MÁFIYU 15
15
Jísu i yɛpɛí kɔwɔ́ato wɔ́lɔ wɔlɔma gálambongi wa
(Máa 7:1-13)
1Kɛ́ Júsuai sítii taa ɣɛ́ ti w̃a Falósiai ɛ́ɣɛ kaamɔítii Ngala sávai hááw̃a ti lɛ́ingaa ti híɣeni Jɛlúsɛl̃ɛ, tí vá Jísu yelé ti mɔ́ɔ́ni, ti ɣɛ́ ma, 2“Ndeénii le í vólu yélaitii taa híyama ngáá a mu káwalani ti volú hái? Sífaa tɛí yáa wúya kíya kule í ti w̃a tí kɛ p̃ɛ́ɛ́ tɔɔ́ ɣɛ́a laaỹɛ́.”
3Kɛ́ Jísu i ti woo yápoteni, i ɣɛ ti w̃a, “Ndeénii le wá bɛ́lɛ nɔ wáá híyama ngáá Ngala sávai, wú hítɛa wú wú maa ɣélei vólu? 4Sífaa Ngalá ngí ndengɔ́, i ɣɛ ta, ‘Wufe í kɛ́ɛ́ɣɛ w̃a taa í njéé’ aáva ‘Nuí fíli áá ngoo ỹɔ́u lé kɔwɔ́ato ngi kɛ́ɛ́ɣɛ ɔɔ ngi njéé wa, kɛ tí maa w̃ɔ́i váa.’ 5Kɛ́ wáá wú gálambongi wo ngáá, ná nuu fíli áá ŋáni hɔ́lɔ ngáá ɔ́ɔ́ bɔ́ la ngi kɛ́ɛ́ɣɛ ɔɔ ngi njéé wa, kɛ́ i ɣɛ ta, ‘Ngí Ngalá kuulónga náa lá kílii,’ 6aa ngáá maa gúle ngáá ɔ́ɔ́ wúfe ngi kɛ́ɛ́ɣɛ w̃a ɔɔ ngi njéé w̃a fe fááw̃a ti yaá, sífaa, i Ngalá kuulonga náa lá. Ná yáa sí ɣɛ, kɛ yáa híyama ngáá Ngala sávai. Náá hááw̃a, kɛ wú híɣe veléi lɔ ngáá ná Ngala sávai vólu kɛinɔɔ́ wú hítɛ wúmaa gálambongi vólu. 7Wá lɔ́ ngáá Ngala fáá la mbélaa yaah̃ú kɛ́ aa wú lií h̃u! Ngala ndaa háá lé mɔ́i Aisáya ndái i ɣɛi pele w̃a ná Ngalángi ngói sítii ndení ma ngáá í ndé kɔwɔ́ato wú wá, ná wáa ngáá, sí Aisáya í ndéni, i ɣɛ ta,
8‘Nungái sítii taá wúfe má ngáá laa wóo,
kɛ́ ti liítii maa gooh̃ángɔɔ lé mbá.
9Kulasuunúma aa ti yɛ fɛ́lindai h̃u,
bɔw̃álale, taá ɣɛ taá nuu búsa hávai ɣɛ ngáá nungáitii kíya kpéiŋ áá ɣɛ́ ngáá ní háva!’ ”
Faí sítii taá núu ɣɛ ngáá kpaló mba w̃ɔ́ɔ́
(Máa 7:14-23)
10Kɛ Jísu i faŋaí lolínga yelé, i ɣɛ ti w̃a, “A wolílo sí w̃a ngáá nde wú ngatɔ́ mba! 11Mɛɛníi sí núi áá mɛ ɛ́ɣɛ sí áá kpɔ́le, aá láa le áá núi ná ɣɛ́ ngáá kpaló mba w̃ɔ́ɔ́ Ngala fɛ́li fááw̃a, kɛ́ ngói sítii taa gúla nda áá nde, aá lɔ áá kɛ ngáá kpaló mba w̃ɔ́ɔ.”
12Kɛ Jísu volú yélaitii tí váa ngelé, ti ɣɛ́ ma, “Yí kɔ́lɔ ngáá ngoí sí yí ndéngɔ i baalɛngɔ́ Júsuai sítii mba taa ɣɛ́ ti w̃a Falósiai?”
