Lúù 18
18
Pĩ̀ã̀ lɛ́ à gbɛ̃̀ɛ̃̀ lɛ gã̀ã lee wà dɔ‐mì doó mɔ̀ɔ
1Lɛ̀ e kɛ kília, Zízɛ̀ e pĩ̀ã̀ e kéa vɔ o lɛ̀ɛ, kɛ é à zɔ̃̀ɔ̃̀ o lɛ̀ɛ kélɛ̀ lɛ o mɔ̀ ó sɛ̀nɛ ɓo teele, yékɛ̀ o fĩ́ĩ́ é nyɛ sɛ̀nɛ ɓoò mɔ̀. 2A gèe kélɛ̀, “E kɛ dɔ‐mì dò lɛ́ e kɛ pɛ́lɛ dò yía ká. Lɛ̀ɛ́ gbaa túó Wálà lɛ̀ɛ, ɛ̃́ɛ̃́ lɛ̀ɛ́ gbaa kpàa mi nɔ́ɔ fé dò ká. 3Ɛ́ɛ̃́ zeĩ́, e kɛ gã̀ã lee doó lɛ́ e kɛ pɛ́lɛ e kília yía ká. Léé e kília e kɛ nupìà dɔ‐mì e kília píé, áà gèè à lɛ̀ɛ, ‘Mi dò lɛ gèlè gɔ̃pìà m ká. Ì wɔ̃́ lɛ́ lɛ i mɔ̀ ɓá kɛ m lɛ̀ɛ à mɔ́ɔ̀ wɔ̃̀ yía kɛ.’ 4Dɔ‐mìa e wɔ̃́ɔ dà e kɔ̀ mɛ̀ĩ́ ɓɛ̀lɛ̀ píé gbèĩ zɛ̀. Lɛ̀ e kɛ kília, a gèe e dìè píé kélɛ̀, ‘Yé bɛ̃̀ɛ̃ m̀ḿ túó Wálà lɛ̀ɛ, ɛ̃́ɛ̃́ lɛ́ m̀ḿ kpàa mia káa, 5ḿm̀ lo wɔ̃́ lɛ́ lɛ m mɔ̀ ḿ kɛ gã̀ã leea lɛ̀ɛ, ḿm̀ lo à kɛɛ̀, ɓii lɛ m fɔ̃̀ã̀‐fɔ̃́ã́ kɛpìàa mɔ́ɔ̀ wɔ̃̀ mɔ̀. Yé m̀ḿ kɛ kília, lɛ́ɛ̀ lo tóò nɔ́ nupìà, é tóá kíli é m kɔ̀ ɓo.’ ”
6Lɛ̀ e kɛ kília, ko Dàa‐mì a gèe kélɛ̀, “Kà ka tóó dɔ wɔ̃́ lɛ́ dɔ‐mì lɛ́ à kɛ‐wɔ̃̀ wá kpeĩa à gèea mɔ̀. 7Yé mɔṹ lɛ́ kília, káà yí dɔ Wálà lɛ̀ɛ́ ló wɔ̃́ lɛ́ lɛ à mɔ̀ á kɛ là mia lɛ́ aà o sí, lɛ́ ò gbóó ɓo à píé bĩ́ã́ ɛ̃́ɛ̃́ nyɛ́nɛ́ĩ́a lɛ̀ɛ kɛɛ̀ o lɛ̀ɛ? Káà yí dɔ à yí lɛ́ɛ̀ lo kɛɛ̀ dɔ́lɔ́ dɔ́lɔ́ gbũ̀‐o‐mɔ̀ yí? 8Ḿm̀ gèe ka lɛ̀ɛ, wɔ̃́ lɛ́ lɛ à mɔ̀ á kɛ o lɛ̀ɛ, lɛ́ɛ̀ lo à kɛɛ̀, ɛ̃́ɛ̃́ lɛ̀ɛ́ ló túò à kɛpìà. Kɛɛ yé Mi Gbe aà nua, lɛ́ɛ̀ lo zò‐dɔ̀à‐mɔ̀ gɛ̃̀ɛ̃̀ tĩã́ mia yí kpóṹ là zèe?”
