NJƆÚ 16

1Jísu i ndií ngu ma, íwaa ɣɛ ta, “Ngí faí sítii kpɛ́lɛɛ ndénga wú w̃a kɛinɔɔ́ wálaa híɣe nda pélei sí wa. 2Tiyá lɔ́ɔ va wú bétevema Ngala fɛli máákpɔ wotaí wuu wá. Aá ɣéle p̃ɛ́ɛ́ táingi lɔɔ va folóma ma ngáá nuí fíli áá wú váá, aa ɣɛ maa w̃ɔ́i gi má ngáá aá lɔɔ Ngalá ndiivó ngénge mbo. 3Nungáitii taá ɣɛ́ taá faí sítii kɛ ngáá wú ye bɔw̃álale nápa taá ní Kɛ́ɛ́ɣɛ ɣéle tɔ kɛ kíli wɔlɔ́ p̃ɛ́ɛ́ kɛlaa nyá. 4Kɛ́ ngí fái sítii ndengá wú w̃a ngáá kɛinɔɔ́ ná naa hɔwɔ́i áá folóma wú gíndo su ngáá ngí wú lááhingɔ. Ngáá ɣɛ́ngɔ sí lení wú w̃a nɛ́nɛ bɔw̃álale ngí ɣɛ́ngɔ wú lóów̃a.”

Hɛ́ɛ́ma Ỹínangi yénge tokoítii

5Jísu í mɔ́ɔ́ ɣɛ ti w̃a, “Kɛ́ nyá lɔɔ lí naá nuí sí yelé í tɔ́vengɔ, aáva wú ta fíli wáá mɔ́ɔ́ningɔ wɔ́ɔ́ ɣɛ́ má, ‘Míl̃inda lɔ yíwaa lí na?’ 6Wú lííỹaaningɔɔ lé náa sífaa ngi faí sítii ndengá wú w̃a. 7Kɛ́ ngí tɔɔỹái le wú w̃a, aá lɔ ngáá faa vánda wú hááw̃a ngáá ngíwaa gúla mbéi wa. Ná ngɛ́i ɣɛ́ gulaní mbéi wa, kpɔmba w̃ɔ́i ɛi va wú yéle. Kɛ́ ná ngáá lí, ngáá tɔve wú yéle. 8Ná áá ɣɛ́ vaaní, aá lɔ áá va kɛma ngáá ngeleí sí wúu yélaitii ngáá kɛ ti gísiyaitii táá pele w̃a kɔwɔ́ato faa ỹɔ́i wa ɛ́ɣɛ telembo fái ɛ́ɣɛ Ngalángi gɔ́sɔngi. 9Aá lɔ́ɔ vá kɛ́ma ngáá ngeleí sí wúu yélaitii ngáá kɛ ti gísiyaitii kɔwɔ́ato faa ỹɔu ɣɛ́ndaitii mba taa pele w̃a sífaa taá lái ngáá ngé. Aáva nda tálai nuu áá ɣɛ́ su ngáá ngé, aá lɔ́ ngáá faa ỹɔ́u. 10Aá lɔ́ áá vá kɛ́ma ngáá ti ye ngáá nyá lɔ ngáá telembo mɔ́ɔ́ sífaa nyá lɔɔ lí ní Kɛ́ɛ́ɣɛ yelé ná ngáá gúla mbéi wa. Ná vólu, wɔ́i mɔ́ɔ ɣɛ wáá tɔ́. 11Aá lɔ́ áá vá kɛ́ma ngáá ti ye ngáá kɛ ti gísiyaitii táa péle w̃a kɔwɔ́ato Ngalángi gɔ́sɔngi wa bɔw̃álale Ngalá ngí ngeleí sí wúu w̃ásangi gɔ́sɔnga kílii ngáá aa veléi.

