MARCOS 13
13
Jesosaa huohuicapoa cuana Eyacuiñajjija equi-ai quecuajeabichajea'yojjijo
(Mt 24.1-2; Lc 21.5-6)
1Majoya Jesosa Eyacuiñajjija equi-aiquiquibojo ani cuayaqui'yani oe o shajja-ajjajji poaniya oya jama acapoa ba'a: —Esohuihuohuijji, bacue achepamenee jiquio mei, equi-aicuana ani. Queaquemonee, queaca'anee pea-ai ani.—
2Jesosaa oya jama acapoa ba'a: —¿A'a jiquio equi-aicuana, equiquibocuana queapamenee ani baña? Eyaya miya e'ejojonei huohuiaña, quijje ojjaña jiquiojo ani Eyacuiñajjija equi-aijo miya jjeyanei baña huisotii chama'neinei acaje'yo cuaa. Ojjaña meicuana quecuajeabichajeajeyocaje'yo cuaa. Chama'neinei che oema'nei mei pea meibiajje eanijji poaje'yo.—
Yajja Eyacuiñajjiya quijje acaje huohuicapoa Jesosaa
(Mt 24.3-28; Lc 21.7-24; 17.22-24)
3Majoya aje quijje Jesosa o shajja-ajjajji poanicuananijje jaasohuaquiapoa eyiyoiyeao Olivos bajjani nequiyasijje ma Eyacuiñajjija equi-ai ani cojjaneiyasijje. Cuamaya Jesosa anioqueapoa. Majoya Pedrohua, Santiagohua, Juanya, Andresya pea-ai oopanaa Jesosa huohuiajjacapoa jama ba'a: 4—¿Acheshono shai equi-aicuana quecuajeabichajeacaje'yo cuaa? ¿Ae shai bacaje cuaa ma epojja poechipiajo?—
5Jesosaa oya saja-acapoa jama ba'a: —Jjajaahuananeineiquicue quiana oe peacuanaja esohuijo. A'a jjadasiameequijji quiana pea dejjacuanajo. 6Queahuisocuana poemajje jama quiana anishocañaje ba'a: “Jiquia aje eya Eyacuiñajjija huoojeaneiya miquiana nahue'yojji epojji poeyanaje.” Majoya queahuisocuana dasiacañaje cuaa.
7—Miquiaaya shajja-ajjaje queahuisocuana jjaquecuaquicaje'yo queahuesha ba'ecacuana, jiquio chipinei ba'eca pea-aiya. Ona jama jjaquecuaquica'yani shajja-ajjamajje a'a queamete pojji quiana majoya. Jamaya acapoquije queahuiso jaajjicuaa oe-ejjenei epojja poechipijjimahuajo, apoa pojjima' so'o. 8Oejaajjicuana jjaquecuaquicaje'yo peajaajjicuananijje. Oe meshicuiñajjicuanaja soldadocuana pea meshicuiñajjicuanaja soldadocuananijje jjaquecuaquicaje'yo pea-ai. Queahuiso meshiyasijje majo ba'ecacuana bobiyasijje pocaje'yo bobi chamajo, meshicuana queahuiso pea-ai huehuahuehuaje. Jamaya ojjañajaajjicuana ebionei queanee pocoocaje. Jiquio ecua eponacuana bacuaneecoomajje jjabaquiani quijje queaneenee poaje jama pea-aiya queacamajanee pocoocaje cuana.
9—E shajja-ajjajji poani quiana jjajaahuananeineiquicue dejja etii poanicuanajo. Miquiana iñameecaje cuaa ejeanobiameejji. Judiocuanaja equi-ai ejjachichaquijjiyasijje quiana cuiasejjajeacaje cuaa ojjañacuanaja ebajji. Miquianaya emeshimesecuana nequi cojjaneijo nequimeecaje etiija miquiana queanee pomeejji ejo. Jamajjeya ecuea esohui huohuije quiaa emeshimesecuanaja eshajja-ajjajji. 10Epojja oe-ejjenei poejjimajo ecuea esohui queapamenee huohuiquicajji ojjañajaajjicuanahuasijje. 11Jamajjeya a'a queamete jjashahuabaquijji emeshimesecuananijje emimijji miquiana iñameecajje. O cojjaneijo nequimajje huohuicue cuana ma Eyacuiñajjiya miya esohui huohuimeesahuacaje huisotiiya. Miquianajayanei ca ehuohuijji pojjeama. Edojjoshahuapameya miquianaya peacuana queaja'a huohuimeesahuacaje. 12Beca dejjacuaa oja dohuenei huohuicaje o cuiamee'yojjijo etiicuana nequi cojjaneijo. Peacuaa echiimeseya oja bacuanei huohuicaje etii poanicuanaja o cuiamee'yojji. Majoya ebacuacuaa oja chii oja nae pea-ai huohuicaje o cuiamee'yojji. 13Ojjañajaajjicuaa quiana cajaa acaje ejo, miquianajoneitii pojjeama. Jamajjeya ojjaña joya e cajaa a pojjima'tii poanicuana jjanahuemeequije'yo ejo ona queaneenee pomeejji oe poajo.