Pĩ̀ã̀ lɛ́ à gbɛ̃̀ɛ̃̀ lɛ Fálásíì mi wà ɓo‐pɛ̀ ɓo‐mì mɔ̀ɔ
9Zízɛ̀ e pĩ̀ã̀ yé e kéa bɛ̃̀ɛ̃ vɔ mia lɛ́ o zò dɔɔ̀ e kɛá o dìè mɔ̀, wáà o dìè sì mi kpeĩ, tó o nyìɛ áà fɔ̃̀ mia gbɛɛ yía lɛ̀ɛ. 10“Gɔ̃à pèèlɛ o ló sálà‐ɓò‐Wálà‐lɛ̀ɛ‐kà wì kɛ ó sɛ̀nɛ ɓo. Mi doó‐mì e kɛ Fálásíì mi ká. Mi doó‐mì bɛ̃̀ɛ̃ e kɛ ɓo‐pɛ̀ ɓo‐mì ká. 11Fálásíì mia e dɔ e gã̀ mɔ̀, áà sɛ̀nɛ ɓò e zò píé, áà gèè, ‘Wálà, ḿm̀ i zúo ɓo, lɛ́ ma wá kélɛ̀ míá o tóa lɛ́ ɓea. Ma wá mi lɛ́ pɛ séĩ́ zì lɔ̀‐kɛ̀à‐mɔ̀ lɛ à yí, ɛ̃́ɛ̃́ lɛ́ m̀ḿ yɛ̀ì‐yɛ́í kɛ, e bɛ̀i, lɛ́ m̀ḿ wàà m ɓɛ́ĩ̀ gbɛɛ na píé kɛ́ìa. Ḿm̀ i zúo ɓo lɛ́ ma wá bɛ̃̀ɛ̃ kélɛ̀ ɓo‐pɛ̀ ɓo‐mì e dĩ̀ĩa lɛ́ ɓea. 12Ḿm̀ lo m sṹũ yí e kíe yí pèèlɛ lɔ́ɔ́ doó yí. Ḿm̀ pɛ séĩ́ lɛ́ m̀ sɔ̀lɔ̀ ɓoa, vũ̀‐lé‐ɓɔ nɔ i lɛ̀ɛ.’ 13Kɛɛ ɓo‐pɛ̀ ɓo‐mìa e dɔ mia ká gbèĩ, tó lɛ̀ɛ́ gbaa bɛ̃̀ɛ̃ e wɛlɛ yà lɛ̀í. Kɛɛ e kɛ e zò là mɛ̀pìà, áà gèè, ‘Wálà, má m ké, lɛ́ m kɛ‐wɔ̃̀ yɔɔ kɛ‐mì káa, ì m yéĩ̀ kṹ.’ 14Ḿm̀ gèe ka lɛ̀ɛ, mi lɛ́ e kɛ Wálà lɛ̀ɛ kpeĩ lɛ̀ lɛ́ e ló e píé kɛ́ìa káa, lɛ́ e kɛ gɔ̃́ e kília káa. Lɛ̀ɛ́ gbaa kɛ mi bèĩzɛ̀ lɛ́ e sɛ̀nɛ ɓoa ká. Ƃii mia séĩ́ lɛ́ ò o dìè si lɛ̀ía, óò lo nuù o ká tã́ã̀. Ɛ́ɛ̃́ mia yé ò lo o dìè ká tã́ã̀a, óò lo o síì lɛ̀í.”
