Zɔ̃̀ɔ̃́ 14
14
Zízɛ̀ lɛ zi lɛ́ è lo mia Dàa píéa ká
1“Yékɛ̀ ká tó ka zò é ka fɔ̃̀ã̀-fɔ̃́ã́ kɛ. Kà ka zò dɔ Wálà mɔ̀, ká ka zò dɔ ma bɛ̃̀ɛ̃ m mɔ̀ nɔ́ kíli. 2Yàlà-pìà lɛ m Dàa píé kɛ́ì gbùò. M lópìà kɛ ḿ lɛ̀ dò pɛ̀ kɛ ka lɛ̀ɛ. È kɛ̀á wɔ̃́ e kéa ye wá kília, m̀ḿ gɔ̃̀ à gèeè ka lɛ̀ɛ. 3Yé maà ló, lɛ́ maà lɛ̀ pɛ̀ kɛ ka lɛ̀ɛ, ḿm̀ lo nuù m mɛ̀ĩ́ zeĩ́, tó m ka sí m dìè lɛ̀ɛ, kɛ ká kɛ lɛ̀ lɛ́ m yía mɔ̀. 4Káà zi lɛ́ lɛ ka mɔ̀ ká ɓɔá lɛ̀ lɛ́ m̀ lo yía mɔ̀ɔ dɔ.”
5Tɔ́mɔ̀ a gèe à lɛ̀ɛ, “Ko Dàa-mì, kòó lɛ̀ lɛ́ ì lo yía dɔ. Zi sùu kpɛɛ̀ lɛ́ kò bɛ̀i à mɔ̀ kó zi lɛ́ è lo yía dɔ à ká?”
6Zízɛ̀ a gèe à lɛ̀ɛ kélɛ̀, “Ma lɛ́ m zía, e bɛ̀i, wánà-wɔ̃̀ ɛ̃́ɛ̃́ kɛ̀ɓe káa. Mi gbɛɛ lɛ̀ɛ́ bɛ̀i ɓɔɔ̀ mia Dàa mɔ̀, yé lɛ̀ɛ́ kpɔ́ nɛ́ m làa ká. 7È kɛ̀á ka m dɔɔ, kɛɛ káá m Dàa bɛ̃̀ɛ̃ dɔɔ̀ nɔ́ kíli. É kã́ pɛ́nɛɛ mɔ̀, é ló líéa, kaà à dɔ, ɛ̃́ɛ̃́ kaà à gɛ̃̀.”
8Félè a gèe à lɛ̀ɛ, “Ko Dàa-mì, mia Dàa ɓɛ zɔ̃̀ɔ̃̀ ko lɛ̀ɛ. Pɛ́ nɔ́ kò nàà à káa, lɛ ɓɛ.”
9Zízɛ̀ a gèe à lɛ̀ɛ, “Félè, ìí m dɔ nɛ́ yìì maà ɓo ka píé zèe fɛ̃̀ɛ̃̀ɛ ká? Mi lɛ́ aà m gɛ̃̀ɛ, kɛɛ aà mia Dàa ɓɛ gɛ̃̀. Mɛ́ e kɛ lɛ́ mɔṹ ɓà gèe kélɛ̀, ‘Mia Dàa zɔ̃̀ɔ̃̀ ko lɛ̀ɛ?’ 10Ƃàá gɛ̃̀ wánà ká kélɛ̀ m mia Dàa yí, ɛ̃́ɛ̃́ mia Dàa bɛ̃̀ɛ̃ lɛ m yí? Wéé lɛ́ maà à gèe ka lɛ̀ɛ, lɛ̀ɛ́ gó m dìè m kɛ̀lɛ̀. Mia Dàa lɛ́ à yàlà kṹũ̀ lɛ m yía, lɛ́ɛ̀ e dìè là yɛɓoa kɛ̀ɛ. 11Wéé lɛ́ m̀ gèe kélɛ̀ m mia Dàa yí, ɛ̃́ɛ̃́ mia Dàa bɛ̃̀ɛ̃ lɛ m yía, kà à gɛ̃̀ wánà ká. Yé kàá kɛ kília, kà wɔ̃́ gɛ̃̀ wánà ká yɛɓo nì e kéa kolo là. 12Wánà-wɔ̃̀ kpó-kpó lɛ́ m̀ gèe ka lɛ̀ɛ ɓɛ. Mi lɛ́ è e zò dɔ m mɔ̀ɔ, lɛ́ɛ̀ lo yɛɓo lɛ́ m̀ kɛ̀ɛ kɛɛ̀. Ɛ́ɛ̃́ lɛ́ɛ̀ lo à yé lɛ kpànazɛ̀, é dieá à yé nì e kéa làa kɛɛ̀, ɓii m lópìà mia Dàa píé. 13Pɛ nɔ́ɔ fé lɛ́ kà pɛ̃ m tɔ́ yía, ḿm̀ lo à kɛɛ̀ ka lɛ̀ɛ. À kɛɛ̀ lɛ́ɛ̀ lo kɛɛ̀á kíli, kɛɛ mia ó mia Dàa ɓɛ zì kɛ̀-kpànazɛ̀-kɔ̀ gɛ̃̀ à Gbe ɓɛ yí. 14Ká pɛ nɔ́ɔ fé pɛ̃̀á m mɔ̀ m tɔ́ yía, ḿm̀ lo à kɛɛ̀ ka lɛ̀ɛ.
