Àpɔ́sò 15
15
Wa poìn dyí ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ mú
1Ɓó tia ɓaɖaa, gàa ɖíɛ́ ɓě sɔ̀ìn ma ɖé Júɖìà-ɓòɖòɔ̀ kɔ̃, ké wa nì ma cɔ́cì-nyɔ̀ ɓěɔ̀ ɖɛ tɛ̀mɛ̀ǐn ɖé Ã́tìà-hwɔ̀ɖɔ̀ɔ̀ mú, ké wa ɖá, “Ɖɛ ɓɛ́ Mózè tɛ̀mɛ̀ìn zɔ̃̌ɔ̀ à kɛɛ, ɔ mɔ̀ ɓɛ́ à ké sàà mɛ́. Ɔ jǔ ké ɓě mɔ̀ùn se sàà mɛ́ín, ɓě se póɛ ɓɛ́ìn.” 2Ɖɛ wa nì ma nyɔ ɓěɔ̀ tɛ̀mɛ̀ǐn nyɛɛ, ɔ nyuɛ ké Pɔ́ɔ̀ kè Bànábà zà ma wa gbo dòǐn, ké wa nyu ma zàǔn-zàǔn ɓáún-ɓáún. Ɔ jèɛɛ, cɔ́cì-nyɔ̀ ɓěɔ̀ poɛ ma gbɔ, ɓɛ́ Pɔ́ɔ̀ kè Bànábà ɔ kè nyɔ tɔ̀ɔ̀ ɓěɔ̀ ɖò ké Jùɖúsɛ̀ɖɛ̀ìn-hwɔ̀ɖɔ̀ɔ̀ mú mu, ɓɛ́ wa ké àpɔ́sò ɓěɔ̀ kè nyɔ vɛ̀nɛ̀ ɓěɔ̀ dyé ɓó ɖɛa jè.
3Ti ɓɛ́ cɔ́cì-nyɔ̀ ɓěɔ̀ ɖǎ ma wa ɖoɓoɛɛ, wa zĩ̀ìn ma ɖé Fònísìà-ɓòɖòɔ̀ kè Sɛ̀mɛ́ɖìà-ɓòɖòɔ̀ kɔ̃. Wa nì ma kà ɓóɖó-dù kà kò ɖò ɓěɛ̀ nyɔ ɓěɔ̀ mɔ̀ùn nyu ma Gèɖèpɔ́ɔ̀ gbo gmɔ̀ìn nyɛɛ jè cɛ̃iń, ké ɔ po ma wa ɖíí cɔ́cì-nyɔ̀ séín ɓě ɓɛ́ wa nì ma ɖé ɓóɖó ɓěa kɔ̃ɛɛ múàǔn mìɔ. 4Ti wa nyini ma Jùɖúsɛ̀ɖɛ̀ìn-hwɔ̀ɖɔ̀ɔ̀ múɛɛ, cɔ́cì-nyɔ̀ ɓě nì ma ɖéɛ kè àpɔ́sò ɓěɔ̀ ɔ kè nyɔ vɛ̀nɛ̀ ɓěɔ̀ kpɔ̃ ma wa jè dyi. Ké Pɔ́ɔ̀ kè Bànábà cɛ̃ ma ɖɛ séín ɓɛ́ Gèɖèpɔ́ɔ̀ ɖǎ ma wa gbo kpá, ké wa ɖǎ ma nyuɛɛ jè wa gbo. 5Kɛɛ Fáɖòsíì-nyɔ̀ ɓěɔ̀ nyɔ ɓě taɓa ma Gèɖèpɔ́ɔ̀ hwìɖǐǐɛɛ, wa ɖíɛ́ ɓě sɔ̀ ma dyí, ké wa ɖá, “Wa ɓéɖé ɓɛ́ wa ké sàà mɛ́, ké à ɓéɖé à kéɛ wa gbo cɛ̃, ɓɛ́ wa ké Mózèɛ̀ gma ɓěɔ̀ dyi kpɔ̃.”
