Matyu 25
25
To pangngarig maipanggep kadiya sangapulu nga babbalasang
1Nituluy ne̍ Je̍sus ya panagkagi na, nga kinunen na, “Ya panangituray niya Nailangitan kadiyan nad nga algew, maiyarig iya agten idi: Uwed sangapulu nga babbalasang nga nakipakalun. Ket nawe̍ da nga sumabet iya umbe̍t nga nubyu, nga nagkakalneb da ka nidal-ag nga dilag. 2Ket ya lima kadito sangapulu nga babbalasang, bekken da nga nanakem. Ngem dito lima nga gennung, nanakem da met. 3Ket dito bekken nga nanakem, nidal-ag da ngarud dito pagdilag da, ngem awan met nidal-ag da nga sagana da nga imayan kadito dilag da. 4Ngem dito nanakem nga gennung, uwed ngarud diya nidal-ag da pe̍ nga sagana da nga imayan kadito nidal-ag da nga dilag da. 5Ket ya napasamac, nabayag nga madi sinumpuc to nubyu. Ket makatkatudugen met amin dito babbalasangin, ket natudug da ngarudin.
6“Ket ito tengnga gabi yin, uwed nagpekkaw nga kinunen na, ‘Ala! Uwed ya nubyu win! We̍ kayu sabten nin!’ kunen na.
7“Ket dito babbalasang, bimangun da nga aminin, ket isagana da dito dilag dan. 8Ket dito bekken nga nanakem, kinunen da ngarud kadito nanakem, ‘E̍cdan dakami kay met ka sagana nu nga mayan diya dilag nu, ta dandani makusep pin diya dilag mi,’ kunen da.
9“Ngem kinunen dito nanakem nga babbalasang, ‘Ay, madi mabalin. Kaynun no agkurang, no para dactida nga amin. Mawe̍ kayu was kuma ngumina iya kasapulan nu kadiya aglaclaku,’ kunen da met.
10“Ket nawe̍ ngarud ngimina dito lima. Ket pag-isu met nga inumbe̍t to nubyu win. Ket dito nakasagana, nibulun da iginan, nga nawe̍ da imuneg ito baley nga pakaarimanan nito pangparagsac ito pakalun. Ket ito nakauneg dan, naigiset tin to gagayangan nito baley.
11“Ket kalpasan niyan, simarunu nga sinumpuc enna baley dito lima nga babbalasang, ket kinunen da, ‘Apu! Apu! Ilukatan nakami kay!’ kunen da.
12“Ngem kinunen lugud nito nubyu, ‘Madi mabalinin, ta pulus nga madi nakayu em-emmu!’ kunen na.”
13“Itu nga kunec dakayu ita,” kunen ne̍ Je̍sus, “nga sisasagana kayu kuma ngarud nga pe̍yeng. Ta madi kayu emmu ya algew winno ya uras niya umbe̍t na.”
To pangngarig maipanggep kadito tellu nga natalec
nga mangikem ka kuwarta
Luk. 19:11-27
14“Sisasagana kayu kuma ngarud, ta ya panangituray niya Nailangitan, agten nad idi: Uwed isa nga toley nga mawe̍ kuma ka deyyu nga lugar. Sacbay nga nawe̍, pinalbe̍t na diya tagabu na tasun ipaikem na igida diya sanicwa na. 15Nangitalec kadiya tunggal isa igida ka kuwarta, sigun iya kinalaing da. Ket ya isa, ne̍cdan na ka lima nga ribu nga diplata. Ket ya maikadduwa, ne̍cdan na ka duwa nga ribu. Ket ya maikatlu, nae̍cdan ka isa nga ribu. Kalpasan niyan, nagrubwat to amu dan.
16“Ket to nae̍cdan ka lima nga ribu, sigida nga nawe̍ na nikume̍rsiyu, ket nakaganansiya met ka lima nga ribu win. 17Agten met pe̍ iyan ya winangel nito nae̍cdan ka duwa nga ribu, ket nakaganansiya met pe̍ ka duwa nga ribu. 18Ngem to nae̍cdan ka isa nga ribu, nawe̍ na lugud nikorob to kuwarta nito amu na, tasun isoroc na.
