Jɛ́nɛ́sì 37
37
Jòséɛ̀ dya-wùɖù ɓěɔ̀
1Ɓó tia ɓaɖaa, Jékɔ̀ cĩ́ ma ɖé Kénà-ɓòɖò kɔ̃̀ kɔ̃ ɓɛ́ ɔ ɓǎ mɔ̀ ma kà ɖéèɛ. 2Kà Jékɔ̀ gbǒ-xwíníínɔ̀ nyu ma nìɛ̀ kɛɛ, ɔ kɛà kɛ̀. Ti ɓɛ́ Jòsé nyu ma zɔ̃ ɓaɖa-bùè sè mɛ̀nɛ̌ìn-sɔ̃́ɛɛ, ɔ kè ɔ ɖíí-gàà ɓě ɓɛ́ wa mɔ̀à Bíóhà kè Zíópà mɔ̀à ɔ ɓǎà gmàà ɓěɔ̀ gbo-nì-ɓà ɓěɔ̀ kɛɛ dyú-gàà ɓěɛɛ nì ma wa ɓǎà nyúà-ɖɛ̀ ɓěɔ̀ dyí gmɔ̀ǔn. Ti séín Jòséɛ̀ ɖíí-gàà ɓěɔ̀ mu ɖɛ gbà ɖò nyuùn wɛ̃ɛ, ɔ dyà ma wa bɔ̃̌ gbà wa ɓǎ gbo ɖe tee.
3Jékɔ̀ ɖɛ̀ɓɛ̀ ma Jòsé mú mìɔ ké ɔ zi ɔ dyú tɔ̀ɔ̀ ɓěɔ̀ dyí, sepóɛɖé ɔ nyɛ ma hwɛ̀ ké ɔ wóɖóìn ma ɔ jè. Ɔ jèɛɛ, ɔ gma ma ɔ bìì gã́ùn nɔ̀mɔ̀ dyíin ɖò. 4Ti ɓɛ́ ɔ ɖíí-gàà ɓěɔ̀ dyéɛ ma kà wa ɓǎ ɖɛ̀ɓɛ̀ ma ɔ mú mìɔ ké ɔ zi ma wa séín dyíɛɛ, púɛɛ, wa nyɛ́ ma ɔ mú, ké wa ní wùɖù ma ɔ gbo pɛ̀ɛ̀-pɛ̀ɛ̀-kà.
5Wé ɖòɛ̀ ɓaɖaa, Jòsé ɓéɖé ma dya-dya ɖò. Ti ɓɛ́ ɔ po ma dya-wùɖùɔ̀ ɔ ɖíí-gàà ɓěɔ̀ gboɛɛ, wa nyɛ́ ma ɔ mú ɖe mìɔ. 6Ɔ ɖá, “Ɓě tò ní dya-wùɖùɔ̀ gbo ɖùǔo. 7Ḿ dyaa ma, ké à nì mɔɔ́ sãuń ɖé geɖeín. Púɛɛ, níǐn mɔɔ́-jũ̌ɔ̀ nyànà dyi, ké ɓě nììn mɔɔ́-jũ̌ ɓěɔ̀ nyanaìn níǐnɔ̀ ɖei, ké wa séín taɓa dú hwuɖu ɓóɛ dyúa.”
8Hwɛ̀ ké ɔ ɖíí-gàà ɓěɔ̀ cɛ̃ɛ ma ɔ gbo, ké wa ɖá, “Nì hwòɖǒ ɖá m̀ ké à wuɖuí kɔ̃̀e? Nì hwòɖǒ ɖá nì mu à kɔ̃in nììn cáe?” Púɛɛ, wa nyɛ́ ma ɔ mú ɖe mìɔ ɓó ɔ dya-wùɖùɔ̀ jè.
9Sɔ̀ìn ɓóɛ gboɛɛ, ɔ ɓéɖé ma dya-dyaɔ̀ ɖò ɖe, ké ɔ po ma dyɛ mɔ̀ɔ̀ ɔ ɖíí-gàà ɓěɔ̀ gbo ɖe, ké ɔ ɖá, “Ɓě tò ɖùǔ. Ḿ ɖǎ ɖɛ ɖò dya ɖe. Ɖé dya-dyaɔ̀ nyɔà múɛɛ, dyóɖóɔ̀ kè dɛ̀nɛ̀ɔ̀ ɔ kè dɛ̀nɛ̀ mɛ́nɛ́ɛ́ ɓaɖa-bùè sè dyúáɖò ɓě taɓa dú hwuɖu ɓó ḿ dyúa.”
