MÁFIYU 16
16
Ti Jísu w̃ɔɔniní ngáá í káámaa haa ɣɛ
(Máa 8:11-13; Lúu 12:54-56)
1Júsuai sítii taa ɣɛ́ ti w̃a Falósiai ɛ́ɣɛ Júsuai sítii taa ɣɛ́ ti w̃a Sájusiai tí lííni Jísu yelé ngáá tí suugɔvɔ́. Kɛ tí mɔ́ɔ́ninga ngáá í káámaa haí tá ɣɛ́ sí ɔ́ɔ́ ngakɛ́ ngáá ti ye kpál̃au ngáá kɛ Ngalá tɔ́ í tɔ́vengɔ. 2Kɛ́ Jísu i ti woo yápoteni, i ɣɛ ti w̃a, “Ná fóloi áá ɣɛ́a víla, wáá ɣɛ́ ta, ‘Njɛ fíli ɛi wa díína, bɔw̃álale, ngeleí yá kɛ́ngɔ lé kpál̃au.’ 3Ná mɔ́ɔ́ áa ɣɛ́ ngáá ngelendáá lɛtɛngí wáá ɣɛ́ ta, ‘Njɛí lɔɔ vá wáma, bɔw̃álale, ngeleí yá kpíndingɔɔ lé.’ Wáá hómbo wú ngélei yá kpéle wú ɣɛ́ kɔlɔ́ ngáá kɛ njɛí lɔɔ vá wáma hááwɔ, kɛ́ wɔ́i hómbo wɔ́ɔ fái sítii polú haalé táá híya hááwɔ! 4Ngéteyangi sí h̃úu yélaitii tiyá lɔ́ ngáá nyaama yélaa, ná vólu, taá Ngalá fááw̃a! Wú mɔ́ɔ́ninga ngáá ngí káámaa haa ɣɛ, kɛ́ ngáá kɛ́ma! Káámaa haí nɔ́ɔ léi áá vá ɣɛ́ma wú yɛ aa wáa ngáá, káámaa haí ná í ɣɛ́i ngáá Ngalá ndaa háá lé mɔ́i Jóna.”
Kɛ Jísu i gulaá náa wa í lí.
Ndaahíngi kɔwɔ́ato Falósiaini ngaa Sájusiai ti gálambongi wa
(Máa 8:14-21)
5Ná Jísuni ngaa polú yélaitii tí njɛ wálai levéni, polú yélaitii tí lééw̃ai taá bíle fíli ngéɣeni. 6Kɛ Jísu i ɣɛa ti w̃a, “A w̃aah̃ú béle ngáá ngɛí gúloi ná taá pu biléi h̃u áá tɛ́nga taá tóli ngáá yíísii, Júsuai sítii taa ɣɛ́ ti w̃a Falósiai ɛ́ɣɛ Júsuai sítii taa ɣɛ́ ti w̃a Sájusiaitii ti ndái.”
7Kɛ Jísu volú yélaitii tí tɔkúla héinga ngáá yɛpɛ ndáá ỹɔw̃ɔ́ ỹɔ́w̃ɔ yéle, táá ɣɛ́ ta, “I sí léngɔ bɔw̃álale maá váángɔ ngáá bilé fíli.”
8Kɛ́ Jísu i ɣɛi kɔlɔ́ sí tí ɣɛ́i taá nde. Faalɔ, i ti w̃ɔ́ɔ́nii, í ɣɛ ta, “Ndeénii le wáá yɛ́pɛ ỹɔw̃ɔ́ ỹɔ́w̃ɔ yelé ngáá sí le nɔ́ɔ wáá váángɔ ngáá bilé? Wú lángi gulo kw̃ɛ́ɛ́ngɔɔ le! 9Baa wáá nɛ́ɛ́ ngatɔ́i mba? Baa wɔ́i giséi ma ná h̃ú ngí siỹɛ tásu ndɔ́ɔ́lungɔi laawɔ́i ngáá bilé búsa ndɔ́ɔ́lungɔi? Kambáli nɔ́nɛngɔ lɔ́ wú ndaa héni ngáá mataí? 10Ɛ́ɣɛ mɔ́ɔ́ sí vá náa ngí siỹɛ tásu nááningɔ laawɔ́i ngáá bilé búsa ngɔ́felangɔi? Kambáli nɔ́nɛngɔ lɔ́ wú ndaahéni ngáá mataí? 11Ndeé lɔ í kɛ́ngɔ wáá ngátɔngɔ mba ngáá kɛ ngáá ɣɛ́ngɔ ngáá yɛ́pɛ wú yéle kɔwɔ́ato bilé wa? A bɔwɔ́ w̃aah̃ú béle ngáá Falósiaitii ɛ́ɣɛ Sájusiaitii ti ndá yíísii. Ná wáá ngáá, bíle lɛnga ngɛ́i guloí ná.”
