Ɖúù 15
15
Nɔ́ɔ́ ɓá ɓáɖáá sè xwáɖáún jè dyíɛ
(Máfíò 18:12-14)
1Ti ɖòɛ̀ ɓaɖaa, tácì-kpɔ̃-nyɔ̀ ɓě kè nàmàǔn-nyɔ̀ ɓě dyi, ɓɛ́ wa ké ma Jízɛ̀ gbo ɖùǔ tò. 2Ké Fáɖòsíì-nyɔ̀ ɓěɔ̀ kè Gèɖèpɔ́ɔ̀-cèè-ɖɛ̀ dyuò-nyɔ̀ ɓěɔ̀ ɖú ma jɛ kpàǐ, ké wa ɖá, “Gàa nìà kɛ kpɔ̃ nàmàǔn-nyɔ̀ ɓě jè dyi, ké ɔ kè wa ɖi ɖɛ.”
3Ɔ jèɛɛ, Jízɛ̀ po ma wa nɔ́ɔ́ nìà kɛ gbo, ké ɔ ɖá, 4“Ɔ jǔ ké ɓě ɖò dyi ɓáɖáá hɔ̃dɛ̀ɖɛ̀ ɖò ɓéɖé, ké waà dyúáɖò dyi xwáɖáún sèǐn, nìí, ɖɛ́ nyɔɔ̀ mu nyuùn wɛ̃́? Má, ɔ mu ɓáɖáá kpáɖá-nyɔ hĩinyɛ ɓaɖa-bùè sè mɛ̀nɛ̌ìn-hĩinyɛ ɓě sèà ɓóɛɛ ɖé gbǎùn-fúɖúáɔ̀ kɔ̃ sèìn, ɓɛ́ ɔ ké ɓáɖááɔ̀ nyɔ sèà xwáɖáún wɛ̃ɛ dyi mɔ́ɔ kpa tee, ɓɛ́ ɔ kéɛ dyé hwɛ̀e? 5Ɔ dyiɛ dyéín, ɔ kpá múàǔn, ké ɔ wáɖáa kɔún. 6Ké ɔ kpaa hwɔɖɔún ɖe, ké ɔ ɖá ɔ ɓǎto ɓěɔ̀ kè ɔ mǔè ɓěɔ̀, ké ɔ cɛ̃ɛ wa gbo, ké ɔ ɖá, ‘Ḿ kè ɓě mɛ kpá múàǔn, sepóɛɖé ḿ ɖǎ ní ɓáɖáá sè ma kà xwáɖáún wɛ̃ɛ dyé.’ 7Ḿ cɛ̃ɛ ɓě gbo, kà dyúáɖòɔ̀ kǎà múà mu ɖé dyɔún nììn, ɔ jǔ ké nàmàǔn-nyɔ̀ dyúáɖò dyi ɔ kpeɖe gbàɔ̀ dyi táà ní, ké ɔ zi nyɔ ɓě ɓɛ́ wa ɖá wa mɔ̀ dyí-sɛ́ɖɛ́ìn-nyɔ̀ kpáɖá-nyɔ hĩinyɛ ɓaɖa-bùè sè mɛ̀nɛ̌ìn-hĩinyɛ ɓɛ́ wa se ɓéɖé ɓɛ́ wa ké waà kpeɖe gbàɔ̀ dyi táà kɛɛ jè dyí.
Nɔ́ɔ́ ɓá wíɖí-pĩ̀à sè xwáɖáún jè dyíɛ
8“Ɓó kɔ̃in ɖeɛɛ, ɔ jǔ ké màa ɖò dyi séɓàɖà-pĩ̀à ɓaɖa-bùè ɓéɖé, ké ɖò dyi xwáɖáún sèǐn, nìí, ɖɛ́ ɔ nyuɛ́? Ɔ kpɔ̃̀ìn ɖáùnpò dyí, ké ɔ wúò gbǒɔ̀ múin, ké ɔ gmɔìn dà séín dyi nɔ̀mɔ̀ dyíin, ké ɔ dyéɛ hwɛ̀. 9Ti ɔ dyéɛ kɛɛ, ɔ ɖá ɔ ɓǎto ɓěɔ̀ kè ɔ mǔè ɓěɔ̀, ké ɔ ɖá, ‘Ḿ kè ɓě mɛ kpá múàǔn, sepóɛɖé ḿ ɖǎ ní séɓàɖà-pĩ̀à sè ma kà xwáɖáún wɛ̃ɛ dyé.’ 10Ḿ cɛ̃ɛ ɓě gbo, kà dyúáɖòɔ̀ kǎà Gèɖèpɔ́ɔ̀ ínjà ɓěɔ̀ kpá múàǔn ɓó nàmàǔn-nyɔ̀ dyúáɖò ɓɛ́ ɔ táà ɔ kpeɖe gbàɔ̀ dyiɛɛ jè.”