10Ti ɓɛ́ ɔ ɖǎa ɔ ɖíí-gàà ɓěɔ̀ gbo cɛ̃ɛ, ɔ cɛ̃ɛ ma ɔ ɓǎ gbo ɖekè. Ké ɔ ɓǎ pánáìn ma ɔ dúi, ké ɔ ɖá, “Ɖɛ́ mɔ̀ dya-wùɖù nì kà m̀ dyaà kɛɛ xwíníín nyɛ́? Nì hwòɖǒ ɖá ḿ kè m̀ ɖe kè m̀ ɖíí-gàà ɓěɔ̀ mu dyiìn, ɓɛ́ à ké m̀ dyúa dú hwuɖu taɓa cáe?” 11Púɛɛ, ɔ ɖíí-gàà ɓěɔ̀ dyéìn ma ɔ hwɛ̀nɛ̌, kɛɛ ɔ ɓǎ pɛ̃́ìn ma ɖɛ séín ɓěɛ̀ hwìɖǐi.
Jòséɛ̀ ɖíí-gàà ɓěɔ̀ peɖe ɔ ní, ɓɛ́ ɔ ké gǐì jǔ
12Ti ɖò nì ma ɓó, ké Jòséɛ̀ ɖíí-gàà ɓěɔ̀ kpa ma wa ɓǎà nyúà-ɖɛ̀ ɓěɔ̀ dyi ɖiɛń ɖé Sɛ́kɛ̃̀ìn-hwɔ̀ɖɔ̀ɔ̀ wĩín. 13Wé ɖòɛ̀ ɓaɖaa, Éézùɖùɛ̀#37:13 Éézùɖùɛ̀ mɔ̀ Jékɔ̀. cɛ̃ɛ ma Jòsé gbo, ké ɔ ɖá, “Má, nì ɖíí-gàà ɓěɔ̀ nì nyúà-ɖɛ̀ ɓěɔ̀ dyí gmɔ̀ǔn ɖé Sɛ́kɛ̃̀ìn-hwɔ̀ɖɔ̀ɔ̀ wĩíne? Dyi. Ní mɔ́ ɓɛ́ ḿ ké m̀ ɖé wa gbo ɖoɓo.”
Ké Jòsé ɖá, “Ḿ wɔ̃́ ní.”
14Ké Éézùɖùɛ̀ cɛ̃ɛ ma Jòsé gbo, ké ɔ ɖá, “Ní ɓaà m̀ ní, mu, ɓɛ́ m̀ kéɛ dyé kɛbì ɖé nì ɖíí-gàà ɓěɔ̀ kè nyúà-ɖɛ̀ ɓěɔ̀ gbo pɛɛ̀ ní, ɓɛ́ m̀ ké ḿ bɔ̃̌ gbo ɖe dyà.” Kǎà Éézùɖùɛ̀ nyu ma Jòsé ɖoɓoɛ sɔ̀ìn ɖé Hɛ́bɔ̀nɔ̀ Bɔɔ-kpà kɔ̃̀ kɔ̃ wa cĩ́ ma kà kɛ.
Ti ɓɛ́ ɔ nyini ma ɖé Sɛ́kɛ̃̀ìn-hwɔ̀ɖɔ̀ɔ̀ wĩín nyɛɛ, 15gàa ɖò dyɛ̀ìn ma ɔ ɖé gbǎùn-fúɖúáɔ̀ kɔ̃ dyi téɛ. Ké gàaɔ̀ diè ɔ dyi, ké ɔ ɖá, “Ɖɛ́ nì mɔ́ dyiɛ́?”
16Ké Jòsé jǔ ma gàaɔ̀ gɔ̃̌, ké ɔ ɖá, “Ḿ nì ní ɖíí-gàà ɓě nì nyúà-ɖɛ̀ dyí gmɔ̀ǔn wɛ̃ɛ dyi mɔ́uń. Ní ɓaà m̀ ní, zàìn ḿ dɛ̀ wa kpa wa nyúà-ɖɛ̀ ɓěɔ̀ dyi ɖiɛń nyɛɛ da.”
17Ké gàaɔ̀ ɖá, “Wa ɖǎ dà sɔ̀. Ḿ wɔ̃́ɔ ma wa wĩín, ké wa ɖá, ‘Ɓěà mu ɖé Dófàùn-hwɔ̀ɖɔ̀ɔ̀ wĩín.’ ” Hwɛ̀ ké Jòsé mu ma, ké ɔ dyé ma ɔ ɖíí-gàà ɓěɔ̀ ɖé Dófàùn-hwɔ̀ɖɔ̀ɔ̀ wĩín.