12Kɛ Jísu volú yélaitii ti ngátɔnga mbá ngáá kɛ Jísu aa ɣɛngɔ áá tí laahí ngáá tí w̃ááh̃u béle ngáá bilé lɛ́nga ngɛ́i guloí ná, kɛ́ tí w̃ááh̃u béle ngáá Falósiaitii ɛ́ɣɛ Sájusiaitii ti gálambongi.
Pítɛ líi h̃u hái kɔwɔ́ato Jísu wa
(Máa 8:27-30; Lúu 9:18-21)
13Jísu i liiní tataí ná h̃u í táá walái ná h̃ú béla taa náá lolí ngáá Sɛsɛ́liya Félepa. Kɛ í vólu yélaitii mɔ́ɔninga, i ɣɛ ti w̃a, “Nungáitiini ti ɣɛ éle wáá ngáá nuí síí w̃ɔ́i taa ɣɛ́ ma Nuu Búsa Goo H̃ú Loí?”
14Tí ngoo yápoteni, ti ɣɛ́ má, “Ti lɛ́ingaa ti ɣɛ́ Nguya Wo Mɔ́i Njɔú waa ngáá laa, tɛingáa tí ɣɛ́ Iláija waa ngáá laa, ti lɛ́ingaa tí ɣɛ́ Jɛlemáya waa ngáá laa, ti lɛ́ingaa vá ti ɣɛ́ Ngalá ndaa háá lé mbélai ti tá waa ngáá laa.”
15Kɛ Jísu i mɔɔ ti w̃ɔ́ɔ́ninga, i ɣɛ ti w̃a, “Kɛ́ wáá vá náa, wú ɣɛ́ ele wáá ngáá ngé?”
16Kɛ Sáimɔ Pítɛ í ngoo yápotenga, i ɣɛ ma, “Yá lɔ́ yí ngáá Ngalángi Lókolo Mbá W̃ɔ́i ngumaawóngi hááw̃a, Ngalángi sí í ndɛ́ɛh̃ui h̃ú kúnafɔ, ngi H̃íỹɛndou Loí waa ngáá í ye.”
17Kɛ Jísu i ɣɛa ma, “Aa lɔ́ ngáá faa vánda í hááw̃a Sáimɔ, yɛ́i yí ngáá Njɔú lói, sífaa, nuu búsa láá le ɔ́ɔ́ tɔɔỹái sí vú í lá yɔ́ɔ́ nde, kɛ́ ní Kɛ́ɛ́ɣɛi í ngelegóóh̃u aá lɔ́ í púngɔ í lá. 18Aáva ngí ndé í w̃á, Pítɛ, yá lɔ́ ngáá kɔtu ɣɛ kíli. Aáva kíya nɔ́ɔ nuu áá pɛ́lɛi ló ndɔwɔlɔ́ bángi w̃a kíya kɔtu í na, ngimɔ́ɔ́ nɔ́ɔ ngáá vá ní Yála fɛ́li mbélaitii ngatɛ́ma mba í w̃á. Saí ɣéle tɔ ngi yákpa ngɛi hombó ɔ́ɔ́ ɣɛ́ ti w̃ááh̃u. 19Nyá lɔɔ vá Ngalángi w̃ásandai gíítii féma í yáá, sí yáá bééle mbá ngeleí sí wú, Ngala ngaa beele mba, sí fíli pá yáá lókohei mbu ngeleí sí wú, Ngala ngaa lokoheí mbú.”
