Matyu 21

To nadayaw nga isusungad ne̍ Je̍sus ka He̍rusale̍m

Mar. 11:1-11; Luk. 19:28-40; Juan 12:12-19

1Ket ito umad-adenni de̍ Je̍sus enna He̍rusale̍min, nakadateng da ka ili nga Be̍tpage̍ yin enna Tageytey Ulibu. Ket itun, nangibon nge̍ Je̍sus ka duwa nga adalan, 2nga kinunen na igida, “Mawe̍ kayu iyan nga masungad nga baryu, ket maaskuran nu nga sigida antuni ya isa nga nakabaud nga asnu nga uwed urbun na. Ukasan nu da ket e̍lbe̍t nu da idi. 3Ket no uwed agsaludsud dakayu, ibaga nu nga, ‘Masapul niya Apu,’ kunen nu, ket sigida nga palubusan nan didi,” kinunen ne̍ Je̍sus.

4Ket agten iyan to napasamac, tasun matungpal kuma to kinagi nito mammadtu itun nga kinunen na,

5“Agten idi ya ibaga nu kadiya iSiyun:

‘Singen nu, ket umbe̍tin ya ari nu.

Napakumbaba ngas met,

ket nakasakey ka asnu.

Tutu met, nakasakey ka urbun asnu.’”

6Ket dito duwa nga adalan, nawe̍ da ngarud tinungpal to nibilin ne̍ Je̍sus igida. 7Ne̍lbe̍t da ngarud to asnu se̍ to urbun na. Ket niyap-ap da diya ke̍bal da iya eddeg dito asnu, ket itu ya nagsakayan ne̍ Je̍susin.

8Ket ya kaaduwan diya toltoley antuni, nagiyaplag da met kadiya ke̍bal da ito dalanen na, nga panangipasingen da iya panagdayaw da igina. Ket uwed da pe̍ duduma nga nagputed ka sangsanga kayu, ket itu met to niyap-ap da ito dalan. 9Ket dito adu nga toltoley nga sarsarunuwen se̍ sumarsarunu e̍ Je̍sus, nip-ipkaw da nga kinunen, “Madaydayaw ya Mangisalakan nga kapututan nito Ari Dabid! Madaydayaw ngarud ya agparang gapu iya turay niya Apu! Madaydayaw kuma pe̍ ya Mangisalakan enna kangatuwan nga edyan!” kunkunen da.

10Ket ito imuneg nge̍ Je̍sus iya siyudad nga He̍rusale̍min, nariribuc kin diya toltoley nga uwed iyan, nga kinunen da, “Nagan kad yani nga toley?” kunen da.

11Ket dito adu nga toltoley nga nakibulubulun e̍ Je̍sus, kinunen da met, “Igina yan nge̍ Je̍sus, nga itu to mammadtu nga taga-Nasare̍t enna prubinsiya nga Galilya,” kunen da.

To panangpatalew ne̍ Je̍sus kadito aglaclaku ka Te̍mplu

Mar. 11:15-19; Luk. 19:45-48; Juan 2:13-22

12Ket nawe̍ nge̍ Je̍sus enna Te̍mplu. Ket diya uwed iya emwag niya Te̍mplu nga aglaclaku se̍ diya agnginngina, pinagtalew met ne̍ Je̍sus da. Ket binalintukang na diya lamlamisaan dito agisucsukat ka kuwarta, se̍ diya tugtugew dito aglaclaku ka kalapati. 13Ket kinunen na igida, “Naisurat met iya Bibliya nga agten idi: ‘Ya baley ku, ket maawagan nad ka baley nga pagkararagan,’ kunen na met. Ngem dakayu, pagbalinen nu lugudin nga paguurnungan diya tulisan!” kunen na.

14Ket itun, nawe̍ iya edyan ne̍ Je̍sus enna Te̍mplu diya kulap se̍ diya piley, ket pinalaing na da. 15Ngem dito pangulu diya agsirsirbi iya Te̍mplu se̍ dito manursuru iya Linteg, nakaunget da ito nasingen da dito nakaskasdaaw nga inariman ne̍ Je̍sus, se̍ ito nagicna da diya eb-ebbing nga nagpecpekkaw enna Te̍mplu nga kinunen da, “Madaydayaw ya Mangisalakan nga kapututan nito Ari Dabid!” 16Itu nga kinunen da e̍ Je̍sus, “Madi ka magicna ya kagkagiyen diyan?” kunen da.

Ket kinunen ne̍ Je̍sus igida, “Kapuutin, magicnac met. Ape̍? Madi kayu kad pekkem nabasa to naisurat iya Bibliya nga kunen na nga, ‘Gapu iya maikagi diya eb-ebbing se̍ ke̍bke̍bit, nipakaemmum ya dayaw mu,’ kunen na met?” kunen ne̍ Je̍sus.