19“Ket ito nabayagin, simoli to amu dito tagabu, ket inemmu na igidan ya naganansiya da ito kuwarta na. 20Ket to ne̍cdan na ka lima nga ribu nga diplata, nawe̍ ngarud simangu ito amu na, nga ne̍lbe̍t na to lima nga ribu nga diplata nga naitalec igina, agraman to lima nga ribu nga naganansiya na. Ket kinunen na, ‘Apu, uwed idi ya lima nga ribu nga naganansiyac ito nitalec mu iyaken nga lima nga ribu,’ kunen na.
21“Ket to amu na, kinunen na igina, ‘Mayat met! Nabaru se̍ mapagtalkan ka nga tagabu. Ket gapu ta napagtalkan ka kadiyan nga e̍teng nga banbanag, pagtalkan naka ka adu nga banbanagin. Makitipun ka iyaken nin nga amum, idi nga paganggemmac,’ kunen na.
22“Ket to tagabu nga natalec ka duwa nga ribu nga diplata, nawe̍ met pe̍ simangu ito amu na. Ket kinunen na, ‘Apu, uwed idi ya duwa nga ribu nga naganansiyac ito nitalec mu nga duwa nga ribu iyaken,’ kunen na.
23“Ket to amu na, kinunen na igina, ‘Mayat met! Nabaru se̍ mapagtalkan ka nga tagabu. Ket gapu ta napagtalkan ka kadidi nga e̍teng nga banbanag, pagtalkan naka ka adu nga banbanagin. Makitipun ka iyaken nin nga amum, idi nga paganggemmac,’ kunen na.
24“Ket to tagabu nga natalec ka isa nga ribu nga diplata, nawe̍ pe̍ simangu ito amu na. Ket kinunen na, ‘Apu, emmuc nga nainget diya bilin mu. Emmuc ngarud nga ganiyem met ya bekken mu nga niraep, se̍ agurnung ka pe̍ ka in-gikan nga bekken mu nga nisap. 25Nansing ngac ngamin, itu nga nawe̍ yac nikorob nga nisoroc to kuwartam. Ket uwed idi to kuwarta mun,’ kunen na.
26“Ket to amu na, kinunen na igina, ‘Dake̍c se̍ nasadut ka met nga tagabu! No tutu nga naemmuwam nga ganiyec ya bekken ku nga niraep, se̍ agurnung ngac ka in-gikan nga bekken ku nga nisap, 27ape̍ madi ka lugud nibangku to kuwartac, tasun iya isosolic, ket mae̍cde̍ iyaken ya sigud nga kuwartac agraman ya anac na?’ kunen na ito tagabu.
28“Ket uwed da met binilin nito amu nga kinunen na, ‘Ala, alaken nu igina dito diplata, ket e̍cde̍ nu nga gennung ito uwed sangapulu nga ribu nga diplata nan. 29Ta ya toley nga adu ya uwed iginan, mae̍cdan nad pekkem, tasun nawadwad kuma ngin ya uwed igina. Ngem ya toley nga e̍teng ya uwed igina, maipac nad pekkem mas igina ya orey e̍teng ngas nga uwed iginan. 30Ket yan nga tagabu nga awan sirsirbi na, itemsit nu iya kagicbettan enna deyyu! Ket diya uwed antuni nga edyan, agberrit se̍ agngaretnget da ngarud,’ kunen nito amu.”
Ya pakasupapakan nad diya toley
31“Ket no umbe̍t nad nga sidadayaw ya Anac nga Naipatoley nga maibulun pe̍ igina diya amin nga anghe̍le̍s, agtugew nad nga agari iya trunu na nga pakaidayawan na. 32Ket maipasangu nad igina diya toltoley nga gayat kadiya amin nga pagpagiliyan iya lubung. Ket pagsisibnaen na nad da nga arig nga isa nga agay-aywan nga mangisibna kadiya karne̍ru kadiya kalding. 33Ket isaad na nad diya naibilang nga karne̍ru iya madiwanan na. Ngem diya naibilang nga kalding nga gennung, paguurnungen na da nad met iya makatigid na.
