Lucas 15
15
—Diosma isabenö jojodö sulabenö tjomukwati̧ kabatibö tjöbalewachobö ösödo̧— jö̧ba̧lö Jesús yöawina wene
1Jesús yöawena, la'aka luwo̧ itea balada impuesto ötjabi̧ balada emadöbi, ju'wedö sulabedö ötjabawö̧bi Jesús ö̧jobekwö tji̧'yinobe, yöawi̧ tja̧ja̧kwobö, ja̧danö Jesúsma jobadönö a'dewö lobökönö jobadönöbi yöawinobe.
2Jejenö a'dewö loiököwö̧, fariseo jojodöbi Moisés iwȩyudina ba̧ja̧dadöbi tjo̧'wo̧ sulinö yötja̧lakwawinobe Jesúsnö:
—Bite Jesúsma sulabedö tjichobö ösödo̧, ja̧danö ju'wibi jobadökwö sulabenö kwo̧—
jö̧ba̧lö, Jesúsnö öpöjödö yötja̧lakwawinobe. 3Jejenö yötja̧liökwe, Jesúsma jobadönö wanedö yöawinobe baikwö:
4—Ökwödötjö bakwo̧ o̧bȩja̧dönö cienbedönö ujuna̧litjö̧ma, ja̧danö a̧jwi̧mutjö bakwo̧ ile'dewitjö̧ma, ¿jo̧banö isakwökenaji̧? Kwöwaisaduwa, isakwena, ¿jö̧tö? Ju'wedö noventa y nuevebedönö okobe junibö, le'dewajo̧nö isakwena öbadekwajenanö kabatö, ¿jö̧tö? 5Ja̧danö, badekwajo̧, o̧'wo̧ ösöwachibanö öböbe'onö wanawö, ȩwa̧jena, ¿jö̧tö? 6Ja̧danö, ejube ichibenama, o̧'wo̧ ösöwanö ömöledönö jwöbö yöawena, Okobe deinö do̧'wo̧ ösöwachibanö dö̧jaduwo, chajwi le'dewajo̧nö chöbadekwajabetjö̧, jö̧ba̧lö o̧'wo̧ ösöwanö yöawena ömöledönö, ¿jö̧tö?
7Mölejȩbetjöbi ja̧danö, bakwo̧ sulabenö ja̧bö jo̧ sulabenö omukwati̧ kabatibö öbalewachenama, jwiinö tjo̧'wo̧ ösöwachibanö tjuju̧kwobe mölejȩbe ju̧kwadöma. Jau, ju'wedö noventa y nuevebedö jweinö omukwatadönö edö, isabenö tjo̧'wo̧ ösöwanö tjedobe mölejȩbe ju̧kwadöma bidöma otiwanö omukwatadö jö̧ba̧lö, jo̧kwaijayonö jobadönö edö tjo̧'wo̧ ösöwanö tjö̧ji̧tjö bajalekwönönö isabenö tjo̧'wo̧ ösöwachibanö tjuju̧kwobe, bidö sulabedö jö̧ba̧lö kwöpöjödawö̧tjö bakwo̧ sulabenö omukwati̧ kabatibö öbalewachenama—
jö̧ba̧lö yöawinobe Jesúsma.
8Ja̧danö tupakwö wanedö yöawinobe Jesúsma:
—Ja̧danö, jojosuju baladasapi̧ domulatajasapi̧ juna̧lujuma bakwapi̧da mebö le'dewitjö̧ma, bakwapi̧dajayonö jöbadekwajenanö kabatö ¿jisakwökenaji̧? Isabenö jisakwena, dejewa'yu̧ nötedibö otiwanö jojwodatena jöbadekwajenanö kabatö, ¿jö̧tö? 9Ja̧danö badekwaju, jömöledönöbi jipjeanö ju̧kwadönöbi jwöbibö yöja̧lena, Okobe deinö do̧'wo̧ ösöwachibanö dö̧jaduwo, chitea baladasapi̧ le'dewaja̧pi̧ chöbadekwajabetjö̧, jö̧ba̧lö jo̧'wo̧ ösöwanö yöja̧lena, ¿jö̧tö?