Zízɛ̀ e lúà kpɔ́ nɔ́ɔ̀ɓé mɔ̀
(Máfìù 19.13-15; Máà 10.13-16)
15Mia dò o nu wà nɔ́ɔ̀ɓé ká Zízɛ̀ píé, kɛ é pá o mɔ̀. Kɛɛ là tòà‐píé‐mìà o o gɛ̃̀, wáà gèè o lɛ̀ɛ yékɛ̀ ó kɛ kíli. 16Kɛɛ Zízɛ̀ e nɔ́ɔ̀ɓéa súo kɛ e píé, áà gèè, “Kà tó nɔ́ɔ̀ɓéa ó nu m píé. Yékɛ̀ ká o tèá nuù mɔ̀. Ƃii mia sùu o kéa, Wálà lɛ́ɛ̀ lo tóò o là. 17Wánà‐wɔ̃̀ lɛ́ m̀ gèe ka lɛ̀ɛ ɓɛ. Mi lɛ́ lɛ̀ɛ́ ló wéè à mɔ̀, lɛ̀ zí nɛ́fú è wèè à ká à mɔ̀, kɛ Wálà é tó à làa lɛ́ ɓea, Wálà lɛ̀ɛ́ ló tóò à là gbɛɛ ɓo.”
Gɔ̃ kpànazɛ̀
(Máfìù 19.16-30; Máà 10.17-31)
18Zúù‐mìà wũ‐là‐mì dò e Zízɛ̀ wɛ̃́ĩ́‐lɔ̀ɔ kɛ kélɛ̀, “Tísɛ̀ sɔ̃̀ɔ̃ yiè zɛ̀, mɛ́ lɛ m mɔ̀ ḿ kɛ, kɛ ḿ kɛ̀ɓe wɔ́lɔ́‐wɔ́lɔ́ sɔ̀lɔ̀ ɓo?”
19Zízɛ̀ a gèe à lɛ̀ɛ, “Mɛ́ e kɛ lɛ́ ì m si Tísɛ̀ sɔ̃̀ɔ̃ yiè zɛ̀ ɓe? Mi sɔ̃̀ɔ̃ yiè zɛ̀ gbɛɛ wá ɓe. Wálà doó lɛ́ nɔ́ à sɔ̃̀ɔ̃ lɛ sɛ̀ɛ. 20Íì Wálà là lɔ́ɔ̀ɔ dɔ. O lɛ́ o kélɛ̀, ‘Yékɛ̀ í wàà i ɓɛ́ĩ̀ gbɛɛ na píé kɛ́ì. Yékɛ̀ í mi zɛ. Yékɛ̀ í kã̀ã ɓo. Yékɛ̀ í nɛ̀ kpɔ́ i ɓɛ́ĩ̀ gbɛɛ mɔ̀. Ɛ́ɛ̃́ ì ɓɛ̀lɛyà nɔ i dàa wà i lèe o lɛ̀ɛ.’ ”
21Gɔ̃́ɛɛ a gèe Zízɛ̀ lɛ̀ɛ, “Wɔ̃́ lɛ́ Wálà a gèe kília, maà séĩ́ kṹ tã́ã̀ lɛ̀ lɛ́ m kɛ nɛ́fú káa ká, é tó à ká kíli, é ɓɔá pɛ́nɛɛ mɔ̀.”
22Lɛ̀ Zízɛ̀ e wɔ̃́ e kéa maa, a gèe à lɛ̀ɛ, “Pɛ doó lɛ́ i kɔ̃́ɔ̃̀ lɛ tĩã́ à kɛ‐wɔ̃̀ mɔ̀ɔ. Ì pɔɔ̀ séĩ́ lɛ́ o i kɛ̀lɛ̀ɛ lɔ̀ɔ̀ dɔ, í à pɛ̀lèe yí gìnì mia lɛ́ pɛ wá o kɛ̀lɛ̀ɛ mɔ̀. Yé ɓaà kɛ kília, pɛ kpɔ́lɔ̀ bɛ̀iì lɛ́ɛ̀ lo kɛɛ̀ à ká i lɛ̀ɛ Wálà‐pà. Ƃáà kɛ̀á kília, ì nu, kɔ́á tàà‐kíe‐píé kɛ.” 23Kɛɛ lɛ̀ lɛ́ gɔ̃́ɔ e wɔ̃́ e kília maa, à zò e dà zízàá nyɔ́ɔ̀ɔ, ɓii dɔ‐pɔ̀ɔ̀ e kɛ à kɛ̀lɛ̀ gbùòa mɔ́ɔ̀ wɔ̃̀ mɔ̀.
