Lukas 2
2
To pannakaiyanac ne̍ Je̍sus
Mat. 1:18-25
1Ket itun nga timpu, uwed bilin nito Ari Se̍sar Agustu nga mailista kanu diya amin nga toltoley. 2Itu yan to nona nga pannakailista diya toley, bayat nito panaggube̍rnadur ne̍ Kire̍nyu ka prubinsiya nga Sirya. 3Ket iya agten iyan, nawe̍ ngarud diya amin nga toley kadiya ili da, tasun agpailista da.
4Ket e̍ Huse̍, nagedyan ka Nasare̍t enna prubinsiya nga Galilya. Ket nawe̍ met ka prubinsiya nga Hudya, ito ili nito Ari Dabid, nga maawagan ka Be̍tle̍he̍m, ta nagtaud nge̍ Huse̍ iya kapututan nito Dabid. 5Nawe̍ ngarud nagpailista, ket nibulun na nge̍ Marya nga naitulag igina, ket nabucsit itunin.
6Ket ito uwed da enna Be̍tle̍he̍m, nadatnganin ya panaganac ne̍ Marya. 7Ket lalaki met ya niyanac na, nga itu to inauna nga anac na. Ket linampinan na, se̍ na nipaida ka papakanan ka animal, ta awan met pagedyanan da ito pagdadagusan nga baley.
Dito agay-aywan ka karne̍ru nga nakasingen kadito anghe̍le̍s
8Ket iya isa nga lugar nga masakupan niya Be̍tle̍he̍m, uwed da agay-aywan ka karne̍ru iya pakarsu da iya gabi. 9Ket itun, uwed met isa nga anghe̍l niya Apu nga nagpasingen igida, ket nadarangan da mettin iya darang niya dayag niya Apu. Napalaus ngarud ya ansing dan. 10Ngem kinunen nito anghe̍l igida, “Madi kayu mansing. Ta makapaanggem met nga unay ya e̍lbe̍t ku nga damag dakayu, ket pakaanggemman pe̍ nga tutu nidi diya amin nga toltoley. 11Ta ita mettas, enna ili nito Ari Dabid, uwed naiyanac kin nga Mangisalakan dakayu, nga itu met ya Kristu nga Apu. 12Agten idi ya pagilasinan nu: Uwed maaskuran nu nad nga ke̍bit nga nalampinan se̍ naipaida iya papakanan ka animal,” kunen na.
13Ket pagamwan da, uwed dackel nga bungguy anghe̍le̍s nga nagparang nga gayat ka langit, nga kabulun nito isa nga anghe̍l. Ket nagdaydayaw mettin dito anghe̍le̍s e̍ Apu Diyus, nga kinunen da,
14“Madaydayaw nge̍ Apu Diyus
nga uwed iya kangatuwan nga edyan.
Ket idi nga lubung,
uwed kuma talna
kadiya toltoley nga pakaay-ayuwan na,”
kunen da.
15Ket ito nakapanaw dito anghe̍le̍s nga simoli ka langitin, nagtetebbar ngarud dito agay-aywan ka karne̍ru, nga kinunen da, “Tidan enna Be̍tle̍he̍min, ta we̍ tida ngarud singen yani nga napasamac nga nipakaemmu niya Apu dactida,” kunen da.
16Ket inalistuwan da ngarud ya nawe̍. Ket nasmac da de̍ Marya nge̍ Huse̍, se̍ nasingen da met ya ke̍bit, nga naipaida iya papakanan ka animal. 17Ket ito nasingen dito agay-aywan ka karne̍ru to ke̍bit, nipakaemmu dan to nibaga nito anghe̍l igida maipanggep iyan nga ke̍bit. 18Ket nasdaawan ngarud dito amin nga nakagicna iya nipadamag igida dito agay-aywan ka karne̍ru. 19Ket e̍ Marya, sinalimetmettan na ngarud amin didi, se̍ inut-utub na nga nalaing.
