Jɛ́nɛ́sì 21
21
Áázèɛ̀ wóɖó-wóɖó
1Sɔ̀ìn ɓó ɖɛ ɓěa gboɛɛ, Bounɓoɔ̀ po ma Seɖɔ́ mana kɔ̃ kà ɔ nyuɛ ma kà ɔ nyɛ́nɛ́ín ɖáìn nyɛ. 2Hwɛ̀ ké Seɖɔ́ nì ma zùù kɔ̃, ké ɔ wóɖóìn ma gàa-dyù ɖò ɓó Ééɓòɖòhɛ̃́ɛ̀ bìì, ɖé Ééɓòɖòhɛ̃́ɛ̀ nyɔ-sùà-tìɔ̀ mú ɓó ti déín kɔ̃̀ jè ɓɛ́ Gèɖèpɔ́ɔ̀ cɛ̃ ma kà ɔ gboɛɛ ɓaɖa. 3Ké Ééɓòɖòhɛ̃́ɛ̀ jǔìn ma dyú ɓɛ́ ɔ kè Seɖɔ́ wóɖóìn ma kà kɛɛ Áázè-nyɛ̀nɛ̀ kɔ̃̀ xwíníín mɔ̀à dyɔ́-wùɖù kɛ. 4Ti ɓɛ́ Áázè nyu ma wé mɛ̀nɛ̌ìn-tã kɛɛ, Ééɓòɖòhɛ̃́ɛ̀ ɖáɓá ma ɔ sàà kà Gèɖèpɔ́ɔ̀ nyuɛ ma kà ɔ gbo cɛ̃ɛ kɛ. 5Ti ɓɛ́ Ééɓòɖòhɛ̃́ɛ̀ wóɖóìn ma Áázè kɛɛ, ɔ nyuá ma zɔ̃ hɔ̃dɛ̀ɖɛ̀ ɖò. 6Ké Seɖɔ́ cɛ̃ɛ ma, ké ɔ ɖá, “Gèɖèpɔ́ɔ̀ ɖǎa nyu ké ḿ ɖǎ kéɛ̀. Ké nyɔ séín muɛ wɔ̃́ùn wɛ̃ɛ, wa mu kéɛ̀ìn ɖekè.” 7Ké ɔ cɛ̃ɛ ɖe, ké ɔ ɖá, “Nyɛ́ muɔ́ɔ Ééɓòɖòhɛ̃́ɛ̀ gbo cɛ̃ìn kà Seɖɔ́ muɔ́ dyú nyáìn nyɛ́? Kɛɛ wɛ̃́ɛ́ kɛɛ, ḿ ɖǎ ɔ bìì gàa-dyù ɖò wóɖóìn ɖé ɔ nyɔ-sùà-tìɔ̀ mú.”
