Aramid 5
5
To panaglibac de̍ Ananyas nge̍ Sapira
1Ngem uwed met isa nga lalaki nga agnagan ka Ananyas se̍ ya asawa na nga Sapira. Uwed pe̍ nilaku da nga ginet da. 2Ngem igida nga agasawa, niranta da nga binati ya duduma nga bayad nito nilaku da. Dikad pe̍ madi niyawat ne̍ Ananyas nga amin kadito apustule̍s.
3Ket kinunen ne̍ Pe̍dru igina, “Ananyas, ape̍ pinalubusam nge̍ Satanas nga mangituray ikew, nga agbusid ka iya Ispiritu Santu win? Ta binatim met ya duduma nga bayad nito ginet mu. 4Kuwam met to ginet itun, ito madi pekkem nailaku. Ket orey to nilaku mun, kuwam met pe̍ to bayad na, ket madi ka met napilit nga mange̍cde̍. Ngem ape̍ nilibac mu ya kinapudnu maipanggep iya binatim? Bekken nga dakami nga toley ya binusidam, no di lugud e̍ Apu Diyus!” kunen na.
5Ket apaman nga nagicna ne̍ Ananyas to kinagi ne̍ Pe̍dru, nalicwad met nga natey yin. Ket nansing ngarud diya amin nga nakadamag idi. 6Ket diya babagu nga uwed iyan, nawe̍ da nga kinabat to bangkay nito Ananyasin, se̍ da binuligan, nga nawe̍ nitamen nin.
7Ket kalpasan banda tellu nga uras, inumbe̍tin to asawa na nga Sapira ito edyan de̍ Pe̍dru. Ket di na pekkem em-emmu to napasamac.
8Ket kinunen ne̍ Pe̍dru igina, “Ibagam kay no amin to bayad nito ginet nu ket ne̍cde̍ nu dakami,” kunen na.
Ket kinunen ne̍ Sapira, “Bo met. Ne̍cde̍ mi amin nan,” kunen na.
9Ket kinunen manin ne̍ Pe̍dru igina, “Ape̍ nagtulagan nu nga agasawa nga sigsigiren nu met ya Ispiritu niya Apu? Orey singem, sinumpuc kin dito nawe̍ nangitamen e̍ asawam. Uwed da mettin iya laskig, ket ikew met ya buligan dan,” kunen na.
10Ket tutu met, ata pagamwan nas nga nalicwad met pe̍ nge̍ Sapira nga natey yin iya sangu mettas ne̍ Pe̍dru. Ket ito imuneg dito babagu, nasingen da nga natey met pe̍ yin, ket binuligan da pe̍ nga nawe̍ nitamen iya abay niya tamen nito asawa nan.
11Itu nga mansing nga unay dito amin nga kamkameng niya bungguy mamati, se̍ amin diya duduma nga nakadamag ito napasamac.
Dito nakaskasdaaw nga inar-ariman dito apustule̍s
12Ket to Purtiku ne̍ Sulumun ito emwag niya Te̍mplu, itu ya pe̍yeng nga naguurnungan dito mamati itun. Ket adu diya pagilasinan se̍ nakaskasdaaw nga naar-ariman gapu kadiya apustule̍s nga nagsedseddaawan diya toley. 13Ngem diya duduma nga bekken nga kabulun dito mamati, awan igida ya nakaitured nga nakitipun ito bungguy diya mamati. Ngem rinaem latta diya toley to bungguy. 14Ket imad-adu ya bilang diya namati nga nakitipun ito bungguy, ta adu diya lalaki se̍ babey nga namati iya Apu.
15Ket gapu kadito nakaskasdaaw nga inariman dito apustule̍s, niruwar diya toley diya agsacsakit. Nipen da da iya kalsada, nga nipaida da dito agsakit iya nagipaidaan da nga kama winno kasew, tasun no tumalib kanu igida nge̍ Pe̍dru, orey no maniniwingan na da ngas kuma, bareng no malaingan dan. 16Adu pe̍ diya toley nga inumbe̍t nga gayat kadiya il-ili iya le̍but niya He̍rusale̍m nga nage̍lbe̍t kadiya agsacsakit se̍ diya malugluganan ka sairu. Ket nalaingan da met nga amin.