13Kɛ́ Jísu i ti woo yápoteni, i ɣɛ ta, “Sí kínɛi í ngáá sí ŋaníí ní Kɛ́ɛ́ɣɛ í ngelegóóh̃u áá síngɔ, kpɛ́lɛɛ aa vulukúla. 14A waa béɣe ngáá Falósiaitii, tiyá lɔ ngáá mbole yeláa ɣɛ kíli, táa pele ɣɛ ngáá mbole yeláá. Mbole w̃ɔ́i va ná áá ngi mbála wole w̃ɔ́i lokohóu ngáá í péle ɣɛ lá, ti félengɔ taá víli ndowá h̃u.”
15Kɛ́ Jísu volú w̃ɔ́ɔ yiláa i ɣɛi na táá ɣɛ́ ma Pítɛ, i yɛpɛní Jísu yelé i ɣɛ ma, “Faanɛ́ɛ́ngi sí h̃úúɣɛ ngáá ni ye.”
16Kɛ́ Jísu i ɣɛi volú yélaitii ma, “Wɔ́i nɛ́ɛ́ faa yátɔ mba kpɛ́? 17Wáa suuwɔ́lɔ ngáá mɛɛníi fíli nuí áá mbála la aa lí koo ya, laáva aa gula koo ya? 18Kɛ́ ngoí núi áá kulá la í ndé, aá lɔ́ɔ gúla ndií h̃u, nátii pa tɔ taá nuí ɣɛ́ ngáá kpaló mba w̃ɔ́i Ngala fɛ́lindai h̃u. 19Sífaa, núi gí mai lɔ́ kisiyá ỹɔ́i áá gúla na sí áá kɛ ngáá háwu í nuu váa, í kɔ́lɔsiya mbo, í ŋúỹa wó, í káha hééle woo le, ɛ́ɣɛ í maaboo ngoo le kɔwɔ́ato nungáá véka wa. 20Sítii tɔ taá kɛ núi áá ɣɛ́ ngáá kpaló mba w̃ɔ́i Ngala fɛ́lindai h̃u. Kɛ́ mɛɛníi nuí áá mɛ ɛ́i ɣɛ́ yaa wúyai, kíya Falósiaitii tí ndéngɔ ngáá nuu í kɛ, ɛi nuu ɣɛ́ ngáá kpaló mba w̃ɔ́ɔ́.”
Ndangí í ɣɛ́i nyah̃ápoi h̃u
(Máa 7:24-30)
21Jísu i hiɣeí mbéi í ɣɛ́i na í lí tataí ná h̃u í taa walái nátii kpela taa tí lolí ngáá Táya ɛ́ɣɛ Sáidɔ. 22Nyah̃ápo yiláa tɔ́ wɔ́lɔ í ɣɛ́i na, i ɣɛi ngáá taí sí h̃u w̃ɔ́ɔ́ taá náá lolí ngáá Kééna. I hiɣeí Táya ɛ́ɣɛ Sáidɔ lataí h̃u í vá Jísu yelé. I ɣɛi áá woo gúla áa ɣɛ́ Jísu w̃a, “Kawálai, yɛ́i taa í lóli ngáá Masangí Deevé Láála Loí, mááw̃aanu hóu kái! Faa bɔ́lungɔɔ lé ní ỹáh̃aloi la ngwala, maa lɔɔ nɔ́w̃ɔ ngáá ỹína nyɔí í pólu.”
23Kɛ́ ngoo yílaa bɛ́lɛ Jísu aa ndeí ma. Kɛ Jísu volú yélaitii tí váa Jísu yelé, tí maanɛ́ɛ́nɛ, ti ɣɛ́ ma, “Nyah̃ápoi sí bɛ́ mu volú, aá lɔ nɔ́ɔ mu volú áá mu lolí ngéleya.”
24Kɛ Jísu i ɣɛa ta, “Ngalá ngí tɔ́vengɔ nɔ́ɔ Ísulɔ yeláitii ngéle, tiyɛ́i ti gúlangɔi ngáá mbaalaítii ti longɔ́i su.”
25Ná Jísu í fái sí léni, nyah̃ápoi i vaí, í lá mbɛ, i ɣɛ ma, “Kawálai, bɔ́ mba kái!”
26Jísu i ɣɛ ta, “Aa pele w̃a ngáá nuu ɔ́ɔ́ ndopóaitii ti ỹɛ́nii yéɣe ɔ́ɔ́ píli kékeaitii mbɛ.”
