Matyu 24
24
To panangipakaemmu ne̍ Je̍sus iya pannakalasang niya Te̍mplu
Mar. 13:1-2; Luk. 21:5-6
1Ket e̍ Je̍sus, pumanawin enna Te̍mplu. Ket ito rumrumwar nga pumanaw antuni nin, imadenni dito adalan na igina, nga nipadlaw da e̍ Je̍sus dito napaw-is nga pangpatdec nga nausar iya Te̍mplu. 2Ket kinunen ne̍ Je̍sus igida, “Tutu met nga masingen nu da ita. Ngem pudnu met nga awan nad orey isa nga batu idi, nga naisimpa nad iya sap-ew niya sabali nga batu. Ta malasang da nad met nga amin,” kunen na.
Diya rigrigat se̍ diya pannakairurumen
Mar. 13:3-13; Luk. 21:7-19
3Ket ito nagtugtugew nge̍ Je̍sus enna Tageytey Ulibu, awan diya kaaduwanin. Ket imadenni igina dito adalan, nga kinunen da igina, “Ibagam kay dakami no nungey nad nga madatngan yan nga timpu nga kinunem, se̍ no nagan nad ya pakalasinan iya umbe̍t mu manin se̍ ya panagpatingga nidi nga timpu,” kunen da.
4Ket kinunen ne̍ Je̍sus igida, “Agannad kayu ngarud tasun awan kuma mangiyaw-awan dakayu maipanggep iyan nga timpu. 5Ta adu nad diya agparang nga agkunen nga igida kanu ya iyaken, nga kunen da nad nga, ‘Iyaken ya Kristu!’ kunen da nad met. Ket iya agten iyan, adu nad diya maiyaw-awan da. 6Ket magicna nu nad ya uni diya panaggubat, se̍ madamag nu nad pe̍ iya sapsaput diya toley maipanggep ka gubgubat. Ngem masapul nga madi kayu mariribukan kadiyan. Ta masapul ngarud met nga mon-ona nga mapasamac diyan, ngem bekken nad pekkem nga itu ya panungpalan. 7Tutu met yan, ta aggiginnubat nad met diya pagpagiliyan, agten met pe̍ diya pagpagariyan. Uwed da nad met pe̍ panagbisin se̍ yegyeg kadiya nadumaduma nga lugar iya lubung. 8Ngem amin diyan, ket damu na nad pekkem mas nga arig nga panangrugi ngas niya panagpakiskis niya isa nga aganac.
9“Ket iyan nad nga timpu, iyawat dakayu kadiya mangirurumen dakayu. Ket uwed nad pe̍ dakayu diya mapatpatey. Ket guraen dakayu ngarud nad diya toltoley kadiya amin nga pagiliyan, gapu mettas iyaken. 10Ket iyan nga timpu, adu nad diya mangipalikud iya panamati da, ket aglilinniput se̍ aggiginnura da nad pe̍. 11Se̍ adu nad diya agparang nga mangikasaba ka busid, ket adu nad met diya maallilaw da. 12Ket gapu iya lumallalu nga kinadake̍c iyan nga timpu, madi nad gabay diya kaaduwan ya mangayatin, nga arig nga bumaaw nad ya ayat dan. 13Ngem maisalakan nad met ya makaitured kadiyan agingga iya panagpatingga da.
14“Ket idi nga Makaparagsac nga Damag maipanggep iya nadiyusan nga panangituray, maikasaba nad iya amin nga lubung, tasun uwed kuma pakaemmuwan diya toltoley kadiya amin nga pagiliyan. Ket kalpasan nad nidi, agpatingga yani nga timpu win.”
Ya Nakar-aryec nga Mangpirdi
Mar. 13:14-23; Luk. 21:20-24
15“Itu nga masingen nu nad nga nakasikad iya nasantuwan nga edyanin to ‘Nakar-aryec nga Mangpirdi’, nga nipadtu nito mammadtu nga Danye̍l itun. (Ikew nga agbasbasa idi nga naisurat, masapul nga maawatam ya kaipapennan nidi.) 16Ket no masingen nu nad yanin, agtalew kuma ngarud diya aged-edyan iya prubinsiya nga Hudya ngi, nga mawe̍ da kuma agsoroc kadiya tagtageytey yin. 17Ket no uwed kuma nad toley iya sap-ew niya atep niya baley na, madi kuma umulug nga mawe̍ mangbulay pekkem kadiya uwed iya uneg niya baley na. 18Ket agten pe̍ ya uwed nad iya lapug na, madi kuma agawir nga mawe̍ agbulay ka orey no ya ke̍bal na.
