Lucas 13
13
—Sulabenö kwomukwataduwi̧ kabatibö kwöbalewachaduwökötjöma Dios lȩebakwawö̧ja— jö̧ba̧lö Jesús yöawina wene
1Ja̧danö, ja̧ möle Jesús jojodönö yöawenama, jobadötjö ju'wedöma Jesúsnö yötjawinobe:
—Galilea jojodö ju'wedöma Dios ejutjö tja̧jwi̧munö kwabö juwö Diosnö tjiyinobe. Ja̧danö tjiyemi ja'ötjö, la'aka luwo̧ Pilatoma jobadönö kwabö loinobe, tja̧jwi̧mukwö bakobe debö 'ya̧dö batjibanö—
jö̧ba̧lö. 2Yötjawiökwe, Jesúsma atadö jojodönö yöa̧linobe:
—Kwomukwataduwena, Aaa, jejenö baledi̧ma sule ju'wedötjö bajalekwönönö jwiinö sulabenö ja̧badönöda baledena, jö̧ba̧lö. Tjömöledötjö bajalekwönönö sulabedö tjö̧jinökötjö̧ma, la'akatjöda jejenö baledobö weoko jö̧a̧linena Diosma jö̧ba̧lö kwomukwataduwena, ¿jö̧tö? ¿Dakwö kwomukwataduwa chömöledö? Jobadö Galilea jojodötjö debö 'yi̧nadöma, okobe deinö ju'wedö Galilea nijinö ju̧kwadötjö bajalekwönönö sulabenö ja̧tjiökwe ¿jejenö baledobö weinaji̧ Diosma? Sulabedötjinökötjö̧ma, ¿jejenö baledoko jö̧a̧linenaji̧? 3Ju'wedö Galilea jojodötjö bajalekwönönö sulabedötjinokobe chömöledö. Dios öba a'otjö jobadöbi, ju'wedö Galilea jojodöbi, ökwödöbi bakwaibedöja. Jau chömöledö, Dios öba a'otjö ökwödöbi isabenö sulabenö omukwatadöja, ja̧danö sulabenö kwomukwataduwi̧ kabatibö kwöbalewachaduwökötjö̧ma, ökwödöbi isabenö Dios lȩebi̧tjö kwemaduwakwedöja.
4Ja̧danö, belö Jerusaléntjö a̧li̧nösamu jelemutjö wa̧medukwa jojodönö mösaka Siloé mikwakama kwaibinobe, ja̧danö jobadönö kwabö loinobe, ¿jö̧tö? ¿Tajawedö jobadönö kwaibinada chömöledö? ¿Ju'wedö Jerusalénnö ju̧kwadötjö bajalekwönönö sulabedötjobetjö̧ jejenö kwaibinaji̧ jakama? Sulabedötjinökötjö̧ma, ¿jejenö baledoko jö̧a̧linenaji̧? 5Ju'wedö Jerusalénnö ju̧kwadötjö bajalekwönönö sulabedötjinokobe chömöledö. Dios öba a'otjö jobadöbi, ju'wedö Jerusalénnö ju̧kwadöbi, ökwödöbi bakwaibedöja. Jau chömöledö, Dios öba a'otjö ökwödöbi isabenö sulabenö omukwatadöja, ja̧danö sulabenö kwomukwataduwi̧ kabatibö kwöbalewachaduwökötjö̧ma, ökwödöbi isabenö Dios lȩebi̧tjö kwemaduwakwedöja—
jö̧ba̧lö yöawinobe Jesúsma.
Higo towi wa̧jokowinö Jesús wanedö yöawina wene
6Jesúsma jojodönö wanedö yöawinobe baikwö:
—Bakwo̧ batjo luwo̧ma higo towi ujuna̧linobe, iteda öbatjo ubasayutjö. Ja̧danö, jowi higo towi wa̧ji̧ ukwotö jö̧ba̧lö edö i̧'yijayonö, waekwinobe, wa̧jinokobe. 7Wa̧pötakwa o̧biya baledibanö jejenö wa̧jiökökwe, ömöayo̧ batjo otido̧nö weinobe baikwö: Edi, ida̧ökö wa̧pötakwa o̧biya baledibanö bowi wa̧ji̧ chukwotö jö̧ba̧lö chi̧'yiba̧lijayonö, wa̧jokowi. Wa̧jo̧kowi chöbatjonö jo̧böma chöpöjöda, jubö lobi, jö̧ba̧lö weinobe ömöayo̧nö.
