Juan 19

1Enga jé u uje ore eduguéjnai Piláto chiroque darógode aja Jesús ujetiga ore chaquesu údode. 2Piláto irógode soldácho ore pésu Jesús ayo gajnui iji pore ojnacúcodie jmanecade enga ore chicháji Jesús gatoi. Enga ore dopoi iguidé gatíjna rĩ uje eduguéjnane ore iguidé enga ore na aja Jesús. 3Enga ore chujñieta enga ore chose yui enga ore chojninga:

–¡Picotaque opejã judíode ore eduguéjna cuchábi!–

Enga ore chinguíra dajmanáyone aja edodie.

4Piláto dopoi guesi te rĩ enga catecã́ri judíode ore enga chojninga:

–A yijnime uaquetei Jesús jne enga a yicháji uacaquei ujetiga ajicho. Mu yipota ujetiga arajáyo uje que yirajapise bárique.–

5Diga Jesús doi guesi iji ore iguíjnai uje ayo gajnui qué déji gatoi uje ore ipesudi iji pore ojnacúcodie jmanecade. Enga qué chigui eduguéjnane ore iguidé gatíjna. Enga jé u uje Piláto chojningame ore:

–Yojningai jnani déji de.–

6Uje sacerdóteode eduguéjnane, Dupade iguíjna cuchábi irodisórone ore chimo Jesús enga ore tibite enga ore chigotája daruode enga ore chojninga:

–¡Ajo uté aja curesei gai! ¡Ajo uté aja curesei gai!–

Mu Piláto chojninga:

–Boyo údi enga ajóyo aja curesei. Chamáña gu uje que yirajapise uté iyoguérique gu.–

7Mu judíode ore chojninga:

–Uté bai u uje cho Dupade Abi iji re. Jecute jé tiógara ujetiga toi. Yocai jnani bajai Moisés urusarane quigode uñai jé u gu.–

8Piláto aguté cho jora iji taningai mu uje chudute uje Jesús cho Dupade iji re enga todo gaté. 9Jecute Piláto chacapója daguíjna cuchábi te rĩ enga catecãrápoi Jesús rĩ enga chojninga:

–¿Banínique jé déji rique a?–

Mu Jesús que chajnai uruode.

10Uje Jesús que chajnai Piláto uruode enga Piláto chojninga:

–¿Ja ca ajéngome yu a? Uje que achajnai yuruode. ¿Jé ca araja to a? uje yajnei u ujetiga yiroque ua aja ujetiga ore chajo ua aja curesérique. Enga yajnei upo rĩ ujetiga yirame ua.–

11Mu Jesús chajnai uruode enga chojninga:

–Ísega ca araja to uje Dupade sué bajnéone udore gáyode. Ujetiga ca ajéo enga a ca toguírase ome ua bojningane udore ujetiga apésu. Mu Dupade guẽrate ujetiga apésu cucha dacadode udore aja quigode. Jecute uté uje oite yu aja, uté isijnaringuéone sué basijnaringuéone gai.–

12Uje Piláto chudute Jesús uruode udore enga jĩraque chucué dáyipie ujetiga chirame Jesús. Mu judíode ore tibite gaté enga ore chojninga:

–Bamo uje beduguéjna cuchábi umajósõri u Jesús uté. Chamáñaje pota dáringai eduguéjna cuchape to ome re. Jecute ujetiga arame Jesús enga obiréjna uje que bagaidedie u eduguéjna cuchábi César áyipiedie.–

13Uje Piláto chudute judíode ore uruode enga chimate dáyipiedie ome Jesús. Jecute chiroque darógode aja Jesús ujetiga ore di údi iji. Enga Piláto chácariji ore charipi cuchábi iji guiguíjnai ajé uñai uje i tu Gabáta ome judíode ore arecujaidie. Enga guiguíjnai ajé uñai uté u uje ore ipesute ajei ome cucaranenie. Enga guiguíjnai ajei uté u uje Piláto chingo dáyipiedie ome ore. 14Enga judíode ore pésu cuchade aja quigode ome dajnusinamáni dire dirome uje i u Páscua. Enga guedé chirõre gatócoro. Enga jé u uje Piláto catecã́ri judíode ore enga chojninga:

