Lucas 14
14
Otikwökö möle Jesús ö'wöcho̧nö otidö loina wene
1-3Ju'wi otikwökö mölema, Jesúsma fariseo jojodötjö luwo̧ ejube ukwobö i̧'yinobe, ja̧danö jobe bakwo̧ ö'wöcho̧bi ö̧jinobe, öbabi i̧bȩjwa̧bi ye'yebacho̧ma. Ja̧danö, otikwökö möle ö'wöcho̧ Jesús öba a'o ö̧jiawö̧, fariseo jojodöbi, Moisés iwȩyudina ba̧ja̧dadöbi te'ada̧lönö tjeda̧linobe Jesúsnö, otikwökö möle dakwö ja̧ojobö jö̧ba̧lö.
Jejenö dakwö ja̧ojobö jö̧ba̧lö tjeda̧liökwe, Jesúsma jobadönö abebö a̧ja̧kwinobe:
—Moisés iwȩyudinama ¿dakwö laebobeda? Otikwökö möle ö'wöchadönö otidö lotjobö ¿jo̧beji̧?, ¿jwiobeji̧? ¿Dakwö laebobeda?—
jö̧ba̧lö. 4Abebö a̧ja̧kwijayonö 'wi̧inö ja̧nö tjatadinokobe. Jemi ikenama, Jesúsma ö'wöcho̧nö do̧batö, ö'wöchi̧ otidö loinobe, ja̧danö otidö lobajo̧, ȩwa̧jobö weinobe.
5Jejenö otidö lobajo̧, Jesúsma jo̧banö eda̧ladönö abebö a̧ja̧kwinobe:
—Ökwödötjö bakwo̧ kwitji̧ena, kwajwi pakayaso̧ena otikwökö möle laju okwa meitjö̧ma, ¿jo̧kwada jö̧ba̧lö pjakataduwökenaji̧? Aaa, otikwökö möleobetjö̧ pjatatökö ¿jö̧ka̧laduwenaji̧? Ökwödötjö bakwo̧bi, Otikwökö möle, jö̧ba̧lö kwitji̧nöena, kwajwinöena ¿pjakatökenaji̧? Ja̧maökö, okobe deinö pjabatö tököbaduwena, ¿jö̧tö?—
jö̧ba̧lö abebö a̧ja̧kwinobe Jesúsma. 6Jejenö abebö a̧ja̧kwiawö̧, atadakwawa jwiinö tjö̧jinobe Jesúsnö eda̧ladö fariseo jojodöbi Moisés iwȩyudina ba̧ja̧dadöbi.
—Ökwödöda otiwo̧sa jö̧ba̧lö kwi̧sebaduwoböma kwisakwaduwoko— jö̧ba̧lö Jesús wanedö yöawina wene
7Jobe fariseo jojo ejunö ja̧nö, Jesúsma edinobe ju'wedö fariseo jojo tjukwobö a̧debawö̧ tji̧sebi̧ma. Okobe deinö tjisakwinobe, luwedö tjö̧bena tjöbamatobö, ja̧danö jejenö tjisakwiökwe, Jesúsma jobadönö wanedö yöawinobe baikwö:
8—Tji̧lȩkwa̧munö emawa pjiesta kwujunobö tja̧debitjö̧ma, luwedö tjö̧bena kwöbamatoko, taba tököbapji jö̧ba̧lö. Baikwö yötawa: La'aka luwo̧ ö̧bena kwöbamatitjö̧ma, kwöbamataja̧ ikena jelo̧ ökwötjö bajalekwönönö pjiesta luwo̧ otiwanö ösödökwe teachena. Jau chömöledö, ötjöda ju'wedötjö bajalekwönönö otiwanö ösödökwesa jö̧ba̧lö kwomukwatijayonö, wajwiköbena okobe deinö a̧debajawö̧nö. Ja̧danö chömöledö, wajwiköbonö ökwötjö bajalekwönönö mikwawo̧nö a̧debajena pjiesta luwo̧ma. Ja̧danö jejenö a̧debatjö̧ma, 9jo̧ba inesö mikwawo̧ teachenama pjiesta luwo̧ma ökwönö weena: A̧laibö pjolachibi, bite otiwanö chösödökweda jobe öbamatakobetjö̧, jö̧ba̧lö. Ja̧danö, jejenö baleditjö̧ma, tabakwö jo̧kwadabedö tjö̧bemida kwöbamatena, ¿jö̧tö? 10Jejenö ökwödönö baledapji jö̧ba̧lö baikwö ja̧köbaduwo: Ökwödönö pjiesta kwujunobö tja̧debenama, jo̧kwadabedö tjö̧benada kwöbamato, ja̧danö ökwönö a̧debajo̧ teachenama, ökwönö weena, Chömöledöso̧, ichi, otiwanö chösödawö̧ tjö̧benada kwöbamato, jö̧ba̧lö. Jejenö baleditjö̧ma, okobe deinö jobe ba̧ja̧dö tjöba a'otjö i̧sebena, isabenö otiwanö ösödökweja jö̧ba̧lö.
