Lukas 3
3
To panangasaba nito Juan nga Mammautisar
Mat. 3:1-12; Mar. 1:1-8; Juan 1:19-28
1Ito maikasangapulu ket lima nga dagun nito panagturay nito Tibe̍ryu nga Ari Se̍sar, ket e̍ Punsiyu Pilatu ya gube̍rnadur ka Hudya itun. E̍ He̍rude̍s met to agturay enna Galilya. Ket e̍ Pe̍lipe̍ nga kabsat na, igina met ya agturay iya masakupan niya Iturya se̍ Trakunite̍. Ket e̍ Lisanyas ya agturay ka Abile̍ne̍ itun. 2Ket diya kangatuwan nga agsirsirbi iya Te̍mplu itun, ket de̍ Anas nge̍ Kaipas.
Ket itun mettas nga timpu, nadatngan ya panangbilin ne̍ Apu Diyus ito Juan nga anac nito Sakaryas, bayat nito kauwed nito Juan ka away. 3Itu nga nawe̍ to Juan kadiya amin nga luglugar nga denni iya wangag Hordan, nga nikasaba na nga masapul nga agbabawi diya toltoley, nga agpabautisar da, tasun maawat da kuma ya pannakapakawan diya basbasul da. 4Ket maikanatad met yani ito kagi nito mammadtu nga Isayas nga naisurat ito libru na, nga kunen na,
“Enna away,
uwed mangip-ipkaw nga kunen na,
‘Isagana nu ya dalan niya Apu!
Palinteggen nu ngarud ya dalanen na!
5Masapul nga magaboran diya amin nga losong,
se̍ masimpa diya amin nga tagtageytey
se̍ mungmung-ul.
Masapul nga mapalinteg diya nakillu,
se̍ maistimar diya le̍kkale̍kkaong nga dalan.
6Ket masingen nad met diya amin nga toltoley
ya panangisalakan ne̍ Apu Diyus,’”
kunen nito mammadtu itun.
7Ket adu met diya toley nga nawe̍ ito edyan ne̍ Juan, tasun pabautisaran da igina. Kinunen met ne̍ Juan kadiya toltoley, “Arig kayu was nga putputut diya nagita nga malaga! Ape̍? Nagan kad ya nangibaga dakayu nga masapul nu nga ilisi ya beggi nu iya maadpangan nga pannakaukum? 8Diya wangwangel nga tumutup iya napudnu nga panagbabawi kuma lugud ya ipasingen nu iya panagbiyag nu. Ket di nu met kunkunen iya lemlemmet nu nga, ‘Orey a, ta e̍ Abraham met to am-ama mi.’ Bay-an nu ngarud ya agten iyan nga panpanunut. Ta ya kinapudnu na, orey didi ngas nga batu, mabalin met pe̍ nga pagbalinen ne̍ Apu Diyus nga an-anac nito Abraham, no gabay na. 9Ngem ita, arig nga uwed met mailaylayat nga wasey yin nga maikelleng kadiya gamgamut diya kayu. Dikad pe̍ diya amin nga kayu nga madi mamisic ka nabaru, macleng da ngarud, se̍ maitemsit da iya apuy,” kunen na.
10Ket dito naggigicna, nagsaludsud da met, nga kinunen da, “Nagan ngarud ya masapul nga wanglen min, tasun madi dumateng yan dakami?” kunen da.
11Ket simungbat ngarud nge̍ Juan nga kinunen na, “Agten idi ya wanglen nu: Ya uwed duwa nga badu na, masapul nga e̍cde̍ na ya isa iya awan badu na. Se̍ ya uwed kanen na, masapul nga ibingayan na diya awan kanen na,” kunen na.
12Ket uwed da met pe̍ agsingsingir ka buis nga nawe̍ agpabautisar e̍ Juan, ket kinunen da, “Mistru, nagan ya masapul nga wanglen mi?” kunen da.
13Ket kinunen ne̍ Juan igida, “No agsingir kayu ka buis, madi nu kuma ngarud labsan ya singiren nu ngem iya tumutup,” kunen na igida.
14Ket uwed da met pe̍ suldadu nga nagsaludsud igina, nga kinunen da, “No dakami, nagan ya masapul nga wanglen mi?” kunen da.
Ket kinunen na igida, “Madi nu piliten nga alaken ya kuwarta diya orey nagan na, se̍ madi kayu pe̍ agbusid nga agpabasul ka toley tasun maalac nu ya kuwarta da. Basta mapnec kayu kuma ngasin iya suwildu nun,” kunen na.
15Ket bimileg met ya namnama diya toltoley yin, ket kinunkunen da iya lemlemmet dan nga bareng no e̍ Juan met ya Kristu nga naipadtu. 16Itu nga kinunen ne̍ Juan igida nga amin, “Ket iyaken ita, danum ya pamautisar ku dakayu. Ngem uwed nad umbe̍t nga sumarunu iyaken nga dacdackel ya pannakabalin na ngem iyaken, ket di yac pe̍ maikari nga orey no mangukas ngas kadiya listun diya palloka na. Ket igina, ya Ispiritu Santu se̍ apuy met ya pamautisar na nad dakayu. 17Ta arig met nga ic-icman nan ya pagsap na ka in-gikan, tasun urnungen na ya in-gikan se̍ italipen nan iya alang na. Ngem ya essap nga gennung, ipoor na met ka apuy nga di pulus nga makusep,” kunen na.