Hégà kè Ésìméò kúmú-kúmú
8Ti ɓɛ́ Áázè ɖǎ ma ɓúá kɛɛ, ɔ ɓɔ́ ma nɛɛ̀. Ké wé kɔ̃̀ ɓaɖa ɓɛ́ ɔ ɓɔ́ ma kà nɛɛ̀ kɛɛ, Ééɓòɖòhɛ̃́ɛ̀ pa ma hwɔ vɛ̀nɛ̀ ɖò. 9Kɛɛ Seɖɔ́ dyéɛ ma kà Ésìméò ɓɛ́ Hégà mɔ̀à Íjè-mààɔ̀ kɛ kè Ééɓòɖòhɛ̃́ɛ̀ wóɖóìn ma kà kɛɛ nì ma Áázè dyɔ́ ɓaɖauń wɛ̃. 10Ké ɔ cɛ̃ɛ ma Ééɓòɖòhɛ̃́ɛ̀ gbo, ké ɔ ɖá, “Kúmú gǐì-màà nìà kɛ kè ɔ dyúɔ̀, sepóɛɖé gǐì-màà nìà kɛ dyúɔ̀ kè ní dyú Áázè se dúí-sè-ɖɛ̀ɔ̀ mú peɖeɛ̌n mu.” 11Ké ɖɛɔ̀ po ma Ééɓòɖòhɛ̃́ɛ̀ hwòɖǒ ɖé ɖei mìɔ, sepóɛɖé Ésìméò mɔ̀ ma ɔ dyúɔ̀ ɖò ɖekè. 12Kɛɛ Gèɖèpɔ́ɔ̀ cɛ̃ɛ ma ɔ gbo, ké ɔ ɖá, “Nì hwòɖǒ mɛ ɓɔ́ ɖé ɖei kpáa ɓó gàa-dyùɔ̀ kè nì gǐì-mààɔ̀ jè. M̀ mɛ wɔ̃́ìn ɖɛ séín Seɖɔ́ cɛ̃à m̀ gboɛɛ gbo, sepóɛɖé dyììn ɖé Áázè múɛɛ, ɖéɛ̀ nì nyɛ́nɛ́ɔ̀ mu dyúa muùn kánáá pū. 13Ké ní mu ɓóɖó-dù vɛ̀nɛ̀ ɖò nyuùn sɔ̀ìn ɖé nì gǐì-mààɔ̀ dyúɔ̀ mú, sepóɛɖé ɔ mɔ̀ nì xwíníín-zà-dyùɔ̀ ɖò ɖekè.”
14Ɔ jèɛɛ, wéɔ̀ nyɔ kɔ ma ɓó dyíɛɛ gànà-kṹún mɛ̀nɛ̀ɛ̀ kɛɛ, Ééɓòɖòhɛ̃́ɛ̀ ɖú ma ɖii-ɖɛ̀ kè ní-tɛ̀ɓɛ̀ɛ̌ ɖò dyí, ké ɔ nyíɛ ma Hégà. Ɔ dèɛ̀ ma ɔ kɔún. Ké ɔ cuò ma ɔ kè dyú-gbɔ́ɔ̀. Ké wa mu ma, ké wa kpá ma ɓóɖó gbo, ké wa sè ma xwáɖáún ɖé Bèsíɓà Gbǎùn-fúɖúáɔ̀ kɔ̃. 15Ti ɓɛ́ ní nì ma ɖé tɛ̀ɓɛ̀ɛ̌ɔ̀ múɛɛ ɖǎ ma ɖé dyi hwɛ̀ kɛɛ, ɔ sè ma dyú-gbɔ́ɔ̀ ɓó cu-gbɔ̌ ɖò xwíɖíi. 16Ké ɔ mu ma ɓó dyúa goun. Sɔ̀ìn ɓó dɛ̀ ɔ nì ma kà kɛ, ké ɖé ɔ dyúɔ̀ gbo nyiniɛɛ ɓɛ́ìn ma ɓáɖáa kpáɖá-nyɔ sɔ̃́ ɓaɖa-bùè jǔɛ. Ké ɔ kò ma dyi. Sepóɛɖé ɔ hwòɖǒ se mɔ́ ɓɛ́ ɔ ké ɔ dyúɔ̀ mɛ́ɛ dyé. Ti ɔ kò ma ɓó dyiɛɛ, ɔ dè ma vĩ̌ɛ gbɔ. Ké dyú-gbɔ́ɔ̀ mɔ̀ùn nì ma kpé poɛń ɖekè.