–Uaqueduguéjna cuchábi déji de.–

15Mu ore tibite enga ore chojninga:

–¡Yocajegaidi u ujetiga toi! ¡Yocajegaidi u ujetiga toi! ¡Ajo aja curesei gai!–

Piláto chojninga:

–¿Ja uacajéode u ujetiga yajo uaqueduguéjnai aja curesei a?–

Mu sacerdóteode ore eduguéjnane chajnai Piláto uruode enga ore chojninga:

–Que yoqueduguéjnai uñeque cus. Gusu uje yoco yoqueduguéjnai iji beduguéjna cuchábi uje déji Róma.–

16Udojo quigade enga Piláto chisi ome Jesús ome ore ujetiga ore chajo aja curesei gai. Enga jé u uje ore jno údi.

Ore chajo Jesús aja curesei

(Matéo 27:32-44; Márcos 15:21-32; Lúcas 23:26-43)

17Enga Jesús chicai dagachodi yui enga chijnoque dacuresei aja jogadi uje i tu Patodé Ajnoquei. Mu Gólgota u ome judíode ore uruode. 18Enga ore chajo Jesús aja curesei iji uté. Mu que gusu Jesús; jorane u dabayade uje gare ore. Ore chicha uñai aja ãrachua, jé ore chicha uñai aja arasé. Enga Jesús déji ore ujai. 19Piláto chiroque ore ujetiga ore pésu darusarane enga ore chajo aja Jesús gajnei curesé. Enga ore urusarane quigode u udore: "Jesús nazarétgosi, judíode ore eduguéjna cuchábi u udé." 20Diga uásejna judíode uje ore chimo ore urusarane iji Jesús gajnei curesé. Chamáñaje Jesús cachodi idógosiji ore idai gu. Que gusu judíode ore uruode uje déji ore urusarane. Mu gréciagosode, rómagosode, ore uruode déji to. 21Jecute sacerdóteode ore eduguéjnane ore catecã́ri Piláto enga ore chojninga:

–Gajnareque barusarane quigode uje bo judíode yoqueduguéjnai iji uté. Écãre barusarane quigode enga ósi te: "Jnani uté cho judíode eduguéjnai iji re."–

22Mu Piláto chojninga:

–Yurusarane quigode jé u udore enga jé jogate. A ca yécãre jne.–

23Soldádode gagájni ore uje ore chimate Jesús aja curesei. Uje Jesús e déji curesei gai enga soldádode udore chamáta iguidedie enga jé u uje ore chajuguína ñane. Mu Jesús iguidé qué déji uje ore ora enga íjnoque pugapídode iji. 24Enga soldádode ore catecã́ri ñane ome Jesús iguidé gajnesónique. Enga ore chojninga:

–Jé ca yajujo iji jnumi mu yicoi enga yicobi yocajñamitique ome ñane enga a yusónique chijna.–

Enga ore urusarane Dupade urúo tocade ome ore ipesudode udore. Uje Dupade uruode chósi te: "A ore chajuguína yiguidedie iji ñane jne. Enga a ore dopoi dajñamitígo jne rĩ ome ñane ome yiguidé." Enga jé upúsu soldádode ipesudode udore.

25Chequedíe uñáringui ore déji Jesús gajnei curesé ejoi. Jesús daté jé u uña, enga Jesús daté jõra jé upo uña te rĩ. Cleófas acoté uje i tu María déji to. Enga María Magdaléna dépoji to rĩ. 26Enga Jesús acadigode uñai dépoji ore gari rĩ uje Jesús chijnorapise uté. Enga Jesús chimo uje uté déji daté ejoi. Jecute catecã́ri daté enga chojninga:

–Chequé á, o babi iji uté.–

27Quigade enga Jesús catecã́ri dacadi enga chojninga:

–O baté iji uaté jne.–

Enga jec u uje Jesús acadi uté cho daté iji uaté enga uaté pusi uté iguíjnai.

