Zɔ̃̀ɔ̃́ 13

Zízɛ̀ e là tòà-píé-mìà gã̀ mɛ́ pɛ́lɛ́

1E kɛ Dìè-mia-là Kpílì lúó mɛ́ĩ́ yìì ká gbaa. Zízɛ̀ e à yí dɔ kélɛ̀ lúó lɛ́ è lo góòá kpóṹ là zèe, kɛ é ló mia Dàa píéa aà ɓɔ. Mia lɛ́ o kɛ à dìè là mia nì ká kpóṹ là zèea o lɔ̀ e kpɔ́ à mɔ̀, ɛ̃́ɛ̃́ o lɔ̀ e tó kpɔ́pìà à mɔ̀ é ɓɔá wɔ̃́ líé nyɛpìà.

2Zízɛ̀ wà là tòà-píé-mìà o kɛ wà nyɛ́ŋɛ̀ĩpíé léɓèlè ɓèlèpìà. Lɛ̀ e kɛ kília, kɛɛ Dɛ́ɓò aà à dà Zúdà lɛ́ e kɛ Sáímɔ̀ Ɛ̀sɛ̀kélìà gbe káa zò píé, kélɛ̀ é Zízɛ̀ lé gó. 3Zízɛ̀ e à yí dɔ kélɛ̀ mia Dàa aà pɛ séĩ́ kpɔ́ gbaa à kɔ̀ là. A yí dɔ kélɛ̀ e gó Wálà píé, ɛ̃́ɛ̃́ lɛ lópìà Wálà píé. 4À mɔ́ɔ̀ wɔ̃̀ mɔ̀ɔ, Zízɛ̀ e gó téɓòa mɔ̀, e là sɔ-là-sɔ̀ ɓo e mɔ̀, e táɓà dò yèlè e dĩ́. 5Lɛ̀ e kɛ kília, e yíí gbɛ̃̀ páni dò yí, e gbɛ̃̀ áà là tòà-píé-mìà gã̀ mɛ́ pɛ̀lɛ̀, áà o mɛ́ sòlò táɓà lɛ́ e kɛ à dĩ́a ká. 6E ɓɔ Sáímɔ̀ Pílɛ̀ mɔ̀. Pílɛ̀ a gèe à lɛ̀ɛ, “M Dàa-mì, ɓáà nàà í m gã̀ mɛ́ pɛ́lɛ́?”

7Zízɛ̀ a là nìɛ̀ kélɛ̀, “Wɔ̃́ lɛ́ m̀ kɛ̀ɛ, ìí à yí ma nɛ́ dɛɛ ká. Kɛɛ íì lo à yí maà líé zàá.”

8Pílɛ̀ a gèe Zízɛ̀ lɛ̀ɛ kélɛ̀, “Ìí ló m gã̀ mɛ́ pɛ́lɛ̀ gbɛɛ ɓo.”

Zízɛ̀ a gèe, “Ḿ gɔ̃̀á i gã̀ mɛ́ pɛ́lɛ́ɛ̀ɛ, kɛɛ kò ɓi kòó ló tàà-kíe-píé kɛɛ̀ gbaa.”

9Sáímɔ̀ Pílɛ̀ a gèe kélɛ̀, “M Dàa-mì, yékɛ̀ é kɛ m gã̀ doó ká mɔṹ. È kɛ m kɔ̀ wà m wĩĩ́ nì ká nɔ́ kíli.”

10Zízɛ̀ a gèe à lɛ̀ɛ, “Mi lɛ́ aà e zúlúa, à mɛ́ ɓɔɔ̀ lɛ pã́pã́ le. Ye wá à mɔ̀ kɛ é e zúlú zeĩ́. À gã̀ lɛ́ nɔ́ lɛ à mɔ̀ á pɛ́lɛ́ɛ. Ka mɛ́ ɓɔɔ̀ lɛ. Kɛɛ ka séĩ́ ka mɛ́ ɓɔɔ̀ wá.” 11Zízɛ̀ e mi lɛ́ e kɛ lópìà à lé góòa dɔ. Pɛ́ e kɛ lɛ́ a gèe kélɛ̀, ka séĩ́ ka mɛ́ ɓɔɔ̀ wáa, lɛ́ ɓɛ.