11Jau chömöledö, okobe deinö idöda luwedö batjibobö isakwadöma, mikwawöködö batjibanö ja̧akwo̧ Diosma, ja̧danö okobe deinö mikwawö̧kö̧sa jö̧ba̧lö omukwatadönö, jobadönö mikwawadö batjibanö kabebö ujunakwo̧ Diosma—
jö̧ba̧lö yöawinobe Jesúsma.
Tji̧lȩkwa̧munö emawa pjiesta jawa Jesús wanedö yöawina wene
12Ja̧danö, Jesúsma jo̧banö ukwobö a̧debajo̧nö jö̧a̧linobe:
—Jojodö ichö tjukwobö kwa̧debena, ja̧danö pjiesta kwujunenama, kwömöledönö, ja̧danö kwöja̧wo̧dönö, ja̧danö kwipjeanö ju̧kwadö nöinö juna̧ladönö kwa̧deboko. Baikwö yötawa: Ökwö kwujuna̧li̧danö nöinö juna̧ladönöda kwa̧debitjö̧ma, balekwa mikwa ökwönöbi tja̧debakobe, tjejube ichö kwukwobö, ¿jö̧tö? Ja̧danö, jejenö tja̧debobetjö̧ Diosma kwa̧debaja̧ omukwatö ökwönö mölejȩbetjö iyobö omukwatökena, ida̧ökö balekwa mikwa jo̧banöbi tja̧debajabe jö̧ba̧lö. 13Jau chömöledöso̧, Dios ökwö kwa̧debaja̧ omukwatö ökwönö mölejȩbetjö iyobö kwösöditjö̧ma, jwibadönöda pjabatö kwa̧debo, balekwa mikwa ökwönö a̧deböködönöda. Jau chömöledöso̧, usula jojodönöbi, kwebachöködönöbi, 'wabadönöbi, tjöbajale tjewawadönöbi kwa̧debenama, ja̧ edö Diosma ösödena, Bitema otiwanö dösölö̧jinö jojodönö pjabato̧, jö̧ba̧lö. Ja̧danö, otiwanö ja̧köbiökwe balekwa mikwa mölejȩbetjö ökwönö otiwa jawa iyena Diosma, ¿jö̧tö? 14Jau chömöledöso̧, jobadöjayedönö pjabatö kwiyenama, balekwa mikwa ökwönö pjabatö tjiyoböma jwibadö, jo̧kwaiökwe Diosda otiwanö omukwatö mölejȩbetjö ökwönö iyakobe, 'dö̧ibaji̧ möle otiwadönö woawatjö tjetjachajinö ja̧enama—
jö̧ba̧lö yöawinobe Jesúsma.
