Maluko 6

UYeesu ikhaanwa ku Nasaleti

(Mataayo 13:53-58; Luuka 4:16-30)

1UYeesu na vamanyisiwa vaakwe vawuushile lumo, valutile ku lijumbi ilya Yeesu ilya ku Nasaleti. 2Pina lyafishile ilijuva lya Sabaato, wáyansiise kimanyisa mu nanda iya kifuunyila. Avaanu vinshi vina vamupuliishe, vaswijile mandu amamanyiso gaakwe. Vaposeenie vaveene kiija, “Khaa! Wágaaga kwi amaswi aga? Ulumanyo ulu apeliilwe nu naani? Khanji wásaaga kwi ingufu isa kisenjela amabikha aga? 3Wuli, uyu asili yuyula umuhongolaaji, ulusawo lwa Maliya, na vanangʼana vaakwe uYaakobo, uYoose, uYuuda nu Simoni? Avawulumbu vaakwe vasili vaveene tiikhala lumo baaha panyeesu?” Baheene vakhaana kimuhuviilila.

4UYeesu wávajoveele wáaja, “Umukuwamalago itiilwa shila luvala, leelo ku nyi yaakwe, na ku valukholo lwakwe, na kukhaaya yaakwe asitiilwa.” 5Asawuyile asenje amabikha minshi ukho, leelo wávavishiile amawokho avatamu vasheefu, woope vaponile. 6Wáswijile mandu kiiva avaanu avanji vasamuhuviliile. Baheene uYeesu wáwuushile wájendile jendile mu majumbi aganji kivamanyisa avaanu.

UYeesu ikivafilikha avanandeje vaakwe kikhoma iLiswi lya Nguluvi

(Mataayo 10:5-15; Luuka 9:1-6)

7UYeesu wávashemeelile avanandeje vaakwe ishumi na vavili, wáyansa kivafilikha vavili vavili, na kivapeela uwutawulilwa uwa kigadaga amalungu. 8Baheene wávakhanyansiise wáaja, “Nikivatawula musumulaje nkwegu seene, leelo ndaali kisumula ishiinu shoshoona pina mushuula, wala shakiilya, wala mbukuli, wala hela. 9Nikivatawula mufwalaje indaatu, leelo ndaali kisumula umwenda ugwa kiyanunkhania.” 10Khanji wávajova wáaja, “Ilitembe lina musiyinjile, mukhalaje muumo mbakha pina muwuukha mu lijumbi ilyo. 11Khanji pala pina vasikivasaajisa wala kivapuliisa, wuukhaji na kikungʼuuna amankundi gina gali mu nsayo sa magulu geenyu#6:11 Kikungʼuuna amankundi gina gali mu nsayo sa magulu geenyu: Uluganulo lwakwe, aVayahuudi vinshi pina viiwuya kunyaanave, vakhandi vikungʼuuna amankundi ga nyi sina sisili sa Vayahuudi mu nsayo sa magulu gaanave, kiiva vakhandi viijova kiija inyi isinji mwikho. Avanandeje va Yeesu vagahaga ndeeno, kivawonensa aVayahuudi vina vasikhaanaga imola sa Nguluvi kiija, uNguluvi ikivaaga vaafu, nda vasilambiisila, akhavahiga. yive shimanyilo sha kihigwa kwa kiyikhaana iMola iNofu.”

12Baheene avanandeje vaakwe vawuushile viiluta kikhoma kiija, avaanu valambiisile uwunansi waanave. 13Khanji vadagaga amalungu minshi. Vakhandi vikivasusuuta amafuta avatamu vinshi, woope vakhandi viipona.

UYohana uMutwiniaji iibudwa

(Mataayo 14:1-12; Luuka 9:7-9)

14Umutwa uHelode#6:14 UHelode: Uyo asili yula yuna uwiihe wávabudaga avaana uluhaavi luna wásawaagwa uYeesu. Yimba iliswi Helode mu Maswi aMahensa. wápulikhaga imola sa Yeesu, kiiva ilitaawa lya Yeesu lyapulisikhaga imbali soona. Avaanu avanji vakhandi vapilogola, “UYohana uMutwiniaji wáfyukha kihuma kwa vina vafwile. Lulwene ana ngufu isa kisenga amabikha.” 15Avanji vaajova, “Yu mukuwamalago uEliya.”#6:15 AVayahuudi vakhandi vahepeleese kiija akhayinsa khanji umukuwamalago uEliya, ayandaale kiyinsa kwa Kilisito. Yimba mu litaafili lya Malaaki 4:5-6. Avanji vaajova, “Uyu mukuwamalago ngaja yuyuumo na vakuwamalago ava pawukuulu.” 16Baheene uHelode wáganile kipulikha imola iso, wájovile, “Uyo yumwene uYohana, yuna namudumwile umutwe, wáfyukha!”

