Luku 11

Jeju tɔju gusu duju Lubba njê-njaje goe tə̂

1Marə ndɔ Jeju aw duju Lubba marə lo tə̂. N̂-duju Lubba tɔyn n̂-tunga a, marə nje-nja goe tə̂ pa arɛ̂ nan: «Əbbə-dəwje, ə-tɔjuje gusu duju Lubba tokə Jan tɔju njê-njaje goe tə̂.» 2N̂-pa narəde nan: «Bbo aw dujuje Lubba a, ə-paje nan:

‹Bɔy! Maji karə dəwje bbəəlje rii.

Arə kɔn-mbay ləi ddee!

3Arəje nɛ̂n-kusa taje kə ndɔ kâra kâra tɔyn!

4Ɔru tar majang ləje dɔje tə̂,

mba jeje kara jaw jɔru tar dɔ dəwje tə̂ kə̂ ddaje majang kə je tɔ.

Inya arə marə nɛ̂n nanje ang.› »

Dəw kə̂ duju nɛ̂n a, inga

5Jeju pa arəde bbay nan: «Bbo marə dəw horose tə̂ nəənn, marə nje-buwa-kura laa to ngaâ aw bbeê laa til tə̂ kə̂ lo mɔngu aw pa arɛ̂ nan: ‹Nje-buwa-kura ləm, arəm mapa mota m-tunain, 6mba marə nje-buwa-kura ləm in mba tə̂ tee dɔm tə̂, a moo nɛ̂n kâra ta karɛ̂ ang.› 7A bbo dəw kə̂ kâra le nayn kə mə kəy tə̂ nu njaa ila tə̂ nan: ‹Ə-jɔkum ang, ta-kəy utu mban, əman kə ngannəm n-to nangə̂ mban bbo ddəw kə̂ mâ kin taar kari nɛ̂n mapa goto›, 8a m-pa marəse, le nin taar mba karɛ̂ mapa le mba buwa-kura kə̂ duwaje le ang njaa kara, nâ kin ta karɛ̂ nɛ̂n tɔyn mba nɛ̂n-jɔku laa kə̂ naw jɔku le.

9«A əman, m-pa marəse: Ə-dujuje nɛ̂n a, dâ karəse. Ə-sangəje nɛ̂n a, â kingaje. Undaje ta-kəy a, dâ kɔru karəse. 10Mba dəw kə̂ duju nɛ̂n a, inga. Dəw kə̂ sangə nɛ̂n a, inga ngaâ dəw kə̂ unda ta-kəy a, dɔru darɛ̂. 11Bɔ ngonnje kə̂ dda horose tə̂ nəənn, bbo ngonnɛ̂ duje kanji a, li â nâ karɛ̂ wa? 12Wase bbo n̂-duje kabbə kunja a, nâ karɛ̂ nyi wa? 13Bbo sese kə̂ məse maji ang ddəm nəənn, ə-gərəje ta karə nɛ̂n kə̂ maji ngannse a, Bɔy kə̂ darâ a karə Ndil-mə-nda njê kə̂ dujeje ang wa?»

Jeju tubba ndil kə̂ maji ang

14Jeju tubba ndil kə̂ maji ang kə̂ dda arə marə dingaw pa tar ang. Ndil kə̂ maji ang le tee mə dingaw tə̂ le kə ddang ngaâ dingaw le pa tar. Dəwje kə̂ banya ooje a, dum dɔde. 15A marə dəwje kâra kâra paje nan: «Bɛljebul kə̂ to mbay le ndilje kə̂ maji ang â arɛ̂ singa tubba nɛ̂n ndilje kə̂ maji ang!» 16Marɛ̂je dujeje karə n̂-dda marə nɛ̂n-mɔri kə̂ in darâ. N̂-dujeje nɛ̂ɛnn le ta nɛɛ̂n nɛ̂n.

17Jeju gərə kəjə ləde ngaâ pa arəde nan: «Bbe-kɔn tɔyn njaa kə̂ njê-bbeje le tinje naan ngaâ ddɔje naan a tuju ngaâ kəyje kə̂ mə bbe tə̂ le a guruje dɔ naan tə̂. 18Ə-paje nan: ‹Bɛljebul â arəm singa arə maw tubba nɛ̂n ndilje kə̂ maji ang› wa? Bbo Satan tin kə da-rɔɛ̂ njaa a, bbe-kɔn laa a nayn baa tokə baânn wa? 19Â bbo Bɛljebul â arəm singa maw tubba nɛ̂n ndilje kə̂ maji ang a, nân â arə singa njê kə̂ ləse arə aw tubbaje nɛ̂n ndilje kə̂ maji ang le wa? Yeenn bba dede njaa dâ toje to njê-kujaje kəm tar nəənn karəse. 20A bbo Lubba â arəm singa maw tubba nɛ̂n ndilje kə̂ maji ang a, yeenn tɔju to kɔn-mbay lə Lubba ddee ndərəng tee rɔse tə̂ ngaa.

