Markə 10
10
Tar kinya-naan lə dɛnɛ̂n de kə dingaw
1Goe tə̂ a, Jeju ɔtu lo tə̂ənn aw nangə tə̂ kə̂ Jude, tura Jurdɛn tə̂. A dəwje kə̂ banya təl mbɔnje naan rɔɛ̂ tə̂ bbay, arə naw tɔjude nɛ̂n tokə naw dda kə ndɔ tɔyn.
2 Parijinyɛje awje rɔ Jeju tə̂ dujeje tar ta nɛɛ̂n nɛ̂n nan: «Ndu arə ddəw dingaw ta tubba dɛnɛ̂n laa wa?» 3Jeju ilade tə̂ nan: «Mɔyijə unn ndu arəse nan ddi wa?» 4Dilɛ̂je tə̂ nan: «Mɔyijə arə ddəw dingaw karə dda makəturu tɔju nɛ̂n to ninya dɛnɛ̂n laa bba ta ninya dɛnɛ̂n laa le.» 5Jeju pa arəde nan: «Mba mə-kətərə ləse â Mɔyijə uja ndu nəənn le makəturu tə̂ arəse. 6A kunn-kutu nɛ̂nje tə̂ kə̂ Lubba dda le, n̂-dda dingaw de kə dɛnɛ̂n. 7Mba yeenn bba, dingaw a kinya bɔɛ̂je kə kɔɛ̂nje ta nayn kə dɛnɛ̂n laa, 8ta dede joo kəm, dâ ddeeje to da-rɔ kə̂ kâra baa ngaa. Yeenn a, n̂-toje to dəwje kə̂ joo ang ngaa, a n̂-toje to da-rɔ kə̂ kâra baa. 9Nɛ̂n kə̂ Lubba mbɔn naan tə̂ a, maji karə dəw kayn hore ang.»
10Kar tə̂ kə̂ n̂-teeje kəy a, njê-njaje go Jeju tə̂ le təl dujeje tar dɔ tar tə̂ nəənn le bbay. 11Nilade tə̂ nan: «Dəw kə̂ tubba dɛnɛ̂n laa, a taa marɛ̂ dda lo-to-majang mba dɛnɛ̂n kə̂ dɔngɔr kə̂ n̂-tubbɛ̂ le. 12Bbo dɛnɛ̂n mbətə ngawɛ̂je, a təl taa marə dingaw a, dɛnɛ̂n le dda lo-to-majang ang.»
Jeju bbar tar kə̂ maji dɔ ngannje tə̂
13Dəwje ddeeje kə ngannje karə Jeju ɔrude kə jia, a njê-njaje goe tə̂ aw inje kə dəwje le. 14Jeju oo nɛ̂ɛnn le a, nəəle ang ngaâ pa arə njê-njaje goe tə̂ le nan: «Inyaje ngannje kə̂ mbatə arəje ddeeje rɔm tə̂ bbo ɔkujede ddəw ang. Mba Bbe-kɔn lə Lubba to mba dəwje kə̂ toje tokə dede. 15Tɔkɔrɔ njaa m-pa marəse, dəw kə̂ taa Bbe-kɔn lə Lubba tokə lə ngonn ang, a kandə tə̂ ndɔ kâra ang.» 16Yeenn ngaâ nuwa ngannje le kə karɛ̂ tə̂, nila jia dɔde tə̂ ngaâ n̂-bbar tar kə̂ maji dɔde tə̂.
Jeju kə nje-nɛ̂n-kinga
17Kar kə̂ Jeju unn ddəw ta kɔtu a, marə dingaw ddee kə ngɔru ɔsu məkəjə-gɔlɛ̂ nɔɛ̂n tə̂ duje nan: «Nje-nɛ̂n-tɔju kə̂ maji, ddi â mâ dda bba mâ kinga təbbə kə̂ to kə ndɔ kə ndɔ wa?» 18Jeju ilɛ̂ tə̂ nan: «Mba ddi bba ə-bbarəm to dəw kə̂ maji wa? Dəw kə̂ maji goto, Lubba kâra baa â maji. 19Ə-gərə nduje kə̂ nan: Ə-tɔl dəw ang, ə-dda lo-to-majang ang, ə-bboko ang, ə-pa tar-naji kə̂ to ngəm ang, ərə dəw ə-taa nɛ̂n laa ang, ə-wal bɔije kə kɔinje.»
