabaquiani dejjacuana, eponacuana pea-ai eshequi'yojji pojjeama poso poanijjejojoya.—
Eyacuiñajjija esohui queapameneenee
(Mt 22.34-40)
28Jesosaa queaja'anee saja-acapoa cuana. Majoya aje oe dejja Moisesja tehuehuohuijji poani jjanequichipiquiapoa Jesosa ehuohuiajjajji. Jesosaa queaja'anee huohuicani cuana ohuaya shajja-ajjacapoa. Jamajjeya ohuaya Jesosa jama huohuiajjame acapoa ba'a: —Esohuihuohuijji, ¿ache Eyacuiñajjija esohui Moisesja tehue ebionei queapamenee poani ecuanaja eapoquiajjitii?—
29Jesosaa oya saja-acapoa jama ba'a: —Ebionei esohui queapameneenee yahuajo Moisesya jama tehueme acapoa ba'a: “Israelcuiñajji poani quiaa shajja-ajjacue. Emeshimesenei esejaya Eyacuiñajji poani oeneinei Emeshimesenei poani. 30Emeshimesenei, miquea Eyacuiñajji poani, comaya queajeaneenee apoquiacue ojjaña miquea equijijjijo, miquea ejjashahuabaquijjijo, miquea eyamijo pea-ai queajeanee oya apoquiacue.” 31Ejaa pea Eyacuiñajjija esohui queapamenee poani beshahuanei oya jayojja pea-ai. Oya jama poani ba'a: “Ojjaña mipejjejo ba'eca pea-ai queajeanee acue jiquio ecua miya queajeanee jjanahuebaquiani jama pea-aiya oya apoquiacue.” Jiquio beca esohui queapameneenee. Chama' pea esohui queapameneenee jiquiajja pea-aiya eapoquiajji— jamaya poa Jesosa.
32Majoya aje dejja Moisesja tehuehuohuijji poani jama poa ba'a: —E'e, jamaya esohuihuohuijji queapame miquea esohui e'ejojonei miyaya aña. Enequi oenei Eyacuiñajji, chama'neinei pea. 33Jiquio beca esohui queapameneenee eapoquiajji. Emeshimesenei, miquea Eyacuiñajji poani, comaya queajeaneenee apoquiacue ojjaña miquea equijijjijo, miquea ejjashahuabaquijjijo, mique eyamijo pea-ai queajeanee oya apoquiacue oeya. Ojjaña mipejjejo ba'eca pea-ai queajeanee acue jiquio ecua miya queajeanee jjanahuebaquiani jama pea-aiya oya apoquiacue. Dejjacuaa oja ehuonecuana enaa jehuimeeca'yani equiyotehuejeameejji Eyacuiñajji quiajji ca majo queapamepishana poani.—
34Jesosaa ma dejja Moisesja tehuehuohuijji poani queaja'a mimiani shajja-ajjamajje jama acapoa oya ba'a: —Beshahuanei miya apoa Eyacuiñajjiya ojjañacuana huoojeacapoquianitii meshi Eyahuasijje epoqui'yojji.—
Majoya etiicuaa a'a Jesosa queaja'a mimije ebajji huohuiajjapajeaca'yapoa.
Ojjañacuana nahue'yojji epojji, ¿ajea osecua poaje?
(Mt 22.41-46; Lc 20.41-44)
35Jesosaa Eyacuiñajjija equi-aiquiquibojo nequiya majo ejjachichaqui anica esohui huohuicanequiapoa jama ba'a: —Moisesja tehuehuohuijji poanicuaa huohuicani Eyacuiñajjija huoojea ojjaña nahue'yojji epojji Davidja osecua poaje. ¿Yajjajje shai jama huohuime acani cuaa? 36Yahuajonei Edojjoshahuapameya emeshimese David tehuemeecapoa jama ba'a:
“Emeshimesenei Eyacuiñajjiya jama huohuime acanaje ecue Emeshimesenei ba'a:
Ecuea ebañeimijijjetii anioquecue.
Quijje eyaya ojjaña mi cajaa ajji poanicuana,
mi sapo-ajjanei poanicuana huoojeapoquiajji epojji pomeeje.”
37Emeshimese Davidya Eyacuiñajjija huoojea ojaya Emeshimesenei poani bacapoa. Ohua o jama bacajo, ¿achajjajo oja huoojea Davidja osecuanei pome?— jama huohuime acapoa Jesosaa.
Majo ejjachichaqui anica queahuisocuaa queabihuiya Jesosaja esohui shajja-ajjaneicapoa.
Jesosaa Moisesja tehuehuohuijji poanicuana bacapoa queamimishi
(Mt 23.1-36; Lc 11.37-54; 20.45-47)
38Jesosaa huohuicapoquiapoa cuana jama ba'a: —Jjajaahuananeineiquicue quiana oe Moisesja tehuehuohuijji poanicuanajo. A'a o jayojja pea-ai posapojji. Ohuaya peacuanajo jjabameequisapomajje daqui quea-aonee queanahuenee huoshocani. Moisesja tehuehuohuijji poanicuana queabihuinee poani peacuaa ojo esohui queapame huohuicajje ojjaña ejjachichaqui anicajo. 39Judioja equi-ai ejjachichaquijji aniyasijje nobiquimajje ehuiyasijje anioqueani equii-anijji queapamenee nequijo. Oya jayojja ojee eijjiaijjiajjiyasijje nobiquimajje anioqueñani equimesepejjeneijo oya queaca'anee poani peaja ebajji. 40Jamatii ohuaya epona eahuemano'yocuanaja equicuana jjesheca'yani siajjejo. Peacuanaja eshajja-ajjajji queasohui-aoneenee miminishoani Eyacuiñajjinijje. Jamajjeya Eyacuiñajjiya oya queaneenee pomeecaje'yo quijje oya queamimishitii poanajejojoya.—
Eahuemano'yoja quia Eyacuiñajjija yajji
(Lc 21.1-4)
41Majoya aje Jesosaa Eyacuiñajjija equi-aiquiquibojo cajoncuana cojjaneijo aniya bacapoa bejjo iyanobiacapoquije cuaa Eyacuiñajjija yajji. Dejja quea-aquianahuisocuaa oja bejjo queahuiso iyanobiacani bacapoa Jesosaa. 42Majoya aje oe eahuemano'yo aema'nei poeapoa oja bejjo iyanobiaa. Ohuaya oepojjinei becaneijji pea-ai eso'dojjo iyanobiacapoa cajonyasijje. Oja bejjo sose oepojjinei poa. 43Jesosaa ohua bejjo jama quiame acaje bamajje o shajja-ajjajji poanicuana huohuicapoa jama ba'a: —Eyaya e'ejojonei esohui aña. Eyacuiñajjiya jiquio eahuemano'yoja eso'dojjo oja quia queahuisoneenee jayojja bacani ojayanei bobi jjeshejji nisho eso'dojjo quiaca'yonajejojoya. Ma pea quea-aquianahuisocuanaja bejjo oja quia ca Eyacuiñajjiya oepojji jayojja bacani. 44Joya quea-aquianahuisocuaa bejjo queahuiso quiacani jamatii ojaya bejjo esejja queahuiso ejaatii. Eahuemano'yohua ca ojjañatii ojaya bobi jjeshejji nisho eso'dojjo oepojji ani quiajeyoca'yonaje.—
Currently Selected:
MARCOS 12: ESE
Highlight
Share
Copy
Want to have your highlights saved across all your devices? Sign up or sign in
Copyright Mision Nuevas Tribus, 2006