21«Bbo dəw kə̂ to nje-singa ungu nɛ̂n-ddɔje rɔɛ̂ tə̂ aw ngəm nɛ̂n ta-kəy laa a, nɛ̂n-kingaje laa a to mɔkɔkɔ. 22A bbo marə nje-singa kə̂ utɛ̂ ddee tee ngaâ uwɛ̂ akɛ̂, taa nɛ̂n-ddɔje laa kə̂ naw nunda məɛ̂ dɔɛ̂ tə̂ le a, nâ kasə ta kayn dəwje nɛ̂n-kingaje laa kə̂ n̂-taa le.

23«Dəw kə̂ to ləm ang, to nje-baan ləm, dəw kə̂ mbɔn səm nɛ̂n ang to nje-sanrɛ nɛ̂n.»

Təl lə ndil kə̂ maji ang ture tə̂ guku

24«Bbo ndil kə̂ maji ang tee mə dəw tə̂ kə ddang a, naw nasə lo kə̂ maann goto tə̂ mba sangə lo kuwa rɔɛ̂ tə̂, a ninga lo le ang le arə n̂-pa nan: ‹Mâ təl kə̂y ləm kə̂ minya le.› 25N̂-təl kə̂y le ngaâ noo a, to baa, duta darə arɛ ngaâ n̂-dda darə kura. 26Yeenn ngaâ naw noto marə ndilje kə̂ maji ang nya utɛ̂ siri n̂-ddee kə de ngaâ dandəje mə kəy tə̂ le disije tə̂. Goe tə̂ a, kisi lə dəw le təl maji ang nya uta ye kə̂ kete.»

Kisi maji kə̂ tɔkɔrɔ

27Jeju aw pa tar baann a, marə dɛnɛ̂n kə̂ ar horo dəwje tə̂ kə̂ banya le pa arɛ̂ kə taar nan: «Maji arə dɛnɛ̂n kə̂ uji ngaâ ari mba il.» 28A Jeju ilɛ̂ tə̂ nan: «Uta tɔyn, maji arə dede kə̂ dooje tar lə Lubba a, ngəmje.»

Jeju mbətə ta dda nɛ̂n-mɔri

29Dəwje aw mbɔnje naan tokə banya a, Jeju pa arəde nan: «Dəwje kə̂ bbasinɛn nəənn majije ang, daw dujuje nɛ̂n-mɔri. A bbay nɛ̂n-mɔri kə̂ dâ kooje â to nɛ̂n kə̂ inga Jonas. 30Ddəw kâra baa kə Jonas kə̂ to marə nɛ̂n-mɔri mba dəwje kə̂ Ninibə le, Ngonn lə dəw a to marə nɛ̂n-mɔri mba dəwje kə̂ bbasinɛn nəənn tɔ. 31Ndɔ gangə sariya a, mbay-dɛnɛ̂n kə̂ bəər kə̂ oy a ndol kə dəwje kə̂ bbasinɛn nəənn ta nâ kunda tar dɔde tə̂, mba nin kɔyn nangə tə̂ n̂-ddee mba koo tar kəm-karɛ lə Salomɔn. A dəw kə̂ uta Salomɔn ee nəənn. 32Ndɔ gangə sariya a, dəwje kə̂ Ninibə a kinje ta kunda tar dɔ dəwje tə̂ kə̂ bbasinɛn nəənn. Mba dəwje kə̂ Ninibə le, Jonas ila mbər arəde a, n̂-turuje məde nyɔm. A dəw kə̂ uta Jonas ee nəənn.

Gusu-tar dɔ lambe tə̂

33«Ndɔ kâra dəw a kila puru lambe tə̂ ta kunda lo-kiyɛ̂ tə̂ ang ddəm ta dəbbə kə jo ang ddəm. Nâ kunda lambe le dɔ marə nɛ̂n tə̂ taar, mba karə dəwje kə̂ aw andəje kə̂y ooje nɛ̂n lo. 34Kəmi to tokə lambe kə̂ da-rɔi tə̂. Kar kə̂ kəmi to kə majɛ̂ a, da-rɔi tɔyn to dann lo-karɛ tə̂. A bbo kəmi to kə majɛ̂ ang a, da-rɔi to lo ndul tə̂. 35Yeenn a, aa kə majɛ̂ arə lo-karɛ kə̂ to rɔi tə̂ to lo ndul ang. 36Bbo da-rɔi tɔyn njaa to dann lo-karɛ tə̂ ngaâ marə dəbbe ngaji to lo ndul tə̂ ang a, da-rɔi tɔyn a to dann lo-karɛ tə̂ tokə lə lambe kə̂ uru ndoko laa dɔi tə̂.»