To pannakaibalud dito apustule̍s
17Ngem napalaus ya iman nito kangatuwan nga agsirsirbi iya Te̍mplu, se̍ dito kabulun na nga kamkameng niya bungguy diya Sadusiyu. 18Ket pinatkem da manin dito apustule̍s, se̍ da da pinaibalud iya pagbaludan niya ili. 19Ngem ya napasamac, ket ito gumabi yin, uwed inumbe̍t nga anghe̍l niya Apu nga nawe̍ nangilukat kadiya giset nito pagbaludan, se̍ na pinaruwar dito apustule̍s. Ket idi to kinunen nito anghe̍l igida: 20“Mawe̍ kayu iya Te̍mplu, ta ibaga nu kadiya toltoley ya amin maipanggep idi nga kabarbaru nga biyag,” kunen na.
21Ket tinungpal da ngarud to kinagi na, ta apaman nga imagsapa, nawe̍ da iya Te̍mplu, ket nangisuru da manin.
Ket iyan mettas nga agsapa, nagpamiting to kangatuwan nga agsirsirbi iya Te̍mplu se̍ dito kabulun na. Miniting na amin dito kamkameng diya kunse̍hale̍s, agraman pe̍ diya amin nga panglakayen diya iIsrae̍l. Ket uwed da nibon na nga nawe̍ iya pagbaludan nga mangpalbe̍t kadito apustule̍s. 22Ngem ito nakadateng dito naibon iya pagbaludan, awan met gayam dito apustule̍s antuni nin. Dikad pe̍ simoli da nga nawe̍ nangibaga. 23Ket nipadamag da nga kinunen da, “Ito nakadateng kami iya pagbaludan, sigigiset se̍ situtulbec met. Uwed met pe̍ diya agbanbantay iya gagayangan, ngem ito linukatan mi to gagayangan, awan gayam toley iya uneg gin,” kunen da.
24Ket to kapitan dito guwardiya iya Te̍mplu se̍ dito pangpangulu diya agsirsirbi iya Te̍mplu, ito nagicna dan to kinunen dito naibon, nasikuran da ngarud maipanggep ito napasamac. 25Ngem itun, uwed inumbe̍tin nga nagpadamag igida, nga kinunen na, “Dito toley nga nibalud nu, uwed da met iya Te̍mplu win nga mangisursuru kadiya toltoley,” kunen na.
26Ket to kapitan se̍ diya guwardiya, nawe̍ da ngarud nimet dito apustule̍s. Ngem madi da da pinilit, ta mansing dito guwardiya kadiya toltoley, kaynun no uburen da dito guwardiya.
To pannakaisangu de̍ Pe̍dru kadito agtuturay
27Ket nilnec dito guwardiya diya apustule̍s, se̍ da da nipasangu kadiya kunse̍hale̍s. Ket to kangatuwan nga agsirsirbi iya Te̍mplu, kinunen na, 28“Pinaritan mi met ya panagisuru nu maipanggep iya kinaturay ne̍ Je̍susin. Ape̍ nga niwaragawag nu manin ya sursuru maipanggep igina kadiya amin nga toltoley idi nga He̍rusale̍m? Se̍ bekken nas nga iyan, ta dakami met ya panggep nu nga pabasulen iya pannakatey na,” kunen na.