Nɔ́ɔ́ ɓá dyú-gàà sè xwáɖáún ɖò jè dyíɛ
11Hwɛ̀ ké Jízɛ̀ po ma nɔ́ɔ́ ɖò ɖe, ké ɔ ɖá, “Gàa ɖò nì ma ɓó, ké ɔ ɓéɖé ma dyú-gàà sɔ̃́. 12Nyɔ dyùwèɔ̀ cɛ̃ɛ ma ɔ ɓǎ gbo, ké ɔ ɖá, ‘Ḿ ɓǎ, nì kɔ̃̀ɔ̀-ɖɛ̀ɔ̀ nyɔ ɓɛ́ ḿ muɔ́ kà dyéìn ɓó nì mɛ́-tìɔ̀ múɛɛ, m̀ mɛ tòɛ̀ ḿ dyí nɔ̀ɔ̀.’ Ɔ jèɛɛ, ɓǎɔ̀ geìn ma ɔ kɔ̃̀ɔ̀-ɖɛ̀ ɓěɔ̀ ɔ dyú ɓěɔ̀ múin. 13Wé gbɛ̀ǐ-gbɛ̀ǐ ziɛ nyɛ̀nɛ̀ɛ̀ kɛɛ, nyɔ dyùwèɔ̀ poìn ma ɖɛ séín ɓě ɓɛ́ ɔ ɓéɖé ma kɛɛ dyí, ké ɔ sɔ̀ ma dyí, ké ɔ mu ma ɓóɖó vɛ̃in ɖò kɔ̃. Ké ɔ gbɔɔ̀ ma ɖé ɔ wíɖíɔ̀ mú fùɖù-fùɖù-kà. 14Ti ɓɛ́ ɖɛ séín ɖǎ ma ɔ xwai hwɛ̀ɛ, púɛɛ, mɔ́ vɛ̀nɛ̀ ɖò kpá ma ɖé ɓóɖóɔ̀ kɔ̃, ké ɔ se ma ɖɛ ɖò ɓéɖé ɖe. 15Ɔ jèɛɛ, ɔ mu ma, ɓɛ́ ɔ ké ɓóɖóɔ̀ dyú ɖò gbo nì, ké dyúɔ̀ ɖoɓo ma ɔ ɖé ɔ ɓíɖí-geɖeín, ɓɛ́ ɔ ké ɔ ɓeé ɓě dyí gmɔ̀. 16Ké ɔ mɔ́ ɓɛ́ ɔ ké ma deɖe-fèɖè ɓɛ́ ɓeé ɓěɔ̀ ɖi ma kɛɛ ɖò ɖi, ɓɛ́ ɔ ké ma ɖoɓo, kɛɛ nyɔ ɖò se ma ɔ ɖɛ ɖò nyí. 17Ti hwòɖǒ dyi ma ɔ gboɛɛ, ɔ ɖá, ‘Nyɔ séín ɓě nìà ḿ ɓǎ gbo kũ̀à nyuɛń nyɛɛ, wa ɓéɖé ɖii-ɖɛ̀ pàɖǎ cá, ké wa seɛ séín ɖiɛ hwɔɔ ɓɛ́ìn. Ké dyéɛ, ḿ nì nɔ̄, ké mɔ́ nì ḿ ɖáɓáuń. 18Ní mu dyí sɔ̀ùn, ɓɛ́ ḿ ké ḿ ɓǎ gbo ɖe mu, ɓɛ́ ḿ kéɛ ɔ gbo cɛ̃, ɓɛ́ ḿ ké níiń, “Ḿ ɓǎ, ḿ ɖǎ Gèɖèpɔ́ɔ̀ nàmàǔn bũ̌ nyu, ké ḿ ɖǎ mɔ̀ùn nàmàǔn bũ̌ nyu. 19Ké ḿ se nì dyú jǔɛ ɓɛ́ìn ɖe. M̀ mɛ kpɔ̃ ḿ kà m̀ kpɔ̃à nyɔ ɓě nìà m̀ gbo kũ̀à nyuɛń nyɛ.” ’ 20Ké ɔ sɔ̀ ma dyí, ké ɔ kpá ma ɔ ɓǎ gbo mu hwìè xwíníín.