17-18Isi mola sa Helode pina wámubudile uYohana. UHelode wámutoolile uHelodiya umudala wa munangʼana waakwe uFilipo. Baheene uYohana wámujovile uHelode kiija, “Mwikho kimutoola umudala wa munangʼana waakho uFilipo.” Baheene uHelode wáfiliishe avaanu vamukhate uYohana na kimudindila mu shifungo. 19Baaho uHelodiya wámukhalaliile uYohana na kimutegama kiija amubude, leelo wágombolaga, 20kiiva uHelode akhandi ikimudiima uYohana. Wámutiilaga uYohana kiiva uYohana akhandi mugolofu, akhandi munya numbula nofu. UHelode wálunduveele mandu pina akhandi ikimupuliisa uYohana, leelo akhandi apidobokha amupulisaaje.

21Baheene uHelodiya wápatile imwenshe iya kimubuda uYohana. Ilisiku limonga uHelode wáali ni shiwungo isha kikumbukha kisawa kwa mwene. Wátelekhaga ishakiilya ishinofu, baheene wávashemeela avavaha vaakwe va livansa, avakhome va vayimililaaji va vasulukhali na vina vakhandi vilongosa mu nyi ya Galilaya. 22Baheene wáyinjiile umwali wa Helodiya, wáneenile, wávashendefiise uHelode na vahensa vina vaali mula. Baheene umutwa uHelode wámujovile umuhinja yula wáaja, “Lomba ishiinu shoshoona shina wisakula, na yuune nisikupeele.” 23Khanji wáyiyijile wáaja, “Shoshoona shina hambi ukinilomba nisikupeele, hata wuve uwutwa wangu hambi niigava paakhati ulubali lumonga nisikupeele.”

24Umwali yula wálutile kimuposa umaayi waakwe kiija, “Nilombe shishi?” Umaayi waakwe wáaja, “Lomba umutwe gwa Yohana uMutwiniaji.” 25Umuhinja yula wátinile nyangu nyangu kwa mutwa uHelode wálomba wáaja, “Nilomba umutwe gwa Yohana uMutwiniaji mu siniya.”

26Umutwa uHelode wáganile kipulikha ago, wásugumilwagwa mandu. Leelo kiiva akhandi ayiyiijile pa vahensa woona vala, wágombwele kikhaana amalombo gaakwe. 27Baaho umutwa uHelode wámufilikha umusulukhali aleete umutwe gwa Yohana. Umusulukhali wálutile mu shifungo, wámudumula uYohana umutwe. 28Wáviikha umutwe gula mu siniya, wámupeela umuhinja yula, woope wámupeela umaayi waakwe. 29Avamanyisiwa va Yohana uMutwiniaji, vaganile kipulikha imola iyo, valutile kigutoola umufimba na kigusiila mu lijooja.

UYeesu ikivaliisa avaanu magana mashumi gasaanu (5,000)

(Mataayo 14:13-21; Luuka 9:10-17; Yohana 6:1-14)

30Vala avanandeje vatinile kwa Yeesu, vamutavililaga goona gina vagahaga na gina vamanyiise. 31UYeesu na vamanyisiwa vaakwe, vakunyaga na kiiva nu luhaavi ulwa kiilya, kiiva avaanu vinshi vakhandi vipyanisania kiyinsa kwa Yeesu. Baheene uYeesu wávajova avamanyisiwa vaakwe wáaja, “Tilute apanji palubali tikhale tituuye padoodo.” 32Baheene vayinjiile mu shipugo, viiluta palubali pina pangaya vaanu.

33Leelo avaanu vinshi vavaajile pina viwuukha, vamanyaga kuna viiluta. Avaanu kihuma mu makhaaya goona valutile luvilo valongola kifikha. 34UYeesu wáganile kiyiikha mu shipugo, wáshaajile ishipuga shikhome sha vaanu. Wávasungupilaga kwa kiiva vakhandi ngaja nkholo sina singaya mudimaaji. Baheene wáyansa kivawulanisa amaswi minshi.