24Zízɛ̀ e zò‐dà‐zízàá lɛ́ e kɛ à mɔ̀ɔ yí dɔ, áà gèè, “Zi sùu kpɛɛ̀ lɛ́ lɛ à ká gágà kɛ mia kpànazɛ̀ ó kɛ Wálà zì tò‐mia‐là wì ké. 25Lɛ gágà kɛ mi kpànazɛ̀ é kɛ Wálà zì tò‐mia‐là wì, é dieá wìì lɛ́ ò si kĩ́ã́mòa, dìè mià‐léĩ́ bũ yí pìà là.”
26Lɛ̀ e kɛ kília, mia lɛ́ o wɔ̃́ e kília maa, wa gèe kélɛ̀, “Yé aà kɛ kília, deĩ̀ kpó‐kpó lɛ́ à laà è bɛ̀i kɛɛ̀ à ká?”
27Kɛɛ Zízɛ̀ a gèe kélɛ̀, “Wɔ̃́ lɛ́ bɛ̀i wá mi mɔ̀ á kɛɛ, bɛ̀i lɛ Wálà yee mɔ̀ à kɛɛ̀ mɔ́ɔ̀ wɔ̃̀ mɔ̀.”
28Pílɛ̀ a gèe kélɛ̀, “Lɛ̀ gɛ̃̀, kɔaà kã́ ko píé kɛ́ì wɔ̃̀ lɛ̀ɛ, kɔ́áà tò i píé.”
29Zízɛ̀ a gèe o lɛ̀ɛ kélɛ̀, “Wánà‐wɔ̃̀ lɛ́ m̀ gèe ka lɛ̀ɛ ɓɛ. Mi lɛ́ è lo kã́ã̀ e pà, ɛ̃́ɛ̃́ e na, e bɛ̀i e lèe‐gé nì, ɛ̃́ɛ̃́ à ye‐mìà, ɛ̃́ɛ̃́ zeĩ́ à zì nɔ́ɔ̀ nì mɔ́ɔ̀ wɔ̃̀ lɛ̀ɛ Wálà zì tò‐mia‐là mɔ́ɔ̀ wɔ̃̀ mɔ̀ɔ, 30lɛ́ɛ̀ lo pɛ sɔ̀lɔ̀ ɓoò gbùò lúó e kéa ká, ɛ̃́ɛ̃́ zeĩ́, lúó lɛ́ lɛ nupìàa, lɛ́ɛ̀ lo kɛ̀ɓe wɔ́lɔ́‐wɔ́lɔ́ sɔ̀lɔ̀ ɓoò à ká.”
Zízɛ̀ e e ga‐wɔ̃̀ gèe zeĩ́
(Máfìù 20.17-19; Máà 10.32-34)
31Zízɛ̀ e là tòà‐píé‐mìà vũ̀ doó wɛ́lɛ́ pèèlɛɛ súo kɛ lɛ̀ doó mɔ̀, áà gèè o lɛ̀ɛ, “Ɛ̀ɛ̀, kɔa lópìà gbaa Zúlúsàlɛ̀. Wɔ̃́ séĩ́ lɛ́ dɔ̀‐Wálà‐lé‐là‐mìà wa bɛ̃̀ɛ̃ é gbɛ̃̀á Mi Gbe mɔ̀ɔ, lɛ́ɛ̀ lo kɛɛ̀ à lɛ̀ mɔ̀. 32Óò lo à nɔɔ̀ sɛ́lɛ́ gbɛɛ yí‐mìà lɛ̀ɛ. Óò lo yéí síì à mɔ̀, tó wáà à kũ̀ mɛ́ gágà zɛ̀, ɛ̃́ɛ̃́ wáà o leí sùò à là. 33Óò lo à mɛ̀ɛ̀ gbàtò ká, tó o à zɛ. Yé waà kɛ kília, lɛ́ɛ̀ lo wɛ̀lɛ̀ ga kɛ̀lɛ̀ à lɛ̀‐kpɛ̀iì yààka lùò ká.”