17Ket pinanawan ne̍ Je̍sus dan, ket rinumwar iya siyudad nga nawe̍ enna ili nga Be̍tanya. Ket antuni ya nageppawan na.

To panangilunud ne̍ Je̍sus ito kayu nga igus

Mar. 11:12-14, 11:20-24

18Ket iya imagsapa ngin, ito sumolsoli de̍ Je̍sus enna siyudad, nabisinan nge̍ Je̍sus iya dalan. 19Ket nakasingen itun ka kayu nga igus enna pingit niya dalan. Ket nawe̍ iya edyan nito kayu, ngem yan nas met eddon ya uwed ito kayu. Ket kinunen met ne̍ Je̍sus ito kayu, “Manipud ita, awan maibisic mun!” kunen na met. Ket dagus nga nacrit to kayu win.

20Ket dito adalan, ito nasingen da, nasdaawan da ngarud, nga kinunen da, “Ape̍ ngata nga dagus nga nacrit yan nga kayu nga igus?” kunen da.

21Ket kinunen ne̍ Je̍sus igida, “Kinapudnu na, no sipapati kayu nga awan panagduwaduwa nu, mabalin nga arimanen nu pe̍ ya agten idi nga inariman ku iya kayu nga igus si. Se̍ bekken nas nga iyan, no di lugud mabalin nu pe̍ nga bilinen yani nga tageytey, nga kunen nu, ‘Maiyalis ka nga maipisuc iya baybayin,’ kunen nu kuma, ket maariman met nga tutu. 22Se̍ orey nagan na nga adngen nu nga sipapati iya kararag nu, ket maalac nu nga tutu,” kunen na.

Maipanggep iya turay ne̍ Je̍sus

Mar. 11:27-33; Luk. 20:1-8

23Ket nawe̍ nge̍ Je̍sus enna Te̍mplu. Ket ito madama nga mangisursuru win, nawe̍ ito edyan na dito pangulu diya agsirsirbi iya Te̍mplu se̍ dito panglakayen diya Hudyu. Ket nagsaludsud da e̍ Je̍sus, nga kinunen da, “Awac ngarud ya naggayatan niya turay mu nga agariman kadiya ar-arimanem? Nagan ya nange̍cde̍ ikew iyan nga turay mu?” kunen da.

24Ket simungbat nge̍ Je̍sus igida nga kinunen na, “Uwed pekkem mona nga isaludsud ku dakayu. Ket no masungbatan dac, ibagac pe̍ yin dakayu no awac ya naggayatan niya turay ku nga agariman kadiya ar-arimanec. 25Ket agten idi: To Juan nga Mammautisar, awac ngarud ya naggayatan nito turay na nga mamacbautisar itun? Gayat kad e̍ Apu Diyus, winno ka toley?” kunen na.

Ket igida, nagdidinniskutir da ngarudin, nga kinunen da, “Nagan ngarud ya isungbat tidan? Ta no kunen tida nga gayat e̍ Apu Diyus, kunen na nad met nga, ‘No agten iyan, ape̍ ngarud nga madi kayu namati ito Juan?’ kunen na nad met. 26Ngem no kunen tida nga gayat ngas ka toley, ay-ay, mansing tida kadiya toltoley. Ta diya toltoley, patpatiyen da nga amin nga isa nga mammadtu ne̍ Apu Diyus to Juan,” kinunen da. 27Ket iya agten iyan, nisungbat da e̍ Je̍susin nga kinunen da, “Madi kami met emmu a, to naggayatan niya turay na,” kunen da.

Ket kinunen ne̍ Je̍sus igida, “No agten iyan, madic met ngarud pe̍ ibaga dakayu no awac ya naggayatan niya turay ku nga agariman kadiya ar-arimanec,” kunen na.

To pangngarig maipanggep kadito agkabsat

28Ket kinunen manin ne̍ Je̍sus, “Nagan ya makunen nu idi nga pangngarig? Uwed toley nga uwed duwa nga anac na nga lalaki. Ket nawe̍ na kinunen ito inauna nga anac na, ‘Iyong, mawe̍ ka kuma agwangel enna kaubasan tida,’ kunen na.

29“Ngem kinunen met nito anac na, ‘Ahuh! Madi yac!’ kunen na. Ngem iya di nabayag, nagbabawi yin, ket nawe̍ mettas nagwangel.

30“Ket to ama, nawe̍ pe̍ ito inaudi nga anac nan, ket nibaga na pe̍ igina nga mawe̍ kuma agwangel enna kaubasan. Ket to inaudi, kinunen na, ‘Mawe̍ yac ngarud, ama,’ kunen na, ngem madi met nawe̍.

31“Ket nagan ya makunen nu? Nagan kadito duwa nga anac ya nagtungpal ito gabay nito ama da?” kunen na.