20Ket dito agay-aywan ka karne̍ru, nagawir dan nga sidadayaw se̍ siiiyaman e̍ Apu Diyus, gapu kadito amin nga nagicna se̍ nasingen da, nga maikanatad ngarud kadito nibaga nito anghe̍l igida.
To pannakapanagan ne̍ Je̍sus
21Ket kalpasan walu nga algew, ito algew niya panangpakugit da iya ke̍bit sigun iya ugali diya Hudyu, pinanaganan da ka Je̍sus, nga itu yan to nipanagan nito anghe̍l ito sacbay nito pannakainaw na.
To panangipen de̍ Huse̍ e̍ Je̍sus iya Te̍mplu
22Ket nadatngan itun ya timpu nga panangtungpal de̍ Huse̍ nge̍ Marya iya paglinteggan maipanggep iya panagdalus da maikanatad iya Linteg nito Muyse̍s maipanggep ka aganac. Ket nipen da ngarud ya ebbing enna He̍rusale̍m, tasun ipaay da iya Apu. 23Ta naisurat iya Linteg niya Apu nga, “Amin nga inauna nga anac nga lalaki, maibilang da nga maipaay iya Apu.” 24Ket niranta met pe̍ de̍ Huse̍ ya agidatun ennan, sigun iya kustu nga pagdatun nga naibilin iya Linteg niya Apu, nga kunen na iya Linteg, “Sangaparis nga pagaw, winno duwa nga ugbun kalapati.”
25Ket enna He̍rusale̍m itun, uwed isa nga lakay nga agnagan ka Simyun. Nalinteg yan nga toley, se̍ managtungpal iya pammati na, ket pinadpadaanan na nga sinanama ya pannakaliwliwa diya iIsrae̍l. Ket uwed pe̍ igina ya Ispiritu Santu. 26Ket nipaltiing niya Ispiritu Santu ito Simyun itun nga madi pekkem kanu matey agingga nga di na masingen ya Kristu nga ibon niya Apu. 27Ket iya agten iyan, gapu iya panangidalan niya Ispiritu ito Simyun, nawe̍ nimuneg iya emwag niya Te̍mplu. Ket itun, diya naganac iya ebbing nga Je̍sus, nipen da met ya ebbing iya Te̍mplu win, tasun tungpalen da para igina to bilin niya Linteg. 28Ket to Simyun, nawe̍ na nimet nga sinakuruy ya ebbing, ket nagdaydayaw ngarud e̍ Apu Diyus, nga kinunen na,
29“Apu nga Mannakabalin,
natungpalin to karim iyaken nga tagabum.
Dikad pe̍ orey no ipalubus mu nga matey yac kun,
ta sitatalna ngac mettin.
30Ta nasingec kun ya nibon mu nga mangisalakan,
31nga itu ya nisaganam
iya imatang diya amin nga toltoley.
32Igina ya arig nga dilag nga mangwada
kadiya bekken nga Hudyu,
se̍ ya pakaidayawan diya toley mu nga iIsrae̍l,”
kunen na.
33Ket nasdaaw ngarud diya naganac ito ebbing gapu ito kinagi nito Simyun maipanggep ito ebbing. 34Ket nikararagan ne̍ Simyun da, ket kinunen na e̍ Marya nga ina nito ebbing, “Ngarud, naipaay met yani nga ebbing nga pakaipaseggeddan se̍ pakaipangatuwan diya adu nga toley idi nga Israe̍l. Ket igina pe̍ ya naipaay nga pagilasinan nga kunkuntraen nad diya toley. 35Agten iyan nad ngarud, tasun maiparangarang diya nalimed nga panpanunut diya adu nga toltoley. Ket ikew, mapasakit nad ya nakem mu, nga arig nga uwed kampilan nga manglessuc iya pusum,” kunen na.