29Ket simungbat ngarud nge̍ Pe̍dru se̍ diya duduma nga apustule̍s nga kinunen da, “Napatpateg met dakami ya panagtungpal e̍ Apu Diyus ngem iya panagtungpal iya bilin toley. 30Ket no dakayu, pinatey nu met nge̍ Je̍sus, ta nipailansa nu ka krus. Ngem e̍ Apu Diyus nga Diyus dito am-ama tida, pinagungar na met. 31Se̍ nipangatu pe̍ ne̍ Apu Diyus iya kadayawan nga saad. Ket iya agten iyan, uwed din nge̍ Je̍sus iya madiwanan na nga mangituray se̍ mangisalakan ka toley. Agten iyan ngarud ya winangel ne̍ Apu Diyus, tasun uwed dactida nga Israe̍lita ya gundaway nga agbabawi se̍ tasun uwed pakapakawanan tida pe̍. 32Ket dakami diya mangibagbaga iya pudnu maipanggep kadidi nga banbanag. Se̍ bekken nas nga dakami ya mangibagbaga, no di lugud pe̍ ya Ispiritu Santu nga nipaay ne̍ Apu Diyus dakamin nga sumurut igina.” Itu yan to nisungbat de̍ Pe̍dru ito kangatuwan nga agsirsirbi iya Te̍mplu.
33Ket ito nagicna dito kunse̍hale̍s to kinagi de̍ Pe̍dru, nakaunget da nga unayin, ket gabay da kuma nga patayen dan. 34Ngem uwed isa nga Parisiyu antuni nga isa nga manursuru iya Linteg Hudyu. Gamalye̍l ya nagan na, nga isa nga kunse̍hal, ket maraem met pe̍ kadiya amin nga toley. Nagsikad nge̍ Gamalye̍l, se̍ pinaruwar na nga nona pekkem dito apustule̍s, 35se̍ nakitbar kadito pada na nga kunse̍hale̍s nga kinunen na, “Padac nga iIsrae̍l, tanangen tida kuma nga nalaing no nagan ya pamaayan tida kadiyan nga toley. 36Ta malagip tida kuma to Te̍yudas itun nga nagkunen nga igina kanu ya isa nga dackel nga agturay, se̍ uwed pasar eppat nga gasut kadito pasurut na itun. Ngem ito napatey to Te̍yudasin, nawarawara dito pasurut na, ket awan pe̍ pulus nagbanbanagan nan.
37“Ket malagip tida kuma pe̍ nga kalpasan niyan, uwed manin to Hudas nga iGalilya, ito timpu nga nagpase̍nsus ya gubiye̍rnu itun. Ket uwed pe̍ dito inawis na nga nakitipun igina, ngem natey met pe̍. Ket dito pasurut na, ket nawarawara da ngasin.
38“Itu nga agten pe̍ iyan didi nga toley. Ya kunec, ket madi tida kuma nga piliten da. Madi tida da kuma nga bibiyangan, ta no tumaud ngas ka toley diya pangpanggep winno wangwanglen da, awan mettas nad pagbanbanagan na. 39Ngem no e̍ Apu Diyus nga tutu ya nangibon igida, ket pulus ngarud nga madi tida maabac da, orey nagan na ya pampamaayen tida igida. Ket no agten iyan, kaynun no e̍ Apu Diyus lugudin ya kuntraen tidan.” Itu yan to kinagi ne̍ Gamalye̍l kadito kunse̍hale̍s.
Ket nipangag da ngarud to kinagi na. 40Ket pinalnec da manin dito apustule̍s, se̍ da nipabaut da, se̍ da da binilin manin nga madi da kanu mangikasaba ka maipanggep iya kinaturay ne̍ Je̍sus, se̍ da da winayawayaanin.
41Ket siraragsac nga pimanaw dito apustule̍s ito mimitingan diya kunse̍hale̍s, ta emmu da nga gapu mettas iya winangwangel da maipanggep iya kinaturay ne̍ Je̍sus, nibilang ne̍ Apu Diyus da nga maikari nga aglak-am iyan nga pakaiyal-alyewwan da. 42Ket inalgew nga nawe̍ da iya Te̍mplu se̍ kadiya babaley, nga pe̍yeng da nga mangisursuru se̍ mangikaskasaba iya Makaparagsac nga Damag, nga e̍ Je̍sus, ket igina ya pudnu nga Kristu nga nibon ne̍ Apu Diyus.
Currently Selected:
Aramid 5: YBT
Highlight
Share
Copy
Want to have your highlights saved across all your devices? Sign up or sign in
© 1990 New Tribes Mission, Sanford, FL 32771-1487, USA.
Printed in the Philippines.