10Mölejȩbetjöbi ja̧danö, bakwo̧ sulabenö ja̧bö jo̧ sulabenö omukwati̧ kabatibö öbalewachenama, Diosma iteda ömöayedö ángelesdökwö o̧'wo̧ ösöwachibanö ö̧jobe—
jö̧ba̧lö yöawinobe Jesúsma.
Bakwo̧ itji̧ sulabenö omukwati̧ kabatibö abe'dokwö tjeachajina wene Jesús wanedö yöawina wene
11Ja̧danö, tupakwö wanedö yöawinobe Jesúsma:
—Bakwo̧ i̧tji̧mu du̧ju̧tajabedönö ujuna̧linobe, 12ja̧danö jobadötjö bajalia luwo̧ma abe'donö aebinobe: Chabe'do, woköbena kwiteatjö ötjö chemo jö̧ta̧li̧ma, woköbena baibanöma chite'ada̧lobö chöpöjöda. Babeda kwiyobö chösöda. Iyitjö, jö̧ba̧lö.
Jejenö aebiökwe, sulabenö aebijayonö abe'doma iteda itea 'da̧batö ujuninobe, abönö pöe emakwa̧bi, öjawo̧ emakwa̧bi, ja̧danö 'da̧batö junajo̧ itji̧nö iyinobe aebi̧danö.
13Jemi ikena, ja'yubenö lekwajabetjö itji̧ bajalia luwo̧ma okobe jwiinö ujuna̧li ko̧ko̧dibö e'ewö i̧'yinobe ödö ju'wedö tjitebobe. Ja̧danö, ju'wedö tjitebonö ja̧nö, omukwatökönö iteda ösödi̧danö ja̧bö ö̧jinobe, ja̧danö juluwanö okobe jwiinö ujuna̧li̧ balada 'dö̧ibajinobe, omukwatökönö iyö loobetjö̧.
14Ja̧danö, okobe jwiinö ujuna̧li̧ 'dö̧ibaja̧ ikena, ja̧ niji bakwameachibanö a̧wi̧chi̧ tjöinobe, ja̧danö balada jwiobetjö̧, jo̧banöbi a̧wi̧chi̧ lö̧jinobe. 15A̧wi̧chi̧ jwiinö lö̧jiökwe, balada emotö jö̧ba̧lö otidawa isakwinobe, ja̧danö sule inesö suli̧ otikwada öbadekwajinobe, sule ku̧si̧dönö te'ada̧lakwawa otikwada. Jo̧kwajabetjö̧ a̧wi̧chi̧ jwiinö lö̧jökweobetjö̧, ja̧ niji jojodötjö bakwo̧ ku̧si̧dönö ajikwo̧ ömöayo̧ baibinobe, ja̧danö uluwo̧ma jo̧banö weinobe, ka̧putjö iteda a̧jwi̧mu ku̧si̧dönö tju̧kwa iyobö.
16Isabenö jwiinö a̧wi̧chi̧ lö̧jinobe jo̧banö, ku̧si̧dö tju̧kwa kwakwawa ukwobö omukwatenanö. Ku̧si̧dö tju̧kwa jwiinö suli̧jayonö, ja̧bi edö, chukwowe jö̧ba̧lö omukwatinobe. Jo̧kwaijayonö jwiinö a̧wi̧chi̧ lö̧jijayonö, jo̧banö ja'yubebi kwakwawa tjiyinokobe, ukwobö.