Jeju ndɔru mbi Parijinyɛje kə Njê-gərəje-Ndu

37Jeju aw pa tar a, marə Parijinyɛ bbarɛ̂ ta karə naw nusa nɛ̂n kəy laa. Naw ngaâ nisi ta nɛ̂n-kusa tə̂ le. 38Parijinyɛ le oo a, Jeju toko jia kete bba usa nɛ̂n nɛ̂n ang. Nɛ̂ɛnn le dum dɔɛ̂. 39A Əbbə-dəwje pa arɛ̂ nan: «See Parijinyɛje, aw tokoje giri əngo kə giri ka, a kəm-nda kə mə-majang ddusu məse. 40Njê-dɔ-gotoje! Dəw kə̂ nje-dda giri nɛ̂n le dda məɛ̂ tɔ ang wa? 41Arəje nɛ̂nje kə̂ mə əngo tə̂ kə ka tə̂ le njê-ndooje, yeenn bba nɛ̂n a ddee to nɛ̂n-yərəw ang mbase.

42«To ndoo nya arəse, see Parijinyɛje, mba aw dinje dɔ marə kam nɛ̂n-ndirije kə kam-naynje dang dang tɔyn aw arəje to dim njaa, a nɛ̂n-dda kə̂ gatə gatə kə ndiki lə Lubba ooje to nɛ̂n ang. Nɛ̂ɛnn â to tar ləse ta dda, a ta kinya kəseje kə kɔrɔ̂ ang.

43«To ndoo nya arəse, see Parijinyɛje, mba nɛ̂n-kisi kə̂ kete â aw ndikije mə kəy mbɔn-naanje tə̂ ngaâ ə-ndikije karə dəwje ddase lapiya natâ.

44«To ndoo nya arəse, mba ə-toje tokə lə dɔbarəje kə̂ sula, kə̂ dəw aw nja dɔɛ̂ tə̂, a gərə ang.» 45Marə nje-gərə-Ndu pa arə Jeju nan: «Nje-nɛ̂n-tɔju, tar kə̂ aw pa nəənn, jeje â aw tajije tɔ.» 46Jeju ilɛ̂ tə̂ nan: «To ndoo nya arəse, see Njê-gərəje-Ndu, mba aw undaje nɛ̂n-koto kə̂ ɔɔy dɔ dəwje tə̂, a sese ndɔn-jise kara ɔruje nɛ̂n nɛ̂n-koto le ang.»

47«To ndoo nya arəse, mba aw ddaje dɔbarə njê-kilaje mbər tar lə Lubba, dede kə̂ kasese njaa â tɔljede le. 48Yeenn pa nan aw tɔjuje kə ddaka to kulaje kə̂ n̂-ddaje le ə-ndikije tə̂, mba dede n̂-tɔlje njê-kilaje mbər tar lə Lubba, a sese aw ddaje dɔbarəde. 49Mba yeenn bba Lubba pa tar ddəw kəm-karɛ tə̂ laa nan: ‹Mâ kula njê-kilaje mbər tar kə njê-kaw-kulaje karəde. Dâ tɔl marɛ̂je ngaâ dâ kula kəm marɛ̂je ndoo tə̂.› 50Mba yeenn bba, Lubba a duju dəwje kə̂ bbasinɛn nəənn məsə njê-kilaje mbər tar tɔyn kə̂ n̂-tɔlde, unn kute ndɔ tə̂ kə̂ Lubba dda nɛ̂n duninya ndərəng bbokənɛn. 51A kunn-kute dɔ məsə Abɛl tə̂ ndərəng məsə Jakari tə̂ kə̂ n̂-tɔlɛ̂ horo bann tə̂ kə kəy-polo Lubba le. Tɔkɔrɔ m-pa marəse, Lubba a duju məsəde ji dəwje tə̂ kə̂ bbasinɛn nəənn.

52«To ndoo nya arəse, see Njê-gərəje-Ndu, mba uwaje kele ta-ddəw nɛ̂n-gərə ə-taaje. Sese njaa kara andəje nɛ̂n-gərə tə̂ le ang ngaâ ɔkuje ddəw dəwje kə̂ ndikije ta kandə tə̂.»

53Jeju in mə kəy tə̂ le tee a, njê-gərəje-Ndu kə Parijinyɛje unnje kutu kubbɛ̂je kə singa singa ngaâ dujeje tar dang dang. 54N̂-ddeeje mba sangə ddəw kunda tar dɔɛ̂ tə̂ ddəw tar tə̂ kə̂ tɛɛ̂ tə̂.

Currently Selected:

Luku 11: KabbaDkS

Highlight

Copy