12Faa bíh̃i bih̃i tɔ na ngáá ngí ndé wú w̃á, kɛ́ ti bih̃íngɔɔ lé ngwala ngáá wɔ́i giséi ti w̃a kíya suu í na. 13Kɛ́ ná Hɛ́ɛ́ma Ỹínangi lɛ́i áá tɔɔỹái yakɛ kɔwɔ́ato Ngalá mba áá va, laá lɔ áá kɛ ngáá háwu wú ɣɛ́ tɔɔỹái kpɛ́lɛɛ kɔ́lɔ. Aa vaamá ɣɛ́ma áá yɛ́pɛ ngáá wu maá, kɛ́ sí léi áá mɛni laá lɔ áá nde aáva aa ɣɛ áá nde wú w̃a sí áá va ɣɛmá. 14Aa ɣɛ áá kɛ kíya káámaangɔ, bɔw̃álale sí ngáá ɣɛ́ ngáá nde ma, laá lɔ áá ɣɛ́ áá nde wú w̃a. 15Sí kínɛi í ní Kɛ́ɛ́ɣɛ yaá, nyá lɔ pó ngí ngáá kpɛ́lɛɛ. Ná lɔ́ í kɛ́ngɔ ngí ndéngɔ ngáá Hɛ́ɛ́ma Ỹínangi aa ɣɛ́ áá wolílo má, sí ngáá ndé í ndé wú w̃a.”

Ndiiỹaanii ɛ́ɣɛ kooh̃unɛ́i

16Jísu í mɔ́ɔ́ ɣɛ ta, “Naa guló lɔɔ ɣɛ́ nɔ́ɔ kpɛ́ɛ́ wɔ́i mɔɔ tɔ́. Ná mɔ́ɔ́ naa guló áá ɣɛ́ kpɛ́ɛ́, kɛ wú mɔ́ɔ́ tɔ́a.”

17Kɛ polú yélaitii ti lɛ́ingaa tí ỹɔw̃ɔ́ ỹɔ́w̃ɔ w̃ɔ́ɔ́ninga, táá ɣɛ́ ta, “Ndeé lɔ ngáá sí íwaa nde ná í ɣɛ́ngɔ ta, ‘Naa guló lɔɔ ɣɛ́ nɔɔ́ kpɛ́ɛ́ wɔ́i tɔ. Ná mɔ́ɔ́ naa guló áá ɣɛ́ kpɛ́ɛ́, kɛ wu mɔ́ɔ́ tɔa?’ Ndeé lɔ́ mɔɔ ngáá sí i ndéngɔ, í ɣɛ́ngɔ ta, ‘Sífaa nyá lɔɔ lí ní Kɛ́ɛ́ɣɛ yelé’? 18Ndeé lɔ gíte íwaa yɛ́pɛ kɔwɔ́ato mba, ná í ndengɔ́ ngáá naa guló lɔɔ ɣɛ́ kpɛ́ɛ́? A maá máa yɛ́pɛi ná gíte vólu hái wɔ́lɔ.”

19Kɛ Jísu i ngatɔ́nga mba ngáá kɛ ti ɣɛ́i loí tí mɔ́ɔ́ni kɔwɔ́ato faí sí wa. Faalɔ, i ɣɛi ti w̃a, “Wá lɔɔ ỹɔw̃ɔ́ ỹɔ́w̃ɔ w̃ɔ́ɔ́ni mɔɔní ngáá faí sí volúi ngí ndéngɔ ngí ɣɛ ta, ‘Naa guló lɔɔ ɣɛ́ nɔ́ɔ kpɛ́ɛ́ wɔ́i tɔ́. Ná múl̃ɔ naa guló áá ɣɛ́ kpɛ́ɛ́ kɛ wú mɔ́ɔ́ tɔa?’ 20Ngí tɔɔỹái le wú w̃a, wá lɔɔ vá wɔlɔmá, ná vólu, wú w̃ááw̃aanungɔ. Ngeleí sí wúu yélaitii pa, táá gooh̃unɛ́ɛ. Wú lííỹaaningɔ lɔɔ ɣɛ́ la, kɛ́ wú lííỹaanii va aa vote ngáá kooh̃unɛ́ɛ́. 21Ná nyah̃ái áá ɣɛ áá vá ndoí lemá, koo h̃úi aa ɣɛ áá báálɛ, bɔw̃álale ngi loí le sɔ́wɔi wúl̃a áá ɣɛ́ folói ma. Kɛ́ ná náa áá ngí lói le, aa leew̃a nduwu ya fuulɛ́i ná w̃a sífaa kooh̃unɛ́ɛ́ngɔ aa ɣɛ la ngáá i ngi lói lénga. 22Ngimɔ́ɔ́ nɔ́ɔ áá ɣɛ ngáá wú ye, kíya suu í na wú liiỹááni sɔ́wɔi i folónga ma, kɛ́ nyá lɔɔ vá wú lɔ́ma múl̃ɔ aáva wa lɔɔ vá gooh̃unɛ́ɛ́ma, nuu fíli pá ɛi wú góóh̃unɛi gúla wú yáá.