19“Ket diya mabucsit se̍ diya agsagsagibi iyan nga timpu, kackaasi da nad ngarudin! 20Ikararag nu ngarud nga bekken kuma nad nga timpu kabasa winno Algew Ngilin ya panagtalew nu. 21Ta iyan nga timpu, uwed nad met napalaus nga panagrigat, nga awan kapada na, orey manipud ito pannakaparsuwa niya lubung, agingga ita mettas. Ket orey iya maadpangan nga timpu, awan mapasamac nga kapada niyan nga napalaus nga rigat. 22Ket gapu iya nakaru nga panagrigat iyan nga timpu, pulus nga awan nad toley nga makalasat, no madi mapae̍teng ya kabayag na. Ngem nalaing lugud ta gapu iya panangipateg ne̍ Apu Diyus kadiya pinili na nga toley, ket pae̍tngen na nad ngarud ya kabayag na.
23“Ket iyan nad nga timpu, no uwed agkunen dakayu nga, ‘Kad yani! Itu yani ya Kristu!’ winno kunen da nad nga, ‘Uwed antuni nin!’ kunen da nad dakayu, ket madi kayu kuma patpatiyen. 24Ta uwed da nad agparang nga sinan-Kristu se̍ sinan-mammadtu. Ket agariman da nad ka pagilasinan se̍ nakaskasdaaw, tasun, no mabalin, gabay da nga iyaw-awan kuma orey diya pinili ne̍ Apu Diyus nga toley na. 25Tandaanan nu ngarud didi nga kagic. Nipakaemmuc didi dakayun sacbay nga mapasamac da.
26“Dikad pe̍ no uwed nad diya agkunen dakayu nga, ‘Tidan! Uwed din ya Kristu enna away!’ ket madi kayu latta maw-awe̍. Winno no kunen da nad nga, ‘Tidan! Uwed din iya kin-uneg nga kuwartu!’ kunen da, ket madi kayu patpatiyen. 27Ta ya umbe̍t nad niya Anac nga Naipatoley, nawada met nga arig nga panaggilap niya kilawet, ta orey gumilap ka daya ya kilawet, wadaan na met pe̍ ya abac lawa iya ellod. 28Agten met ito pagkakagi tida, nga siguradu nga orey awac ya edyan niya bangkay, itu ngarud ya pagurnungan diya gayang.”
Maipanggep iya umbe̍t manin niya Anac nga Naipatoley
Mar. 13:24-27; Luk. 21:25-28
29“Ket apaman nad nga malpas ya panagrigat kadiyan nga algew, gumicbet nad ya sinagin, se̍ awan nad pe̍ wada nga e̍cde̍ niya bulanin. Ket diya bitbituwen, agterkag da nad met manipud iya abac lawa. Ket diya pannakabalin nga uwed iya abac lawa, ket makusu da nad mettin. 30Ket itu nad ya panagparang niya pagilasinan iya ngudu maipanggep iya Anac nga Naipatoley. Ket iyan nad nga timpu win, agberberrit diya toltoley kadiya amin nga pagpagiliyan iya lubung. Ket masingen da nad mettin ya Anac nga Naipatoley nga uwed nad iya sap-ew diya ulep, nga umbe̍t manipud ka langit. Ket maipasingen nad ngarud ya pannakabalin na se̍ ya nakaskasdaaw nga kinadayaw na. 31Ket uwed nad magicna nga nabileg nga uni tangguyub manipud kadito ulep, ket itu nad ya panangibon na kadiya anghe̍le̍s nan. Ket mawe̍ diya anghe̍le̍s kadiya eppat nga pagtaudan niya belluut, nga urnungen da nad diya pinili ne̍ Apu Diyus nga toley na. Ngarud, urnungen da nad da nga gayat kadiya amin nga parte̍ niya lubung.”
To adal maipanggep iya kayu nga igus
Mar. 13:28-31; Luk. 21:29-33
32“Maadal tida kuma ya pangngarig maipanggep iya gangey niya kayu nga igus. Ta no sumagicsic diya sangsanga na, se̍ agutec dan, ket emmu nun nga dandani yin ya timpu pudut. 33Ket agten met pe̍ iyan, nga no masingen nu nga mapaspasamac kin didi nga nibagac dakayu, maemmuwan nun nga denni yin yan nga timpu, nga arig nga uwed sumungsungad iya ruwanganin.
