NJƆÚ 15

Jísu lɔ í ngáá sii hií ŋáni wúlu giteí ɣɛ kíli

1Jísu i ɣɛi ta, “Nyá lɔ́ ngáá sii hií ŋáni wúlu giteí ɣɛ́ kíli, ní Kɛ́ɛ́ɣɛ va tɔ po ngí ngáá maa híí hii ŋanii. 2Mbekeí fíli áá ɣɛ́ mbá ɛ́i wá aa tevé mbá, sí va áá ɣɛ́ mbá áá wa, aa maa bátɛ fo kɛinɔɔ́ í wa ngwala. 3Wú ɣɛ́ kíli batɛngɔ́ɔ́ lé naá fó ngáá kalambongí sí ngí mbónga ngáá wú ye. 4A ló kpahaí h̃u wú su mba, nyá bɛ́lɛ ngáá ló kpahái h̃u ngi su wu wa. Ngulú yékei ɛi mbambó nɔ́ɔ bɔwɔ́ yɛ. Sí léi nɔ́ɔ áá kɛ áá mbambó aá wáá ngáá kɛ í ɣɛ lóóni ngulúi gítei wa, ngimɔ́ɔ́ nɔ́ɔ jɔ́ maa hái í na, kɛ léi wú ló kpahái h̃u mba, kɛ́ ná láá le, wɔ́i hómbo wɔ́ɔ́ faa fíli kɛ ngáá wumaá.

5Nyá lɔ ngáá sii hii ŋáni wúlu ɣɛ kíli, wá va tɔ wú ngáá mbekeítii kɛ kíli. Ná wáá ló kpahái h̃u wú su mbá, nyá bɛ́lɛ ngáá ló kpahái h̃u ngi su wú wá, ngamba pánda aa hɔ́lɔ wú h̃u. Í síɣe féa mbá, wɔ́i faa fíli páa. 6Nuí fíli ɛ́i ɣɛ́ loí kpahái h̃u áá ɣɛ́ su mbá, maa w̃ɔ́i haa gulangɔ́ aa ɣɛ nɔ́ɔ la ngáá ngulú yékei sí taá tevé mba, tí pilí aáva í ye. Ngulú yéke láálii nátii pa tɔ taá ti yatɛ́ mba, tí tí víli ngɔmbuí h̃u, tí w̃ɔ. 7Kɛ́ ná wɔ́lii wáá ló kpahái h̃u wú su mbá, ndáá wói va í ló wú líítii su, ná ná áá ɣɛ́, sí fíli áá wú líívo, a Ngala fɛ́li faaw̃a aáva wáá sɔ́lɔ. 8A kɛ ngáá háwu ngamba bih̃íw̃aa í hɔ́lɔ wú h̃u, ná áa ngakɛ ngáá kɛ wá lɔ ngáá pólu yelaa. Ná vá tɔ áá ngákɛ ngáá kíya ní Kɛ́ɛ́ɣɛ gáámaangɔ. 9Kɛ kíya ní Kɛ́ɛ́ɣɛ longɔ́ ngáá ngé, ngimɔ́ɔ́ nɔ́ɔ ndóngɔɔ ngáá wú ye. Faalɔ, a kɛ ngáá háwu ngí ndí ngú ma ngáá ndongí ngáá ɣɛ su ngáá wu ye. 10Ná wáá gólo ní hávaitii mbu, ngáá ndí ngú ma ngáá ndongí ngáá ɣɛ́ su ngáá wú ye kíya nɔ́ɔ ngí gólongɔ ní Kɛ́ɛ́ɣɛ hávaitii mbu, áá ndi ngu ma ngáá ndongí í su ngáá nge.

11Ngí faí sítii ndengá wú w̃a ngáá kɛinɔɔ́ ní góóh̃unɛi í ɣɛ́ wú líí h̃u, aáva maa góóh̃unɛi ta guló bɛ́lɛ álaa gɛ́ɛ́lɛ pele h̃u. 12Ní hávai lɔ ngáá sí ngáá wú ló ngáá ỹɔw̃ɔ́ ỹɔ́w̃ɔ kíya nɔ́ɔ ndóngɔ ngáá wú ye. 13Ndo fíli aa mɔɔ na ɔ́ɔ́ lɔ́ve sí wa ngáá sí nuí áá lɛɛh̃úi gúla kɛlɛ́ma ngi mbálangaitii faaw̃a. 14Ná wɔ́lii wáá híya ngáá savaí sítii ngí ndangɔ́ wú yaa, kɛ wá lɔ ngáá ní mbálangaa. 15Kúnafɔ ngɛ́i mɔ́ɔ́ wú lóli ngáá ngenge mbélaa bɔw̃álale ngenge mɔ́ɔ́ ɛi ɣɛ w̃aalíɣii yaá haa h̃uuwɔ́lɔ. Kɛ́ laá ɣéle, ngí wú lólinga ngáá ní mbálangaa sífaa, sí kínɛi ní Kɛ́ɛ́ɣɛ í ndéngɔ má, ngí ndénga wú w̃a. 16Wá láa le wɔ́ɔ́ lokolo mbá, kɛ́ nyá lɔ́ ngí lókolongɔ wú wa ngáá wú lí wú kɛ ngáá háwu ngamba bih̃íw̃aa í hɔ́lɔ wú h̃ú, ngambángi sí áá ɣɛ́ na kúnafɔ taá ngi ndá gúnafɔ. Aáva sí fíli wáá ní Kɛ́ɛ́ɣɛ hɛ́li faaw̃a ndááheingi h̃u, aa fe wú yáá. 17Ní hávai lɔ ngáá sí ngáá wú ló ngáá ỹɔw̃ɔ́ ỹɔ́w̃ɔ.”