6Sɔ̀ìn ɓóɛ gboɛɛ, àpɔ́sò ɓěɔ̀ kè nyɔ vɛ̀nɛ̀ ɓěɔ̀ poìn ma dyí, ɓɛ́ wa ké ɖɛ nìà kɛ múin gmɔìn. 7Ti ɓɛ́ wa ɖǎ ma ɖɛa wa mìɔùn hwìɛ̀ cɛ̃iń hwèɖèìn nyɛɛ, Píɖɛ̀ sɔ̀ dyí, ké ɔ cɛ̃ɛ ma wa gbo, ké ɔ ɖá, “Ɖíí ɓě, ɓě dyuòɛ̀ kà ɖé ti kĩ́ín múɛɛ, Gèɖèpɔ́ɔ̀ gã zɔ̃̌ɔ̀ nyɔ ɖò ɖé ɓě hwìɛ̀, ɓɛ́ dyììn ɖé ḿ múɛɛ, ɓóɖó-dù kà ɖò ɓěɛ̀ nyɔ ɓěɔ̀ ké ɖɛ bɔ̃̌ nɔ̀mɔ̀ dyíinɔ̀ cɛ̃ɛ wɔ̃́, ɓɛ́ wa kéɛ hwìɖǐǐ taɓa. 8Gèɖèpɔ́ɔ̀ mɔ̀ nyɔ dyéà nyɔǔn séín hwòɖǒ-dyùà múin nyɛɛ, ɔ tɛ̀mɛ̀ìn ma à dyí kà ɓɛ́ ɔ kpɔ̃ ma ɓóɖó-dù kà kò ɖò ɓěɛ̀ nyɔ ɓěɔ̀ jè dyiɛ, sepóɛɖé ɔ nyí ma wa Zùù Hwɛ̀ǐn-hwɛ̀ǐnɔ̀ kà ɔ nyuɛ ma kà à mɔ̀ùn bììɛ. 9Ké ɔ se mú-ge-ge ɖò à kè wa pṹa dyà, sepóɛɖé waà hwìɖǐǐ-taɓa-taɓaɔ̀ nyuɛ ké Gèɖèpɔ́ɔ̀ hwɔ ma waà hwòɖǒ-dyùà ɓěɔ̀ mú. 10Kɛɛ kàǔn wɛ̃ɛ, ɖɛ́ kɔ̃̀ jè ɓě nìà Gèɖèpɔ́ɔ̀ mú dɔ̃̌uń wɛ̃́? Gbɛ̌ nìà kɛ, à kè à ɓǎ nììn ɓǎ ɓěɔ̀ seɛ ma xwa ɓɛ́ìn, ɓɛ́ à kéɛ kpa. Nìí, ɖɛ́ kɔ̃̀ jè ɓě mɔ́ ɓɛ́ ɓě kéà nyɔ ɓě taɓaà Gèɖèpɔ́ɔ̀ hwìɖǐǐ kɛɛ gbɛ̌ɔ̀ ɖɔ ɓáá? 11Kɛɛ à poɛ jǎà kà Bounɓo Jízɛ̀ɛ̀ kpeɖe nɔ̀mɔ̀ dyíinɔ̀ mɔ̀ nyɔ póìn kà à kɛ̀, ké kǎà ɔ póìn wa mɔ̀ùn ɖekè.”
12Ɓó tia ɓaɖaa, nyɔ séín ɓěɔ̀ nì ma gìɖìǐ. Ké Bànábà kè Pɔ́ɔ̀ nìɛ̀ ma cɛ̃iń kà Gèɖèpɔ́ɔ̀ nyu ma ɖàɓàìn-ɖɛ̀ kè ɖɛ dĩ́ín-dĩ̀ìn ɓě wa mú nyùɛ̌n ɖé ɓóɖó-dù kà kò ɖò ɓěɛ̀ nyɔ ɓěɔ̀ hwìɛ̀ kɛ, ké nyɔ ɓěɔ̀ tò ma wa ɖùǔ gbo. 13Ti wa ɖǎ ma wùɖùɛ̀ hwɔɛɛ, Jĩ́ìn cɛ̃ɛ ma, ké ɔ ɖá, “Ɖíí ɓě, ɓě tò ḿ gbo ɖùǔ. 14Sã́ɓò ɖǎa máa à gbo cɛ̃ kà ɓɛ́ Gèɖèpɔ́ɔ̀ nyu ma ɓóɖó-dù kà kò ɖò ɓěɛ̀ nyɔ ɓěɔ̀ jè kpéí poɛ kĩ́ín, ɓɛ́ ɔ ké nyɔ ɓě ké ɔ nyɔ ɓě jǔ kɛɛ ɖé wa hwìɛ̀ gã kɛ. 15Ɖɛ ɓɛ́ Gèɖèpɔ́ɔ̀ nyu ma kà kɛ kè ɖɛ ɓɛ́ ɔ kpáá-ɖɛ̀-cɛ̃-nyɔ̀ ɓěɔ̀ cɛ̃ zɔ̃̌ɔ̀ kà kɛɛ, ɔ mɔ̀ ɖɛ dyúáɖò pū. Ɔ céè, ké ɔ ɖá,
16‘Ɖɛà ɖǎ dyi ziín, ní mu ɖe dyiìn,
ké ní mu Dèɓéɛ̀ kã́á-ɓòɖò ɖǎ ma kà wáɖáa poùn ɖe kà nyɔ poà gbǒ ɓɛ́ ɔ ɖǎ wáɖá kɛɛ ɖie kɛ.