20Dingaw le ilɛ̂ tə̂ nan: «Nje-nɛ̂n-tɔju, maw ngəm ndujeenn kə kasəm baa ndərəng bbokənɛn.» 21Jeju ɛɛ̂ a, ndike ngaâ pa arɛ̂ nan: «Nɛ̂n kâra ngaa â dui: Aw labbə nɛ̂nje tɔyn kə̂ inga ta ə-kayn narɛ̂ dangətəje a, â kinga marə dam narɛ darâ. Goe tə̂ a, ə-ddee unn gom.» 22A kar tə̂ kə̂ dingaw le oo tar le a, rɔɛ̂ nəəle ang ngaâ ɔtu to ndoo ndoo, mba nɛ̂n-kingaje laa banya nya.
23 Jeju ila kəmɛ̂ aa nɛ̂n lo mbɔrɛ̂ tə̂ tɔyn ngaâ pa arə njê-njaje goe tə̂ nan: «To ngəng nya kə njê-nɛ̂n-kingaje karə dandəje Bbe-kɔn tə̂ lə Lubba.» 24Tar le gangə singa njê-njaje goe tə̂ le. A Jeju pa arəde bbay nan: «Ngannəm, to ngəng nya ta kandə Bbe-kɔn tə̂ lə Lubba! 25Karə jambal andə buwa suwa tə̂ ngəng ang wa? Ta karə nje-nɛ̂n-kinga andə Bbe-kɔn tə̂ lə Lubba a ngəng nya.» 26Tar le aw dum dɔ njê-njaje goe tə̂ le kə kete kete. N̂-dujuje naan nan: «Yeenn a, nân bba a kasə kinga kaji wa?» 27Jeju aade ngaâ pa arəde nan: «Nɛ̂ɛnn, to nɛ̂n kə̂ nya dəwje. A nya Lubba ang. Mba Lubba asə ta dda nɛ̂n tɔyn.»
28Yeenn ngaâ Piyɛr pa arɛ̂ nan: «Oo! Jinya nɛ̂nje tɔyn, a junn goi.» 29Jeju ilɛ̂ tə̂ nan: «Tɔkɔrɔ m-pa marəse: Dəw kə̂ inya kəy laa, inya ngakɔɛ̂nje kə̂ dingaw wase ngakɔɛ̂nje kə̂ dɛnɛ̂n, kɔɛ̂nje wase bɔɛ̂je, ngannɛ̂ wase ndɔɔje laa mbam ddəm mba Tar kə̂ Maji ddəm 30a təl kinga nɛ̂njeenn asə gɔl kɔr kâra bbasinɛn nəənn. Nâ kinga kəy, ngakɔɛ̂nje kə̂ dingaw kə ngakɔɛ̂nje kə̂ dɛnɛ̂n, kɔɛ̂njedede, ngannje kə ndɔɔje ngaâ dəwje a kulaje kəmɛ̂ ndoo tə̂ tɔ. A nâ kinga təbbə kə̂ to kə ndɔ kə ndɔ mə ndɔje tə̂ kə̂ aw ddeeje. 31Nya lə dəwje kə̂ toje to dəwje kə̂ dɔngɔr, a ddeeje to dəwje kə̂ dɔ guku. A dəwje kə̂ dɔ guku, a ddeeje to dəwje kə̂ dɔngɔr.»
Jeju təl pa tar koy kə tar ndol laa bbay
32 Jeju kə njê-njaje goe tə̂ daw dawje kə Jerujalɛm ngaâ noso nɔnde tə̂ kete. Kəjə-tar tɔl njê-njaje goe tə̂ le ngaâ bbəəl uta dɔ dəwje kə̂ aw unnje gode le tɔ. Jeju təl ɔru njê-njaje goe tə̂ kə̂ dɔku gire joo le aw kə de ər kâra tə̂ ngaâ unn kutu ta pa tar nɛ̂n kə̂ a ta kingɛ̂ karəde nan: 33«Ooje, jaw jawje kə Jerujalɛm. Dəwje a kilaje Ngonn lə dəw ji mbayje tə̂ lə njê-poloje Lubba kə ji njê-gərəje-Ndu tə̂. Dâ gangə sariya-yo dɔɛ̂ tə̂ ngaâ dâ kilɛ̂ ji dəwje tə̂ kə̂ gərəje Lubba ang. 34Dâ kɔjɛ̂je koko nɛ̂n, dâ tije wənrə dɔɛ̂ tə̂, dâ tundɛ̂je kə ndəy, dâ tɔlɛ̂je ngaâ ndɔ mota laa a, nâ ndol.»