27Kɛ́ nyah̃ápoi i ɣɛi ta, “Tɔɔỹaá le, kawálai, kɛ́ laáva kékeaitii kéle tɔ taá mɛ́ɛ́ni búlu kpúlungi ỹɛ áá híɣe ti lo mbélaitii ti léévei ya áá gúla ndɔwɔlɔ́i wa.”
28Kɛ Jísu i nyah̃ápoi woo yápotea, i ɣɛ ma, “Yá lɔ ngáá nyah̃á í lángi h̃úúbangɔ! Sí í lóngɔ lá aá lɔ́ɔ ɣɛ́ í yɛ́.” Ngamá nɔ́ɔ, nyah̃ápoi ỹáh̃aloi i walóni.
Jísu i nuu bíh̃iw̃aa wáloi
29Jísu i hiɣéi ỹandái míl̃anda í ɣɛ́i na, í lí Galéli Yɛ Walaí góóɣaka w̃á, í lɛ́ ngihéi wa, í héi na. 30Faŋa walá i vaí ngele ngáá mɛŋɛl̃ɛ́ yélaitii, mbole yeláitii, nɔɔnɔ yeláitii, bóboaitii ɛ́ɣɛ seebɛ yeláa vékaa bih̃íw̃aa, tí tí kpɛ́lɛɛ pú Jísu gakála, laáva í ti waló. 31Nungáitii kindáá vílingɔ i ɣɛi lá ngwála ná ti bóboai tɔí táa yɛ́pɛ, nɔɔnɔ yeláitii ti walóngɔ, tí mɛŋɛl̃ɛ́ yélai tɔ táa híya, ɛ́ɣɛ tí mbole yélai tɔ táa ỹandá lɔ, aáva ti kpɛ́lɛɛ ti Ísulɔ yeláitii ti Yálangi laaw̃áálɛi.
Jísu i mɔ́ɔ nuu bíh̃iw̃aa láa wɔ́ni
(Máa 8:1-10)
32Kɛ Jísu i volú yélaitii tólinga, i ɣɛ ti w̃a, “Nungái sítii maaw̃áánu lɔɔ sóu, bɔw̃álale, tí kɛ́nga náa mbéi ngáá foló sáángɔ aáva ŋani fíli aa ti yaá tɔ́ɔ mɛ. Nyáá vá ngáá lói ngɔ́ɔ́ ti lɔ́ve ti láitii su ngáá ndɔlɛí, sífaa tɛingaa h̃u taá vúw̃a ngáá ndɔlɛí pélei h̃u.”
33Kɛ́ polú yélaitii tí mɔɔnií ti ɣɛ́ ma, “Míl̃inda lɔ maá mɛ́ɛ́ni hɔ́lɔ na áá kulaɣɛ maá fáŋa walái sí laawɔ́ lá ngaalaí sí h̃u?”
34Jísu i ti w̃ɔ́ɔ́nii, i ɣɛ ti w̃a, “Bilé búsa nɔ́nɛngɔ lɔ í wú yáá?”
Tí ngoo yápoteni, ti ɣɛ́ ma, “Bilé búsa ngɔ́felangɔ ɛ́ɣɛ nyɛɛ guló gulo lɛingáá.”
35Kɛ Jísu i ndengá fáŋai w̃a ngáá ti héi ndɔwɔlɔ́i wa. 36Kɛ i bilé búsa ngɔ́felangɔi yeɣénga ɛ́ɣɛ nyɛ́i, í sɛ́ɣɛɛ gula Ngalá ma, í tí yalé ngále su, í tí he volú yélaitii ngeyá. Polú yélaitii pa tí féé hee nungáitii ngeyá. 37Ti kpɛ́lɛɛ tí mɛ́ni, í kúlaɣɛ ngáá ti ye. Kɛ Jísu volú yélaitii tí kambáli ngwála wála ngɔ́felangɔ yeɣénga tí ndaa hé ngáá mataí í gúlai polú. 38Siỹɛngáitiini sɔíngi tí ndaaỹɛ́ngi wóni ti ɣɛ́i ngáá tásu nááningɔ, nyah̃áitii ɛ́ɣɛ ndopóaitii taá ɣɛ́i kpaɣai h̃u.
39Kɛ Jísu i nungáitii tɔveá ti láitii su, í víli keléngi h̃u, í lí Magada lataí h̃u.
Currently Selected:
MÁFIYU 15: KNNT
Highlight
Share
Copy
Want to have your highlights saved across all your devices? Sign up or sign in
Bandi New Testament © Bible Society in Liberia, 2000