17Ja̧danö, jejenö a̧wi̧chi̧ lö̧jökwe ja̧nö, bajalianö jweinö omukwatinobe, ja̧danö jö̧a̧linobe itedada: Chabe'do ömöayedöma otiwanö tju̧kwa juna̧ladö, jobadöma u̧'yu̧kwibi̧nö kwadö, ja̧danö chabe'do ömöayedö otiwanö tjukwonö, ötjöma bai ja̧nö a̧wi̧chi̧tjö wotena. 18Baikwö ja̧tocha: A̧laibö chabe'do ö̧jobe chȩwa̧jocha, ja̧danö jo̧banö yöta̧locha: Chabe'do, isabenö sulabenö ja̧tajabe, Dios öpöjödi̧nöbi, ökwö kwöpöjödi̧nöbi sulabenö ja̧tajabe. 19Ja̧danö, jwiinö sulabenö ja̧tajabetjö̧, kwitji̧ chö̧joböma mikwawö̧kö̧sa ötjöma. Jo̧kwajabetjö̧, kwömöayo̧danö editjö, ja̧danö ju'wedö kwömöayedönö weköbi̧danö ötjönöbi webitjö, weköbi̧ otidö chö̧jakobetjö̧ jö̧ba̧lö yöta̧locha, jö̧ba̧lö yöa̧linobe itedada. 20Ja̧danö, jejenö omukwatajo̧, a̧laibö abe'do ö̧jobekwö ȩwa̧jinobe.
Abe'do ejube ichibakwa̧ abönö, ina ödö ö̧jayi, abe'doma jo̧banö edinobe, ja̧danö lȩlö̧jinö edö, itji̧ ö̧jobekwö ö'öakwawinobe, ja̧danö itji̧nö wo̧batö, du̧atinobe.
21Ja̧danö, ajayinö omukwatö ujuninadanö, itji̧ma abe'donö yöa̧linobe: Chabe'do, isabenö sulabenö ja̧bajo̧sa, Dios öba a'otjöbi, ökwö kwöba a'otjöbi sulabenö ja̧tajabe. Ja̧danö, jwiinö sulabenö ja̧tajabetjö̧, kwitji̧ chö̧joböma mikwawö̧kö̧sa ötjöma, jö̧ba̧lö yöa̧linobe abe'donö.
22Jejenö yöa̧lijayonö, isabenö chitji̧ kwö̧joböma mikwawö̧kö̧ja jö̧ba̧löma atadinokobe abe'doma. Itji̧nö ösödö ömöayedönö weinobe: Juluwanö ichejebaduwi inesö otiwado̧ jeledo̧tjö bajalekwönönö otiwado̧ kamijido̧ma, ja̧danö ja̧do̧nö bite chitji̧nö 'dubataduwi. Ja̧danö tjötö'anö nönawakwawabi, ötö'anö nönaduwi, ja̧danö sapatu ömasapiyanö 'dubataduwi, isabenö bitema ötjöda chitji̧obetjö̧. 23Ja̧danö, pakayaso̧ o̧tewo̧, pjiesta dukwena dukwakwo̧ jö̧ba̧lö otiwanö dukwejebinökwe pakayaso̧nö ichejebö, kwaköbaduwo pjiesta dukwobö. Jau chömöayedö, do̧'wo̧ ösöwanö pjiesta dukwobö jo̧be, 24Bite chitji̧nö woinenaö̧kö̧ jö̧ba̧lö domukwatinajayonö, woawatjö tjeachajinobedanö ichejekwobetjö̧, ja̧danö ile'dewinajayonö, bajalianö yemidanö jo̧banö döbadekwajabetjö̧. Jo̧kwajabetjö̧ do̧'wo̧ ösöwanö pjiesta dukwaduwo, jö̧ba̧lö weinobe iteda ömöayedönö.
25Ja̧danö, ja̧ baledonö, itji̧ abönö pöema ina batjonö otidö ö̧jinobe, ja̧danö öjawo̧ ichibaja̧ wajwiinobe. Ja̧danö, otidö kabatibö ȩwa̧jenama, yöne ichibö musica ökwöobe a̧ja̧kwinobe, ja̧danö tjo̧'wo̧ ösöwanö baile dötjobe a̧ja̧kwinobe.