14—Dejjamimishicuaa oja ne eyacuiñajjinisho nequiacaje Eyacuiñajjija equi-ai queatainee ajji. Jamajjeya cua jiquio esohui ajji poajecuana queaja'a jjashahuabaquicue jiquio esohuijotii. Miquianaya Judea meshijo ba'eca dejjacuaa Eyacuiñajjija equi-aijo nequiya queatainee acaje bamajje, quehuapoquicuajicue eyiyo nequicahuasijje. 15Ojjaña joya oja equishashajo anicuana dejjacuaa Eyacuiñajjija equi-aijo nequiya queatainee acaje shajja-ajjamajje poquicuajica'yojji. Oja equiyasijje nobiquinanaca'yoajja oja aquianacuana, camacuana dojo'yohua. 16Oya jayojja pea-ai joya oja quejo chacochacoanicuana jamatii poquicuajica'yojji ojaya equiyasijje huacuaya poqui'yojjimatii oja daqui ejeanana ani jjehua'yohua. 17Queacamajaneenee poaje joya oejji ani eponacuanaja. Joya tojjojo ba'e bacuajji anicuanaja pea-ai queacamajaneenee poaje equehuapoquicuaji'yojji ma pojjajotiiya. 18Eyacuiñajjinijje oe mimicue ma quijje miquianaya quehuapoquicuajije'yo epojja queahuoe epojji pojjeama ba'ijo. 19Ma quijje queacamajaneenee epo'yojji ba'icuanajo poajo queahuisonee jiquio meshijo ba'ecacuana queaneenee pocaje'yo. Ma ecua yahuajoneinei meshi panacapoajo dejjacuana eponacuana pea-ai queanee pocapoa jama pojjeama ca jjeya pocaje'yo. Quijje pea-aiya chama' poaje quiajjaya queaneenee epo'yojji cuanaja. 20Eyacuiñajjiya ma quijje ojjañacuana queacamajaneenee pomee'yojji iyeba'ihuiso jama epojji mipomeecajo chama'neinei pocaje'yo cuana, che oema'nei eshe ba'eje. Jamajjeya Eyacuiñajjiya iyeba'ihuisonei queacamajaneenee pomeecaje oja babacacuana ojaya queajeanee poanijojoya.
21—Dejjacuaa esohui jama acaje ba'a: “Bacue, jiquia aje Eyacuiñajjija huoojea ese nahue'yojji poani.” ¡A'a oya shajja-ajjajji! Peaa jama acajo ba'a: “Chojja, coma pojjeama, joma nequi caca oe Eyacuiñajjija huoojea ese nahue'yojji epojji.” Ohua jama acajo, ¡a'a e'ejojonei acani poso ajji! 22Queahuisocuana esohuihuohuijjinishocuana poeje siajjepohua. Peacuaa ca Eyacuiñajjija huoojea poani miquiana nahue'yohua anishocaje. Dejjaja ajjima'neineicuana ohuaya queahuiso apea-aicañaje queahuisocuana ojo ejjashahuabaqui'yojji. Eyacuiñajjija epeejjicuana oja babaca siajje pea-ai acañaje cuaa ojo ejjashahuabapea-aiqui'yojji nisho. 23Shajja-ajjaneicue, eyaya quiana jjeyanei queaja'a huohuiaña dejjacuana siajjepojji poejjimahuajo miquianaya ohua edasiacapoanijje.