15Jejenö yöa̧liökwe, bakwo̧ Jesúskwö mesasötenö bo̧ma yöa̧linobe:
—Isabenö tjo̧'wo̧ ösöwanö tjö̧jakwedö okobe deinö judío jojodö Dios la'aka luwo̧ ö̧jena pjiesta tjukwakwedöma—
jö̧ba̧lö. 16Yöa̧liökwe, Jesúsma atadö wanedö yöawinobe baikwö:
—Bakwo̧ pjiesta ujunobö omukwatinobe, jwiinö ba̧jekwadö otiwanö tjukwakwa̧ pjiestama. Ja̧danö ba̧jekwadönö a̧debinobe, pjiesta chujunocha, ja̧danö chujunenama ichö kwukwaduwo, jö̧ba̧lö. 17Ja̧danö, ida̧ökö tjukwobö baibenama, iteda ömöayo̧nö weinobe, a̧debajawö̧nö yöawobö:
Tjo̧wi̧ kwukwaduwobö jo̧be, ichö kwaduwi, jö̧ba̧lö.
18Jo̧kwaijayonö, ja̧ pjiestama mikwawökö ji̧ jö̧ba̧lö, okobe deinö bakwo̧nökwena öpöjödö, Aaa, chi̧'yoböma jwiobe jö̧ba̧lö yötja̧linobe. Jobadötjö bakwo̧ jö̧a̧linobe: Aaa, babeda chöbatjo chemajabetjö̧, otiwojobö jö̧ba̧lö chedajo. Jo̧kwajabetjö̧ pjiesta junö chi̧'yököjayonö sulabenö ötjönö kwomukwatokobö ateba, jö̧ba̧lö. 19Ja̧danö jelo̧ yöa̧linobe: Babeda pa̧ka̧yö̧nö domulatajabedönö chemajabe, du̧ju̧tajakwena töbö tjotidobö, ja̧danö otiwanö tötjojobö chedaja. Jo̧kwajabetjö̧ pjiesta junö chi̧'yököjayonö sulabenö ötjönö kwomukwatokobö ateba, jö̧ba̧lö. 20Ja̧danö jelo̧ yöa̧linobe: Chilekwonö cheminobetjö̧ chi̧'yoböma jwia, jö̧ba̧lö.
21Jejenö yötja̧liökwe, pjiesta luwo̧ ömöayo̧ma uluwo̧nö yöbawö ȩwa̧jinobe, ja̧danö tjichajiökökwe, ödameakwinobe ichajöködönö. Ja̧danö, pjiesta luwo̧ma iteda ömöayo̧nö weinobe: Juluwanö comunidad bakwameachibanö 'ya̧wi, ja̧danö jobetjö usula jojodönöbi, kwebachöködönöbi, tjöbajale tjewawadönöbi, 'wabadönöbi öbibö kwichejebo, jobadöda pjiesta tjukwobö, jö̧ba̧lö. 22Weökwe uluwo̧ weaja̧danö i̧'yinobe, ja̧danö ȩwa̧jo̧ uluwo̧nö yöawinobe: Chuluwo̧, weköbaja̧danö comunidad jojodönö chichejebajabe tjukwobö, jo̧kwaijayonö ina su̧'bȩ baibokobe pjiesta kwakwawȩko̧ma, ina ju'wedöbi tebachö tjukwobö jo̧be, jö̧ba̧lö.
23Yöawiökwe, uluwo̧ma atadinobe: Comunidad tupakwöbi isakwö 'ya̧wi, ja̧danö kwetjachama nöamabi, tebo ö'öbö la̧mabi okobe deinö kwedawö̧nöma yöbawö kwa̧debo, cheju isabenö su̧'bȩ baibakobetjö̧. 24Jau chömöayo̧, jobadönöda kwa̧debo, jobadö otiwanö tjukwonö ajayinö cha̧debajawö̧ öpöjödadöma ja'yubebi chotidaja̧ pjiesta tjukwökakobetjö̧, jö̧ba̧lö atadinobe uluwo̧ma—
jö̧ba̧lö wanedö yöawinobe Jesúsma. Jejenö wanedö yöawinobe Jesúsma, Diosma isabenö judío jojodönö a̧debajayonö, tjöpöjödobetjö̧ ju'wedönöda a̧debakobe, jö̧ba̧lö.