Gɛ̀ɛ̀ Púlú lɛ́ɛ̀ lo nuù
15“É kɛ̀á m lɔ̀ kpɔ́ɔ̀ lɛ ka mɔ̀ɔ, káà lo wɔ̃́ lɛ́ m̀ gèe ká kɛɛ kɛɛ̀. 16Ḿm̀ lo mɛ́ĩ́ ɓoò m Dàa lɛ̀ɛ, ɛ̃́ɛ̃́ lɛ́ɛ̀ lo Gbũ̀-ka-mɔ̀-mì doó nɔɔ̀ ka lɛ̀ɛ zeĩ́. Mí e kília lɛ́ e Gɛ̀ɛ̀ Púlú wánà zɛ̀ɛ káa. Lɛ́ɛ̀ lo kɛɛ̀ ka píé tòá kíli ká. 17Kpóṹ là lɛ̀ɛ́ bɛ̀i à sɔ̀lɔ̀ ɓoò. Ƃii kpóṹ là lɛ̀ɛ́ à gɛ̃̀, ɛ̃́ɛ̃́ lɛ̀ɛ́ à dɔɔ mɔ́ɔ̀ wɔ̃̀ mɔ̀. Kɛɛ ka yee, káà à dɔ, ɓii lɛ ka píé, ɛ̃́ɛ̃́ à yàlà kṹũ̀ lɛ ka yí.
18“M̀ḿ ló ka tóò tèè ká. Ḿm̀ lo nuù ka píé. 19Yé lúó aà die zààlea, kpóṹ là lɛ̀ɛ́ ló m gɛ̃̀ɛ̃̀ gbaa. Kɛɛ ka yee káà lo m gɛ̃̀ɛ̃̀. Yé mɔṹ m ɓea, ka bɛ̃̀ɛ̃ káà lo kɛɛ̀ ɓe nɔ́ kíli. 20Yé lúó e kília aà ɓɔɔ, káà lo à yí dɔɔ̀ kélɛ̀ m m Dàa yí, ɛ̃́ɛ̃́ ka bɛ̃̀ɛ̃ ka m yí, ɛ̃́ɛ̃́ ma bɛ̃̀ɛ̃ m ka yí.
21“Mi lɛ́ wɔ̃́ lɛ́ maà gèe à lɛ̀ɛ á kɛɛ lɛ à kɛ̀lɛ̀, tó áà kɛ̀ɛ, à ye lɛ́ m lɔ̀ kpɔ́ɔ̀ lɛ à mɔ̀ɔ. Mi lɛ́ m lɔ̀ kpɔ́ɔ̀ lɛ à mɔ̀ɔ, à lɔ̀ lɛ́ɛ̀ lo kpɔ́ɔ̀ m Dàa mɔ̀. À lɔ̀ lɛ́ɛ̀ lo kpɔ́ɔ̀ ma bɛ̃̀ɛ̃ m mɔ̀ nɔ́ kíli, ɛ̃́ɛ̃́ ḿm̀ lo m dìè wɔ̃̀ zɔ̃̀ɔ̃̀ à lɛ̀ɛ.”