17Hwɛ̀ ké Gèɖèpɔ́ɔ̀ wɔ̃́ ma dyúɔ̀ kpé-po-wùɖùɔ̀, ké ɔ zɛ̃̀ìn ma ínjà ɖò mú. Ké ɔ ɖá ma Hégà sɔ̀ìn ɖé dyɔún, ké ɔ ɖá, “Hégà, ɖɛ́ kpá kɛ́? Ɓɔ́ fɛ̃̀ìn, sepóɛɖé ḿ ɖǎ dyúɔ̀ kpé-po-wùɖùɔ̀ wɔ̃́ dà ɔ pɛ̃́à ɓó dyiɛ. 18Sɔ̀ dyí, ɓɛ́ m̀ ké ɔ sɔ̃ún ɓá, ɓɛ́ m̀ ké ɔ dyií dyi kpɔ̃, sepóɛɖé ní mu ɓóɖó-dù vɛ̀nɛ̀ ɖò nyuùn sɔ̀ìn ɖé ɔ mú.” 19Hwɛ̀ ké Gèɖèpɔ́ɔ̀ nyuɛ ké ɔ dyé ma ní-ɓì ɖò. Ké ɔ mu, ké ɔ dyíìn ma tɛ̀ɓɛ̀ɛ̌ɔ̀ ní mú. Ké ɔ nyí ma dyúɔ̀ ní, ké ɔ náa ma. 20Ké Gèɖèpɔ́ɔ̀ nì ma ɓó dyúɔ̀ gbo, ké ɔ ɓúá ma. Dyúɔ̀ mɔ̀ ma gbǎùn-fúɖúá-kɔ̃-nyɔ̀, ké ɔ mɔ̀ ma sé-po-nyɔ̀ vɛ̀nɛ̀. 21Ti ɓɛ́ ɔ nì ma ɖé Páwàɖàùn Gbǎùn-fúɖúáɔ̀ kɔ̃ cĩ́ɛń nyɛɛ, ɔ ɖe mɔ́ ma ɔ bìì nyɔ́nɔ́ ɖò ɖé Íjè-ɓòɖòɔ̀ kɔ̃.
Dèè-wùɖù nì ma ɓó Ééɓòɖòhɛ̃́ɛ̀ kè Àbímɛ̀nɛ̀ pṹa kɛ
22Ɓó tia ɓaɖaa, Àbímɛ̀nɛ̀ kè Fíkò mɔ̀à ɔ sójà ɓěɔ̀ nyɔ vɛ̀nɛ̀ kɛɛ cɛ̃ɛ ma Ééɓòɖòhɛ̃́ɛ̀ gbo, ké wa ɖá, “À dyéɛ kà Gèɖèpɔ́ɔ̀ nì ɓó m̀ gbo ɖé ɖɛ séín m̀ nyuɛɛ mú kɛ. 23Ɔ jèɛɛ, ɓó kàǔn wɛ̃ɛ, ɖììn wuɖu à dyéɖéín ɓó Gèɖèpɔ́ɔ̀ dyúa kà ɓɛ́ m̀ se à kè à dyú ɓě kè à nyúà-dyú ɓě gbá-gbá ɖò mú nyuɛ́ mu kɛ. Nyu à kè ɓóɖó kɔ̃̀ kɔ̃ ɓɛ́ m̀ mɔ̀à ɖéèɛɛ kpeɖe nɔ̀mɔ̀ dyíin dyúáɖò ɓɛ́ à ɖǎà mɔ̀ùn dyí nyuɛɛ dyí.”
24Ké Ééɓòɖòhɛ̃́ɛ̀ wɔ̃́ ma, ké ɔ ɖá, “Ní mu wuɖu ɖiìn.”