34“Ket kunen nad niya Ari kadiya uwed iya madiwanan na, ‘Umbe̍t kayun, dakayu nga pinagasatan niya Amac! Makipagtawid kayu ngarudin iya pannakairaman nu iya pagiturayan, nga itu ya tawid nu nga naisagana para dakayu manipud ito pannakaparsuwa niya lubung. 35Mae̍cdan kayu ngarud ka tawid nu, ta ito nabisin nac, pinakan dac met. Ito newwew wac, pinainum dac met. Ket orey gan-gannaet tac itun, sinangaili dac met. 36Ito nagkurang ngac ka luput ku, ne̍cdan dac met ka luput. Ito nagsakit tac, inistimar dac met. Ito naibalud dac, nawe̍ dac pe̍ sinacwaran,’ kunen na nad met.
37“Ket dito napalinteg nga toley, kunen da nad iya Ari, ‘Nungey daka kad nga nasingen, Apu, nga nabisin ka, se̍ daka pinakan, winno newwew ka, se̍ daka pinainum? 38Se̍ nungey daka pe̍ nga nasingen nga gan-gannaet ka, se̍ daka sinangaili, winno nagkurang ka ka luput se̍ daka ne̍cdan ka luput? 39Se̍ nungey daka kad pe̍ nga nasingen nga nagsakit ka winno naibalud, se̍ daka nawe̍ sinacwaran?’ kunen da nad met.
40“Ket kunen nad niya Ari igida, ‘Kinapudnu na, ito tinulungan nu ya orey isa kadiya agten kadiyan nga kanumuwan nga kakabsat ku, ket naibilang nga iyaken mettas ya tinulungan nu,’ kunen nad niya Ari.
41“Ket kalpasan niyan, kunen nad niya Ari kadiya uwed iya makatigid na, ‘Dakayu, umadeyyu kayu iyaken nin, dakayu nga nailunud nga toley! Mawe̍ kayu was ito agnanayun nga pagapuyan nga naisagana itun para iya diyablu se̍ dito eb-ebbonen na. 42Ta ito nabisin nac, di dac met pinakan, se̍ ito newwew wac, di dac pe̍ pinainum. 43Ito isa ngac nga gan-gannaet, di dac met sinangaili. Ito nagkurang ngac ka luput, di dac pe̍ ne̍cdan ka luput. Ito nagsakit tac se̍ naibalud dac, di dac met sinacwaran,’ kunen nad niya Ari.
44“Ket diya nailunud nga toley, kunen da nad met, ‘Nungey daka kad nga nasingen, Apu, nga nabisin ka, winno newwew ka, winno gan-gannaet ka, winno nagkurang ka ka luput, winno nagsakit ka, winno naibalud ka, se̍ madi daka inistimar?’ kunen da nad met.
45“Ket kunen nad ngarud niya Ari, ‘Kinapudnu na, ito madi kayu gabay nga tinulungan ya orey isa nga agten kadiyan nga kanumuwan, ket naibilang lugud nga iyaken mettas ya madi nu gabay nga tinulungan,’ kunen na nad igida. 46Ket iya agten iyan, pumanaw nad diyan nga toley nga mawe̍ da iya agnanayun nga pakadusaan da. Ngem diya napalinteg nga toley, mawe̍ da nga gennung iya agnanayun nga pakabiyagan da,” kunen ne̍ Je̍sus.
Currently Selected:
Matyu 25: YBT
Highlight
Share
Copy
Want to have your highlights saved across all your devices? Sign up or sign in
© 1990 New Tribes Mission, Sanford, FL 32771-1487, USA.
Printed in the Philippines.