18Ket agten met iyan se̍ adu pekkem to pamagbaga nga nibaga nito Juan kadiya toltoley iya panangikasaba na maipanggep iya Makaparagsac nga Damag.
19Ket to He̍rude̍s nga agturay antuni, pinabasul met ne̍ Juan. Pinabasul na ngarud, gapu iya panangikabbalay nito He̍rude̍s e̍ He̍rudyas nga asawa mettas nito kabsat ne̍ He̍rude̍s, se̍ gapu pe̍ kadiya duduma nga winangwangel na nga dake̍c. 20Ket to He̍rude̍s, nakarkaru ya winangel na nga dake̍c ngem kadiyan, ta pinaibalud na met nge̍ Juanin.
To pannakabautisar ne̍ Je̍sus
Mat. 3:13-17; Mar. 1:9-11
21Ket agten idi to napasamac itun: Ito pannakabautisar dito adu nga toltoley, nairaman met pe̍ nge̍ Je̍sus nga nabautisaran. Ket ito agkarkararag pekkem nge̍ Je̍sus, arig met nga nalukatan ya langitin. 22Ket nagpasegged met igina ya Ispiritu Santu nga sibebeggi, nga umasping ka kalapati. Ket uwed pe̍ nagicna nga timec antuni nga nagtaud ka langit, nga kinunen na, “Ikew ya Anac ku nga dungdungnguwec. Ikew ya pakaay-ayuwac,” kunen na.
Ya kapuunan ne̍ Je̍sus
Mat. 1:1-17
23Agtellu nga pulu ya dagun ne̍ Je̍sus ito nirugi na to gagara na. Ket sigun ito kunen diya toley, anac kanu met ne̍ Huse̍. Ket to Huse̍, anac nito E̍li.
24To E̍li, anac nito Matat, to Matat, anac nito Le̍bi, to Le̍bi, anac nito Me̍lki, to Me̍lki, anac nito Hane̍, to Hane̍, anac nito Huse̍.
25To Huse̍, anac nito Matatiyas, to Matatiyas, anac nito Amus, to Amus, anac nito Nahum, to Nahum, anac nito E̍sli, to E̍sli, anac nito Nage̍.
26To Nage̍, anac nito Maat, to Maat, anac nito Matatiyas, to Matatiyas, anac nito Se̍me̍i, to Se̍me̍i, anac nito Huse̍, to Huse̍, anac nito Huda.
27To Huda, anac nito Huwana, to Huwana, anac nito Re̍sa, to Re̍sa, anac nito Surubabe̍l, to Surubabe̍l, anac nito Se̍yaltiye̍l, to Se̍yaltiye̍l, anac nito Ne̍ri.
28To Ne̍ri, anac nito Me̍lki, to Me̍lki, anac nito Addi, to Addi, anac nito Kusam, to Kusam, anac nito E̍lmudam, to E̍lmudam, anac nito E̍r.
29To E̍r, anac nito Huswe̍, to Huswe̍, anac nito E̍liye̍se̍r, to E̍liye̍se̍r, anac nito Hurim, to Hurim, anac nito Matat, to Matat, anac nito Le̍bi.
30To Le̍bi, anac nito Simyun, to Simyun, anac nito Huda, to Huda, anac nito Huse̍, to Huse̍, anac nito Hunan, to Hunan, anac nito E̍lyakim.
31To E̍lyakim, anac nito Me̍lya, to Me̍lya, anac nito Me̍na, to Me̍na, anac nito Matata, to Matata, anac nito Natan, to Natan, anac nito Ari Dabid.
32To Ari Dabid, anac nito He̍sse̍, to He̍sse̍, anac nito Ube̍d, to Ube̍d, anac nito Buas, to Buas, anac nito Salmun, to Salmun, anac nito Naasun.
33To Naasun, anac nito Aminadab, to Aminadab, anac nito Aram, to Aram, anac nito Arni, to Arni, anac nito E̍srum, to E̍srum, anac nito Pare̍s, to Pare̍s, anac nito Huda.
34To Huda, anac nito Hakub, to Hakub, anac nito Isaac, to Isaac, anac nito Abraham, to Abraham, anac nito Tare̍, to Tare̍, anac nito Nakur.
35To Nakur, anac nito Se̍rug, to Se̍rug, anac nito Ragaw, to Ragaw, anac nito Pe̍le̍g, to Pe̍le̍g, anac nito He̍be̍r, to He̍be̍r, anac nito Se̍la.
36To Se̍la, anac nito Kainan, to Kainan, anac nito Arpakad, to Arpakad, anac nito Se̍m, to Se̍m, anac nito Nue̍, to Nue̍, anac nito Lamec.
37To Lamec, anac nito Matusale̍m, to Matusale̍m, anac nito E̍nuc, to E̍nuc, anac nito Hare̍d, to Hare̍d, anac nito Mahalale̍e̍l, to Mahalale̍e̍l, anac nito Kainan.
38To Kainan, anac nito E̍nus, to E̍nus, anac nito Se̍t, to Se̍t, anac nito Adan, ket to Adan, anac met ne̍ Apu Diyus.
Currently Selected:
Lukas 3: YBT
Highlight
Share
Copy
Want to have your highlights saved across all your devices? Sign up or sign in
© 1990 New Tribes Mission, Sanford, FL 32771-1487, USA.
Printed in the Philippines.