Jan de kə Jakə n̂-dujuje marə nɛ̂n ji Jeju tə̂
35Goe tə̂ a, Jakə de kə Jan kə̂ n̂-toje to ngann lə Jebede n̂-ddeeje rɔ Jeju tə̂, n̂-paje darɛ̂je nan: «Nje-nɛ̂n-tɔju, n-ndiki karə ə-dda nɛ̂n kə̂ ja ta duji nəənn.» 36Jeju dujude nan: «Ddi â ə-ndikije karə m-dda marəse wa?» 37Dilɛ̂je tə̂ nan: «Arə jeje kə̂ joo nəənn, kâra isi dɔ ji-kɔli tə̂, a kâra isi dɔ ji-gəli tə̂ mə piti tə̂ ləi.» 38Jeju ilɛ̂ tə̂ nan: «Ə-gərəje nɛ̂n kə̂ aw dujuje ang. A kasəje ta kay əngo kəm-to-ndoo kə̂ mâ ta kay wa? A kasəje ta kinga batɛm kəm-to-ndoo kə̂ mâ ta kinga wa?» 39Dilɛ̂je tə̂ nan: «Ja kasə.» A Jeju pa arəde nan: «Tɔkɔrɔ, â kayje əngo kəm-to-ndoo kə̂ mâ ta kay, â kingaje batɛm kəm-to-ndoo kə̂ mâ ta kinga njaa. 40A tar kisi dɔ ji-kɔləm tə̂ wase dɔ ji-gələm tə̂ to tar ləm ang. Lo le to mba njê kə̂ Lubba gɔl mbade.»
41Kəseje kə̂ dɔku le ooje tar le a, wungu ɔnde dɔ Jakə de kə Jan tə̂ le. 42Yeenn ngaâ Jeju bbarde tɔyn ngaâ pa arəde nan: «Ə-gərəje to njê kə̂ dəwje aw oojede to mbay-bbeje aw ddaje dingaw dɔ dəwje tə̂ ngaâ dəwje kə̂ bo aw ddaje dəwje maji ang. 43A horose tə̂, maji karə to tokə baann ang. Dəw kə̂ ndiki ta ddee to dəw kə̂ bo horose tə̂ a, maji karə n̂-ddee to nje-kula ləse. 44Dəw kə̂ horose tə̂ kə̂ ndiki ta to dəw kə̂ dɔngɔr a, maji karə n̂-ddee to bbərə ləse tɔyn. 45Mba Ngonn lə dəw ddee karə dəwje ddaje kula arɛ̂ ang. N̂-ddee ta dda kula karə dəwje, ta kunn rɔɛ̂ to nɛ̂n-kuka dɔ dəwje tokə banya.»
Jeju aji Bartime arə oo lo
46Jeju kə njê-njaje goe tə̂ n̂-teeje Jeriko. Ne kə njê-njaje goe tə̂ kə dəwje kə̂ banya daw teeje mə tɔkə bbe tə̂ le ta kɔtu a, marə nje-kəm-tɔ kə̂ to ngonn lə Time, ria nan Bartime isi mbɔr ddəw tə̂ aw kɔy nɛ̂n. 47Noo nan Jeju kə̂ Najarɛtə â aw nday a, nunn kutu kuru əkii nan: «Jeju, Ngonn lə Dabbiti, oo kəm-to-ndoo ləm bbo!» 48Dəwje nya inje saa karə nutu tɛɛ̂, a nuru əkii kə taar bbay nan: «Ngonn lə Dabbiti, oo kəm-to-ndoo ləm bbo!» 49Jeju ar lo kâra ngaâ pa nan: «Ə-bbarɛ̂je.» Dəwje le bbarɛ̂je ngaâ paje arɛ̂ nan: «Ə-dda singa in taar, naw bbari!»
50N̂-bin tɔkə kubbu laa nila nangə̂, nubba nangə nin nar taar ngaâ naw rɔ Jeju tə̂. 51Jeju duje nan: «Ddi â ə-ndiki karə m-dda mari wa?» Nje-kəm-tɔ le ilɛ̂ tə̂ nan: «Nje-nɛ̂n-tɔju, m-ndiki ta təl koo lo!» 52Jeju pa arɛ̂ nan: «Aw, mə-kunn ləi aji!» Njangə baa goe tə̂ a, n̂-təl noo lo ngaâ nunn go Jeju ddəw-boô.
Currently Selected:
Markə 10: KabbaDkS
Highlight
Share
Copy
Want to have your highlights saved across all your devices? Sign up or sign in
© 2020, ACOTBA
