Héchos 2

Dupade Ujopié Espíritu Sánto diringai tu

1Uje e chise judíode ore jnusinamáni dire uje i tu Pentecostés enga Jesús anguretasórone chamáta ñane iji pijogate chojmarai. 2Ore chuningame eti cucha ajaramomíni tṍraji gaté. Cho úyujna cuchabe. Cucha ajaramomíni irágu ore charidi guijnatajé. 3Enga ore chimo cuchárique uje cho piogode ocaraidie. Enga pioque ocarai gajnunie basája ore gáyode jnese. 4Enga Dupade Ujopié Espíritu Sánto irágu ore ajéode jnese enga jĩrique ore chiraja enga ore doi dara quedéjnane. Ore chiraja gu Dupade Ujopié Espíritu Sánto.

5Judíode uñane déji Jerusalén iji dirode udore uje ore gaidode u Dupade adode, mu ore doi dayode jnani bajácho jmapiedie ome dagaidode udore. Enga ore tṍraji erámi údode jnese. 6Uje guidai idaisórone udore ore chudute cucha ajaramomíni enga jĩrique ore chamáta ñane aja. Mu ore uruode cãra re ome ñane. Jecute que ore chiraja gotique uje ore chudute darúpisode iji Jesús anguretasórone ore pijnanone uje ore narare. 7Ore tijapísa Jesús anguretasórone ore enga que ore chiraja gotique. Jecute ore chojningame ñane:

–¿Jé gotique a? ¿Ja ca galiléagosode u udore ore a? uje ore dopísi yocuruode. 8¿Jé gotinguiringuipise? uje yudúco yocurúpisode iji ore pijnanone uje dara quedéjna ome ore múñi. 9Chamáñaje yocuñane yórangoji Pártia. Yocuñane yórangoji Média. Yocuñane yórangoji Elam. Yocuñane yórangoji Mesopotámia. Yocuñane yórangoji Judéa. Yocuñane yórangoji Capadócia. Yocuñane yórangoji Pónto, Ásia ore. 10Yocuñane yórangoji Frígia. Yocuñane yórangopoji Panfília rĩ. Yocuñane yórangopoji Egípto rĩ. Yocuñane yórangoji guidáyode uje déji ore uniri África uje déji Cirene uéchade. Rómagosode uyoc uñane mu yoco yocuniri iji puniri udé. Judíopise yocuñane. Mu uñane que judío yoque go, mu yoco judíode iji yoque gu uje yicoi ore isocade to. 11Yocuñane yórangoji Créta. Yocuñane yórangoji Arábia. Yocuruode cãra re ome ñane, mu jé ore doi yocuruode jnese uje ore chacate yógome Dupade ipesútedatéode.–

12Ore tija enga que ore chiraja gotique. Enga ore catecã́ri ñane ome enga ore chojninga:

–¿Jé gotinguiringuipise uje ore doi yocuruode uje que ore urúo múñi?–

13Mu uñane cana ore gai enga ore chojninga:

–Yote pioi a yuque ore.–

Pédro acajnaquéode u ome darasade

14Mu Pédro jĩrique chague. Enga jorane Jesús irócho uje chojmára ore iji yirídai ore chague to. Enga Pédro chejnapúsu daruode enga chojninga:

–Judéa jogosórone uaque á, jé aja Jerusalén idaisórone uaque rĩ, angachopísi yuruode uje yigaidi u gu ujetiga arajáyopise cuchade udore quigode. 15Uacoyo yote pioi yúguiji yoque mu que yote pioi yuque yoque go, uje qué durasape. 16Que u gotique, mu Dupade uruode atatasṍri Joel urusarane ojninga cásodicáite u. Enga e tocade uje chojninga:

17Dupade chojninga:

A yuruode tocade jne ome disi ejórigo iji dire erueminórone.

A yojne Yujopié Espíritu Sánto aja ayoré ponáyone ore jnese jne iji disi ejórigo.

Ore ujnacáningo, ore urórigui a ore chatata yadode jne.