8Weiökwe, ömöayo̧ma atadinobe: Chuluwo̧, ina jubö lodoko, biya̧ o̧ba jowi ö'öbönö sobö cho̧tjocha, ja̧danö tja̧jwi̧mu tjide'ijukwö wiwodö cho̧tjocha towi ö'öbönö, otiwanö wa̧jobö. 9Ja̧danö, cho̧tjaja̧ ikena o̧ba wa̧jitjöma otiwa, jo̧kwaijayonö ina wa̧jökötjö̧ma, jenada jubö lotocha, jö̧ba̧lö atadinobe—
jö̧ba̧lö wanedö yöawinobe Jesúsma.
Jesús otikwökö möle jojosujunö otidö loina wene
10Judío jojodö tjodidökö möle baibenama, Jesúsma ba̧nö tja̧ja̧kwa̧lejutjö öba̧ja̧dinobe jojodönö. 11Ja̧danö jeluju jobe jö̧jinobe, jo̧'wo̧ luwo̧nö sulabo̧ öjokoma, a̧li̧nösamu jelemutjö wa̧pötakwa o̧biya usula emawujuma. Jo̧'wo̧ luwo̧nö sulabo̧ ö̧joko, bakobenö itukobuju jö̧jinobe, jweinö a̧laibökuju.
12Jobujunö edö, Jesúsma jobujunö jwöinobe, ö̧jobekwö jichobö, ja̧danö ichibajunö yöa̧linobe:
—Jojosuju, kwö'wöchi̧tjö ejatö lotakwö—
jö̧ba̧lö. 13Ikenama Jesúsma jobujunö mainobe, ja̧danö maenama, juluwanö jweinö a̧laibö, jo̧'wo̧ ösöwachibanö Diosnö jösödinobe, otiwanö pjaatajabe jö̧ba̧lö.
14Jo̧kwaijayonö otikwökö möle jö'wöchi̧ otidö loiökwe, ba̧nö tja̧ja̧kwa̧leju luwo̧ma ödameakwinobe, ja̧danö jojodönö yöawinobe:
—Semanakwena jelemutjö bakwöta möle jobe, jojodö otiwanö tjotidoböma, jo̧kwajabetjö̧ ja̧ jelemutjö bakwöta möleda kwichaduwo, kwö'wöchaduwi̧ otidö looböma. Otikwö̧kö̧ möle ökwödönö otidö looböma sula, jo̧kwajabetjö̧ otikwökö möle otidö looböma kwichaduwoko—
jö̧ba̧lö. 15Jo̧kwaijayonö jejenö yöa̧liökwe Duluwo̧ma atadinobe:
—Ökwödö jejenö omukwatadöma sulabenö dötölatajanö omukwatadöja. Ökwödöma okobe deinö kwa̧jwi̧muduwinö ejatadöja, ¿jö̧tö? Otikwökö mölejayonö, kwajwi bulönöena, pakayaso̧nöena ejatö, öbibadöja ojwiyo owobö, ¿jö̧tö?
16Ja̧danö kwa̧jwi̧muduwinö jejenö otikwökö möle kwejataduwobö ji̧tjöma, bisu Abraham itjiju tupadanö jojosujunö ¿jö'wöchi̧tjö chejatobö jwienaji̧? Isabenö jo̧be. Bisuma Awetja nu'yö loiniokoda a̧li̧nösamu jelemutjö wa̧pötakwa o̧biya itukobuju usula jemawajabeta, ja̧danö kwa̧jwi̧munö otikwökö möle kwejataduwobö ji̧tjö̧ma, isabenö bisu kwa̧jwi̧muduwitjö bajalekwönönö mikwawujunö otikwökö möle chejatobö jo̧be—
jö̧ba̧lö yöawinobe Jesúsma.
17Jejenö yöawiawö̧, Jesúsnö öpöjödadöma taba̧lawö̧ tjö̧jinobe, jo̧kwaijayonö ju'wedö jojodöma tjo̧'wo̧ ösöwachibanö tjösödinobe, Jesúsma isabenö otiwa jawa otido̧ jö̧ba̧lö.