18Kɛɛ ti wa dyé ma ɔ ɖé nya vɛ̃in, hwɛ̀ ɓɛ́ ɔ ké ma wa bũ̌in xwɛ̃́ìn nyɛɛ, wa sɔ́ ma ɔ, ɓɛ́ wa ké ma ɔ ɖáɓá. 19Wa cɛ̃ìn cɛ̃̀ìn ma gbo, ké wa ɖá, “Gmɔ̀ ɖéa, dya-nyɔ̀ vɛ̀nɛ̀ɔ̀ dyià ɖéɛ̀. 20Ɓě dyi, ɓɛ́ ɓěà ké ɔ kpɔ̃, ɓɛ́ ɓěà ké ɔ ɖáɓá, ɓɛ́ ɓěà ké ɔ ní-ɓì fóɖóún ɓěɛ̀ ɖò mú po, ɓɛ́ ɓěà ké níiń, ‘Dyoɖo-nìmìì ɖò kpɔ̃ ɔ, ké ɔ tà ɔ.’ Ɔ dyi ná nìǐn, ɓěà ké ɖɛ mu ɔ dya-dyaɔ̀ gbo wóɖóùn wɛ̃ɛ dyé.”
21Ti ɓɛ́ Wuɖuɓíín wɔ̃́ɔ ma kɛɛ, ɔ vɔ̃, ɓɛ́ ɔ ké ma ɔ wa xwaún póìn. Ɔ jèɛɛ, ɔ ɖá, “Ɓěà ɓɔ́ ɔ ɖáɓáa. 22Ɓěà ɓɔ́ nyɔmɔɔ ɖò dyi wáɖáìn. Ɓěà po ɔ nɔ̄ ní-ɓì fóɖóún nìà gbǎùn-fúɖúáà kɔ̃ɛɛ mú. Kɛɛ ɓěà ɓɔ́ ɔ bũ̌in puàà.” Ɖɛ kɔ̃̀ jè Wuɖuɓíín cɛ̃ ma kà ɖɛ nìà kɛɛ mɔ̀, ɓɛ́ ɔ ké ma ɔ wa xwaún póìn, ɓɛ́ ɔ ké ma ɔ ɖé ɔ ɓǎ gbo ɖe kpa. 23Ɔ jèɛɛ, ti ɓɛ́ Jòsé nyini ma ɓó ɔ ɖíí-gàà ɓěɔ̀ gboɛɛ, wa zà ma ɔ gã́ùnɔ̀ ɔ mú. Ɔ mɔ̀ ɔ gã́ùn nɔ̀mɔ̀ dyíinɔ̀. 24Ké wa ɖú ɔ dyí, ké wa po ɔ ɖé ní-ɓìɔ̀ mú. Ní-ɓìɔ̀ mɔ̀ɔ̀ ma fóɖóún. Ɔ dyɛ ma múin.
25Púɛɛ, wa kò ma dyi, ɓɛ́ wa ké ma ɖɛ ɖi. Ti wa nì ma ɖɛ ɖiɛń nyɛɛ, wa gmɔ̀ ma ɖé nya, ké wa dyé ma zii-nyɔ̀ kúɖúú ɓě mɔ̀ Ésìméò-nyɔ̀ ɓě, mɔ̀ ɖɛ-peɖe-nyɔ̀ ɓě, ɓɛ́ wa sɔ̀ ɖé Gíɖèà-ɓòɖòɔ̀ kɔ̃ɛ. Gbɛ̌ ɓě ɓɛ́ waà sǒ-nì-gbu-kɔ̃ún ɓěɔ̀ ɓéɖé ma kɛɛ mɔ̀ ma nyɔ́ún-nɔ̀mɔ̀-ɖɛ̀-dù kò-kò ɓě kè kũùn ɓɛ́ wa sɔ̀ cu ɓě múɛ. Wa nì ma ɖɛ ɓěɔ̀ Íjè-ɓòɖòɔ̀ kɔ̃ kpauń. 26Hwɛ̀ ké Júɖà cɛ̃ɛ ma ɔ ɖíí-gàà ɓěɔ̀ gbo, ké ɔ ɖá, “Ɖɛ́ mɔ̀ kpáná ɓɛ́ à mu dyéìn, ɔ jǔ ké à dyi à ɖíí-gààɔ̀ ɖáɓá, ké à dyi ɔ nyɔmɔɔ̀ dyi wáɖáìn jè vǐè ní kɛ́? 27Ɔ jèɛɛ, ɓěà pèɖèìn ɔ Ésìméò-nyɔ̀ ɓěa gbo. Ɓěà ɓɔ́ ɔ bũ̌in puàà, sepóɛɖé ɔ mɔ̀ ɓěà ɖíí-gàà, ké ɔ mɔ̀ ɓěà nyɔmɔɔ ɖekè.” Ké ɔ ɖíí-gàà ɓěɔ̀ wɔ̃́ ma. 28Ɔ jèɛɛ, ti ɓɛ́ Ésìméò-nyɔ̀ ɓě mɔ̀à Míɖìàùn-nyɔ̀ ɓě kɛɛ nyini ma ɓóɛɛ, Jòsé ɖíí-gàà ɓěɔ̀ zà ma ɔ ɖé ɓíɔ̀ mú, ké wa pèɖèìn ma ɔ Ésìméò-nyɔ̀ ɓěɔ̀ gbo. Wa pèɖèìn ma ɔ séɓàɖà-cɛ̀kò kpáɖá-nyɔ ɖò.#37:28 Séɓàɖà-cɛ̀kò kpáɖá-nyɔ ɖò ɓɛ́ìn séɓàɖà pɔ̃́ùn ɓɛ́ìn-hwìɛ̀ jǔɛ. Ɔ mɔ̀ wíɖí jĩ̀ kà ɓɛ́ nyɔǔn pɛ́ɛ̀ ma ɓó gǐì ɓɛ́ ɔ mɔ̀ nyɔ gmɔ̀ keɛɛ jèɛ. Ké Ésìméò-nyɔ̀ ɓěɔ̀ kpa ma ɔ ɖé Íjè-ɓòɖòɔ̀ kɔ̃.