Ní mu gbǒɔ̀ dɛ̀ ɓě ɓí nìɛɛ gmaùn ɖe,
ɓɛ́ ḿ kéɛ dɛ̀ ɓě ɖǎ dyíin nyìnììn nyɛɛ dyíin nɔ̀mɔ̀ìn ɖe.
17Ní mu kã́á-ɓòɖòɔ̀ poùn ɖe, ɓɛ́ nyɔ tɔ̀ɔ̀ ɓěɔ̀ ké ḿ dyi mɔ́.
Wa mɔ̀ ɓóɖó-dù kà kò ɖò ɓěɛ̀ nyɔ séín ɓɛ́ wa mùìn ní nyɛ́nɛ́ín nyɛ.
18Mɔ̄ Bounɓo mɔ̀ nyɔ nyuɛ zɔ̃̌ɔ̀ kà ɓɛ́ wa kéó zɔ̃̌ɔ̀ kà ɖɛ ɓěɛ̀ dyí dyuòɛɛ mɔ̀ nyɔ cɛ̃à kɛ̀.’
19“Ɔ jèɛɛ, ní ɖɛ-wɔ̃-po-po ɓɛ́ ḿ nìà nyuɛń nyɛɛ, ɔ mɔ̀, ɓɛ́ à ké ɓóɖó-dù kà kò ɖò ɓěɛ̀ nyɔ ɓě ɓɛ́ wa nìà Gèɖèpɔ́ɔ̀ gbo gmɔ̀ǐn nyɛɛ fũ̀à-fṹá nyùɛ̀n ɓɔ́. 20Kɛɛ à mɛ céè wa gbo, ɓɛ́ wa ké se ɖii-ɖɛ̀ ɓě ɓɛ́ wa ɖǎ kũùn-kpò gbo sáa zàìn nyɛɛ ɖi, sepóɛɖé ɔ mɔ̀ ɖii-ɖɛ̀ se mú hwɛ̀. Wa mɛ táà gbàɖàùn-po-po dyi. Ké wa mɛ ɓɔ́ suaɖɛ̀ kɔ̃̀ bùnù ɓɛ́ wa paɖa dyi, ké ɔ mɛ́ kɛɛ ɖiɛ, ké wa mɛ táà suaɖɛ̀-nyɔ̀mɔ̀ɔ̀ ɖi-ɖi dyi. 21Sepóɛɖé sɔ̀ìn ɖé à ɓǎ nììn ɓǎ ɓěɛ̀ tiín nyɛɛ, Mózè ɓéɖé nyɔ ɓě ké ɔ tɛ̀mɛ̀ìn-ɖɛ̀ ɓěɔ̀ jè cɛ̃ɛ ɖé hwɔɖɔ séín mú. Wa zà ɔ céè-ɖɛ̀ ɓěɔ̀ wuɖuún ɓó Gèɖèpɔ́ɔ̀ fɔ̀-wè séín xwíníín, ɖé Júù-nyɔ̀ ɓěɔ̀ cɔ́cì-gbò ɓěɔ̀ mú.”