36Ket uwed met pe̍ antuni ya isa nga bacbaket nga mammadtu, nga agnagan ka Ana. Anac ne̍ Panuwe̍l nga kapututan nito Ase̍r. Ket bacbaket nga unayin to Ana. Ket pitu nga dagun nga nagdenna da ya asawa na itun, nanipud ito panagasawa da. 37Ket kalpasan niyan, nabalu mettin agingga nga uwed walu nga pulu ket eppat nga dagun nan. Ket kanayun nga uwed to bacbaket iya Te̍mplu, nga madi pumanpanawin, ket algew se̍ gabi ya panagsirsirbi na nga sidadayaw antuni iya panagkararag na se̍ panangitured na nga di mangan tasun isnup na ya agdaydayaw.
38Ket itun mettas nga uras nga kauwed de̍ Huse̍ enna Te̍mplu, inumbe̍t met to Ana ito edyan da, ket nagyaman ngarud met e̍ Apu Diyus. Ket nagkagkagi pe̍ to Ana itun maipanggep iya ebbing, kadiya amin nga toley antuni nga mangpadpadaan pe̍ nga sinanama iya pannakawayawaya niya ili da nga He̍rusale̍m.
39Ket ito natungpal de̍ Huse̍ nge̍ Marya ngin ya amin nga ipaannung nito Linteg niya Apu maipanggep ka ebbing, simoli da ka Galilya iya ili da nga Nasare̍t. 40Ket dimackel se̍ bimileg to ebbing nga Je̍sus, se̍ nasirib nga unay, ket uwed met igina ya panangipateg ne̍ Apu Diyus.
Ya ebbing nga Je̍sus enna Te̍mplu
41Ket ugali dito naganac e̍ Je̍sus ya mawe̍ nga dinagun enna He̍rusale̍m no padaya nga maawagan ka Padaya Nitatalib. 42Ket ito agdagun nge̍ Je̍sus ka sangapulu ket duwa ngin, nawe̍ da ngarud nakipadaya ka He̍rusale̍m sigun mettas iya ugali da.
43Ket ito nalpasin to padaya, nagawir de̍ Huse̍ nge̍ Marya ngin. Ngem to ebbing nga Je̍sus, nabati nga gennung ka He̍rusale̍m, nga madi met em-emmu dito naganac igina. 44Ket isa nga algew dan nga nanaldalan, nga pagarup da no uwed nga naibulun nge̍ Je̍sus iya bungguy da. Ngem ito sinapsapul da kadiya kabulun da nga kakabagiyan se̍ gagayyem, awan met nasmac da. 45Ket ito madi da nasmac, simoli da ngarud enna He̍rusale̍min nga nangsapsapul igina.
46Ket ito maikatlu nga algew, nasmac da mettin ka Te̍mplu. Nakipagtugtugew met ya ebbing kadiya manursuru nga Hudyu, nga agdengdengngeg se̍ agsalsaludsud igida. 47Nagseddaaw diya amin nga nakagicna igina gapu iya sirib na se̍ diya nalaing nga sungbat na.
48Ket ito nasingen dito naganac igina, nasdaawan da met, ket kinunen nito ina na, “Ape̍ inariman mu yani dakami, iyong? Napalaus met ya danag mi nge̍ amam nga nangsapsapul ikew,” kunen na.
49Ket kinunen ne̍ Je̍sus igida, “Ape̍ nga sapsapulen dac? Madi kayu kad emmu nga masapul nga ya baley ne̍ Amac ya edyan ku?” kunen na. 50Ngem madi da met naawatan ya kaipapennan nito kinagi na igida.
51Ket nibulun ngarud nge̍ Je̍sus igida nga nagawir enna Nasare̍tin, ket nagtudyu met nga pe̍yeng igida. Ket e̍ ina na, sinalimetmettan na ngarud amin didi nga pasamac. 52Ket e̍ Je̍sus, simirib, se̍ dimackel, ket bimileg pe̍ ya panaggustu ne̍ Apu Diyus se̍ diya toley igina.
Currently Selected:
Lukas 2: YBT
Highlight
Share
Copy
Want to have your highlights saved across all your devices? Sign up or sign in
© 1990 New Tribes Mission, Sanford, FL 32771-1487, USA.
Printed in the Philippines.