—Chöba̧ja̧di̧ waisachadöma böjȩ jawatjö o̧penönö ötjönöda tjösödobö jo̧be— jö̧ba̧lö Jesús yöawina wene
25Jesús kwebachö i̧'yonö, yelösöda ba̧jekwadö jojodöma ökömanö tji̧'yinobe, ja̧danö jalachibö Jesúsma jobadönö yöawinobe baikwö:
26—Bakwo̧ ötjö chöba̧ja̧di̧ waisacho̧ baibanö chökömanö ichobö ösöditjö̧ma, okobe deinö ju'wedötjö bajalekwönönö jwaikwöda ötjönöda ösödobö jo̧be. Baikwö yötawa: Iteda yöne ömöledönö, abe'donöbi, ojo'donöbi, ilekwonöbi, i̧tji̧munöbi, öjawo̧dö ömadönöbi, ya̧dönöbi ösödijayonö, jobadönö ösödi̧tjö bajalekwönönö ötjönöda ösödobö jo̧be. Jau chömöledö, jobadönö ösödi̧tjö jwiinö bajalekwönönö ötjönöda ösödobetjö̧, ömöledönö öpöjödobedanö ichejekwena, jobadötjö bajalekwönönö ötjönöda ösödobetjö̧. Jau chömöledö, ötjö isabenö chöba̧ja̧di̧ waisachadöma, ju'wedötjö bajalekwönönö ötjönöda tjösödobö jo̧be, ja̧danö ju'wibi itedada ösödakwawi̧tjö bajalekwönönö ötjönöda ösödobö jo̧be isabenö chöba̧ja̧di̧ waisacho̧ma, ja̧danö jejenö ötjönö ösödökötjö̧ma, isabenö chöba̧ja̧di̧ waisacho̧ ö̧joböma jwibo̧.
27Ja̧danö chömöledö, bakwo̧ towisa'o, iteda woakwa'o kabeibö, ötjö chökömanö ichobö öpöjöditjö̧ma, isabenö chöba̧ja̧di̧ waisacho̧ ö̧joböma jwibo̧.
28Jau chömöledö, bakwo̧ chöba̧ja̧di̧ waisacho̧ baibakwa̧ abönö jweinö omukwatobö jo̧be, isabenö woenanö kabatö chökömanö ichojobö jö̧ba̧lö, ja̧danö isabenö iteda ömöledönötjö bajalekwönönö ötjönöda ösödojobö jö̧ba̧lö, baikwö wanedö yötawa: Ökwödötjö bakwo̧ isaka möaka otidobö jö̧a̧litjö̧ma, otidakwa̧ abönö ¿bamatö öba̧ja̧dökenaji̧, ba̧jekwachenanö balada ujuna̧lojobö jö̧ba̧lö? 29Otidakwa̧ abönö omukwatena, ja'öda balada 'dö̧ibiökwe kaatibapji jö̧ba̧lö, ¿jö̧tö? Jau chömöledö, otidakwa̧ abönö omukwatö öba̧ja̧dobö jo̧be, o̧do la'aka junajo̧, möakwö otidö ujunakwa̧ abönö balada 'dö̧ibiökwe kaatibapji jö̧ba̧lö, ja̧danö jejenö ja'ö kaatibiawö̧, jojodö jo̧banö obö, 30Bitema mösaka otidotö jö̧ba̧lö jamatö otidijayonö, ja'önöda kabatakwawo̧, jö̧ba̧lö jo̧banö otjapji jö̧ba̧lö. Jau chömöledö, kwotidaduwakwa̧ abönö omukwatö ba̧ja̧dadöja, kakataduwenanö baibanö kwotidobö kwujuna̧laduwojobö jö̧ba̧lö, ¿jö̧tö?