12Lɛ̀ lɛ́ Zízɛ̀ e nyɛ o gã̀ mɛ́ pɛ́lɛ̀ mɔ̀ɔ, e là sɔ-là-sɔ̀ɔ dà zeĩ́, e ló e yà e yàlà mɔ̀. E o wɛ̃́ĩ́-lɔ̀ɔ kɛ kélɛ̀, “Káà wɔ̃́ lɛ́ ma kɛ ka káa yí dɔ? 13Káà m si Tísɛ̀, ɛ̃́ɛ̃́ mia Dàa-mì. Lɛ wánà zɛ̀ lɛ́ kà kɛ̀ kília, ɓii m à ká. 14Yé má m ka Dàa-mì wà kà pɛ-zɔ̃̀ɔ̃̀-mì káa, maà ka gã̀ mɛ́ pɛ́lɛ́ɛ, lɛ ka bɛ̃̀ɛ̃ ka mɔ̀ kɛ ká ka kíe nì gã̀ mɛ́ pɛ́lɛ́. 15Maà wɔ̃́ gɔ̃̀á zɔ̃̀ɔ̃̀ ka lɛ̀ɛ, kɛɛ ká wɔ̃́ lɛ́ nɔ́ ma kɛ ka lɛ̀ɛ kɛ. 16Wánà-wɔ̃̀ kpó-kpó lɛ́ m̀ gèe ka lɛ̀ɛ ɓɛ. Lùò nɔ́ɔ fé wá kpànazɛ̀, é dieá e dàa-mì là. Vɔ-mì nɔ́ɔ fé wá kpànazɛ̀, é dieá mí a vɔɔ là. 17É kɛ̀á káà wɔ̃́ nì e kília yí maa, kɛɛ lúà kpɔ́ɔ̀ lɛ ka mɔ̀ yé kaà o kɛɛ ká.

18“Ma wá mɛ́ĩ́ e kéa ɓopìà ka séĩ́ ka gbĩ mɔ̀. Mia lɛ́ maà o sía, ḿm̀ o dɔ. Kɛɛ wɔ̃́ yé e ké lɛ́ è go Wálà là kíía yía, laa mɔ̀ é kɛ wánà zɛ̀. Ye lɛ́ e kélɛ̀, ‘Mi lɛ́ e m̀ léɓèlè ɓèlèa, e e gã̀-kɛlɛ̀ zóló zɔ̃̀ɔ̃̀ m lɛ̀ɛ.’ 19Ḿm̀ wɔ̃́ e kéa gèe ka lɛ̀ɛ kɛ bɛ̃̀ɛ̃ é tĩã́ kɛɛ̀. À kɛɛ̀ lɛ kíli, kɛɛ é kɛ̀áa, kɛ ká gɛ̃̀ wánà ká kélɛ̀ m mí e m káa ká. 20Wánà-wɔ̃̀ kpó-kpó lɛ́ m̀ gèe ka lɛ̀ɛ ɓɛ. Mi lɛ́ è e kɔ̀ yà mi nɔ́ɔ fé lɛ́ m̀ vɔɔ wìa, kɛɛ aà e kɔ̀ yà ma bɛ̃̀ɛ̃ m wì nɔ́ kíli. Ɛ́ɛ̃́ mí è e kɔ̀ yà m wìa, kɛɛ aà e kɔ̀ yà mí e m vɔɔ wì.”

Zízɛ̀ a gèe mi dò lɛ́ɛ̀ lo à lé góò

(Máfìù 26.20-25; Máà 14.17-21; Lúù 22.21-23)

21Lɛ̀ Zízɛ̀ e wɔ̃́ e kéa gèea, à zò e mɛ̀ à mɔ̀ yɔɔ, áà gèè kélɛ̀, “Wánà-wɔ̃̀ kpó-kpó lɛ́ m̀ gèe ka lɛ̀ɛ ɓɛ. Ka doó-mì lɛ́ɛ̀ lo m lé góò.”

22Là tòà-píé-mìàa o o kíe nì bà gɛ̃̀. Òó gbaa mi lɛ́ Zízɛ̀ e kɛ là wéé ɓopìàa dɔ. 23Tòà-píé-mìàa doó-mì yé à lɔ̀ kpɔ́ɔ̀ e kɛá Zízɛ̀ mɔ̀ɔ, e kɛ yàá Zízɛ̀ sɔ́nɔ́ kɔ̀ɛ́. 24Sáímɔ̀ Pílɛ̀ e mɛ́ĩ́ ɓo e kɔ̀ ká à lɛ̀ɛ, áà gèè, “Zízɛ̀ wɛ̃́ĩ́-lɔ̀ɔ kɛ kélɛ̀, dé è là mɛ́ĩ́ ɓo ɓɛ.”

25Lɛ̀ e kɛ kília, tòà-píé-mì e kília e tɛ̃́ Zízɛ̀ mɔ̀, áà gèè, “M dàa-mì, deĩ̀ lɛ?”