Wa céè ɓóɖó-dù kà kò ɖò ɓěɛ̀ nyɔ ɓě ɓɛ́ wa taɓa Gèɖèpɔ́ɔ̀ hwìɖǐǐɛɛ gbo
22Ti ɓɛ́ Jĩ́ìn ɖǎ ma wuɖu jaɖaa, ɔ dè ma àpɔ́sò ɓěɔ̀ kè nyɔ vɛ̀nɛ̀ ɓěɔ̀ ɔ kè cɔ́cì-nyɔ̀ tɔ̀ɔ̀ séín ɓěɔ̀ hwìɖǐi, ɓɛ́ wa ké gàa ɓě wa mìɔùn hwìɛ̀ gã, ɓɛ́ wa ké wa tò, ɓɛ́ wa kè Pɔ́ɔ̀ kè Bànábà ké ɖé Ã́tìà-hwɔ̀ɖɔ̀ɔ̀ mú mu. Wa tò ma Júdà ɓɛ́ wa ɖáìn Bàsábà kɛ kè Sáɖè. Wa mɔ̀ ma cɔ́cì-nyɔ̀ ɓěɔ̀ nàìn-nyɔ̀. 23Ké wa dèìn ma wa céè-ɖɛ̀ ɖò xwa. Céè-ɖɛ̀ɔ̀ wuɖu ɖá,
“À mɔ̀ àpɔ́sò kè nyɔ vɛ̀nɛ̀ ɓěɛ̀ kɛɛ, à mɔ̀ ɓěɛ̀ ɖíí ɓě. Ké ɓě mɔ̀ ɓóɖó-dù kà kò ɖò ɓěɛ̀ nyɔ séín ɓě nì ɖé Ã́tìà-hwɔ̀ɖɔ̀ɔ̀ mú kè ɖé Síwíɖíà-ɓòɖòɔ̀ kè Sàɖésìà-ɓòɖòɔ̀ kɔ̃ɛɛ, ɓě mɔ̀ à ɖíí ɓě. À zà ɓě nyíɔún. 24À wɔ̃́ɔ kà à ɖò ɖǎ ɓě wuɖuún ɖaɓa, ké ɔ nyuɛ ké ɓěɛ̀ hwòɖǒ gbaà dyiɛ. Kɛɛ à seɛ náa wa gbo cɛ̃, ɓɛ́ wa kéɛ náa ɓě kɔ̃ún cɛ̃. 25Ɔ jèɛɛ, à séín hwòɖǒ poɛ gbɔ, ɓɛ́ à ké gàa ɓě gã, ɓɛ́ à ké wa ɖé ɓě gbo tò, ɓɛ́ wa kè Bànábà ɔ kè Pɔ́ɔ̀ ɓɛ́ à ɖɛ̀ɓɛ̀à múɛɛ ké ɖé ɓě gbo dyi. 26Nyɔ ɓě nìà kɛ zà wa nììn fɛ̀ɛ̀ɔ̀ jè hwòɖǒ gbo ɓó à Bounɓo Jízɛ̀ Kɛ́ɖɛ́ì nyɛ́nɛ́ɔ̀ jè. 27Ɔ jèɛɛ, à nì Júdà kè Sáɖè tòɛ̌n. Wa mɔ̀ùn mu ɓě ɖɛ dyúáɖòɔ̀ gbo kɔ̃in zaìn ɖekè. 28Ɔ nɔ̀mɔ̀ dyíin ɓó Zùù Hwɛ̀ǐn-hwɛ̀ǐnɔ̀ kè à mɔ̀ùn gbo, ɓɛ́ à ké se ɓě gbɛ̌ɔ̀ kɔ̃ po ɖe, ɔ sèìn ɖɛ kpa ɖɛ ɓě nìà kɛ ɖòùn. 29Ɖɛ kpa ɖɛ ɓěɔ̀ mɔ̀, ɓɛ́ ɓě ké se ɖii-ɖɛ̀ ɓě ɓɛ́ wa ɖǎ kũùn-kpò gbo sáa zàìn nyɛɛ ɖi, ɓɛ́ ɓě ké suaɖɛ̀-nyɔ̀mɔ̀ɔ̀ ɖi-ɖi dyi táà. Ɓě mɛ ɓɔ́ suaɖɛ̀ kɔ̃̀ bùnù ɓɛ́ wa paɖa dyi, ké ɔ mɛ́ kɛɛ ɖiɛ. Ké ɓě mɛ táà gbàɖàùn-po-po dyi. Ɓě dyi ɓě mìɔùn ɖɛ ɓě nìà kɛ gbo zà ní, nìí, ɓě mu ɖɛ nɔ̀mɔ̀ dyíin nyuɛń ziìn. Ɓěɛ̀ hwuɖu ɖǎ hwɔo.”