31Ja̧danö ju'wibi yötawa, chöba̧ja̧di̧ waisachadö bakibaduwakwa̧ abönö otiwanö kwomukwataduwo ötjökwö kwichaduwojobö kwichaduwokojobö jö̧ba̧lö. Baikwö wanedö yötawa: Bakwo̧ la'aka luwo̧, iteda ömöayedö guardia jojodökwö kwakwabö i̧'yakwa̧ abönö, isabenö öpöjojonö ujuluwojobö jö̧ba̧lö ¿omukwatökenaji̧? Isabenö omukwatena chömöledö, öpöjojoma iteda ömöayedö guardia jojodö veinte mil jenanö ömöayedökwö ichitjö̧ma, jo̧bakwö kwakwabö laebakwa̧ abönö bamatö omukwatena, iteda ömöayedö diez milbedökwö öpöjojonö ujuluwakwojobö jö̧ba̧lö, ¿jö̧tö? 32Ja̧danö, omukwatajo̧ juluwö̧kö̧sa jö̧ba̧lö omukwatitjö̧ma, öpöjojo ina ödö ö̧jayi iteda ömöledötjö ju'wedönö weena, öpöjojokwö yöba̧lakwawö wene ja̧ajama söbekwö lotjobö, ¿jö̧tö?
33Jau chömöledö, böjȩtjö abönö omukwatadöja, ja'öda kwöwaekwaduwapji jö̧ba̧lö, ja̧danö ötjö chöba̧ja̧di̧ waisachadö batjibobö omukwatadöbi jejenö jweinö omukwatönö tjomukwatobö jo̧be, isabenö chöba̧ja̧di̧ waisachadö batjibobö tjösödojobö jö̧ba̧lö. Ja̧danö, ötjö chöba̧ja̧di̧ waisachadöma wotjenanö kabatö jwaikwöda ötjönöda tjösödobö jo̧betjö̧, abönö otiwanö tjo̧mukwatobö jo̧be, isabenö chöba̧ja̧di̧ waisachadö batjibobö tjösödojobö tjöpöjödojobö jö̧ba̧lö. Ja̧danö, okobe jwiinö tjujuna̧li̧ mikwawökö ji̧ jö̧ba̧lö lödibö, chökömanö tjichobö tjöpöjöditjö̧ma, isabenö chöba̧ja̧di̧ waisachadö batjiboböma jwibadö—
jö̧ba̧lö yöawinobe Jesúsma.
Sayu jawanö Jesús wanedö yöawina wene
34Ju'wibi wanedö yöawinobe Jesúsma:
—Chömöledö, sayuma otiwi̧, kwakwawa meyuwökönö pjaati̧, ¿jö̧tö? Jo̧kwaijayonö, sayu meyuwachibitjö̧ma, mikwawökö ji̧, ja̧danö yemidanö o̧toböma jwii̧, ¿jö̧tö? 35Jau chömöledö, sayu meyuwitjö̧ma ja'yubebi pjaatökö ji̧. Ju'wi jaye suli̧ waekwi̧ yötja̧li̧ma, ina ja'yubenö mikwawena, ja̧danö batjo otiwanö pokwobö wiwodö o̧tjoböena, sula'wo sulabenö 'dö̧ekwapji jö̧ba̧löbi tjöwanoböena, ina mikwawobe ju'wi suli̧ waekwi̧ yötja̧li̧ma. Jo̧kwaijayonö sayu mȩyu̧wachibö mȩyuwitjö̧ma ja'yubebi mikwawökö ji̧ baibena, ¿jö̧tö? Jau chömöledö, isabenö mikwawokobetjö̧, ikwöda lotjena—
jö̧ba̧lö wanedö yöawinobe Jesúsma. Jejenö wanedö yöawinobe Jesúsma jojodönö, sayu kwakwawa söinö pjaati̧danö, böjȩ jojodö tjö'da̧de ja̧nö meyuwökönö ja̧nö pjakataduwo jö̧ba̧lö. Ja̧danö tupakwö jojodönö yöawinobe:
—Isabenö mikwawi̧ ökwödönö yötawi̧ma, okobe deinö kwa̧ja̧kwaduwobö jo̧be— jö̧ba̧lö.
Currently Selected:
Lucas 14: WPC
Highlight
Share
Copy
Want to have your highlights saved across all your devices? Sign up or sign in
©2021, All Rights Reserved