34“Pudnu met nga mapasamac nad amin didi, sacbay niya panagpatingga diya toltoley nga sibibiyag ita nga timpu. 35No ya abac lawa se̍ ya lubung ngi, uwed nad met panagpatingga da. Ngem diya kagic nga gennung, pulus met nga awan panagpatingga da.”
No nungey ya umbe̍t manin ne̍ Kristu
Mar. 13:32-37; Luk. 17:26-30, 17:34-36
36“Ngem no maipanggep iyan nga algew se̍ uras, awan met makaemmu maipanggep kadiyan, orey diya anghe̍le̍s ka langit, winno ya Anac. Ta yan nas Ama ya makaemmu iyan.
37“Ket no kumaan to kasasaad dito toltoley ito timpu nito Nue̍ itun, ket agten nad met iyan ya kasasaad diya toltoley iya timpu nad niya umbe̍t niya Anac nga Naipatoley. 38Ta ito timpu sacbay nito layus itun, nitultuluy ngas met dito toltoley to winangwangel da nga nangnangan se̍ nagin-inum, se̍ nagaasawa. Itu ngarud met to winangwangel da latta, agingga ito algew nga imuneg de̍ Nue̍ ito daung. 39Ket dito toltoley itun, madi da met nalasin to timpu. Ket pagamwan da, uwed met to layusin, ket naiyoloy da nga aminin. Ket agten met iyan, nad no umbe̍t ya Anac nga Naipatoley.
40“Ket iyan nad nga timpu, mabalin nga uwed duwa nga lalaki iya lapug da. Ket maalac nad ya isa, ket mabati ya isa. 41Ket agten pe̍ kadiya duwa nga babey nga aggilgiling nad iya gilingan da. Maalac nad ya isa, ket mabati met ya isa.
42“Dikad pe̍ no dakayu, sisasagana kayu kuma pe̍ nga pe̍yeng, ta di kayu nga emmu ya algew niya umbe̍t nad niya Apu nu. 43Ket panunuten nu kuma pe̍ yani: No naemmuwan kuma niya makin-kuwa iya isa nga baley no nungey iya gabi nga umbe̍t ya mannanakew, nagsulap ngarud nga sisasagana. Ket madi na nipalubus nga tinakawan nito mannanakew ya baley na. 44Ket agten kayu pe̍ iyan, nga masapul nga sisasagana kayu. Ta ya Anac nga Naipatoley, umbe̍t nad pe̍ iya bekken nu nga pagpagarupen nga uras.”
Ya maibilang nga mapagtalkan no umbe̍t nad ya Apu
Luk. 12:41-48
45“Kaspagarigan no ya maibilang nga mapagtalkan se̍ nasirib nga tagabu. Ket igina mettas ya pangitalkan niya amu na nga makaemmu kadiya pada na nga tagabu iya baley niya amu na, tasun igina ya mange̍cde̍ ka kanen niya tunggal isa igida kada kustu nga uras na. 46Ket maragsakan ngarud yan nga tagabu no madateng niya amu na nga agten iyan nga tutu ya wangwanglen na. 47Ket pudnu met nga ya agten iyan nga mapagtalkan nga tagabu, isaad nad niya amu na nga igina ya makaemmu win kadiya amin nga sansanicwa na. 48Ngem no dake̍c yan nga tagabu, kaynun no kunen na iya lemlemmet na nga, ‘Mabayag pekkem ya amuc,’ kunen na, 49se̍ pagdamdamsakan na ngas mettin diya pada na nga tagabu, se̍ makipangpangan se̍ makiin-inum ngas kadiya age̍ng-e̍nglew. 50Ket ya mapasamac iya agten iyan nga tagabu, pagamwan na ngas nga sumpuc ya amu na iya algew nga madi na ipagpagarup nga idadateng na, winno iya uras pe̍ nga madi na emmu. 51Ket dusaen ngarud niya amu na, ket ipababa na ya saad na nga iraman na ngasin kadiya naukum nga managinlilinteg nga toley. Ket diya uwed antuni nga edyan, agberrit se̍ agngaretnget da ngarud,” kunen ne̍ Je̍sus.
Currently Selected:
Matyu 24: YBT
Highlight
Share
Copy
Want to have your highlights saved across all your devices? Sign up or sign in
© 1990 New Tribes Mission, Sanford, FL 32771-1487, USA.
Printed in the Philippines.
