KEJADIAN 16
16
Bi Hagar ma Nai Ismael
1Bi Sarai, Nai Abram in fenai, fe ka napeni fa anah amsa. Mes in anmu'i kun in ate mese na'ko pah Mesir, li'anfeto mese in kanan bi Hagar. 2Bi Sarai nak neu Nai Abram nak, “Uisneno kan fe kau fa sona he nati' au uhoni li'ana. Es nane te, so hom tup mubua mok au ate le i. Oin in of napeni li'ana neu kau.” Nai Abram ansimo bi Sarai in totis. 3Onle nane bi Sarai anfe nani bi Hagar neu Nai Abram anfani in fe kahu. Anbi tabu nane Nai Abram in nan ton bo'mese anbi Kanaan. 4Nai Abram antup nabua nok bi Hagar, oke te bife nane in naapu. Mes leka bi Hagar nahin neu in naapu, in nanaebon ma in nanebet bi Sarai.
5Oke te bi Sarai nak neu Nai Abram nak, “Au fe ulali au ate bi Hagar neu ko, ma leka in nahin neu in naapu, in nanebet kau. Ho sanat esle' nane. So nati' Uisneno es anfani alef lasi neu ko ma neu kau.”
6Nai Abram natae nak, “Naleok, in le nane ho ate le ho es muplenat in; anmo'e neu in sa' le hom lomi.” Oke te bi Sarai anhamu'i bi Hagar ma'tain le'uf, talantia in naen nasaitan in.
7Ahake Uisneno naeku nok bi Hagar anhaumak oe mata anbi mnela snaen, anbi lanan anao neu mnela snaen Sur. 8Ahake neno tunan nak, “Hagar, bi Sarai in ate, ho mu'ko me ma ho hem nao meu me ka?”
Bi Hagar natae nak, “Au aen u'ko bi Sarai au apafa.”
9Ahake neno tunan nane nak, “Amfani nai meu in ma amtuthae in.” 10Oke te ahake neno tunan nak anteni nak, “Au of umfaub ani ho anah ma ho upuf sin, talantia kan mu'i fa atoni mese le hen so'i nabe'i sin. 11Ka lo fa anteni of ho muhoni li'anmone; mukanab in Nai Ismael, natuin Uisneno in nen nalali ho han kaet.
12Mes ho anah nane of anmoni onle bikase luke mnanu afuit; in of anlaban ale atoni, ma ale atoni of anlaban in. Ma in of anbaitson na'ko in-ini sin.”
13Bi Hagar in natoti anbi in nekan nanan nak, “Namneo ka au it ulali Uisneno le anpanat kau?” Es nane te in antek Uisneno le namolok nalali neu in nak, “Uisneno Apanat ma Apaot.” 14Es nane te atoni antek nani oe nopu anbi Kades ma Bered sin atnanan nak, “Oe nopu In Le Amonit le Anpanat ma Anpao Kau.”
15Oke te bi Hagar nahonis li'anmone, ma Nai Abram in amaf, nakanab li'ana nane Nai Ismael. 16Anbi tabu nane Nai Abram in nan ton bo'fanu am ne.
Currently Selected:
KEJADIAN 16: AOZ
Highlight
Share
Copy
Want to have your highlights saved across all your devices? Sign up or sign in