23Ná náá hɔwɔ́i áá folóma wáá vá tɔ́ ma, wɔ́i mɔ́ɔ́ lo mɔ́ɔ́nima. Ngí tɔ́ɔ́ỹai le wú w̃á, ní Kɛ́ɛ́ɣɛ aa ŋani fíli fé wú yáá wáá fɛli faaw̃a ndááheingi h̃u. 24Nápa wáá nɛ́ɛ́ ní Kɛ́ɛ́ɣɛ hɛ́lini ŋani fíli fááw̃a ndááheingi h̃u, faalɔ, a fɛli aáva wáá mááhɔlɔ aáva wú góóh̃unɛi ɛi gɛɛlɛ́ pele h̃u.”

Ngakpángi í Jísu yaá ngeleí sí wu yákpangi w̃ááh̃u

25Jísu í mɔ́ɔ́ ɣɛ ta, “Ngí njɛpɛí sítii pungá wú w̃a faanɛ́ɛ́ngaa h̃u, kɛ́ naa hɔwɔ́i lɔɔ va folóma ma na h̃u ngɛ́i mɔ́ɔ njɛpɛ fíli pú wú yéle faanɛ́ɛ́ su. Kɛ́ aá ɣéle, ngáá ɣɛ́ náá ngáá yɛ́pɛ wú yéle kɔwɔ́ato ní Kɛ́ɛ́ɣɛ wa, ngíwaa ngakɛ́ wú yáá kpál̃au. 26Ná naá hɔwɔ́i áá foloma, wáá ɣɛ wáá ní Kɛ́ɛ́ɣɛ w̃ɔ́ɔ́ni faa fíli fááw̃a ndááheingi h̃u. Ngɛ́i mɔ́ɔ́ lo ní Kɛ́ɛ́ɣɛ w̃ɔ́ɔ́nima wú hááw̃a. 27Sífaa, ní Kɛ́ɛ́ɣɛ bútei longɔ́ɔ́ lé ngáá wú ye bɔw̃álale wú lóngɔɔ lé ngáá ngé aáva wú lángɔ lá ngáá ngí gúlangɔ Ngalá ngelé. 28Ngí gulangɔ ní Kɛ́ɛ́ɣɛ yelé, ngí vá ngeleí sí wu, aáva nyá tɔ́ mɔ́ɔ́ ngáá gúla ngeleí sí wu wa, ngíwaa lí volú ní Kɛ́ɛ́ɣɛ yéle.”

29Kɛ Jísu volú yélaitii ti ɣɛa ma, “Yá tɔ náa yá njɛpɛí yakɛ kpál̃au ni yaá. Yáá mɔ́ɔ́ yɛpɛmá ni yelé faanɛ́ɛ́ngaa h̃u. 30Ní kɔlɔ́ náá ngáá yí faa kpɛ́lɛɛ kɔlɔ́. Yáá ɣɛ́ núi w̃ɔ́ɔ́ningi wɔ́lɔ p̃ɛ́ɛ́ ɔ́ɔ́ ɣɛ́a mbo. Sí vá tɔ í kɛ́a ni láángɔ lá ngáá yí gúlangɔ Ngalá ngelé.”

31Kɛ Jísu i ti woo yápotenga, i ɣɛ ta, “Ngapúmai lɔ náá wú láá ngáá ngé? 32Kɛ́ naa hɔwɔ́i lɔɔ vá folóma ma aáva i folóa náá ma wú h̃uu aá va váhama. Wú yíla ngílangi fíli wáá lí mbéi wú ɣɛ́ngɔ na, wáá ndó máágelesangɔ. Kɛ́ aáva máágelesangɔ láá lé sífaa ní Kɛ́ɛ́ɣɛ lɔ ndóów̃a. 33Ngí fái sítii ndengá wú w̃a kɛinɔɔ́ wú ndiihéi w̃ááhɔlɔ máávele w̃a. Wá lɔ́ɔ ɣɛ́ wáá faa bá mááhɔlɔ ngeleí sí wu. Kɛ́ a liibá sífaa ngí hómbonga ngeleí sí wúu yákpangi w̃á.”

Currently Selected:

NJƆÚ 16: KNNT

Highlight

Copy