Silímai nungái taa ɣɛ su ngáa Jísu volú yélaitii

18Jísu í mɔ́ɔ ɣɛ ta, “Ná wɔ́lii ngeleí sí wúu yélai taa hilí ngáá wú ye, a nda gi má ngáá tí hílingɔ ngáá ngé p̃ɛ́ɛ́ tɔɔ ɣɛ́a hilí ngáá wú ye. 19Kɛbei wú ɣɛ́i ngáá ngeleí sí wúu yélaa gíte gíte, ná ná ɔ́ɔ́ ɣɛ ngeleí sí wúu yélaitii tɔ́ɔ́ ló ngáá wú ye kíya ti longɔ́ ngáá ti vóngaitii. Kɛ́ aáva wáá ngáá ti vóngaitii ti tá. Ngí lókolonga naá wú wa ngáá wáá mɔ́ɔ ngáá ngeleí sí wúu yélaa. Ná vá tɔ́ í kɛ́ngɔ tí hilíngɔ ngáá wú ye. 20A giséi ngoí sítii ma ngí ndéngɔ wú w̃a, ‘Ngenge mɔ́ɔ́ fíli ngakpángɔɔ láá lé ɔ́ɔ́ lɔ́ve w̃aalíɣii wa,’ ná wɔ́lii taa ɣɛ́ faa bá ndái má, wá bɛ́lɛ nɔ taá faa bá ndá wú w̃a. Ná wɔ́lii taa ɣɛ́ golóni ní gálambongitii mbu, wá bɛ́lɛ taá goló wú ndái wu. 21Nungái taa wú h̃úúhou h̃íí bɔw̃álale wá lɔ́ ngáá ní vóngaa, aáva taá kɔlɔ́ nuí í tɔ́vengɔ. 22Kɛbei ngáá ɣɛ́i vaaní ngɔ́ɔ́ yɛ́pɛ ti yelé ti velé lálangɔ ɛ́i belé ɣɛ́ la faa ỹɔ́u hááw̃a. Ná fíli su, kíya suu í na ngooh̃ugulá w̃áá fíli aa ti wa ti háá ỹɔí hááw̃a. 23Nuí fíli pá sílingɔ áá ɣɛ́ la ngáá ngé, kɛ maa w̃ɔ́i hilingɔ́ɔ́ lé mɔ́ɔ́ ngáá ní Kɛ́ɛ́ɣɛ ɣéle tɔ. 24Kɛbei ngáá ɣɛ́i vaaní ngɔ́ɔ́ faí sítii kɛ ti liiwáá ngáá nuu fíli áá nɛ́ɛ́ kɛní, ti velé lálangɔ ɛ́i belé ɣɛ́ ɣɛi lá faa ỹɔ́u hááw̃a. Kɛ kíya bɛ́lɛ ti káámaa haí sítii kal̃aa lɔngá, ná fíli su ti hilingɔ́ɔ́ lé ngáá ngé ɛ́ɣɛ ní Kɛ́ɛ́ɣɛ. 25Kɛ́ sí lɔ́ na ngáá í kɛ ngáá háwu sí pɔnɛngɔ́ ti Yála Kɔ́lɔi h̃u í hítɛ nga. Sí vá pɔnɛngɔ́ su, aá lɔ ngáá sí, ‘Tí hilíngɔ ngáá ngé háwu aa mba.’

26Ná kpɔmba w̃ɔ́i áá va lɛ́i ngíwaa vá tɔ́vema wú yéle áá gúla ní Kɛ́ɛ́ɣɛ yelé í ngáá Hɛ́ɛ́ma Ỹínangi lɛ́i áá tɔɔỹái yakɛ kɔwɔ́ato Ngala mba, aá lɔ áá vá faa léma kɔwɔ́ato mbá. 27Aáva wá bɛ́lɛ kɛ wáá faa lé kɔwɔ́ato mbá sífaa wú lónga mbá í séi tɔkúla héi sɔ́wɔ w̃a.”

Currently Selected:

NJƆÚ 15: KNNT

Highlight

Copy