Jnacarode a ore chimo denomitígo jne rĩ.

Choquíjnane a ore chĩ́cara daritígo jne.

18A yojne Yujopié aja yirógode, yiróguedie ore gáyode jne enga a ore chatata yuruode.

19A yingo cucha pimojmane aja ore jne enga ore tocade iji gaté jne.

Enga a yingo cucha pingongóningane aja ore jne rĩ enga ore tocade iji jnumi jne.

Enga diquiyode, pioque chagúode, pioque úyujna cuchábedie u jne cucha pingongóningane udore.

20Guedé a cha dáringai guedé enga topiéjna.

Guedoside a cha dáringai guedoside enga a cho diquiyode jne.

Ore angarádejnai gãrapiedie u udaji uje cáma di.

A pijóninga ore angarádejnai uté diringai jne.

Enga suépise cuchade jnese gai.

21Mu ore jnese uje ore chijócha Pangarádejnai uté ajei údi ome raque enga a chiqueta ore jne.–

22Pédro qué chacate ore enga chojninga:

–Angáchoi yu, israélgosode uaque, uje yuruode gajnengórone u uaque. Dupade pota nanique ujetiga ca potigayaquérique déji ome nazarétgosi Jesús úringai Dupade utocaite. Jecute angúromei tu enga cucha pitijabácho uté ipesútedatéode iji uacajade nanique. Enga uacarajáyopise yuruode udore úringane ũréo. 23Mu uje pẽrate Jesús ome uaque diríca enga jĩrique uacarócho jnani sijnángone aja ujetiga ore chujé iji curesei gai. Mu Dupade áyipie diyajmenie u udire nanique, enga ajéode jé upúsu cucha dacadode udore uje tocade diríca ome datocaidi Jesús. 24Mu Dupade chiquetápo Jesús rĩ enga que juéga jeta pitoringai sué gai. Chamáñaje que toc ujetiga pitoringai sué gai. 25Enga eduguéjna cuchábi David casicaite urusarane ojningai jé upúsu Jesús to nanique uje chojninga:

Jecucha yimo yangaráni iji yiquéode.

Déji yãrachua enga que yitodo cuchárique.

26Pininaquéode chĩreta yajéode.

Jecute yĩrarare enga jĩrique pijoque uje yinína yu.

Uje qué yugúsi yúringai ayoré enga a ca yiya yangoroné ome Dupade ujetiga cháta cuchade aja yu.

27Chamáñaje a ca ajuéga jne jeta yáyipie cháji jnaropié.

Jé cho uje a ca ajuéga to jeta baroque bajnorai uyu yarione tarata jne.

28Mu bango dajei qui aja yu uje chicáji pucuecaringuei iji deréjnane.

Enga a yininaquei irágu yajei jne ujeta yugúsi bari.–

29Pédro qué chacate ore enga chojninga:

–Yurasade uaque á, uacarajáyopise uje yocurásai jnani bajai David toi nanique. Enga ore chijóchame. Uacarajáyo to uje ode jé déji de yoquidai. 30Mu Dupade uruode atatasórone uñai David nanique. Jecute chiraja uje Dupade chajo raja ujetiga datocaidi Crísto a u David ape disi ejórique jne. Enga chichaga úringai eduguéjna cuchábi aja David ape disi ejoi uté ujetiga basája eduguéjnai David charidi. 31Cho ujetiga David pañapísiji uje Dupade utocaidi Crísto niji iji dáringai toque quigade. Jecute obiréjna uje que ojningai u re go, mu ojningai u Crísto uje chojninga: a ca Dupade juéga ujetiga áyipie cháji jnaropié. A ca juégapo to rĩ ujetiga aoi tarata iji ode ajei jne. 32Enga jé upúsu urusarane quigode uje Dupade e chiqueta datocaidi iji datoringai. Enga utocaidi uté jé upúsu Jesús. Enga imosórone u uyoque jnese enga yajógo yógaja uje jé ũrepise udore. 33Jecute Dupade chiringare Jesús enga sosi iji gaté enga e déji Dupade ãrachua iji gaté. Enga jogadi u to uje Dupade chisi ome Dajopié Espíritu Sánto ome Jesús ujetiga chajnerame danguresórone. Chamáñaje Dupade jé chajo raja nanique gu ujetiga chisi ome. Enga cucha dacadode jnese uje uacamóño jé aja uacadudigode cucha iji de diri garani u uté. 34-35Que David u gotique uje chise Dupade idai, jecute ojningai u uñeque uje chojninga:

Yocangaráni Dupade chojningame Yangaráni:

"Ayáji yejode iji yãrachua aja diri ujetiga yipésu ua ga ajnué bamajosórone ore gai jne."–

36Pédro qué chacate ore enga chojninga:

–Jecute yipota ujetiga israélgosode uaque jnese uacarajáyo uje Dupade ipesute uaquei Jesús úringai datocaite Crísto. Yojningai u Jesús uté uje uacajóyoja curesei ica. Enga e Dupade pésu uté to ujetiga ore cho dangarádejnai iji jnese.–

37Uje ore chudute Pédro uruode udore ga ore chopise dáyugu re. Enga ore chojningame Pédro, ujode Jesús irócho ore:

–Yoquijorane, ¿jé yoco rique jne a?–

38Pédro chajnai ore ga chojninga:

–Ecãcho uacáyipiedie quigode, uacadode ore ome Dupade. Angoño uágaja ore ujetiga ore chaca uáguiji yodi uje uacanguretáyo Jesús to. Enga a Dupade chĩro uacate gajnaréngone jne enga a Dupade chisi uáguiji Dajopié Espíritu Sánto to jne rĩ. 39Jé yocangarádejnai Dupade urúo nanique gu ujetiga chiroque Dajopié Espíritu Sánto aja dabidigode jnese. Enga ojningane u uaque. Jé upo uacape disi ejórigo rĩ. Enga jé upo erámi unirisórone ore jnese rĩ uje idája ore iji erámone.–

40Pédro acajnaquéode u udore ome ore mu ojningane cucha uñane orocoi. Mu uje Pédro e chejna dacajnaquéode udore guesi enga cho ore quique enga chojninga:

–A pujuya diríe jogonórone jne uje sijnanguipise ore gu. Jecute ca átayo uágaja ore to ujetiga ca ore gajnei pujuyaqué chise uaque to.–

41Enga ayoréode ore jnese uje ore chimesẽre Pédro acajnaquéode enga jĩrique ore tṍra ore aja yodi ome bautísmo. Enga Pédro acajnaquéode imeserãsórone 3.000 u ore iji diri tuté. Jecute Jesús anguretasórone chõre raque ga jiei ore. 42Enga udore ore chejna rángaja Jesús irógode apóstol udore acajnaquéode, enga pirasitigai déji ore ome ñane uje ore chamáta ñane gatuaque ome picatecãraitigade ome Dupade; jé u to uje ore chamáta ñane ome dabosode.

43Dupade angúroméone u Jesús irógode apóstol udore, jecute jiei ore ipesútedatéode, ore ipesudode cucha pitijabácho ore rĩ. Jecute ayoréode tijapísa jnese. 44Diga Jesús anguretasórone ore chatapísa rágaja ñane enga ore péro dagúchade gáyode jnese. 45Ore doi oredie ome dagúchade jnese enga ore chisi dojode Jesús anguretasóño iji daplátadie uje cuchade qué chona ore. 46Ore chamáta ñane aja Dupade iguíjna cuchábi iji dirode jnese. Ore chamátapo ñane iji daguíjnane gatuaque to rĩ ome dabosode. Enga jé ũrepise ore ome darasitigade ome ñane uje ore pésu udore. 47Jesús anguretasórone ore chicota Dupade aja daquigode enga guidai idaisórone que ore chise ore unerotiguérique go. Enga Yocangarádejnai Dupade chõre danguretasórone iji deréjnane gatuaque uje chiqueta ore ome ore isijnaringuéone.

Currently Selected:

Héchos 2: Ayore

Highlight

Copy