22Zúdà a gèe, “Ko Dàa-mì, zi sùu kpɛɛ̀ lɛ́ ì lo i dìè zɔ̃̀ɔ̃̀á ko lɛ̀ɛ, lɛ́ ìí ló à zɔ̃̀ɔ̃̀ kpóṹ là zèe lɛ̀ɛ ɓɛ?” Zúdà lɛ́ e wɔ̃́ e kéa gèea, ye wá à yé ò si Zúdà Ɛ̀sɛ̀kélìàa ká.
23Zízɛ̀ a là nìɛ̀ weeá kélɛ̀, “Mi lɛ́ m lɔ̀ kpɔ́ɔ̀ lɛ à mɔ̀ɔ, lɛ́ɛ̀ lo m wéè kɛɛ̀. M Dàa lɛ́ɛ̀ lo à lɔ̀ kɛɛ̀ à ká. Ɛ́ɛ̃́ kò m Dàa kóò lo nuù à píé, tó kò ye nì ko kɛ lɛ̀ doó mɔ̀. 24Mi lɛ́ m lɔ̀ kpɔ́ɔ̀ wá à mɔ̀ɔ, lɛ̀ɛ́ m wéè kɛ. Wɔ̃́ lɛ́ m̀ gèe lɛ́ kà maa, lɛ̀ɛ́ gó m dìè m kɛ̀lɛ̀. Lɛ́ɛ̀ go mia Dàa lɛ́ e m vɔɔ kɛ̀lɛ̀.
25“Lɛ̀ lɛ́ m tĩã́ ka píéa, lɛ́ m̀ wɔ̃́ nì e kéa gèe ka lɛ̀ɛ. 26Gbũ̀-ka-mɔ̀-mì, lɛ́ e Gɛ̀ɛ̀ Púlú lɛ́ mia Dàa è lo à vɔɔ̀ m tɔ́ yí ka píéa, lɛ́ɛ̀ lo pɛ séĩ́ zɔ̃̀ɔ̃̀ ka lɛ̀ɛ, ɛ̃́ɛ̃́ lɛ́ɛ̀ lo ka zò vùò wɔ̃́ séĩ́ lɛ́ maà à gèe ka lɛ̀ɛ ká.
27“Zò-yà-gé tóò lɛ ka píé zèe. Maà m dìè zì zò-yà-gé nɔ ka lɛ̀ɛ. M̀ḿ gbaa nɔ ka lɛ̀ɛ kpóṹ là zì pɛ-nɔ̀-mia-lɛ̀ɛ zì ká. Yékɛ̀ ká tó ka zò é ka fɔ̃̀ã̀-fɔ̃́ã́ kɛ. Yékɛ̀ ká túó. 28Kaà à ma m lé kélɛ̀ m lópìà, kɛɛ ḿm̀ lo nuù m mɛ̀ĩ́ ka píé zèe. É kɛ̀á m lɔ̀ kpɔ́ɔ̀ lɛ ka mɔ̀ɔ, ka gé lɛ́ɛ̀ lo liì ló m̀ ɓo mia Dàa píéa wɛ̃́ĩ̀. Ƃii lɛ kpànazɛ̀, é dieá m là. 29Maà wɔ̃́ e kéa gèe ka lɛ̀ɛ gbaa kɛ é tĩã́ kɛɛ̀. À kɛɛ̀ lɛ kíli, kɛɛ é kɛ̀áa, kɛ zò-dɔ̀à-mɔ̀ é kɛ ka yí. 30Kɔ̀à ɓi nì kɔ̀àá ló gbaa wéè e kíe là ɓɛ̀lɛ̀-píé gbèĩ zɛ̀, ɓii kpóṹ là zèe wũ-là-mì lɛ nupìà. Là yíkɛ̀ gáàa gbɛɛ wá m là. 31Kɛɛ lɛ à mɔ̀ kɛɛ kpóṹ là é à yí dɔ kélɛ̀ mia Dàa lɔ̀ kpɔ́ɔ̀ lɛ m mɔ̀. Pɛ́ à kɛ̀ lɛ́ m̀ wɔ̃́ séĩ́ kɛ̀ lɛ̀ zí à gèeá m lɛ̀ɛ lɛ́ ɓɛ.
“Kà wɛ̀lɛ̀, kɔ́á gó lɛ̀ɛ mɔ̀.
Currently Selected:
Zɔ̃̀ɔ̃́ 14: MNT
Highlight
Share
Copy
Want to have your highlights saved across all your devices? Sign up or sign in
Mann New Testament © Bible Society in Liberia, 1978.