25Hwɛ̀ ké Ééɓòɖòhɛ̃́ɛ̀ dè ma Àbímɛ̀nɛ̀ zaa ɓá ní-ɓì ɖò ɓɛ́ Àbímɛ̀nɛ̀ɛ̀ gbo-nì-nyɔ̀ ɓěɔ̀ zàìn ma ɔ gana xwa kɛɛ jè dyí. 26Kɛɛ Àbímɛ̀nɛ̀ ɖá, “Ḿ se dyuò nyɔ kéà ɖɛ nìà kɛ nyu kɛ. M̀ séè ḿ ɖɛ nìà kɛ jè gbo cɛ̃ ɖò, mɔɔ ḿ séèɛ̀ jè wɔ̃́ ɖò, ké ɔ dyɛ̀àìn ɓó zɛ̃̌ɛ̀ kɛ̀.” 27Púɛɛ, Ééɓòɖòhɛ̃́ɛ̀ dyà ɓáɖáá kè ɓìɖǐ ɓě, ké ɔ nyí ma wa Àbímɛ̀nɛ̀. Ké wa nyɔ sɔ̃́ɔ̀ dè ma wuɖu.#21:27 Wa ɖáɓá ma nyúà-ɖɛ̀ ɓě nìà kɛ ɓó dèè-wùɖùɔ̀ jè. 28Ké Ééɓòɖòhɛ̃́ɛ̀ zà ma ɓáɖáá nyɔ́nɔ́-dyù mɛ̀nɛ̌ìn-sɔ̃́ ɖé ɔ ɓáɖáá ɓěɔ̀ hwìɛ̀, ké ɔ poɛ ma wáká. 29Ké Àbímɛ̀nɛ̀ diè ma ɔ dyi, ké ɔ ɖá, “Ɖɛ́ kɔ̃̀ jè m̀ poà ɓáɖáá nyɔ́nɔ́-dyù mɛ̀nɛ̌ìn-sɔ̃́ ɓěɛ̀ wáká kɛ́?”
30Ké Ééɓòɖòhɛ̃́ɛ̀ jǔ ma ɔ gɔ̃̌, ké ɔ ɖá, “M̀ mɛ kpɔ̃ ɓáɖáá-dyù mɛ̀nɛ̌ìn-sɔ̃́ ɓěɛ̀ dyi sɔ̀ìn ɖé ḿ xwaún, ɓɛ́ wa ké zàse jǔ kà mɔ̄ mɔ̀ nyɔ ɓúɖú ní-ɓìɛ̀ kɛ.” 31Ɔ jèɛɛ, wa jǔìn ma páɔ̀ Bèsíɓà-nyɛ̀nɛ̀#21:31 Bèsíɓà-nyɛ̀nɛ̀ɔ̀ xwíníín ɖò mɔ̀ ɓáɖáá-mɛ̀nɛ̌ìn-sɔ̃́-nì-ɓì. kɔ̃̀ xwíníín mɔ̀à ní-ɓì kɔ̃̀ wĩín wa dèìn ma wuɖu kɛ, sepóɛɖé ɓóɛ̀ gàa sɔ̃́ ɓěɔ̀ dèìn ma wuɖu jè.
32Ti ɓɛ́ wa ɖǎ ma wuɖuɔ̀ dèɛ̀ hwɔ ɓó Bèsíɓà-pàɔ̀ múɛɛ, Àbímɛ̀nɛ̀ kè Fíkò mɔ̀à ɔ sójà ɓěɔ̀ nyɔ vɛ̀nɛ̀ɔ̀ kɛɛ mu ma wa ɓíɖí ɖé Féɖésìà-ɓòɖòɔ̀ kɔ̃ ɖe. 33Ké Ééɓòɖòhɛ̃́ɛ̀ ɓá ma cu ɖò kɔ̃̀ nyɛ́nɛ́ mɔ̀ támáwàɖà kɛɛ ɓó Bèsíɓà-pàɔ̀ mú, ké ɓóɛ̀ ɔ ɓièìn ma Bounɓo mɔ̀à sè-ná-sèɛ̀ Gèɖèpɔ́ɔ̀ kɛ. 34Ké Ééɓòɖòhɛ̃́ɛ̀ cĩ́ ma ɖé Féɖésìà-ɓòɖòɔ̀ kɔ̃ ɓó ti goun mú.
Currently Selected:
Jɛ́nɛ́sì 21: ƁB02
Highlight
Share
Copy
Want to have your highlights saved across all your devices? Sign up or sign in
Bassa Bible © Bible Society Liberia, 2002.
