Markə 16
16
Jeju kə̂ oy le ndol
1Kar kə̂ ndɔ-kuwa-rɔ lə Jiipije nday a, Mari kə̂ Magədala kə Salome kə Mari kɔn Jakəje, n̂-ndokoje yamboje ta kaw kungu dɔ niinn Jeju tə̂. 2Kə əndɔɔ baa njaa, ndɔ-kuwa-rɔ#16:2 Matiye 28:1 tə̂ kə̂ kar aw tee a, dawje buwa-yo tə̂ le. 3N̂-dujuje naan nan: «Nân njaa bba a ndubbu tɔkə ər kə̂ dutu nɛ̂n ta buwa-yo le kə ddang karəje wa?»
4Kunn kə̂ dunnje kəmde daaje lo a, tɔkə ər le tokə ndubbu mban. 5Yeenn ngaâ dandəje buwa-yo tə̂ le. A dooje marə basan ula kubbu kə̂ ngal kə̂ nda kə̂ isi nangə̂ ər kɔl, a bbəəl uta dɔde. 6A basan le pa arəde nan: «Ə-bbəəlje ang. Aw ə-sangəje Jeju kə̂ Najarɛtə kə̂ n̂-tɔlɛ̂ kakə-dəsə tə̂ le wa? N̂-ndol mban, nee nəənn ang. Lo kə̂ dilɛ̂ tə̂ le â nəənn. 7Awje aw paje arəje Piyɛr kə kəsə njê-njaje goe tə̂, ə-paje nan: ‹Nâ nginanse Galile. Lo kə̂ nunn â, â kooeje tə̂ tokə n̂-pa narəse le.› »
8Yeenn ngaâ dinje buwa-yo tə̂ le n̂-teeje ddaka ngaâ daynje dawje ddəw əw mba daw disaje kə bbəəl, n̂-gərəje nɛ̂n kə̂ ta dda ang. N̂-paje tar kâra darə dəw ang mba bbəəl uta dɔde.
Jeju tee inga Mari kə̂ Magədala
[9Go ndol tə̂ kə̂ Jeju ndol ndɔ-kuwa-rɔ tə̂ kə əndɔɔ baa le a, n̂-tɔju rɔɛ̂ dɔngɔr narə Mari kə̂ Magədala kə̂ n̂-tubba ndilje kə̂ maji ang siri məɛ̂ tə̂ le. 10Mari le aw pa tarɛ̂ arə dəwje kə̂ aw njaje kə Jeju, kar tə̂ kə̂ daw ndingaje ndoo ddəm daw nɔnje ddəm le. 11A koo kə̂ dooje tar lə Mari kə̂ pa nan Jeju nayn kəm baa ngaâ nooe le a, n̂-ndikije tə̂ saa ang.
Jeju tee inga njê-njaje goe tə̂ joo
12Goe tə̂ a, Jeju unn marə da-rɔ kə̂ dang bba tɔju nɛ̂n rɔɛ̂ arə njê-njaje goe tə̂ joo kə̂ aw awje kə ngonn bbe tə̂. 13N̂-təlje n̂-ddeeje, n̂-paje tarɛ̂ darə kəseje. A dede kara n̂-ndikije tə̂ kə de ang tɔ.
Jeju tee inga njê-njaje goe tə̂ kə̂ dɔku gire kâra
14Dɔbɔnyɛ̂ a, n̂-tɔju rɔɛ̂ narə njê-njaje goe tə̂ kə̂ dɔku gire kâra, kə̂ aw usaje nɛ̂n ngaâ n̂-kɔl kə de mba mə-kunn ləde kə̂ goto ddəm mba mə-kətərə ləde ddəm mba n̂-ndikije tə̂ kə dəwje kə̂ ooeje go ndol tə̂ kə̂ n̂-ndol le ang. 15N̂-pa narəde nan: «Awje dɔ nangə tə̂ tɔyn, ilaje mbər Tar kə̂ Maji le arəje dəwje tɔyn. 16Dəw kə̂ unn məɛ̂ ngaâ inga batɛm a, a kinga kaji. Dəw kə̂ unn məɛ̂ ang a, sariya to dɔɛ̂ tə̂. 17Nɛ̂n kə̂ dâ gərə nɛ̂n dəwje kə̂ a kooje məde tə̂ â nəənn: Dâ tubbaje ndilje kə̂ maji ang kə rim, dâ paje ndɔn-tarje kə̂ siki. 18Dâ kuwaje lije kə jide. Bbo dayje marə nɛ̂n kə̂ aw tɔl dəw a, nɛ̂n kâra a ddade ang. Dilaje jide dɔ njê-rɔ-toje tə̂ a, njê-rɔ-toje le a kajije.»
Jeju təl rɔ Lubba tə̂
19Go tar tə̂ kə̂ Əbbə-dəwje Jeju pa arəde tokə baann a, Lubba unnɛ̂ aw saa darâ ngaâ nisi dɔ ji-kɔlɛ̂ tə̂. 20Njê-njaje go Jeju tə̂ aw ilaje mbər tar le loje tə̂ tɔyn. Əbbə-dəwje dda kula kə de arə n̂-ddaje nɛ̂n-mɔrije kə̂ tɔju to tar kə̂ daw dilaje mbəre le to tar kə̂ tɔkɔrɔ.]
Currently Selected:
Markə 16: KabbaDkS
Highlight
Share
Copy
Want to have your highlights saved across all your devices? Sign up or sign in
© 2020, ACOTBA