Mostazasadenöbi, pan ye'yeachi̧ jawanöbi Jesús wanedö yöawina wene
18Jesúsma tupakwö yöawinobe jojodönö baikwö:
—Chömöledö, kwedaduwemi ¿dakwö ichejekwobeda Dios la'aka luwo̧ ö̧jakwa̧ma? ¿Dakwö wanedö yötawakwajö, ichejekwi̧ jawama? Baikwö yötawaduwakwö chömöledö: 19Mostazasade ja'yuwadedanö ichejekwa chömöledö. Baikwö wanedö yötawa: Bakwo̧ mostazade jwiinö ja'yuwade iteda öbatjonö ödinobe, ja̧danö ja'yuwadejayonö, pokwö towi nöowi baibanö pokwobe, ja̧danö pji̧yu̧ma ichö, jowi ötjebiyanö tja'do̧ tjotidobe—
jö̧ba̧lö wanedö yöawinobe Jesúsma.
20Ja̧danö ju'wibi yöawinobe Jesúsma:
—¿Dakwö yötawakwajö Dios la'aka luwo̧ ö̧jakwa̧ ichejekwi̧ jawama? 21Baikwö yötawa: Dios la'aka luwo̧ ö̧jakwa̧ jawama, ye'yeachi̧ jawadanö ichejekwa. Baikwö wanedö yötawa: Bakwuju pan otidujuma, ja'yubeda ye'yeachi̧ jawakwö, nöinö harina jawasa'bekwö wiwoduju, ja̧danö ye'yeachi̧ jawa ja'yubeda jiwiwodijayonö, okobe jwiinö pansa'be ye'yeachibobe—
jö̧ba̧lö yöawinobe.
Apjude ja'yuwadenö tetjachobö Jesús wanedö yöawina wene
22Jesúsma tjo̧'omanö kwebachö i̧'yinobe Jerusalénbe, ja̧danö 'ya̧nö, comunidadtenia techaiabö, jojodönö yöbawö kweachinobe Jerusalénbe. 23Ja̧danö, kweachonö bakwo̧ Jesúsnö abebö a̧ja̧kwinobe:
—Duluwo̧, Dios lȩebi̧tjö tjö̧jibakwedöma, ¿dokwa ba̧jekwadö tjö̧jibakwa̧da? ¿Ja'yubedöda tjö̧jibakwa̧ji̧?—
jö̧ba̧lö. Abebö a̧ja̧kwiökwe Jesúsma atadö wanedö yöawinobe baikwö:
24—Chömöledö, apjude ja'yuwadebenö tekachaduwobö jwaikwöda kwisakwaduwo, jade utumatakwa̧ abönö. Jau chömöledö, ba̧jekwadö tetjachobö tjisakwakobe, jo̧kwaijayonö tetjachoböma jwiakobe, utumatakwa̧ abönö ja'yuwadebenö tetjachokobetjö̧. 25Eju luwo̧ a̧laibö apjude utumataja̧ ikenama, teachakwawa jwiakobe.
Jau chömöledö, ida̧ökö jeju okwa kwö̧jaduwökötjö̧ma, apjude a̧petukwöchobe ja̧nö jwökeba̧laduwena: Duluwo̧, apjude po̧bebi tedachobö, jö̧ba̧lö. Jo̧kwaijayonö okwatjö atadena: Ökwödönö wajwitawö̧ja, detjö ichadöjö, jö̧ba̧lö, ökwödönö atadena, apjude po̧bebö tetatökö ökwödönö, jö̧ba̧lö. 26Jejenö atadiawö̧ yöka̧laduwena: Comunidad mana ö'wejetjö yökawenama, ökwödöma kwöba a'otjö kwanöbi dukwijatö, ja̧danö owöbi dowijatö kwöba a'otjö. Kwöwaisawö̧sa, jö̧ba̧lö.
27Jo̧kwaijayonö jejenö yöka̧laduwijayonö, ökwödönö yöa̧lakobe: Yötawaduwakwö, isabenö wajwitawö̧ja, detjö ichadöjö, jö̧ba̧lö. Tetatökö ökwödönöma. Chö̧jelö da̧ja̧duwi okobe deinö ökwödö sulabenö ja̧badöma, jö̧ba̧lö atadakobe.
28Ja̧danö, jejenö ökwödönö baledenama isabenö ba̧jekwadö budekwabinö kwo'ye kikisö ja̧bö kwubudekwaduwakobe, jobe okwa Abrahambi, Isaacbi, Jacobbi, okobe deinö Dios yöawi̧ yöbawinadöbi okwa tjö̧jonö, ökwödöma a̧petubeda kwö̧jaduwakobetjö̧.