Dejjapojji epo poeje o'oya Eyajje nequioqueje
(Mt 24.29-35,42,44; Lc 21.25-36)
24—Ma quijje ba'icuana ojjañacuana queacamajaneenee po'yojji oe poajo eshequi jijipajeaje'yo. Ba'i pea-ai jijipajeaje. 25Majametacuana eyatahuatahuajo nequi oqueje'yo. Ojjaña eyatahuatahuahuasijjeyee huehuahuehuaje janobajjimanei. 26Majoya queahuisocuaa ma oja bajjimatii poanaje ja'anei bacaje eyahuasijje Dejjapojji epo botejjee nequiya queaca'aneetii poaniya jeaja'aja'acaoqueje meshiyasijje ojjañacuanaja oya ebajji. 27Ohuaya angelcuana ojjaña meshiyasijje huoojeaoqueaje. Eeno poeanimijiyasijje, eeno poquianimijiyasijje pea-ai huoojeacaje. Eshequi jaasohuanimijiyasijje, eshequi oquequianimijiyasijje pea-ai angelcuana huoojeacaje ojjaña oja babaca oja nahue'yocuana jjequi'yohua ojee oque ejjachichameequi'yojji.
28—Jamajjeya jiquio eya huohuiaña esohui queaja'a ebajji higo acuijo ebana jjashahuabapea-aiquicue. Oja aacuana shashaje'yo eiña'yojji bamajje miquiaaya baña nayaja poechipi'yani. 29Oya jayojja jiquio ecua higo acui shasha'yani ebajji jjeya nayaja poechipi'yani jama pea-ai jiquio eya huohuinaje esohui jama poajoya eya Dejjapojji epo poeje o'oya baje quiaa. 30Eyaya quiana e'ejojonei huohuiaña. Eyacuiñajjiya jiquio eya huohuiaña esohui oya jayojjaya ajeyocaje'yo jiquio jjeya judiocuana eshe ba'eca manojeyojeyo'yojjimahuajo. 31Jiquio eyatahuatahua majametacuana nequijji chama'yotii poaje. Jiquio meshi pea-ai ojjaña ba'ecacuana nequijji chama'yotii poaje. Ecuea esohui caca oe jiquio eyaya aña anitiitiipoquije'yo. Ojjañatii ecuea esohui oya jayojjaya ohuaya ajeyocaje'yo.
32—Ojjañacuiñajjicuanaja che oema'neija bajjimanei poani ache pojjajo shai, achenei eshequi nequijo shai Eyacuiñajjiya jama pomeecaje e poeo'oyajjijo. Angelcuanaja pea-ai bajjimaneinei e poeo'oyajjijo, ecuea pea-ai oja Bacuaejjaja bajjimaneinei. Ecue Chii Eyacuiñajjija caca oe ojayanei eba acheshono ohuaya jamaya pomeejeyocaje e poeo'oyajjijo.
33—Jamajjeya quiana oe e poeo'oyajjijo jjashahuabaneiquicue, jjaishoatiitiiquipoquicue pea-ai miquianaja bajjimajojoya acheshono shai eya miquianaja Emeshimesenei poani poecuajije o'oya. 34E poeo'oyajji jama jayojja poaje ba'a: Equimese dejjaa pea meshi queahueshahuasijje poquijjimahuaa oja echacojjicuana huohuicananaje oja equi, aquianacuana jaahuanajjijo. Ohuaya huohuicananaje cuana oja chacopoquiajjijo. Esecuejjanijaahuanajji poani pea-ai huohuicananaje esecuejjani queyaneijji. 35Jamajjeya quiana oe jjaishoatiitiiquicue ejo jiquio ecua oja echacojjicuaa equimese acheshono poeje'yo ishoacapoquiani jama pea-aiya po-anicue ejo. Ache pojjajo shai achenei eshequi nequijo eya poeje o'oya miquianajaya bajjimanei poaje eya. Sinepoquianijo, mecashono pojja'a, jjapojjaquiyasijje pojja'a, cachinayahue mimiquijo pojja'a eya poeje o'oya. 36Jamajjeya jjaishoatiitiiquicue ejo e poeo'oyajji epojja poeajo miquianaya ecahui jaa jayojja e baña poanijje. 37Jiquio eya miquiana huohuiaña esohui ojjañacuanaja shajja-ajjajji huohuiaña miquianajayanei pojjeama. Jamajjeya quiana oe jjaishoatiitiiquicue ejo, apoa epo anicue.—
Currently Selected:
MARCOS 13: ESE
Highlight
Share
Copy
Want to have your highlights saved across all your devices? Sign up or sign in
Copyright Mision Nuevas Tribus, 2006