35Pashinyiijuva, avamanyisiwa vaakwe valutile kwa Yeesu vamujovela kiija, “Panu tikheele pa lunyikha patali na majumbi, khanji yiveele shaamihe. 36Uvahwese avaanu, valute mu magunda gina gali nkholeela na mu njinji, vayigulilaje ifyakiilya.” 37Baheene uYeesu wávajovela wáaja, “Omwe muvapeele yuumwe ishakiilya.” Vaaposa kiija, “Wuli! Titoole kwi ihela isa mahombo ga nsiku magana gavili (200),#6:37 Ihela isa mahombo ga nsiku magana gavili (200): Kwa Shiyunaani yiyandiikhwe, dinaali magana gavili (200). tilute tigule ishakiilya na tivapeele?” 38Wávaposiise wáaja, “Muna makhaate galinga? Mulute muloleele.” Vaganaga kimanya vamujovela kiija, “Tina makhaate gasaanu ni nswi sivili.”

39UYeesu wávalajisa avamanyisiwa vaakwe kiija, vajoveli avaanu woona vakhale fipuga fipuga pa lisole iliigu. 40Woope vaakhala fipuga fipuga, panu ligana, panu mashumi gasaanu. 41UYeesu wátoola amakhaate gala gasaanu ni nswi sila sivili wáloleela kushaanya, wámuhonjesa uNguluvi. Wámenyulania amakhaate, wávapeela avamanyisiwa vaakwe, kiija vavagavile avaanu. Inswi sivili sila, soope wávagavila woona. 42Avaanu woona vaalya, vayikuta. 43Avamanyisiwa vaakwe vakungaania amamenyulanie ni nswi, fyamema matunduti ishumi na gavili. 44Avaanu woona vina valiisaga vaali vinshi, avagoosi veene duguli vaali magana mashumi gasaanu (5,000).

UYeesu ijenda pashaanya pa malenga

(Mataayo 14:22-33; Yohana 6:16-21)

45Baaho uYeesu wávalajisa avamanyisiwa vaakwe, vayinjile mu shipugo, valongole kiluta ku mwambwa ya lilamba ilikhome ilya Galilaya, ku lijumbi lya Betisayida. Uluhaavi ulo umwene akhandi ikishihwesa ishipuga sha vaanu. 46Wáganile kimala kivahwesa avaanu, wálutile ku shidunda kifuunya.

47Pina shikhandi shaamihe, ishipugo shaali paakhati pa lilamba ilikhome, uYeesu wáali mwene duguli kunja ku nyi inyuumu. 48Wávaajile avamanyisiwa vaakwe vigombola kikholojela ishipugo, kiiva ilipepo likhandi likivatinia kunyuma. Kwali kusinahenje kunena, uYeesu wáyansa kijenda pashaanya pa malenga iiluta ku vamanyisiwa vaakwe, ngaja ishilanisa. 49Vaganile kimwaga ijenda pashaanya pa malenga vahiivile kiija linguluvi, valyovile ilyowo, 50kiiva woona vamwagaga vatiilaga mandu. Baaho uYeesu wávajovela wáaja, “Jimfyaji inumbula, yuune, musikhatiilaji!” 51Baheene woope wáyinjila mu shipugo muna vakhandi vakwali, nali lipepo lyavatama, vaswijile mandu. 52Vasikhameenye amabikha ga makhaate, kiiva inumbula saanave sikhandi nyuumu.

UYeesu iiponia avatamu mu Genesaleti

(Mataayo 14:34-36)

53Vaganile kilowokha mu lilamba ilikhome ilya Galilaya, vafishile mu nyi ya Genesaleti, vayiimya ishipugo pa lilowokho. 54Vaganile kihuma mu shipugo, baaho avaanu vamanyaga kiija yu Yeesu. 55Valutile viisiga shila luvala lwa mu nyi yila yoona, vayansa kivatoola avatamu na kivasumula mu lupaasa, na kivatwala kuna vipulikha kiija uYeesu akwali. 56Shila luvala uYeesu luna akhandi iita, mu njinji indoodo, mu majumbi amavaha, na mu magunda, avaanu vavaviishile avatamu vaanave pa munaada. Vamulombile uYeesu kiija avatawule avatamu vapyase ulupembo lwa mwenda gwakwe hela. Baheene avatamu woona vina vapyasaaga vaponaga.

Currently Selected:

Maluko 6: Shisangu

Highlight

Copy