Matyu 20
20
To pangngarig maipanggep kadito mangmangged ito kaubasan
1“Tutu met yan, ta ya panangituray niya Nailangitan, ket agten idi nga pangngarig: Uwed isa nga makin-kuwa iya isa nga kaubasan, nga rinumwar iya nasapa pekkem nga agsapa, nga nawe̍ agsapul ka tangdanan na nga agwangel iya kaubasan na. 2Ket nakitulag kadito nasmac na, nga isa nga diplata kanu ya tangdan niya tunggal isa para iyan nga algew. Ket se̍ na dan pinapen ito kaubasan na.
3“Ket ito umalgew win, rinumwar manin to toley, ket uwed da met duduma nga nasingen na ito tindaan, nga gasisikad da ngas nga agkakaldoyus. 4Ket kinunen na igida, ‘Mawe̍ kayu pe̍ agwangel enna kaubasac, ket tangdanan nakayu mettas ka kustu,’ kunen na. Ket nawe̍ da ngarudin.
5“Ket agten pe̍ iyan ya winangel manin nito toley ito agmatuun se̍ ito nasapa pekkem iya gidam. 6Ket ito gidam nga tutu win, rinumwar manin to toley, ket uwed da met duduma manin nga nasmac na nga gasisikad ngas antuni nga agkakaldoyus. Ket kinunen na ngarud igida, ‘Ape̍ nga aggidgidam kayu nga gasisikad nga agkakaldoyus ngas idi?’ kunen na.
7“Ket kinunen da igina, ‘Awan met ngamin mangpategged dakami,’ kunen da.
“Ket to makin-kuwa ito kaubasan, kinunen na ngarud igida, ‘Ala, mawe̍ kayu pe̍ agwangel enna kaubasac,’ kunen na.
8“Ket ito siclep pin, kinunen nito makin-kaubasan iya katalec na, ‘Palbe̍tem dito mangmangged. Ket tangdanam da, nga ponaem dito nodi nga inumbe̍t, agingga nga di pekkem natangdanan dito nona nga inumbe̍t,’ kunen na.
9“Ket dito mangmangged nga inumbe̍t nga nagwangel ito gidamin, tunggal isa igida, nae̍cdan da ka isa nga diplata. 10Ket dito mangmangged nga nona nga inumbe̍t nga nagwangel, ito nawe̍ da alaken ya tangdan da, nipagarup da nga ad-adu ya maitangdan igida. Ngem isa met pe̍ nga diplata to nae̍cde̍ iya tunggal isa igida. 11Itu nga ito naalac dan to tangdan da, nakiriri da ngarudin gapu ito makin-kuwa ito kaubasan, 12nga kinunen da, ‘Isa nga uras ngas nga nagwangel diyan nga nodi nga inumbe̍t. Ape̍ nga nipadam ya tangdan da iya tangdan mi? Ket dakami, naggidgidam kami nga naganus iya panagbannug mi iya panagwangel mi se̍ ya pudut niya sinag,’ kunen da.
13“Ngem to makin-kuwa ito kaubasan, kinunen na ito isa igida, ‘Gayyem, awan met basul ku ikew. Di met isa nga diplata to tulag ta nga tangdan mu? 14Ala! Alac mu was ya bagim, se̍ ka agawirin. Ta tarigagay ku met nga ipadac ya e̍cde̍c idi nga nodi nga inumbe̍t nga nagwangel iya ne̍cde̍c ikew. 15Di ngarud aya mabalin no wanglec ya orey nagan na nga gabay ku kadiya mismu nga kukuwac? Ape̍? Ya nalaka nga panange̍cde̍c aya ya imanam?’ kunen nito akin-kuwa.”
16Ket kinunen pe̍ ne̍ Je̍sus, “Agten pe̍ iyan nga pangngarig ya panangituray niya Nailangitan. Ta diya maibilang ita nga nababa, ket maibilang da nad nga nadayawin. Ket diya maibilang ita nga nadayaw, ket maibilang da nad nga nababa ngin,” kunen na.
To panangipakaemmu manin ne̍ Je̍sus iya ipapatey
se̍ panagungar na
17Ito agsangsang-at de̍ Je̍sus nga agpa-He̍rusale̍m, nibay-at na dito sangapulu ket duwa nga adalan na ito dalan, ket kinunen na igida, 18“Agten idi nin: Manang-at tida ngarud nga mawe̍ ka He̍rusale̍min. Ket ya Anac nga Naipatoley, maiyawat nad met antuni kadiya pangpangulu diya agsirsirbi iya Te̍mplu se̍ kadiya manursuru iya Linteg. Ket kedngan da nad met nga patey ya dusa na. 19Ket iya agten iyan, iyawat da nad ngarud met kadiya bekken nga Hudyu, tasun malais, se̍ masapsaplit ka latiku, se̍ mailansa nad met ka krus. Ket iya maikatlu nga algew, agungar nad mettas,” kunen na.
