TI GƐ́Ɛ́ HAÍTII 6
6
Kpɔmba yélaa ngɔ́felangɔitii
1Naa h̃u wɔ́lɔ Jísu volú yélaitii ti yangí ɣɛ́i áá ɣɛ́ wɔ́ɔ́lɔ, kpɔɔlɔ́ i laní Júsuai sítii ndowah̃u tɔ́ɔ́ Gilísi woí lé taá Júsuai sítii tɛ́i belé Gilísi woo le. Júsuai sítii tɔ́ɔ́ Gilísi woí le, tí ndéni ngáá kɛ nungáitii ti yaah̃ú vílingɔɔ lé ti vónyah̃aitii mááh̃u kpɔmba wɔ́li ngákɔlɛ wɔlɛ́ndai h̃u foló yíla ngílangi w̃a. 2Faalɔ, Ngalángi gééla púúngɔ maah̃úú félengɔitii ti Jísu volú yélaitii kpɛ́lɛɛ ngátɛni mba ỹanda yílaa, ti ɣɛ́ ti w̃a, “Ɛi ɣɛ́ pele w̃a ngáá nɔɔ́ Ngalá ngóó lendái yambála mba kɛinɔɔ́ ní mɛɛní yakɔ́lɛ wɔlɛ́. 3Faalɔ, mu mbálangaa, a lokolo siỹɛ́ ngɔ́felangɔ wa wú h̃u sítii wú ti wɔlɔ́ ngáá Hɛ́ɛ́ma Ỹínangi í ti volú ɛ́ɣɛ ti géle ɣeléngɔ. Tiyá lɔ náa maá ngéngengi sí géle ti w̃a ngáá ti waa háá. 4Aáva ni yaah̃ú aa ɣɛ nɔ́ɔ náa Ngala fɛ́lindai wa taá Ngala ngóó lendái.”
5Faa h̃uubatɛngi sí i kpɔngí ná kínɛi ndíílani. Faalɔ, tí lókoloni Sitívi wa lɛ́i í ɣɛ́i ngáá nuú Hɛ́ɛ́ma Ỹínangi i polú, nda ngí su ngwala. Ná vólu, tí lókoloni Félepi wá, ɛ́ɣɛ Pilɔkɔ́lɔ, Nekánɔ, Tímɔ, Pamɛ́na, ɛ́ɣɛ Nékola lɛ́i sí í gúlani tái sí h̃u taa náa lolí ngáá Átiyɔ. Nékola sí áá ɣɛ́i ngáá Júsu w̃ɔɔ kɛ́ i ɣɛi náa lokohéini Ngala sávaitii mbu. 6Tí siỹɛ́ ngɔ́felangɔi sítii féni Ngalángi géélaitii ngeyá, nátii tí loko vɛ́lɛ ti w̃a, tí Ngala fɛ́li ti w̃a.
7Faalɔ, Ngalá ndaa wói i vahá fáhani su hááli haali. Jísu volú yélaitii ti yambɔ́ɔ́lɔndai taa í vílii su ngáá maahulángɔ Jɛlúsɛl̃ɛ taa h̃u. Aáva Ngala sááɣa gula mbélaitii ti láni ngáa keela woó vándai kɔwɔ́ato Jísu wa, ti yangí ɣɛ́i wɔɔlɔ ngwala.
Sitívi houndái
8Sitívi i ɣɛi ngáá nuú Ngalángi hɛ́i i ɣɛi ma ngwala ɛ́ɣɛ Ngalángi yákpangi i ɣɛi su. I kindaa vilí fáitii kɛ́ni ɛ́ɣɛ káámaa haítii nungáitii ndiiwáá. 9Kɛ́ mbaahílima yélaitii ti ɣɛ́i na. Mbaahílima yélai ti gúlani kotái sí wu tɔ́ɔ́ tolí ngáá Ngala fɛ́li máákpɔ wotái nduwɔ lopóai faaw̃a ti wumaawongɔ́ í ɣɛ́i la. Ti ɣɛ́i ngáá Júsua aáva ti lɛ́ingaa ti gúlani taa walá walaí sítii su taa ti lolí ngáá Saílini ɛ́ɣɛ Alɛsáánduya. Júsua vekáitii pa ti gúlani tataí sítii su taa ti lolí ngáá Silísiya ɛ́ɣɛ Ésiya. Nungái sítii tɔ tí maaɣaalíi vɛ́lɛni Sitívi wa. 10Kɛ́ tɛ́i belé hómbo tɔɔ ló ndaa wú kɔwɔ́ato ngi géle ɣelengí wa ɛ́ɣɛ njɛpɛí í ɣɛ́i áá pu Hɛ́ɛ́ma Ỹínangi yákpangi w̃aa véle w̃a. 11Faalɔ, tí siỹɛngái tɛingáá wusu ỹáánini ngáá tí nde ngáá kɛ tí mɛningɔ́ Sitívi í ngoo ỹɔ́u ỹɔ́u nde Muusé w̃a taá Ngála. 12Náá hááw̃a, tí nungáitii kɛ́ni wúúlee taá kele ɣelé mbélaitii ɛ́ɣɛ kaamɔítii Ngala sávai hááw̃a, tí Sitívi hou, tí váa lá Júsuai ti Háá H̃uu Haa Lé Mbélaa wala waláitii kákala. 13Tí kahá hééleaitii kulaní ngáá nátii ti hééle woo le. Hééleai nátii pa tí ndéni, ti ɣɛ́ ta, “Siỹɛndópoi sí nápa aa bengɔ́ yɛpɛndái wa ỹɔ́u Hɛ́ɛ́ma Yála Pɛ́lɛi wa taá Ngala sávai Ngala ngí féni Muusé yáá. 14Ní mɛningɔ́ í nde ngáá kɛ Jísui sí í ngáá Násɔlɛ taí h̃uu w̃ɔ́i aá lɔ áa Hɛ́ɛ́ma Yála Pɛ́lɛi sí ỹááni. Ná vólu, í mu lúva veléi w̃aalóvi Muusé í pɔnɛngɔ́ a mu yɛ.” 15Sítii kínɛi ti ɣɛ́i héini faa h̃uu haa lémai, ti wɔ́lɛni Sitívi wa, aáva tí tɔ́ni ngaah̃úi ɣɛ kíli gúlangɔ ngáá maléka.
Currently Selected:
TI GƐ́Ɛ́ HAÍTII 6: KNNT
Highlight
Share
Copy
Want to have your highlights saved across all your devices? Sign up or sign in
Bandi New Testament © Bible Society in Liberia, 2000