20Kɛ Jísu í volú yélaitii ndaahínga ngáá tálaa nde nuu fíli má ngáá kɛ laá lɔ í ngáá Ngalángi Lókolo Mbá W̃ɔ́i.
Jísu i yɛpɛní ngi w̃áánɔw̃ɔi wa taá sáálai
(Máa 8:31–9:1; Lúu 9:22-27)
21Í séi náa taíngi ná h̃uu w̃á í lí naa wutúwɔ, Jísu i tɔkúla héini ngáá suuɣɛ́ndaa volú yélaitiini ma ngáá kɛ í lí Jɛlúsɛl̃ɛ aáva kele ɣelé mbélaitii ɛ́ɣɛ Ngala sááɣa gula mbélai ti wútuwɔaitii ɛ́ɣɛ kaamɔítiini Ngalá sávai hááw̃a, kɛ taá máanɔw̃ɔ na tí páa. Kɛ́ ná fólo félengɔ áa gúla su sawa kélei w̃a, Ngalá ngáá mbuyoɣé sái h̃u.
22Kɛ́ Pítɛ í Jísu lolíni naa góóɣaka w̃á, í pɛ́lɛ kpɛmá nda, áá ɣɛ́ ma, “Ngalángi í kílihoo ná w̃a p̃ɛ́ɛ́, Kɛɛɣɛ́! Ná álaa ɣɛ́ ngáá í ye kúnafɔ!”
23Kɛ́ Jísu i voteí, i ɣɛ Pítɛ w̃a, “Hiɣe kpéla, Setána! Yá lɔ yí ngútuwɔ yaa súúbɛɛɣi, bɔw̃álale, nuu búsa vélei lɔ́ yáá gisíya la, kɛ́ yáá gísiyama ngáá Ngalángi ndá vélei.”
24Kɛ Jísu i ɣɛa volú yélaitii ma, “Ná nuu fíli áá ɣɛ́ lói í ɣɛ́ ngáá pólu w̃ɔ́ɔ́, kɛ í gíkula bɔwɔ́ h̃u, í w̃aahéi wo ngáá í há fááw̃a, í tó mbá. 25Sífaa, nuí fíli áá ɣɛ́ lói í bɔwɔ́ lɛɛh̃úi w̃ááɣawo, aa waláma. Kɛ́ nuí fíli áá bɔwɔ́ lɛɛh̃úi gúla kɛlɛ́ma fááw̃a, maa w̃ɔ́i aa ndɛɛh̃u gítei w̃aahɔ́lɔ. 26Ndeé lɔ áá ɣɛ́ ngaa kulasuunúmai nuí síí w̃ɔ́i hááw̃a áá ngeleí sí wu wɔ́lingai kpɛ́lɛɛ mááhɔlɔ ngáá ngi ndá kɛ́ í wála ndɛɛh̃u gítei w̃a? Ndeé lɔ nuu áá fe kɛinɔɔ́ i ndɛ́ɛ́h̃u gítei w̃aahɔ́lɔ volú? 27Sífaa nuí síí w̃ɔ́i taa ɣɛ́ ma Nuu Búsa Goo H̃ú Loí aá lɔɔ vá vaamá taá ngi w̃álekaitii, aá lɔɔ vá ngi Kɛ́ɛ́ɣɛ yákpa maanɛɛnɛɛngí h̃u. Aáva aa nuí kpɛ́lɛɛ mááỹa fe ngáá ngilá ngíla kíya nuu í yénge tokoí áá ɣɛ́ na. 28Ngí tɔɔỹái le wú w̃a, wú lɛ́ingaa wú lóóni mbéi, wɔ́i saa w̃ááhɔlɔ í ló su kpóloo wú Nuu Búsa Goo H̃ú Loí lɔ́ áá vá ngi w̃ásandai h̃u.”
Currently Selected:
MÁFIYU 16: KNNT
Highlight
Share
Copy
Want to have your highlights saved across all your devices? Sign up or sign in
Bandi New Testament © Bible Society in Liberia, 2000
