KEJADIAN 17
17
Helit ai hapit anfani on takaf han manta'en
1Leka Nai Abram in nan ton bo'sio am sio, Uisneno natonon neu in ma namolok neune nak, “Au le i Uisneno Akuasat Afin-finit. Mituin Kau nai ma minaoba Au lomik piut. 2Of Au mo'e ani fef bela oke ko ma Au of umfaub ho sufam nane.” 3Oke te Nai Abram in nabes, nalali te Uisneno namolok nak, 4-5“Le i fef bela le Au mo'e ani oke ko; Au manta'en nak ho of amfani amaf neu uf namfau. Es nane te ho kanam ka Nai Abram anteni fa, mes Nai Abraham. 6Au of umfauba ho anah ma ho upuf sin, ma na'ko sin atnanan of anmu'i le anfani kesel. Ho sufam nane of namfau nae le'uf, talantia sin anfani uf-uf.
7Au of utis ani Au han manta'en neu ko ma neu ho sufam, na'ko batan antia batan, ma fef bela nane of antia nabal-bal. Of Au fani ho Uisneno ma fani Uisneno neu ho sufam amsa.
8Au of a'fe ani neu ko ma neu ho sufam, pah le i, le tabu i ho mutua ambine amfani atoni anao am nemat. Pah Kanaan anfun natef of anfani ho anah ma ho upuf sin ini talantia nabal-bal ma Au of anfani sin Uisneno.”
9Uisneno namolok anteni neu Nai Abraham nak, “Ho amsa mes mu'ki neu han manta'en le i, leko ho sufam na'ko batan anao neu batan. 10Ho ma ho sufam le atoni of amhapi ai amheli sin. 11-12Naubon na'ko leku le i ho mes amhapi ai amheli li'anmone le in nan neno fanu, ma ale ate le nahonis anbi ho ume nanan ai le hom sos mani sin. Hapit ma helit nane of anfani fef bela na'ko Kau neu ki. 13Atoni mese-mese mes mahapi ma maheli, ma nane anfani takaf mamnita le anfani tonas nak Au fef bela nok ki of anhake tal nabal-bal. 14Atoni le ka mahapi ma ka maheli fa le nane kan fani fa on Au to natuin in kan panat fa Au fef bela nane.”
15Namuni onane te Uisneno nak neu Nai Abraham nak, “Kaisa hom tek amteni ho fenai mak Sarai; mes na'ko tabu le i in kanan Sara. 16Of Au fe ani tetus neune ma in of nahonis li'anmone mese le of Au fe ani neu ko. Namneo, Au of fe tetus neu bi Sara, ma in of anfani ainaf neu ale uf-uf. Ma anbi in sufan nane of anmu'i le anfani kesel.”
17Oke te Nai Abraham nabes, mes in anmani leka in natenab nak, “Anmo'e onme atoni mese le in nan ton natun mese in he napeni anah? Anmo'e onme bi Sara he nahoni anbi in nan ton bo'sio?” 18Oke te in nak neu Uisneno nak, “Leko nesi Nai Ismael es anfani asimot neu ale au maus.”
19Mes Uisneno namolok nak, “Kahaf, bi Sara ho fenai of nahoni li'anmone mese ma of ho mukanab in Nai Ishak. Au mes u'ki neu Au fef bela oke li'ana nane ma nok in sufan tal nabal-bal. Fef bela nane of anhaek nabalah. 20Mes Au of utisi ho totis antom Nai Ismael. Es nane te of Au fe tetus neu in ma of Au umfauba' in sufan. Ma in of anfani amaf neu nonot sin bo'es am nua, ma in sufan of anfani uf mese le anaek. 21Mes Au fef bela nane Au futun ani oke Nai Ishak, ho anah le bi Sara of nahonis in, ton amnemat oin of onle tabu le i.” 22Leka namolok nalali onane te, Uisneno nasaitan Nai Abraham.
23Anbi neno le nane amsa, Nai Abraham natuin Uisneno in plenat ma anheli in anah Nai Ismael, ma ale atoni anbi in ume nanan, nok ale in ate le nahonis sin anbi in ume nanan ma le ansos nani sin. 24Nai Abraham maheli leka in nan ton bo'sio am sio, 25ma in anah Nai Ismael in nan ton bo'es am tenu. 26Anheli sin anbi neno mese, 27nok ale Nai Abraham in ate sin.
Currently Selected:
KEJADIAN 17: AOZ
Highlight
Share
Copy
Want to have your highlights saved across all your devices? Sign up or sign in