30Ti wa ɖǎ ma nyɔ ɓěɔ̀ ɖoɓoɛɛ, nyɔ ɓěɔ̀ mu ma ɖé Ã́tìà-hwɔ̀ɖɔ̀ɔ̀ mú. Ké wa poìn ma cɔ́cì-nyɔ̀ séín ɓěɔ̀ dyí, ké wa zà ma céè-ɖɛ̀ɔ̀ xwáɖáún, ké wa nyíɛ ma wa. 31Ti wa ɖǎ ma céè-ɖɛ̀ɔ̀ wuɖuún zàà hwɔɛɛ, cɔ́cì-nyɔ̀ ɓěɔ̀ kpá ma múàǔn, sepóɛɖé céè-ɖɛ̀ɔ̀ po ma wa kpéí. 32Ké Júdà kè Sáɖè ɓɛ́ wa mɔ̀ ma kpáá-ɖɛ̀-cɛ̃-nyɔ̀ ɓěɛɛ po ma wa ɖíí cɔ́cì-nyɔ̀ ɓěɔ̀ kpéí dyììn ɖé wuɖu ɓáún-ɓáún mú. 33Ké ti Júdà kè Sáɖè ɖǎ ma ɖé ti goun wè nyuɛɛ, cɔ́cì-nyɔ̀ ɓěɔ̀ ɖoɓo ma wa ɖe ɖé múà mú, ɖé nyɔ ɓě ɖoɓo ma kà wa kɛɛ gbo ɖe. [ 34Kɛɛ Sáɖè hwòɖǒ poɛ ma gbɔ, ɓɛ́ ɔ ké ma ɖé sè.]
35Ké Pɔ́ɔ̀ kè Bànábà sè ma ɖé Ã́tìà-hwɔ̀ɖɔ̀ɔ̀ mú ɖekè. Wa nì ma Bounɓoɔ̀ bɔ̃̌ nɔ̀mɔ̀ dyíinɔ̀ wa gbo cɛ̃iń, ké wa nì ma wa ɖɛ tɛ̀mɛ̀ǐn. Nyɔ pàɖǎ ɓě mɔ̀ùn nì ma ɖɛ dyúáɖòɔ̀ nyuɛń ɖekè.
Pɔ́ɔ̀ kè Bànábà zaìn gbo
36Ti Pɔ́ɔ̀ kè Bànábà ɖǎ ma ɖé ti goun wè nyuɛɛ, Pɔ́ɔ̀ cɛ̃ɛ ma Bànábà gbo, ké ɔ ɖá, “À kɔ́ìn ɖe, ɓɛ́ à ké à ɖíí cɔ́cì-nyɔ̀ ɓě nì hwɔɖɔ séín ɓě kɔ̃̀ mú ɓɛ́ à cɛ̃ ma kà Bounɓoɔ̀ bɔ̃̌ nɔ̀mɔ̀ dyíinɔ̀ kɛɛ kɔ̃in té, ɓɛ́ à kéɛ dyé kà wa nyu dyúa muɛ kɛ.” 37Ké Bànábà mɔ́ ɓɛ́ wa ké ma Jɔ̃́ɔ́ ɓɛ́ wa ɖáìn Máà kɛɛ kpa. 38Kɛɛ Pɔ́ɔ̀ poɛ̀n ma hwìɖǐi kà ɓɛ́ ɔ se ma dyíin nɔ̀mɔ̀ ɓɛ́ wa ké ɔ kpa kɛ, sepóɛɖé ɔ ɖǎ ma wa gbo sɔ̀ ɖé Pã̀fíɖídyà-ɓòɖòɔ̀ kɔ̃, ké ɔ kè wa kè se ma dyúa mu, ɓɛ́ ɔ mɔ̀ùn ké kũ̀àɔ̀ ɖò nyu. 39Ɖɛ nìà kɛ dyà ma ɖɛín-zà-zà vɛ̀nɛ̀ ɓó wa sɔ̃́ɔ̀ pṹa. Ɔ jèɛɛ, wa zaìn ma gbo. Bànábà kpa ma Máà, ké wa sɔ̀ dyí, ké wa mu ma ɖé Kítììn-tòò-kpòɔ̀ kɔ̃. 40Kɛɛ Pɔ́ɔ̀ gã ma Sáɖè, ké cɔ́cì-nyɔ̀ ɓěɔ̀ nyí ma wa Bounɓoɔ̀ xwa, ɓɛ́ ɔ ké ma wa dyí gmɔ̀. Ké wa mu ma, 41ké wa zĩ̀ìn ma Síwíɖíà-ɓòɖòɔ̀ kè Sàɖésìà-ɓòɖòɔ̀ kɔ̃. Ké wa po ma cɔ́cì-nyɔ̀ ɓěɔ̀ kpéí.
Currently Selected:
Àpɔ́sò 15: ƁB02
Highlight
Share
Copy
Want to have your highlights saved across all your devices? Sign up or sign in
Bassa Bible © Bible Society Liberia, 2002.