34Zízɛ̀ là tòà‐píé‐mìàa òó gbaa wɔ̃́ nì e kéa gbɛɛ yí ma. Wéé e kília yí bĩ̀ĩĩ̀ e kɛá o mɔ̀, ɛ̃́ɛ̃́ òó gbaa wɔ̃́ lɛ́ Zízɛ̀ e kɛ à gèepìàa, yí ma.
Zízɛ̀ e pɛ‐pɛ̃́‐mì nyìɛ káàa zɛ̀ la
(Máfìù 20.29-34; Máà 10.46-52)
35Zízɛ̀ e kɛ ɓɔpìà Zɛ́lékò ká kɔ̀ɛ́. Gɔ̃ nyìɛ káàa zɛ̀ doó e kɛ yàá zi sɛ̃́ĩ́, áà pɛ pɛ̃̀. 36Lɛ̀ e mia kù wéè ma, wáà dìè zuúa, e wɛ̃́ĩ́‐lɔ̀ɔ kɛ kélɛ̀, “Mɛ́ e kɛ?”
37Wa gèe à lɛ̀ɛ, “Zízɛ̀ lɛ́ è go Názàlɛ̀ɛ lɛ diepìà.”
38E gbɛ́ɛ́ weeá kélɛ̀, “Zízɛ̀ lɛ́ i Dèɓé gbe ká ɓɛ, m yéĩ̀ kṹ.”
39Mia lɛ́ o kɛ líéa, o yà à wúú mɔ̀, wáà gèè à lɛ̀ɛ é e lɛ̀à ga. Kɛɛ e kɛ gbɛ́ɛ́pìà nɔ́ tĩã́ gágà weeá kélɛ̀, “Dèɓé gbe, ì m yéĩ̀ kṹ.”
40Zízɛ̀ e tèá, a gèe míáa lɛ̀ɛ ó nu gɔ̃́ɛɛ ká à píé. Lɛ̀ e ɓɔ kɔ̀ɛ́ɛ, Zízɛ̀ e à wɛ̃́ĩ́‐lɔ̀ɔ kɛ kélɛ̀, 41“Mɛ́ ɓà nàà ḿ kɛ i lɛ̀ɛ?”
A gèe Zízɛ̀ lɛ̀ɛ, “M dàa‐mì, m nyìɛ kɛ é lɛ̀ gɛ̃̀ m lɛ̀ɛ.”
42Zízɛ̀ a gèe à lɛ̀ɛ, “I nyìɛ è lɛ̀ gɛ̃̀. I zì zò‐dɔ̀à‐mɔ̀ aà i la.”
43Yé e kɛ nɔ́ kília, gɔ̃́ɛɛ nyìɛ e fóló gbaa. E tó Zízɛ̀ píé, áà Wálà tɔ́ ɓɔ̀. Lɛ̀ mia gbũ lɛ́ e kɛ yía o wɔ̃́ sùua gɛ̃̀ɛ, o séĩ́ o Wálà tɔ́ ɓɔ.
Currently Selected:
Lúù 18: MNT
Highlight
Share
Copy
Want to have your highlights saved across all your devices? Sign up or sign in
Mann New Testament © Bible Society in Liberia, 1978.