26Jejenö a̧ja̧kwö, abe'do ömöayedötjö bakwo̧nö jwöinobe, ja̧danö abebö a̧ja̧kwinobe: Biya̧ baledi̧ma, ¿taji jö̧ba̧lö baledobeda? jö̧ba̧lö. 27Abebö a̧ja̧kwökwe, ömöayo̧ma atadinobe: Kwöja̧wo̧ma ȩwa̧jabe, ja̧danö ȩwa̧jiökwe kwabe'doma pakayaso̧ o̧tewo̧nö kwabö pjiesta ujunajabe, Chitji̧ma otiwanö ö'wöchökönö tjeachajabe, jö̧ba̧lö.
28Yöa̧liökwe, abönö pöema ödameakwinobe, ja̧danö tebachö pjiesta ujunoböma öpöjödinobe. Öpöjödiökwe, abe'doma labebö itji̧nö budekwödanö aebinobe, tebachö ju'wedökwö o̧'wo̧ ösöwanö pjiesta ujunobö.
29Aebiökwe, itji̧ abönö pöema o̧'wo̧ sulinö yöa̧linobe: Edi chabe'do, ötjöma lekwe o̧biya ökwö weköbi̧ chotidajabe, ja̧danö bakwötanöbi weköbi̧tjö wainö ja̧tijökötö. Ötjöma isabenö kwitji̧ otiwanö ja̧bö ö̧jo jö̧a̧li̧danö ja̧bö chö̧jajabe chabe'do, jo̧kwaijayonö chömöledökwö cho̧'wo̧ ösöwachibobö la'akatjöda kwajwinö kwaköbinokobe, mikwawö̧kö̧ chiwo iti̧nöbi kwaköbinokobe chömöledökwö pjiesta chukwoböma. 30Jo̧kwaijayonö ötjö kwitji̧ otiwanö ja̧bö jo̧ pjiesta chukwobö kwiyököjayonö, bite kwitji̧ sulabenö ja̧bö jo̧ ȩwa̧jenama, nöinö mikwawo̧ o̧tewo̧ pakayaso̧nö kwaköbajabe, pjiesta ukwobö. Bite kwitji̧ma okobe jwiinö kwitea balada putabedönö midabinö 'dö̧ekwajijayonö, jo̧banöda ösödö pjiesta kwujunajabe, jö̧ba̧lö o̧'wo̧ sulinö yöa̧linobe abönö pöema.
31Yöa̧liökwe abe'doma atadinobe: Chitji̧, ökwöma ba̧kwȩlö̧jatebö ötjökwö jo̧ja, ja̧danö okobe jwiinö ötjö chiteama, ökwöda kwiteaobe, kwösödena pjiesta kwukwobö. 32Jo̧kwaijayonö jejenömaökö kwöjawo̧nöma, jo̧bama ökwödökwö ji̧nö̧kö̧. Jo̧bama woinobedanö ji̧nobe, ja̧danö ile'dewinobedanö ji̧nobe, cho̧'wo̧ tjo̧achinö. Jo̧kwaijayonö, jejenö ji̧najayonö, woawatjö tjeachajabedanö jo̧be, ja̧danö ile'dewinajayonö döbadekwajabedanö jo̧be. Jejenö baledajabema ¿pjiesta dujunökenaji̧? Isabenö do̧'wo̧ ösöwanö pjiesta dujunobö jo̧be, kwöjawo̧ otiwanö tjeachajabetjö̧, jö̧ba̧lö yöa̧linobe abe'doma—.
Jesúsma jejenö wanedö yöawinobe, fariseo jojodönöbi, Moisés iwȩyudina ba̧ja̧dadönöbi. Jesúsma sulabedökwö sulabenö ukwobe jö̧ba̧lö tjo̧'wo̧ sulinö yötja̧liökwe, Jesúsma atadö wanedö yöawinobe, sulabedöma sulabenö tjomukwati̧ kabatibö tjöbalewachenama, Diosma isabenö o̧'wo̧ ösöwanö ösödobe jobadönö, jo̧kwajabetjö̧ jobadönö edöma kwödameakwaduwa jö̧ba̧lö.
Currently Selected:
Lucas 15: WPC
Highlight
Share
Copy
Want to have your highlights saved across all your devices? Sign up or sign in
©2021, All Rights Reserved