Jesús itoringai isocade u udojo

(Matéo 27:45-56; Márcos 15:33-41; Lúcas 23:44-49)

28Cuchade udojo quigade enga Jesús chiraja uje Dupade uruode atatasórone jnani bajácho ore urusarane quigode e tocade jnese. Cucha amiri tu uje chojninga:

–Yicajnóriji.–

Uje chejna daruode udore guesi enga Dupade uruode atatasórone ore urusarane úringane tocachuguipíso jogadi u.

29Ga ore jotai piéraque déji jogadi uté uje ore jotaque sujnai irágu dabi. Enga ore pésu damatadé gajnua iji daburuco eruei enga jé u uje ore chacáji dajotaque sujnai. Enga ore chisa daburuco enga ore chṹraja Jesús pijnani. 30Uje Jesús chóji ore jotaque sujnai enga jé u uje chojninga:

–Yajnéone cucha dacate e tocade jnese ome yu.–

Uje chejna daruode udore guesi enga jé u uje gatoi cho caru aja jnumi enga jé u uje toi.

Soldádode uñai chichagu Jesús orotabidi

31Ga dire puyai u dirome. Enga judíode ore cho cuchadaté iji dire puyai uté gu uje ore jnusinamáni dire jé u to uje i u Páscua. Jecute que ore pota ujetiga ore yugode ajnoquéode cháji cureséode iji dire puyai uté. Jecute ore chingome deduguéjnai Piláto ujetiga chiroque soldádode aja ore yugode ujetiga ore chimochẽre ore ajnoquéode iji ore etarúdode. Ore gaidi u gu ujetiga jĩraque ore toi enga ore chijnime ore iji cureséode. 32Jecute soldádode ore doi enga ore chimochẽre Jesús bayade ore etarúdode. 33Mu uje ore chose Jesús yui enga ore chimo uje Jesús e toi. Enga que ore chimochẽre etarútique to.

34Mu soldádode uñai doi ga chichagu Jesús orotabidi. Uje chichagu enga jĩraque iyoi tṍraji enga yodi tõrapóji rĩ. 35Cucha dacadode udore ojñasṍri u uyu enga jé ũrepise yojñane. Chamáñaje cucha dacadode udore pijogúsõri u yu to. Jecute yingome Jesús adode udore ome uaque gu ujetiga anguretáyopise uté. 36Jesús gajnéone cucha dacacho udore tocade gu ujetiga ore urusarane Dupade urúo chise dáringáringo tocachucho to. Uje quigode u uje chósi te: "A ca pimocherãque uté ajnoquéode uñeque jne." 37Mu ore urusarane quique uñai dépoji rĩ uje chósi te: "Enga a ore chajire dajnongoi jne, ore ichajui uté."

José arimatéagosi chijóchame Jesús

(Matéo 27:57-61; Márcos 15:42-47; Lúcas 23:50-56)

38Quigade enga José uté uje idai u Arimatéa catecã́ri ore eduguéjnai Piláto ujetiga Piláto juéga Jesús ome ujetiga chijóchame. Jesús anguretasõre José to mu pógu danguretigai ome Jesús. Chamáñaje todo judíode ore gu. Enga Piláto chimesẽre José áyipiedie. Jecute José chiramurase Jesús iji curesei gai ujetiga chijóchame. 39Enga Nicodémo uje catecã́ri Jesús nanique iji dejai di cucha ai unérone údi uje chãraja 30 kílos. Enga ore chimeríji ñane cucha ai unérone uje ore íode u mírra aja áloes. 40Jecute José, Nicodémo ore cháta rágaja ñane uje ore jno Jesús cuérpo údi. Enga ore na Jesús cuérpo aja borapéode ajei uje arupachéo ome cucha ai unérone udore uje ore chimeríji ñane. Chamáñaje judíode ore isocabei u gu uje ore chijóchame togode. 41Enga porebúrique idógosiji Jesús cachodi uje ore chajo aja curesei iji. Enga ore jochai jnup edo déji oroco iji porebui uté. Ore chijócha jnup edo uaté nanique gu ujetiga dimane ome totique. Mu cáma ayoré totique déji. 42Jecute ore na Jesús cuérpo uté aja jnup edo idógosia uaté. Chamáñaje ore edójnaringuéo gu uje idógosi dire puyai ome judíode ore.

Currently Selected:

Juan 19: Ayore

Highlight

Copy