29Ti ɓɛ́ Wuɖuɓíín dyi ma ɖe, ké ɔ gmɔ̀ ma ɖé ɓíɔ̀ mú, ké ɔ se ma ɖé Jòsé dyé ɖeɛɛ, púɛɛ, ɔ fáìn ma ɔ mìɔùn ɖɔún dyi ɓó wìì nyu ma ɔ kɛɛ jè. 30Ké ɔ mu ma ɖé ɔ ɖíí-gàà ɓěɔ̀ gbo ɖe, ké ɔ ɖá, “Gàa-dyù gmɔ̀ɔ̀ se ɖé nì ɖe. Xwɛ̌ ní muɛ nyuùn wɛ̃́?”
31Púɛɛ, wa ɖáɓá ma vã́á ɖò, ké wa ɖú Jòséɛ̀ gã́ùnɔ̀ dyí, ké wa poɛ ɖéɛ wiɖi-nyɔ̀mɔ̀ɔ̀ gbo. 32Hwɛ̀ ké wa kpaa ma wa ɓǎ gbo ɖe, ké wa ɖá, “Ɖɛ à dyéɛɛ kɛ̀. Dyéɛ kɛbì ɔ mɔ̀ nì dyúɔ̀ gã́ùnɔ̀ ní.”
33Ti ɓɛ́ ɔ dyéɛ ma kɛɛ, ɔ dyuòɛ̀ ma dyí, ké ɔ ɖá, “Ɔ mɔ̀ ní dyúɛ̀ gã́ùnɔ̀. Dyoɖo-nìmìì ɖò ɖǎ ɔ tà. Nimii ɖò ɖǎ ní dyú Jòsé dyi fáìn wà!” 34Púɛɛ, Jékɔ̀ fáìn ma ɔ mìɔùn ɖɔún dyi, ké ɔ po ma ɖɔ-zɔ̃̀ mú, ké ɔ vĩ̌ ma ɓó wé ɓáún-ɓáún mú ɓó ɔ dyúɔ̀ jè. 35Ké ɔ dyú-gàà kè dyú-màà séín ɓěɔ̀ dyi ma, ké wa vɔ̃, ɓɛ́ wa ké ma ɔ hwòɖǒ dyi dè, kɛɛ ɔ se ma wɔ̃́. Ɔ ɖá, “Ḿ se ɓɔ́ɔ mu. Ní mu vĩ̌ɛń dyi gã̀ùn tee, ké ḿ mu ní dyúɔ̀ gbo ɖé gĩɔ hwɛ̀.” Ɔ jèɛɛ, ɔ gã̀ ma vĩ̌ɛń dyi tee ɓó ɔ dyú Jòsé jè.
36Ɓó tia ɓaɖaa, Míɖìàùn-nyɔ̀ ɓěɔ̀ kpa ma Jòsé, ké wa pèɖèìn ma ɔ Pɔ́tífà gbo ɖé Íjè-ɓòɖòɔ̀ kɔ̃. Pɔ́tífà mɔ̀ ma Íjè-ɓòɖòɔ̀ kã́á mɔ̀ Féwòɖò kɛɛ gɔ̌mànà-nyɔ̀ vɛ̀nɛ̀ ɓěɔ̀ ɖò. Ɔ mɔ̀ ma sójà ɓě mɔ̀ ma Féwòɖò dyí-gmɔ̀-nyɔ̀ɛɛ nyɔ vɛ̀nɛ̀.
Currently Selected:
Jɛ́nɛ́sì 37: ƁB02
Highlight
Share
Copy
Want to have your highlights saved across all your devices? Sign up or sign in
Bassa Bible © Bible Society Liberia, 2002.
