Matiye 16
16
Parijinyɛje kə Sadusinyɛje dujuje nɛ̂n-mɔri
1 Parijinyɛje kə Sadusinyɛje ddeeje rɔ Jeju tə̂ ta nɛɛ̂n. N̂-dujeje nan: «Ə-dda marə nɛ̂n-mɔri kə̂ in darâ arəje joo.» 2A Jeju ilade tə̂ nan: «Lo-kul a, ə-paje nan: ‹Lo a to kə majɛ̂, mba mə dara kasɛ.› 3Kə əndɔɔ a, ə-paje nan: ‹Ndi a kərə bbokənɛn, mba mə dara kasɛ ngaâ təl tuka ndul.› Bbo aaje kəm dara a, ə-gərəje nɛ̂n kə̂ a to. A asəje ta gərə nɛ̂n kə̂ a ddee go nɛ̂nje tə̂ kə̂ aw ooje bbasinɛn nəənn ang wa? 4Dəwje kə̂ bbasinɛn kə̂ majije ang ddəm dəwje kə̂ pa-nja ləde to kə dannâ ang ddəm dujuje nɛ̂n-mɔri. A bbay nɛ̂n-mɔri kə̂ dâ koo â to nɛ̂n kə̂ inga Jonas kə̂ to nje-kila mbər tar lə Lubba.» Goe tə̂ a, Jeju inyade a ɔtu.
Wum lə Parijinyɛje kə Sadusinyɛje
5Kar tə̂ kə̂ njê-njaje go Jeju tə̂ awje ta kaal dɔ tɔkə dangə maann kaw turâ a, məde oy ta kaw kə mapa tokə banya. 6Jeju pa arəde nan: «Aaje rɔse wum tə̂ lə Parijinyɛje kə Sadusinyɛje.» 7Njê-njaje goe tə̂ le aw əjəje tar ngaâ aw paje nan: «Məje kə̂ oy ta koto mapaje le â naw pa nɛ̂n tar nəənn.» 8Jeju le gərə ngaâ dujude nan: «Əsee dəwje kə̂ mə-kunn ləse tɛn baa, mba ddi bba aw əjəje tar ə-paje nan mapa goto jise tə̂ wa? 9Ə-gərəje ang bbay wa? Mapa kə̂ min kə̂ dingawje doro min usaje kə kɔr karɛ kə̂ ə-mbɔnje nɛ̂n kəse le, məse ole dɔɛ̂ ang wa? 10Wase ye kə̂ siri kə̂ dingawje doro sɔ usaje ngaâ ə-mbɔnje kəse ddusu karɛ baânn wa le, məse oy dɔɛ̂ wa? 11Bbo m-pa marəse m-pa nan: Aaje rɔse wum tə̂ lə Parijinyɛje kə Sadusinyɛje a, tar le tee mbɔr tar mapa tə̂ ang. A mba ddi bba asəje ta gərə mə tar le ang wa?» 12Yeenn ngaâ njê-njaje go Jeju tə̂ le gərəje to tar kə̂ Jeju aw pa le to tar nɛ̂n-tɔjuje lə Parijinyɛje kə Sadusinyɛje bbo to tar wum mapa ang.
Piyɛr pa nan Jeju to Ngonn lə Lubba
13 Jeju tee nangə tə̂ kə̂ Sejare lə Pilipi a, duju njê-njaje goe tə̂ nan: «Dəwje aw paje nan Ngonn lə dəw to nân wa?» 14Dilɛ̂je tə̂ nan: «Marɛ̂je paje nan ə-to Jan-Batisi, marɛ̂je paje nan ə-to Eli, a marɛ̂je paje nan ə-to Jeremi, ang a, a to marə nje-kila mbər tar lə Lubba horo marɛ̂je tə̂.» 15Jeju dujude nan: «A sese, ə-paje nan m-to nân wa?» 16Simɔn Piyɛr ilɛ̂ tə̂ nan: «Ə-to Mesi, Ngonn lə Lubba kə̂ nje-kisi kəm baa.» 17Jeju pa arɛ̂ nan: «Simɔn ngonn lə Jonas, maji ari, mba dəw â unda tar nəənn tai tə̂ ang, Bɔy kə̂ isi darâ â tɔji nɛ̂n nəənn. 18A əman, m-pa mari: Ə-to Piyɛr#16:18 Piyɛr kə tar lə gɛrɛkəje to ər.. Ər nəənn le â mâ kɔsu Egilisi ləm dɔɛ tə̂. Yo a kasə kubba singa dɔ Egilisi tə̂ le ang. 19Mâ kari kele ta Bbe-kɔn kə̂ darâ. Nɛ̂n tɔyn kə̂ ə-tɔ nangə̂ nəənn to nɛ̂n kə̂ n̂-tɔ darâ mban, nɛ̂n tɔyn kə̂ ə-tutu nangə̂ nəənn, n̂-tutu darâ mban tɔ.»
20Goe tə̂ a, Jeju ndɔru mbi njê-njaje goe tə̂ nan dang kara n̂-paje darə marə dəw to n̂-to Mesi ang.
Jeju pa tar koy laa kə tar ndol laa
21Dɔ ndɔɛ̂ tə̂ənn njaa, Jeju unn kutu pa kə ddaka karə njê-njaje goe tə̂ nan to tar laa ta kaw Jerujalɛm, ta koo ndoo ji tɔkəje tə̂ lə Jiipije kə mbayje lə njê-poloje Lubba kə njê-gərəje-Ndu. Dâ karə n̂-tɔlɛ̂ ta ndɔ mota goe tə̂ a, nâ ndol. 22Piyɛr ɔrɛ̂ kə guku ngaâ unn kutu kin saa nan: «Əbbə-dəwje, maji karə Lubba ngəmi. Nɛ̂ɛnn a kingai ndɔ kâra ang.» 23A Jeju turu rɔɛ̂ ngaâ pa arə Piyɛr le nan: «Ɔtu gom tə̂ kə ddang, Satan! A ta dda karə moso, mba kəjə ləi to kəjə lə Lubba ang, to kəjə lə dəw.»
Dəw a kunn go Jeju tokə baânn wa?
24Yeenn bba, Jeju pa arə njê-njaje goe tə̂ nan: «Bbo dəw ndiki ta kuwa gom a, maji karə nəjə rɔɛ̂ ang, maji karə noto kakə-dəsə laa bba ta nuwa gom. 25Mba dəw kə̂ ndiki ta kaji təbbə laa, təbbə laa le a nayn kɔrɔ̂. A dəw kə̂ ila təbbə laa kɔrɔ̂ ɔju dɔm, a təl kinga təbbə laa le. 26Bbo dəw inga nɛ̂n kə̂ duninya tə̂ nəənn tɔyn, a bbo təbbə laa nayn kə kɔrɔ̂ a, ddi kə̂ maji â nâ kinga goe tə̂ wa? Ddi â nâ karə mba taa nɛ̂n təbbə laa le wa? 27Mba Ngonn lə dəw a ddee mə piti tə̂ lə Bɔɛ̂je kə anjəje laa. Nâ kuka dəw kâra kâra asə kula-ddɛɛ̂. 28Tɔkɔrɔ njaa, m-pa marəse: Marə dəwje horo dəwje tə̂ kə̂ arje nəənn a koyje ang ndərəng dâ kooje Ngonn lə dəw kə̂ a ddee ta kɔn-mbay.»
Currently Selected:
Matiye 16: KabbaDkS
Highlight
Share
Copy
Want to have your highlights saved across all your devices? Sign up or sign in
© 2020, ACOTBA