To inadeng niya ina de̍ Santiyagu nge̍ Juan e̍ Je̍sus
Mar. 10:35-45
20Ket itun, to ina dito agkabsat nga anac ne̍ Se̍be̍dyu, imadenni e̍ Je̍sus nga naibulun igina dito anac na. Ket nagparintumeng iya sangu ne̍ Je̍sus, nga nagadeng igina.
21Ket e̍ Je̍sus, kinunen na igina, “Nagan na ya gabay mu?” kunen na.
Ket kinunen na e̍ Je̍sus, “Ibilin mu kuma nga no uwed ka nad iya pagiturayam, makipagtugew kuma didi nga duwa nga anac ku ikew, ket pagsumbangiran daka kuma, nga ya isa ket iya madiwanan mu, ket ya isa iya makatigid mu,” kunen na.
22Ket kinunen ne̍ Je̍sus, “Madi nu met maawatan ya kaipapennan nidi nga ad-adngen nu. Ape̍? Kabaellan nu kad nga itured ya panagsagaba nga lak-amec, nga rigat nga arig nga inumec?” kunen na.
Ket kinunen dito duwa, “Kabaellan mi met, a,” kunen da.
23Ket kinunen ne̍ Je̍sus igida, “Ngarud, mairaman kayu nad nga tutu iya rigat nga arig nga inumec. Ngem to inadeng nu nga makipagtugew kayu kuma iya madiwanan ku se̍ iya makatigid ku, ket bekken ku met nga karbengngan ya mangisaad iya agten iyan. Ta naipaay mettin diyan nga saad kadiya nangisaganaan ne̍ Amac,” kunen na.
24Ket dito sangapulu nga pada da nga adalan, ito nagicna da to inadeng nito ina dito duwa, nakaunget da met kadito duwa nga agkabsat. 25Ket e̍ Je̍sus, pinaadenni na da igina, nga kinunen na, “Pageemmu nu met nga diya agtuturay kadiya bekken nga Hudyu, ipapilit da ya turay da kadiya toley da. Se̍ agten pe̍ diya nangatu nga toley igida, gabay da pe̍ ya mangituray kadiya toltoley. 26Ngem no dakayu, bekken kuma nga agten iyan. Ta ya mayat nga maibilang nga nangatu dakayu, masapul nga agbalin nga agsirsirbi dakayu. 27Ket ya mayat nga maibilang kuma nga kadayawan dakayu, ket masapul met nga agpaituray dakayu, nga arig nga tagabu nu. 28Ta agten met iyan ya Anac nga Naipatoley. Madi inumbe̍t tasun pasirbiyan kuma kadiya duduma, no di lugud tasun agsirbi, se̍ tasun ipaay na ya biyag na nga pangsubbut kadiya adu nga toltoley,” kunen na.
To panangpalaing ne̍ Je̍sus kadito duwa nga kulap
Mar. 10:46-52; Luk. 18:35-43
29Ket ito pimanaw de̍ Je̍sus enna ili nga He̍riku, adu diya toltoley nga nibulun igina. 30Ket ito dalan da, uwed met duwa nga lalaki nga kulap nga agtugtugew iya pingit. Ket ito naemmuwan da nga e̍ Je̍sus ya tumalib igida, nip-ipkaw da nga kinunen, “Apu nga kapututan nito Ari Dabid! Kaasiyan nakami kay!” kunen da. 31Ket nilbec dito toltoley da nga madi da kuma kanu mamagas. Ngem nilallalu lugud dito kulap to nagpekkaw, nga kinunen da, “Apu nga kapututan nito Ari Dabid! Kaasiyan nakami kay!” kunen da.
32Ket nagsardeng ngarud nge̍ Je̍sus, ket pinalbe̍t na da iya edyan na. Ket kinunen na igida, “Nagan ya gabay nu nga wanglec para dakayu?” kunen na.
33Ket kinunen da ngarud igina, “Mapalaing kuma ya kulap mi yi,” kunen da.
34Ket e̍ Je̍sus, naasiyan ngarud igida, ket sine̍cde̍ng na dito mata da. Ket sigida nga nakasingen da nga tutu manin. Ket simurut da e̍ Je̍susin.
Currently Selected:
Matyu 20: YBT
Highlight
Share
Copy
Want to have your highlights saved across all your devices? Sign up or sign in
© 1990 New Tribes Mission, Sanford, FL 32771-1487, USA.
Printed in the Philippines.