29Ja̧danö, ökwödö okwa tekachaduwököjayonö, jawo̧ laebobekwötjöbi, ichobekwötjöbi, a̧li̧tjöbi, u'datjöbi ba̧jekwadö Israel jojodöböködöma ichö Dios la'aka luwo̧ ö̧jena mesasötenö bamatö tjukwakobe.
30Ja̧danö, biya̧ wene kwomukwataduwo chömöledö: Ju'wedönöma babe mikwawöködö jö̧tja̧lijayonö, ja̧ möle ju'wedötjö bajalekwönönö mikwawadö tjö̧jakobe, ja̧danö babe ju'wedönöma bidöma ju'wedötjö bajalekwönönö mikwawadö jö̧tja̧lijayonö, ja̧ möle mikwawöködö tjö̧jakobe—
jö̧ba̧lö yöawinobe Jesúsma.
Jesús Jerusalénnö ju̧kwadönö o̧'wo̧ tjo̧achina wene
31Ja̧danö, Jesús jejenö yöawonö, fariseo jojodötjö ju'wedö ichö Jesúsnö yötjawinobe:
—La'aka luwo̧ Herodes Antipasma ökwönö kwabö loobö jö̧a̧lobe. Belö dökibajo ökwönö kwabö loapji jö̧ba̧lö—.
32Yötjawiökwe, Jesúsma atadinobe:
—Jo̧ba yolokodanö suli̧ waedo̧ Herodesnö baikwö yökawaduwo:
Jesúsma baikwö yöawajabe: A̧ja̧kwi, babe mölebi, itekwayi mölebi tjo̧'wo̧ luwo̧nö sulabedönö a'dewö loböbi, jojodö tjö'wöchi̧ otidö loböbi chotidocha, ja̧danö jemi ikena möle chotido jö̧ta̧laja̧ma katatibakobe, jö̧ba̧lö Herodesnö yökawaduwo—
jö̧ba̧lö weinobe Jesúsma jobadönö.
33Tupakwö yöawinobe Jesúsma:
—Herodes ötjönö kwabö loobö jö̧a̧lijayonö, yayonö babe mölebi, itekwayibi, ikena mölebi tjo̧'omanö Jerusalénbe kwebachö chi̧'yobö jo̧be, ja̧danö jobe chichibakwa̧ abönö ötjönö kwabö lotjoböma jwiakobe. Baikwö yötawa: Dios yöawi̧ yöbawadönö kwabö loawemima, sule Jerusalénda, jo̧kwajabetjö̧ jobe dichibakwa̧ abönö isabenö ötjönö kwabö lotjökakobe—
jö̧ba̧lö yöa̧linobe.
34Ja̧danö, Jesúsma Jerusalénnö ju̧kwadönö o̧'wo̧ tjo̧achö yöa̧linobe baikwö:
—¡Ökwödö Jerusalénnö ju̧kwadöwe! Ökwödöma Dios yöawi̧ yöbawadönö kwabawö lobadöja, ja̧danö ökwödönö yötjawobö Dios weawö̧nö inawiya ikwawö lobadöja. Isabenö nöinö ökwödönö wo̧batö chite'ada̧lobö chösödijatö, akalasuju ji̧tji̧munö jo̧wa̧ja̧pa̧ teebe ko̧ko̧dö junö jite'ada̧li̧danö, jo̧kwaijayonö kwöpöjödaduwobe. 35Jo̧kwajabetjö̧, edaduwi, beju kwejuduwi Dios ejuma, jojodö deeju ji̧bakobe, ötjönö kwöpöjödaduwobetjö̧.
Ja̧danö ökwödönö yötawa, bemi tupakwöma la'akatjöda yemidanö ötjönö kwedaduwökena, 'dö̧ibaji̧ möle yemidanö chichenanö kabatö. Ja̧ möle yemidanö ötjönö kwedaduwenama, ötjönö ösödö, Bite Duluwo̧ iminö icho̧ma, isabenö Dios otiwanö pjaatökwe, jö̧ba̧lö ötjönö yöka̧laduwakobe—
jö̧ba̧lö yöa̧linobe Jesúsma, Jerusalénnö ju̧kwadönö.
Currently Selected:
Lucas 13: WPC
Highlight
Share
Copy
Want to have your highlights saved across all your devices? Sign up or sign in
©2021, All Rights Reserved