26Zízɛ̀ a là nìɛ̀ kélɛ̀, “Mi lɛ́ m̀ lo belè wàà ɓòo bà, tó ma nɔ à lɛ̀ɛ lɛ́ e à káa.” Lɛ̀ e kɛ kília, e belè kpuú sí, a wàà ɓòo bà, a nɔ Zúdà lɛ́ e kɛ Sáímɔ̀ Ɛ̀sɛ̀kélìà gbe káa lɛ̀ɛ. 27Yé Zúdà e belèa kṹ nɔ́ɔ, Sétɔ̃̀ e wàà à yí gbaa. Zízɛ̀ a gèe à lɛ̀ɛ, “Wɔ̃́ lɛ́ lɛ i mɔ̀ ɓá kɛɛ, ì i yɛ́lɛ́ kɛ i líé ɓá kɛ.” 28Mia lɛ́ o kɛ yàá téɓòa mɔ̀ɔ, o dò nɔ́ɔ fé òó gbaa wɔ̃́ lɛ́ Zízɛ̀ a mɔ́ɔ̀ wɔ̃́ e kéa gèe ɓo à lɛ̀ɛ yí ma. 29Lɛ̀ lɛ́ Zúdà e kɛ pɛlèea vũ-mì káa, tòà-píé-mìàa dò wa gɛ̃̀ ɓɔ̀ɔ kélɛ̀ Zízɛ̀ a gèe à lɛ̀ɛ é ló kpílìa kɛ-pɔ̀ɔ̀ lɔ́ɔ̀, ɛ̃́ɛ̃́ zeĩ́, Zízɛ̀ a gèe lèĩ à lɛ̀ɛ é pɛlèea dò nɔ mia lɛ́ pɛ wá o kɛ̀lɛ̀ɛ lɛ̀ɛ.

30Yé nɔ́ e kɛ kília, Zúdà e ɓɔ pɛlɛí lɛ̀ lɛ́ e belèa kṹa ká. E kɛ bĩ́míà ká.

Lɔ́ɔ̀ dɛɛ

31Lɛ̀ lɛ́ Zúdà e gó yia, Zízɛ̀ a gèe kélɛ̀, “Dɛɛ káa, lɛ́ɛ́ aà ɓo gbaa Mi Gbe là kɛ̀-kpànazɛ̀-kɔ̀ là. Ɛ́ɛ̃́ lɛ́ɛ́ ɓoò lɛ Wálà zì kɛ̀-kpànazɛ̀-kɔ̀ là à kolo là. 32Ɛ́ɛ̃́ yé lɛ́ɛ́ ɓoò lɛ Wálà zì kɛ̀-kpànazɛ̀-kɔ̀ là à kolo làa, kɛɛ Wálà lɛ́ɛ̀ lo à kɛɛ̀ kpànazɛ̀ e dìè yí zàá, ɛ̃́ɛ̃́ lɛ́ɛ̀ lo à kɛɛ̀ nɔ́ zá le. 33M̀ nɔ́ɔ̀ɓé, ma wá gbaa ka píé zèe gbèĩ. Káà lo m naà. Kɛɛ wɔ̃́ lɛ́ ma gèe Zúù-mìà lɛ̀ɛ, ḿm̀ lo à gèeè ka bɛ̃̀ɛ̃ ka lɛ̀ɛ dɛɛ ká. Ye lɛ́ e kélɛ̀, kàá bɛ̀i lóò lɛ̀ lɛ́ m̀ lo yía mɔ̀. 34M nupìà lɔ́ɔ̀ dɛɛ nɔɔ̀ ka lɛ̀ɛ. Ye lɛ́ e kélɛ̀, kà lɔ̀ kɛ ka kíe nì ká. Lɛ̀ zí maà à lɔ̀ kɛá ka káa, kà lɔ̀ kɛ ka kíe nì ká zi nɔ́ doóa ká. 35É kɛ̀á ka kíe nì lɔ̀ kpɔ́ɔ̀ lɛ ka mɔ̀ɔ, kɛɛ mia séĩ́ óò lo à yí dɔɔ̀ kélɛ̀ ka tò-m-píé-mìà ká.”

Zízɛ̀ a gèe Pílɛ̀ lɛ́ɛ̀ lo à gèeè làá dɔ

(Máfìù 26.31-35; Máà 14.27-31; Lúù 22.31-34)

36Sáímɔ̀ Pílɛ̀ a gèe à lɛ̀ɛ, “M Dàa-mì, mɛ́ɛ lɛ́ ì lo yí ɓɛ?”

Zízɛ̀ a là nìɛ̀ kélɛ̀, “Ìí bɛ̀i tóò m píé, kɛɛ kò ɓi kó ló lɛ̀ m̀ lo yía mɔ̀ dɛɛ ká. Kɛɛ íì lo tóò m píé, tó i ɓɔ yí líé zàá.”

37Pílɛ̀ a gèe à lɛ̀ɛ, “M Dàa-mì, mɛ́ e kɛ lɛ́ m̀ḿ tó yee ɓo i píé dɛɛ ká? Ḿm̀ lo m̀ kɛ̀ɓe nɔɔ̀ i mɔ́ɔ̀ wɔ̃̀ mɔ̀.”

38Zízɛ̀ a gèe à lɛ̀ɛ, “Íì lo ɓà kɛ̀ɓe nɔɔ̀ m mɔ́ɔ̀ wɔ̃̀ mɔ̀ kàáà? Wánà-wɔ̃̀ kpó-kpó lɛ́ m̀ gèe i lɛ̀ɛ ɓɛ. Kɛ tɔ̀ɔ̀ é tĩã́ wéèa, íì lo à gèeè kpolà yààka zɛ̀ kélɛ̀ ìí m dɔ.

Currently Selected:

Zɔ̃̀ɔ̃́ 13: MNT

Highlight

Copy