“Ti ɓɛ́ ɔ nì ma ɖé nya vɛ̃in keɛɛ, ɔ ɓǎ dyé ma ɔ. Púɛɛ, wìì nyu ma ɔ ní, ké ɔ kpa ma ɔ dyúɔ̀ gbo peɖeɛ, ké ɔ gbèɖèìn ma ɔ, ké ɔ nyá ma ɔ wɔ̃. 21Ké ɔ dyúɔ̀ cɛ̃ɛ ma ɔ gbo, ké ɔ ɖá, ‘Ḿ ɓǎ, ḿ ɖǎ Gèɖèpɔ́ɔ̀ nàmàǔn bũ̌ nyu, ké ḿ ɖǎ mɔ̀ùn nàmàǔn bũ̌ nyu. Ké ḿ se nì dyú jǔɛ ɓɛ́ìn ɖe.’ 22Kɛɛ ɔ ɓǎ cɛ̃ɛ ma ɔ gbo-nì-nyɔ̀ ɓěɔ̀ gbo, ké ɔ ɖá, ‘Ɓě mɛ dyà ɖɔ zi dyíin nɔ̀mɔ̀ǔn wɛ̃ɛ wàɖà, ɓɛ́ ɓě kéɛ ní dyúɔ̀ mú po. Ɓě po ɔ jìǐn-po-ɖɛ̀ jìǐn, ɓɛ́ ɓě ké ɔ bǎ ɓoún po. 23Ɓě dyà ɓìɖǐ gmɔ̀ ɓúáí-ɓúáí ɖò, ɓɛ́ ɓě kéɛ ɖáɓá. Ɓěà pa hwɔ, 24sepóɛɖé ní dyú nìà kɛ mɛ́ ma ní, kɛɛ ɔ nì cĩ́ɛń ɖe. Ɔ sè ma xwáɖáún, kɛɛ à ɖǎ ɔ dyé ɖe.’ Ké wa ɖú ma hwɔɔ̀ pa kpàǐ.
25“Kɛɛ gàaɔ̀ dyú-gàà vɛ̀nɛ̀ɔ̀ mɛ̀ìn ma ɖé geɖeín. Ké ti ɔ nì ma dyiɛń, ké ɔ nìǎ ma gbǒɔ̀ bũ̌in xwɛ̃́ǐn nyɛɛ, nyɔ ɓěɔ̀ nì ma wɛ́ɖɛ́ kpauń, ké wa nì ma ɖɛ ɓaɖauń, ké ɔ wɔ̃́ɔ. 26Ké ɔ ɖá ma ɔ ɓǎà gbo-nì-nyɔ̀ ɓěɔ̀ ɖò, ké ɔ diè ma ɔ dyi, ké ɔ ɖá, ‘Ɖɛ́ kpáá?’ 27Ké gbo-nì-nyɔ̀ɔ̀ cɛ̃ɛ ma ɔ gbo, ké ɔ ɖá, ‘Nì ɖíí-gààɔ̀ ɖǎ dyi, ké m̀ ɓǎ ɖǎ ɓìɖǐ gmɔ̀ ɓúáí-ɓúáí ɖò ɖáɓá, sepóɛɖé ɖɛ ɖò se ɔ dyúɔ̀ gbo kpá, ké ɔ ɖǎ ɔ dyé ɖe jè.’ 28Ti dyú-gàà vɛ̀nɛ̀ɔ̀ wɔ̃́ɔ ma kɛɛ, ɔ zi ma dyoɖoún kpáuń mìɔ, ké ɔ se ma ɖé gbǒɔ̀ mú dyáa mɔ́. Ɔ ɓǎ sí ma píé, ké ɔ ɓaà ma ɔ. 29Kɛɛ ɔ cɛ̃ɛ ma ɔ ɓǎ gbo, ké ɔ ɖá, ‘Dyé zɔ̃ jĩ̀ kà ɓɛ́ ḿ ɖǎà m̀ bìì kũ̀à nyuɛ, ké ḿ séè nì wuɖu mú jaɖa ɖò fɔɔ. Kɛɛ m̀ séè ḿ wiɖi-dyù ɖò nyí ɖò, ɓɛ́ ḿ kè ní ɓǎto ɓěɔ̀ ké hwɔ pa dyɛ mɔ̀ùn. 30Kɛɛ nì dyú nìà kɛ mɔ̀ nyɔ gbɔɔ̀ ma kà nì wíɖíɔ̀ mú ɖé gbàɖàùn-màà ɓě gboɛ̀. Ti ɔ dyi maa, m̀ ɖáɓá ɔ bìì ɓìɖǐ gmɔ̀ ɓúáí-ɓúáí.’ 31Ké ɔ ɓǎ cɛ̃ɛ ma ɔ gbo, ké ɔ ɖá, ‘Ní dyú, m̀ nì dà ḿ gbo tee, ké ɖɛ séín ɓě ɓɛ́ ḿ kɔ̃̀ kɛɛ mɔ̀ nì kɔ̃̀ɔ̀-ɖɛ̀. 32Kɛɛ ɔ nɔ̀mɔ̀ dyíin ɓɛ́ ɓěà ké múàǔn kpá, ɓɛ́ ɓěà ké hwɔ pa, sepóɛɖé nì ɖíí-gàà nìà kɛ mɛ́ ma ní, kɛɛ ɔ nì cĩ́ɛń ɖe. Ɔ sè ma xwáɖáún, kɛɛ à ɖǎ ɔ dyé ɖe.’ ”
Currently Selected:
Ɖúù 15: ƁB02
Highlight
Share
Copy
Want to have your highlights saved across all your devices? Sign up or sign in
Bassa Bible © Bible Society Liberia, 2002.