Ket nisungbat dito pangulu se̍ panglakayen nga kinunen da, “To inauna, a,” kunen da.

Ket iya agten iyan, kinunen ne̍ Je̍sus igida, “Kinapudnu na, no maipanggep iya pannakitipun niya toley kadiya iturayan ne̍ Apu Diyus, ket konaan dakayu lugud diya managbasul nga agsingsingir ka buis se̍ diya huste̍s! 32Ta ito inumbe̍t to Juan nga Mammautisar nga nangisuru dakayu iya nalinteg nga ugali, ket madi kayu met pinati. Ngem dito agsingsingir ka buis se̍ dito huste̍s, pinati da met nga gennung to Juan. Ket orey nasingen nu itun nga namati didi, madi kayu met latta nagbabawi se̍ namati.”

To pangngarig maipanggep kadito dake̍c nga makisugsugpun

Mar. 12:1-12; Luk. 20:9-19

33“Denggen nu pe̍ yani nga pangngarig: Uwed isa nga akin-kuwa ka lapug. Nagmula yani ka adu nga ubas, se̍ na inalad to nagmulaan na, ket se̍ nagkorob pe̍ ka inariman na nga pagpespessan ka ubas. Nangipasikad pe̍ ka nangudu nga pagedyanan agbantay. Ket ito nalpas nan, nipasugpun na to kaubasan na kadiya agwangwangel ka laplapug, ket nawe̍ ka sabali nga ili yin.

34“Ket ito dandani ya timpu panagbuburas ka ubasin, nangibon to akin-kuwa kadiya tagabu na nga mawe̍ kadito makisugsugpun, tasun alaken da ya bingay na nga ubas. 35Ngem dito makisugsugpun, tinkem da met dito tagabu, ket kinabil da to isa, ket to isa, pinatey da met, ket dinamdampag da met to isa. 36Ket to akin-kuwa ito kaubasan, nangibon manin ka ad-adu pekkem nga tagabu na ngem dito nona. Ngem agten mettas manin ito naariman kadito nona ya inariman da manin kadidi. 37Ket kalpasan niyan, ya anac nito akin-kuwa mettas ya nibon na ito edyan dito makisugsugpun, ta kunen na nga, ‘No anac ku mettas ya ibon ku, emmuc nga dayawen da met,’ kunen na.

38“Ngem dito makisugsugpun, ito nasingen da to anac na, nagtetebbar da nga ig-igida, nga kinunen da lugud, ‘Ala, igina yani ya agtawid! Tidan! Patayen tida lugudin, ket dactida nad ya agtagikuwa iya tawiden nan,’ kunen da.

39“Ket tinkem da ngarud to anac, ket nipen da ngarud iya laskig nito kaubasan, se̍ da met pinatey,” kunen ne̍ Je̍sus.

40Ket kinunen manin ne̍ Je̍sus, “Ket ita, nagan ngarud ya wanglen nad nito akin-kuwa ito kaubasan kadito makisugsugpun, no sumpuc kin?” kunen na.

41Ket kinunen da nga nisungbat e̍ Je̍sus, “Pukawen na ngarud dito managdacdake̍c a, nga awan asi na igida. Ket ipasugpun na ngarud manin to kaubasan na ka sabali nga toley nga madi mangiyagawa iya apit na no panagbuburasin,” kunen da.

42Ket kinunen ne̍ Je̍sus igida, “Kustu ya sungbat nu. Ngem no dakayu met, arig lugud nga madi kayu pekkem nabasa to naisurat iya Bibliya nga kunen na,

‘Iyan mettas nga batu

nga nitemsit ngas dito nangpatdec,

itu met ya nagbalin nga

kangrunaan nga panuli yin.

Ket gapu mettas iya pannakabalin niya Apu,

itu ya nagbalinan na,

ket ibilang tida ngarud nga nakaskasdaaw,’

kunen na iya Bibliya. 43Itu nga ibagac dakayu nga maipac nad met ya kalinteggan nu nga agpaituray e̍ Apu Diyus, ket mae̍cde̍ nad ka sabali nga toltoley nga mangariman nga gennung kadiya tumutup idi nga kalinteggan. 44[Ket diya toley nga maiterkag idi nga batu, mab-abka ngarud met. Ngem ya orey nagan na nga materkagan nidi nga batu, ket matumetumec met agingga nga mapatuyu win,” kunen na.]

45Ket dito pangulu diya agsirsirbi iya Te̍mplu se̍ dito Parisiyu, ito nagicna da diyan nga pangngarig ne̍ Je̍sus, naawatan da nga igida met to kaiyarigan na. 46Ket gabay da nga tacmen kuma, ngem nansing da kadito toltoley, gapu ta ibilang diya toltoley nga isa nga mammadtu ne̍ Apu Diyus nge̍ Je̍sus.

Currently Selected:

Matyu 21: YBT

Highlight

Copy